E Mata, ko Oti ne Agasala Koe ki te Agaga Tapu?
“E isi se agasala telā tena ikuga ko te mate.”—1 IOANE 5:16.
1, 2. E iloa pefea ne tatou me e mafai se tino o agasala ki te agaga tapu o te Atua?
“EFAKALAVELAVE mai faeloa oku mafaufauga me ko oti ne agasala au ki te agaga tapu.” Konā eiloa a pati ne tusi mai ne se fafine i Siamani, e tiga eiloa e tavini atu a ia ki te Atua. E mata, e mafai o agasala se Kelisiano ki te agaga tapu, io me ko te malosi galue o te Atua?
2 Ao, e mafai o agasala tatou ki te agaga tapu o Ieova. Ne fai mai a Iesu Keliso: “E fakamagalogina agasala a tino mo olotou mea ma‵sei e fai; ka ko tino e fai muna ki te agaga tapu, e se fakamagalogina.” (Mataio 12:31) E polopoloki mai ki a tatou me, “Kafai e fakamoemoe tonu eiloa tatou o fai te agasala ka ko oti ne talia ne tatou te munatonu, ko tena uiga, ko se toe iai se isi taulaga e mafai o fakamagalo ei o‵tou agasala.” (Epelu 10:26, 27) Kae ne tusi mai foki te apositolo ko Ioane: “E isi se agasala telā tena ikuga ko te mate.” (1 Ioane 5:16) Kae e mata, e tuku eiloa ki te tino telā ko oti ne fai ne ia se agasala matagā ke fakaiku aka ne ia me ko oti ne fai ne ia se “agasala telā tena ikuga ko te mate”?
E Maua te Fakamagaloga Māfai e Salamō
3. Se a te mea kāti ka maua māfai ko fanoa‵noa malosi tatou e uiga ki se agasala ne fai ne tatou?
3 E fai ne Ieova te fakamasinoga fakaoti o tino fai mea ‵se. Tela la, e tuku atu ne tatou takitokotasi ki a ia se tala e uiga ki a tatou, kae e fai faeloa ne ia a fakamasinoga ‵tonu. (Kenese 18:25; Loma 14:12) Ko Ieova fua e fakaiku aka ne ia me ko oti ne fai ne tatou se agasala telā e se mafai o fakamagalogina, kae e mafai o tapale ne ia keatea te agaga tapu mai i a tatou. (Salamo 51:11) Kae kafai e fanoa‵noa malosi tatou ona ko te agasala ne fai ne tatou, kāti ko maua eiloa ne tatou te salamō tonu. Se a te uiga o te salamō tonu?
4. (a) E fakamatala mai pefea ne koe te uiga o te salamō? (e) Kaia e lasi ei te fakamafanafanaga e maua i pati i te Salamo 103:10-14?
4 E fakauiga eiloa te salamō ki te fuliga o ‵tou kilokiloga e uiga ki ‵tou mea ‵se ko oti ne fai mo mea ‵se kolā ne fakamoe‵moe tatou o fai. E fakauiga i ei me ko fanoa‵noa tatou kae ‵fuli keatea mai i te auala o te agasala. Kafai ko oti ne fai ne tatou se agasala matagā kae ko oti foki ne fai ne tatou a mea kolā e fakaasi atu ei me ko salamō ‵tonu eiloa tatou, ka fakamafanafana mai eiloa ki a tatou a pati a te faisalamo: “E se fakasala ne [Ieova] tatou e ‵tusa mo ‵tou amio masei, e se taui mai foki ne ia ‵tou agasala mo ‵tou mea ‵se. E pelā mo te maluga o te lagi mai te lalolagi, e penā eiloa te lasi o tena alofa ki tino kolā e ma‵taku ki a ia. E pelā mo te ‵mao o te saegala mai te togala, e penā foki te faka‵mao ne ia o‵tou agasala mai i a tatou. E pelā mo te alofa o te tamana ki ana tama‵liki, e penā foki te alofa o te Aliki ki tino kolā e āva io me e ma‵taku ki a ia. E iloa ne ia a te mea ne faite ki ei tatou, e manatua foki ne ia i a tatou ne ‵pefu.”—Salamo 103:10-14.
5, 6. Fakamatala mai te manatu tāua i te 1 Ioane 3:19-22, kae fakamatala mai a uiga o pati a te apositolo.
