‘A te Aso Fakamataku o Ieova ko Pili Mai’

“A te aso fakamataku o [Ieova] ko pili – ko pili mai eiloa, kae e vave o oko mai!”​—SEFANAIA 1:​14.

1, 2. (a) Se a te aso fakapito telā e ‵nofo fakatali‵tali ki ei a Kelisiano? (e) Ne a fesili e ‵tau o fesili ne tatou, kae kaia?

E NOFO fakatalitali mo te fiafia se tamafine ki te oko mai o te aso ka fakaipoipo ei a ia. E olioli faeloa mo te alofa se fafine faitama ki te taimi ka fanau mai ei tena pepe fou. E manako malosi se tino galue malosi kae ko fi‵ta ki te taimi ka kamata ei tena malōlōga. Se a te mea e ‵pau i ei a tino konei? E fakatali‵tali katoa latou ki se aso fakapito​​—se aso telā ka pokotia malosi i ei olotou olaga. E ‵loto ‵ki olotou lagonaga kae ‵kese ‵ki foki. Ka oko mai eiloa te aso telā e ‵nofo fakatali‵tali latou ki ei, kae kafai ko oko mai, e ma‵nako latou ke toka ‵lei latou mō te aso tenā.

² E ‵nofo fakatali‵tali foki a Kelisiano ‵tonu i aso nei ki te oko mai o se aso fakapito penā. A te aso tenā ko te “aso o [Ieova].” (Isaia 13:9; Ioelu 2:1; 2 Petelu 3:​12) Se a te ‘aso o Ieova’ telā ka oko mai, kae ka pokotia pefea a tino katoa i tena oko mai? E se gata i ei, e fakamautinoa aka pefea ne tatou me e toka tatou ki te oko mai o te aso tenā? E tāua ‵ki eiloa ke na ‵sala atu tatou ki tali o fesili konei me ko oti ne fakamaoni aka a te ‵tonu o pati konei i te Tusi Tapu: “A te aso fakamataku o [Ieova] ko pili – ko pili mai eiloa, kae e vave o oko mai!”​​—Sefanaia 1:​14.

‘Te Aso Fakamataku o Ieova’

3. Se a ‘te aso fakamataku o Ieova’?

³ Se a ‘te aso fakamataku o Ieova’? I loto i te Tusi Tapu kātoa, e fakasino atu a te tugāpati ko ‘te aso o Ieova’ ki taimi fakapito kolā e fakaoko atu ei ne Ieova tena fakasalaga ki ana fili kae fakamaluga aka i ei tena igoa sili. Ne oko atu ki tino sē fakamaoni katoa o Iuta mo Ielusalema e pelā foki mo tino amio fakasauā o Papelonia mo Aikupito, a te ‘aso o Ieova,’ i taimi ne fakaoko atu ei ne Ieova tena fakasalaga ki a latou. (Isaia 2:​1, 10-​12; 13:​1-6; Ielemia 46:​7-​10) Kae koi takato eiloa i ‵tou mua nei a te ‵toe ‘aso fakamataku o Ieova.’ Ko te “aso” eiloa tenā ka fakaoko atu ei ne Ieova tena fakasalaga ki tino kolā ne fakamasei ne latou tena igoa. Ka kamata eiloa te aso tenā ki te fakaseaiga o “Papelonia Takutakua,” ko te emupaea o lotu ‵se i te lalolagi kātoa, kae fakaoti eiloa ki te fakaseaiga katoatoa o te olaga masei tenei i te taua o Amaketo.​​—Fakaasiga 16:​14, 16; 17:​5, 15-​17; 19:​11-​21.

4. Kaia e ‵tau ei o ma‵taku a te tokoukega o tino ki te aso o Ieova telā ko pili fua o oko mai?

⁴ Faitalia me iloa ne latou io me ikai, e ‵tau mo te tokoukega o tino katoa o ma‵taku ki te aso tenei telā ko pili mai eiloa. Kaia? E auala i te pelofeta ko Sefanaia, e tali mai a Ieova, penei: “Ka fai te aso tenā mo se aso o te kaitaua fakamataku, se aso o te puapuagā kae logo‵mae, se aso o te fakamaofaga mo te fakamaseiga, se aso o te pouliga kae pouli tagataga, se aso pouli kae kaumanā.” Se aso fakamataku eiloa! E se gata i ei, ne fai mai te pelofeta: “Ka aumai ne au a puapuagā penā ki tino, . . . ko oti a latou ne agasala i oku mua.”​​—Sefanaia 1:​15, 17.

5. Se a te kilokiloga ‵lei e maua ne te fia miliona o tino e uiga ki te aso o Ieova, kae kaia?

⁵ Kae e ‵nofo fakatali‵tali a te fia miliona o nisi tino ki te oko mai o te aso o Ieova. Kaia? E iloa ne latou me fai a te aso tenā e pelā me se aso o te faka‵saoga mo te fakaolataga mō tino amio‵tonu, se aso telā e fakamaluga aka ke maluga ‵ki a Ieova kae ka faka‵malu foki i ei a tena igoa tapu. (Ioelu 3:​16, 17; Sefanaia 3:​12-​17) Faitalia me e fai te aso tenā e pelā me se aso fakamataku io me se aso e ‵nofo fakatali‵tali ki ei, e fakalagolago eiloa te mea tenā ki mea e fai nei ne tino i olotou olaga. Se a tau kilokiloga ki te oko mai o te aso tenā? E mata, ko toka koe ki ei? E mata, e pokotia a tou olaga i aso takitasi ona ko te pili mai o te aso o Ieova?

E Isi ne Tino “ka Fakatauemu Atu ki a Koutou”

6. Se a te kilokiloga a te tokoukega o tino ki te ‘aso o Ieova,’ kae kaia e se ‵poi ei a Kelisiano ‵tonu i te mea tenei?

⁶ Faitalia te fakamataku o te tulaga tenei, e se fia ‵saga atu a te tokoukega o tino i te lalolagi ki te pili mai o te ‘aso o Ieova.’ E fakaitaita kae fakatauemu atu latou ki tino kolā e fakailoa atu ne latou a te oko fakavave mai o te aso tenā. E se ‵poi a Kelisiano ‵tonu i te mea tenei. E masaua ne latou te fakailoaga a te apositolo ko Petelu: “A te mea muamua e ‵tau o fai, e ‵tau o malamalama koutou me e isi ne tino ka ‵sae mai i aso fakaoti, ka ko latou konei e pulea olotou olaga ne olotou manakoga ma‵sei. Ka fakatauemu atu ki a koutou penei: ‘Ne folafola mai ne ia me i a ia e vau. E tonu? Tefea nei a ia? A o‵tou tupuga ko leva ne ‵mate, kae e seai eiloa se ‵fuliga o mea katoa talu te kamataga o te lalolagi!’ ”​​—2 Petelu 3:​3, 4.

7. Se a te mea ka fesoasoani mai ke tumau tatou i te matapula‵pula?

⁷ Se a te mea ka fesoasoani mai ke mo a ma pokotia tatou i vaegā mafaufauga sē aogā konā kae ke tumau i te matapula‵pula? E fai mai a Petelu ki a tatou: “Ne taumafai au o ‵fagu koutou ki ne mafaufauga ‵fou, i te fakamanatu atu ne au a mea konei. Au e manako ke masaua ne koutou a muna ne faipatigina ne pelofeta ‵malu i aso ko ‵teka, mo te fakatonuga mai te Aliki Fakaola telā ne tuku atu ki a koutou ne apositolo.” (2 Petelu 3:​1, 2) A te ‵tou ‵saga tonu atu ki fakailoaga a pelofeta ka fesoasoani mai ke ‘‵fagu aka ei a ‵tou mafaufauga.’ Kāti ko oti ne lagona sāle ne ​—tatou a fakamasauaga konei, kae se mea tāua ‵ki ko te mea ke na ‵saga tonu atu nei tatou i aso nei, ki fakailoaga konei.​​—Isaia 34:​1-4; Luka 21:​34-​36.