5 E fakamafanafana mai foki a pati a te apositolo ko Ioane: “Tenei te mea e iloa i ei ne tatou i a tatou ko tino o te munatonu. Tenei foki te lagona ka maua ne tatou i mua o te Atua. Me kafai e faka‵se tatou ne o‵tou loto, e ‵tau o iloa ne tatou i te Atua e sili atu i o‵tou loto, kae e iloa foki ne ia a mea katoa. Tela la e oku taugasoa pele, kafai e se faka‵se tatou ne o‵tou loto, e maua ne tatou a te loto malosi i mua o te Atua. E maua ne tatou mai i a ia so se mea e fakatagi atu ei tatou, ona ko te mea e faka‵logo tatou ki ana fakatonuga, kae fai foki ne tatou a te mea e fiafia a ia ki ei.”—1 Ioane 3:19-22.
6 “E iloa ne tatou i a tatou ko tino o te munatonu” mai te fakaasi atu ne tatou te alofa fakataina kae e se fakamasani tatou ki te faiga o agasala. (Salamo 119:11) Kafai e se ‵lei ‵tou lagonaga ona ko nisi pogai, e ‵tau o masaua i a tatou me i “te Atua e sili atu i o ‵tou loto kae e iloa ne ia mea katoa.” E fakaasi mai ne Ieova tena alofa fakamagalo me e iloa ne ia ‘te alofa fakamaoni o [tatou] ki ‵tou taina kelisiano,’ te ‵tou taua atu ki te agasala, mo ‵tou taumafaiga ke fai tena loto. (1 Petelu 1:22) ‘Ka se faka‵se tatou ne te loto’ māfai e tali‵tonu tatou ki a Ieova, fakaasi atu te alofa fakataina, kae sē fai se agasala mo te iloa tonu. ‘E maua ne tatou te loto malosi o fai‵pati i mua o te Atua’ i ‵tou ‵talo, kae ka tali mai eiloa a ia ki ‵tou ‵talo me e faka‵logo tatou ki ana fakatonuga.
Ne Agasala Latou ki te Agaga
7. Ne a mea e fakaiku aka ei me e mafai o fakamagalogina te agasala io me ikai?
7 Ne a agasala kolā e se mafai o fakamagalogina? Ke tali te fesili tenei, ke mafau‵fau tatou ki nisi fakaakoakoga mai loto i te Tusi Tapu. Ka fakamafanafana mai eiloa a tala konei māfai e salamō tatou, kae koi fanoa‵noa malosi tatou i ‵tou mea ‵se matagā ne fai. Ka lavea atu ne tatou me e se tāua te vaegā agasala telā ko oti ne fai, kae ko te mea tāua ko ou lagonaga, te tulaga o tou loto, te tulaga o te fai mo te iloa tonu, e fakaiku aka ei me ko te agasala e mafai o fakamagalogina io me ikai.
8. Ne agasala pefea a nisi takitaki lotu Iutaia i te senitenali muamua ki te agaga tapu o te Atua?
8 A takitaki lotu Iutaia kolā ne ‵teke tonu atu ki a Iesu Keliso ne agasala eiloa ki te agaga tapu. Ne lavea ne latou a te agaga tapu o te Atua e galue i a Iesu i te faiga o vavega kolā e faka‵malu atu ei ki a Ieova. Kae ne fai atu a fili konei o Keliso me i tena ‵mana o fai vavega e o Satani te Tiapolo. E ‵tusa mo pati a Iesu, a tino kolā e faifai muna ki te agaga tapu o te Atua, ko fai ne latou se agasala telā e se mafai o fakamagalogina “ke oko eiloa ki te se gata mai.”—Mataio 12:22-32.
9. Se a te uiga o te muna masei ki te Atua, kae ne a pati a Iesu e uiga ki te mea tenā?
9 A te muna masei atu ki te Atua, e fakauiga loa ki te fakamasei, fakapakia, io me ko pati faka‵mae loto. Ona ko te agaga tapu e māfua mai i te Atua, a te muna masei ki te agaga tenei e ‵pau eiloa mo te muna masei ki a Ieova. A te faiga o vaegā pati penā e aunoa mo te salamō e se mafai o fakamagalogina. E fakaasi mai i pati a Iesu e uiga ki vaegā agasala penā, me e fakasino atu loa a Iesu ki tino kōla e ‵teke atu mo te iloa tonu ki galuega fai a te agaga tapu o te Atua. Ona ko te galue o te agaga o Ieova i a lesu ne fakaasi atu ne tino ‵teke me i o te Tiapolo te malosi tenā, ne agasala ei latou i te muna masei atu ki te agaga tapu. Tenā, fai atu ei a Iesu: “Ka ko te tino telā e muna masei ki te agaga tapu, e se mafai lele eiloa o fakamagalogina ke oko ki te se gata mai.”—Maleko 3:20-29.