8. Kaia e se fia ‵saga atu ei a tino e tokouke ki fakamasauaga mai te Tusi Tapu?

⁸ Kaia e se fia ‵saga atu ei a nisi tino ki fakamasauaga konei? Ne toe faka‵soko mai a Petelu: “[E ‵tusa mo olotou manakoga, “NW”] e fakapuli ne latou a te mea nei: ne faipati a te Atua i aso ko ‵teka, ko te mea eiloa ko iai te lagi mo te lalolagi. A te lalolagi ne tupu ake i te vai kae ne siomia ne te vai, ka ko te vai foki tenā ko te lolo ne fakamasei ne ia a fenua o te lalolagi mua.” (2 Petelu 3:​5, 6) E tonu, e isi ne tino e se ma‵nako ke oko mai a te aso o Ieova. E se ma‵nako ke fakamakosu olotou olaga masani. E se ma‵nako ke fakamasino latou ne Ieova e uiga ki olotou olaga kaima‵nako! E pelā mo pati a Petelu, e ola latou “e ‵tusa mo olotou manakoga.”

9. Se a te uiga ne fakaasi atu ne tino i aso o Noa mo aso o Lota?

⁹ Ona ko “olotou manakoga,” e ma‵nako a tino fakatauemu konei ke sē ‵saga atu latou ki te osoatuga a Ieova ki faifaiga a tino i aso ko ‵teka. Ne fakasino atu a Iesu Keliso mo te apositolo ko Petelu ki mea e lua konā​​—ko “aso o Noa” mo “aso o Lota.” (Luka 17:​26-​30; 2 Petelu 2:​5-9) Ne seki fia ‵saga a tino mai mua o te Lolo ki te fakailoaga telā ne fakailoa atu ne Noa ki a latou. E penā foki mai mua o fakamasei a Sotoma mo Komolo, ne ‵kilo atu a avaga a tama a Lota ki a ia e pelā me “e fai fa‵kata” fua.​​—Kenese 19:14.

10. Ne a faifaiga a Ieova ki tino kolā e se fia ‵saga atu ki ana fakailoaga?

¹⁰ E seai eiloa se ‵kese mo ‵tou aso nei. Kae ke mafaufau la ki faifaiga a Ieova ki tino kolā ne seki fia ‵saga atu ki ei: “Ka fakasala ne au a tino kolā e fakalago‵lago eiloa ki te lotou ma‵losi kae tali‵tonu eiloa i a latou kae e fai ake penei, ‘E se mafai ne te Aliki o fai se mea ‵lei io me se mea masei.’ Olotou koloa ka ‵fao mālō, mo fale foki o latou ka fakamaseigina. Ka se ‵nofo lele eiloa a latou i fale e faite nei ne latou io me e inu i uaina mai togavine kolā e ‵toki nei ne latou.” (Sefanaia 1:​12, 13) Kāti e ma‵nako a tino ke tumau latou i olotou olaga “masani,” kae ka se maua eiloa ne latou ne mea aogā tumau mai i olotou galuega ‵mafa konā. Kaia? Me i te aso o Ieova e oko fakapoi mai, kae ka se mafai o faka‵sao latou ne olotou koloa kolā ne fakatupu aka ne latou.​​—Sefanaia 1:​18.

“Faka‵tali Eiloa ki ei”

11. Se a te fakamalosiga e ‵tau o masaua faeloa ne tatou?

¹¹ E ‵kese mo te lalolagi masei i ‵tou tafa, e ‵tau o masaua ne tatou a pati fakamalosi ne tusi ne te pelofeta ko Sapakuka: “Tusi ki lalo, me e seki oko mai te taimi e fakataunu ei. A te taimi ka vave oko mai; a mea ne fakaasi atu ne au e taunu eiloa. E tuai o oko mai, kae faka‵tali eiloa ki ei. E oko mai eiloa, kae ka se tuai foki.” (Sapakuka 2:​3) E ui eiloa kāti ka foliga mai me ka tuai te oko mai o te aso tenā mai ‵tou kilokiloga sē ‵lei katoatoa, e ‵tau o masaua ne tatou me i a Ieova e se tuai i ana mea e fai. Ka oko mai eiloa a tena aso i te taimi tonu, i te itula telā e seki fakamoe‵moe ki ei a tino.​​—Maleko 13:33; 2 Petelu 3:​9, 10.