10. Kaia ne fakaigoa ei ne Iesu a Iuta ki te “tama o te malaia”?
10 Ke mafaufau foki ki te tala o Iuta te Isikaliota. Ne seki fakamaoni a ia, mai te kaisoa ne ia o tupe mai te pokisi tupe telā ne tuku atu ke tausi ne ia. (Ioane 12:5, 6) Ne fanatu fakamuli foki a Iuta ki takitaki lotu Iutaia kae ne aofaga ke fakalata ne ia Iesu mō tupe siliva e 30. E tonu, ne seki ‵lei a lagonaga o Iuta i te otiga ne fakalata ne ia a Iesu, kae ne seki salamō a ia i te agasala telā ne fai ne ia mo te iloa tonu. Ona ko te mea tenā, e se ‵tau ei o fakatu mai a Iuta. Tela la, ne fakaigoa ei ne Iesu a ia ko te “tama o te malaia.”—Ioane 17:12; Mataio 26:14-16.
Ne Seki Agasala Latou ki te Agaga Tapu
11-13. Ne agasala pefea a te tupu ko Tavita e uiga ki a Patisepa, kae se a te fakamafanafanaga e maua ne tatou i te auala ne saga atu ei a Ieova ki a laua?
11 I nisi taimi, kāti koi logo‵mae eiloa a Kelisiano kolā ko oti ne fakaasi atu olotou agasala kae ko oti foki ne maua ne latou se fesoasoani faka-te-agaga mai toeaina i te fakapotopotoga, i olotou faifaiga solitulafono ki tulafono a te Atua. (Iakopo 5:14) Kafai koi ‵mafa eiloa ‵tou mafaufau i te feitu tenei, kāti ka aogā eiloa ki a tatou te mafau‵fau ki mea kolā e taku mai i te Tusi Tapu e uiga ki nisi tino kolā ne fakamagalogina olotou agasala.
12 Ne fai ne te Tupu ko Tavita se matugā agasala matagā e uiga ki te avaga a Ulia, ko Patisepa. I te taimi ne lavea ei ne ia mai luga i te tuafale, a te fafine tinogali tenei e koukou, ne fai ne Tavita ke avaka te fafine tenei ki tena palesi kae ne ‵moe fakatasi laua. Fakamuli ifo, i te iloaga ne ia i tou fafinie ko faitama, ne fai ne ia se aofaga ke moe a tou fafine mo tena avaga ko Ulia ko te mea ke ‵funa aka ei te mulilua tenā. I te taimi ne seki taunu ei te aofaga tenā, ne taumafai ei te tupu ke tamate a Ulia i te taua. Fakamuli loa, ne fai a Patisepa mo fai te avaga a Tavita, kae ne fanau mai ne ia se tamaliki telā ne mate.—2 Samuelu 11:1-27.
13 Ne saga atu a Ieova ki te fakalavelave telā ne aofia ei a Tavita mo Patisepa. Ne fakamagalo ne te Atua a Tavita, me ne fakatāua ne ia a tena salamō e pelā foki mo tena feagaiga ne fai mo ia e uiga ki te Malo. (2 Samuelu 7:11-16; 12:7-14) E manino ‵lei me ne salamō tonu eiloa a Patisepa, me ne maua ne ia te tauliaga ke fai a ia mo mātua o te tupu ko Solomona mo se tupuga foki o Iesu Keliso. (Mataio 1:1, 6, 16) Kafai ko oti ne agasala tatou, se mea ‵lei ke masaua me e lavea ne Ieova te ‵tou loto salamō.
14. Ne fakaasi mai pefea a te lasi o te loto fakamagalo o te Atua i te mea ne tupu ki te tupu ko Manase?
14 E fakaasi mai foki te loto fakamagalo o Ieova i te tala o te tupu o Iuta ko Manase. Ne fai ne ia a mea matagā i mua o Ieova. Ne faka‵tu aka ne Manase a fatafaitaulaga mo fai te tapuakiga ki a Paala, ne tapuaki atu ki ‘te kautau o fetu i te lagi,’ kae faite foki a fatafaitaulaga fapau‵pau i loto i titi e lua o te Faletapu. Ne ‵sunu ne ia ana tama tāgata e pelā me ne taulaga, ne fakamalosi aka ne ia a faifaiga fakataulaitu, kae fai ne ia a tino o Iuta mo Ielusalema ke fai ne latou te “agasala telā e silia atu i agasala kolā e fai ne malo kolā ne afuli keatea ne te Aliki mai i te fenua o Kanana.” Kae ne seki faka‵logo latou ki polopolokiga kolā ne avatu ki a latou ne pelofeta a te Atua. Fakamuli loa, ne puke fakapagota ne te tupu o Asulia a Manase. Kae koi nofo fakapagota a ia, ne salamō a Manase kae ne ‵talo atu faeloa a ia mo te loto maulalo ki te Atua telā ne fakamagalo ei a ia, kae toe tuku atu ki tena tulaga fakatupu i Ielusalema, kae ne ‵lago atu ei a ia ki te tapuakiga tonu.—2 Nofoaiga Tupu 33:2-17.
15. Ne a mea ne ‵tupu i te olaga o Petelu e fakaasi mai i ei me e fakamagalo ne Ieova a tino i se “auala lasi ‵ki”?
15 I te fia o senitenali mai tua ifo i ei, ne agasala a Petelu mo te fanoanoa lasi i te taimi ne fakafiti ei ne ia a Iesu. (Maleko 14:30, 66-72) E tiga te feitu tenā, ne fakamagalo ne Ieova a Petelu i se “auala lasi ‵ki.”(Isaia 55:7, NW) Kaia? Me ne salamō ‵tonu eiloa a Petelu. (Luka 22:62) Ne manino ‵lei te fakamaoniga o te fakamagaloga a te Atua i te 50 o aso mai tua ifo i ei i te taimi o te Penitekoso, me ne maua eiloa ne Petelu te tauliaga fakapito ke molimau atu e uiga ki a Iesu e aunoa mo te mataku. (Galuega 2:14-36) E mata, e isi se pogai ke tali‵tonu tatou me ka se fakamagalo ne te Atua a Kelisiano kolā e salamō ‵tonu i aso nei? Ne usu mai te faisalamo: “Kafai ne tusitusi ne koe omotou agasala, ko oi la te tino ka mafai o sao mai te fakasalaga? Ka ko matou e fakamagalo faeloa ne koe, tenā te mea e ‵tau ei mo matou o ma‵taku atu ki a koe.”—Salamo 130:3, 4.
Ke mo a ma tō Manava‵se ki te Agasala
16. Mai lalo i fakanofonofoga fea e tuku mai ei ne Ieova te fakamagaloga?
16 E ‵tau o fesoasoani mai a fakaakoakoga konei ke mo a ma tō manava‵se tatou ki te agasala ki te agaga tapu. E fakaasi mai i ei me e fakamagalo eiloa ne Ieova a tino agasala kolā e salamō tonu. A te ‵toe mea tāua ko te ‵talo ki te Atua mo te loto kātoa. Kafai ko oti ne agasala tatou, e mafai o fakamolemole atu tatou mō se fakamagaloga e alatu i te taulaga togiola a Iesu, te alofa fakamagalo o Ieova, te ‵tou tulaga se ‵lei katoatoa telā ne togi mai, mo galuega ne fai ne tatou mo te fakamaoni. Ona ko te ‵tou iloa e uiga ki te alofa tauanoa o Ieova, e ‵sala atu eiloa tatou ki tena fakamagaloga, mo te tali‵tonu me ka talia eiloa ne ia.—Efeso 1:7.
17. Se a te mea e ‵tau o fai māfai ko agasala tatou kae manako ki se fesoasoani i te feitu faka-te-agaga?
17 Kae e a māfai ko oti ne agasala tatou kae ko se mafai ne tatou o ‵talo me ko oti ne fai ne te ‵tou agasala ke loto vāi‵vāi tatou i te feitu faka-te-agaga? I te feitu tenei, ne tusi mai te soko ko Iakopo: “Kafai e isi se tino o koutou e masaki, e ‵tau mo ia o fai atu ki toeaina o te ekalesia ke ‵talo mō ia, kae ‵mili te sinu ki luga i a ia i te igoa o te Aliki. A te ‵talo tenei, se ‵talo e fai i te fakatuanaki, kae ka fakaola ne ia te tino masaki: ka toe fakafoki atu ne te Aliki te malosi ki a ia, ka ko ana agasala ne fai ka fakamagalogina.”—Iakopo 5:14, 15.