12. Se a te fakailoaga ne fai atu ne Iesu, kae e ‵kese pefea a te mea tenei mo faifaiga a soko fakamaoni o Iesu?

¹² Ke faka‵mafa atu te tāua o te nofo fakatalitali ki te aso o Ieova, ne fai atu a Iesu me e isi ne ana soko ka se tumau i te matapula‵pula. Ne ‵valo mai a ia e uiga ki a latou: “Kae kafai a ia se tavini se fakamaoni, e fai ake ana pati penei, ‘E se taitai nei o oko mai a toku pule.’ Telā, kamata ei a ia o ‵kini a nisi tavini, kae ‵kai kae inu fakatasi mo tino kolā e inu eiloa ke ko‵nā. A te pule o te tavini tenā, e vau eiloa i te aso ne seki fakamoemoe a ia ki ei, mo te itula foki telā se iloa ne ia; e ‵kati likiliki a ia ne tona pule.” (Mataio 24:​48-​51) E ‵kese mo latou, e tumau eiloa te potukau ko te tavini fakamaoni kae poto i te matapulapula. E matapulapula faeloa te tavini tenā kae toka faeloa. Ko oti ne tuku atu ne Iesu ki ei ke pule i “ana mea katoa” i te lalolagi.​​—Mataio 24:​42-​47.

Te Tāua o te Matapulapula

13. Ne faka‵mafa mai pefea ne Iesu a te manakoga ke matapulapula?

¹³ Se mea tāua ‵ki mō Kelisiano i te senitenali muamua ke tumau i te matapula‵pula. Ne ‵tau o gasuesue fakavave latou o ‵tele keatea mo Ielusalema i te taimi ko “nikoi ne kautau” a te fa‵kai tenā. (Luka 21:​20, 21) Ne tupu te mea tenā i te tausaga ko te 66 T.A. Ke mafaufau ki te faka‵mafaatuga ne Iesu ki Kelisiano a te manakoga ke matapula‵pula i aso konā: “Ko te tino telā e i luga i te tuafale, ke se fanaifo o ave se mea mai i tena fale. Ko te tino telā e i te vao, ke se foki o aumai sona gatu.” (Mataio 24:​17, 18) E ‵tusa mo tala fakasolopito, e seai se fakalavelave ne tupu ki Ielusalema i tausaga e fa mai tua ifo i ei, kae kaia la ne ‵tau ei o ‵saga fakavave atu a Kelisiano ki pati a Iesu i te 66 T.A.?

14, 15. Kaia ne tāua ‵ki ei ki Kelisiano i te senitenali muamua ke gasuesue e aunoa mo te fakatalave i te taimi ne nikoi ei a Ielusalema ne kautau?

¹⁴ E tonu la, me ne seki fakamasei eiloa a Ielusalema ke oko atu ki te 70 T.A., kae ne ‵fonu te fa tausaga tenā i fakalavelave. Ne seki ai eiloa se filemu i ei! Ne ‵fonu a tausaga konā i amioga fakasauā mo te tatino. E fakamatala mai ne se tagata tusitala e tokotasi a te tulaga o Ielusalema i taimi konā e pelā me se “taua foliki fakamataku telā ne tamate i ei a tino e tokouke fakatasi mo faifaiga fakasauā matagā.” Ne fakaga‵lue a tamataene o fakamalosi aka a ‵pui o te fa‵kai, ke fakaaogā a meatau kae ke ‵kau atu ki te kautau. Ne fai ne latou a fakamasaniga i mea tau taua i aso takitasi. A tino kolā e se ‵lago atu ki mea tāua konei e ‵kilo atu ki ei e pelā me ne sipai. Moifai ne tai ‵nofo leva a Kelisiano i loto i te fa‵kai, penei ko ‵nofo atu eiloa latou i se tulaga fakamataku.​​—Mataio 26:52; Maleko 12:17.