18. Kaia e fai atu ei me e se mafai o se fakamagalo a te agasala a se tino telā ne fakatea mai i te fakapotopotoga?
18 Kafai foki e se salamō se tino kae fakatea mai te fakapotopotoga, e se fakauiga i ei me ko se mafai o fakamagalo tena agasala. E uiga ki se tino fakaekegina i Kolinito telā ne fakatea, ne tusi mai a Paulo: “Ko lava te fakasalaga mo se tino e amio penā, i te mea ko oti ne fakasala ne te tokoukega o koutou penā. Kae e ‵tau mo koutou o fakamagalo atu a ia, kae fakamalosi atu tona loto, ke mo a mana to ‵mae i te mea ma loto vāivāi.” (2 Kolinito 2:6-8; 1 Kolinito 5:1-5) Ko te mea ke toe faka‵lei aka i te feitu faka-te-agaga, e ‵tau o talia ne tino agasala a fesoasoani mai toeaina Kelisiano kolā e fakavae ki te Tusi Tapu kae fakaasi atu a uiga o te salamō tonu. E ‵tau o fakaasi mai ne latou ne “fakailoga, ke iloa ei me ko salamō [latou].”—Luka 3:8.
19. Se a te mea ka fesoasoani mai ke “malosi te ‵tou fakatuanaki”?
19 Se a te mea e mafai o māfua mai i ei a te loto lagona me ko oti ne agasala tatou ki te agaga tapu? Kāti ko te mafaufau ‵mafa o tatou ki ei io me ko ma‵saki tatou faka-te-foitino io me faka-te-mafaufau. I vaegā tulaga penā, kāti ka aogā eiloa te faiga o se ‵talo kae ke malōlō malie. Kae maise ke mo a eiloa e talia ne tatou a Satani ke fakavāivāi mai, ko ala ei o se tavini atu tatou ki te Atua. Ona ko te mea e se fiafia a Ieova ke mate se tino masei, e mautinoa eiloa me e se fiafia lele a ia māfai ko galo sena tavini. Tela la, kafai e manava‵se tatou me ko oti ne agasala tatou ki te agaga tapu, e ‵tau o ‵kai faeloa tatou ki te Muna a te Atua, e aofia i ei ko vaega fakamafanafana loto mai te tusi ko Salamo. E manakogina ke ‵kau faeloa tatou ki fakatasiga a te fakapotopotoga e penā foki mo te galuega talai o te Malo. Mai te faiga o mea konā ka “malosi te ‵tou fakatuanaki” kae ka se manava‵se tatou e uiga ki te faiga o se agasala telā ka se fakamagalogina.—Tito 2:2, NW.
20. Ne a manatu e mafai o fesoasoani atu ke matea ne se tino me e seki agasala a ia ki te agaga tapu?
20 E mafai o fesili ifo latou kolā e manava‵se e uiga ki te agasala ki te agaga tapu, penei: ‘E mata, ko oti ne muna masei ne au te agaga tapu? E mata, ko salamo tonu au ki aku agasala? E mata, e fakatuanaki au e uiga ki te fakamagaloga a te Atua? E mata, e fai au pelā me se apositate telā ko oti ne ‵teke atu ki te mainaga o te agaga tapu?’ Kāti ka iloa aka ne nisi tino me seki muna ma‵sei latou ki te agaga tapu o te Atua, kae e seki fai foki latou mo fai ne apositate. E salamō latou, kae e tumau te lotou fakatuanaki ki te fakamagaloga a Ieova. Kafai e penā loa, a latou e seki agasala ki te agaga tapu o Ieova.
21. Ne a fesili ka sau‵tala tatou ki ei i te suā mataupu?
21 Mafaga la o fakamanuiaga ke iloa ne tatou me e seki agasala eiloa tatou ki te agaga tapu! Ka mafau‵fau tatou ki nisi fesili e uiga ki te agaga tapu i te suā mataupu. E pelā loa me se fakaakoakoga, ke fesili ifo tatou ki a tatou eiloa: ‘E mata, e takitaki au ne te agaga tapu o te Atua? E mata, e fakaasi atu ne au ana fuataga i toku olaga?’
Se a Tau Tali?
• Kaia e mafai ei o fai atu me e mafai o agasala tatou ki te agaga tapu?
• Se a te uiga o te salamō?
• Ko oi ne agasala ki te agaga tapu i te taimi ne nofo ei a Iesu i te lalolagi nei?
• E mafai pefea o manumalo i te manavase ki te faiga o se agasala telā e se toe fakamagalogina?
[Fakamatalaga o te Ata i te itulau e 7]
A latou kolā ne fai atu me ne fai ne Iesu a vavega e auala i te malosi o Satani ne agasala eiloa ki te agaga tapu o te Atua
[Fakamatalaga o te Ata i te itulau e 8]
E tiga eiloa ne fakafiti ne ia a Iesu, ne seki fai eiloa ne Petelu se agasala telā e se mafai o toe fakamagalo