¹⁵ E ‵tau o masaua ne tatou me ne fai atu a Iesu me “ko latou kolā e ‵nofo i Iutaia,” kae e se ko Ielusalema fua, e ‵tau o ‵tele keatea. E tāua ‵ki te mea tenei me mai tua o nāi masina ne tiakina ei ne latou a Ielusalema, ne toe kamata ei ne te kautau a Loma olotou taua. Muamua la, ne fakatakavale ne latou a Kalilaia i te 67 T.A., kae ‵soko atu ki ei ko Iutaia kātoa i te tausaga mai tua ifo. Ne iku atu te mea tenei ki te fanoanoa lasi i te fenua kātoa. Ne faigatā foki o fano se tino Iutaia keatea mo Ielusalema ke sao ei a ia. Ne leoleo faka‵lei eiloa a mataloa o te fa‵kai, kae ko so se tino e taumafai o tele keatea e fai pelā me ko kau atu ki te kau Loma.

16. Ne a kilokiloga ne ‵tau o maua ne Kelisiano i te senitenali muamua ko te mea ke ‵sao latou i fakalavelave i te taimi tenā?

¹⁶ Mai mea katoa konei, ko mafai ei o malamalama tatou i te pogai ne faka‵mafa atu ei ne Iesu te fakamataku o te mea tenei. E ‵tau o talia ne Kelisiano a mea faiga‵ta, kae ke mo a ma faka‵se latou ne kope faka-te-foitino. E ‵tau foki o loto fia‵fia latou o “tiakina [olotou] mea katoa” ko te mea ke faka‵logo latou ki te fakatonuga a Iesu. (Luka 14:33) A tino kolā ne faka‵logo fakavave ki ei kae ‵tele atu ki te suā feitu o te Iolitana ne ‵sao.

Ke Fakatumau te ‵Tou Matapula‵pula

17. Kaia e ‵tau ei o fakatumau ne tatou te ‵tou matapula‵pula?

¹⁷ E fakaasi manino mai i valoaga i te Tusi Tapu me ko ‵nofo atu nei tatou i taimi o te gataga. E ‵kese mo aso mua, e ‵tau o matapula‵pula malosi nei tatou. I te taimi o te filemu, e se lagona ne se sotia a te manavase mo te fakamataku e pelā mo te taimi e fai ei a taua. Kae, kafai e se matapulapula malosi a ia kae kalagagina fakavave ki se taua, e mafai o se toka a ia kae e mafai o iku atu te mea tenā ki tena mate. E penā foki eiloa i te feitu faka-te-agaga. Kafai e talia ne tatou ke se tumau i te matapula‵pula, e mafai o se toka tatou o ‵teke atu ki mea kolā e fe‵paki mo tatou kae ‵poi tatou me ko oko mai te aso o Ieova. (Luka 21:36; 1 Tesalonia 5:4) Kafai ko oti ne ‘fulitua se tino mai te tautali atu ki a Ieova,’ tenei eiloa te taimi ke toe ‵sala atu ki a ia.​​—Sefanaia 1:​3-6; 2 Tesalonia 1:​8, 9.

18, 19. Ne a mea ka fesoasoani mai ke olioli faeloa tatou ki te oko mai o te ‘Aso o Ieova’?

¹⁸ E se tioa eiloa o fakamalosi mai te apositolo ko Petelu ke olioli eiloa tatou ki te oko mai o “te Aso o [Ieova] te Atua”! E mafai pefea o fai ne tatou te mea tenei? A te auala e tasi ko te ola i se olaga telā e ‘faka‵malu kae fakatapu mō te Atua.’ (2 Petelu 3:​11, 12) A te fakalavelave faeloa i te faiga o mea konā ka fesoasoani mai ei ke ‵nofo fakatali‵tali faeloa tatou mo te fiafia lasi ki te oko mai o ‘te Aso o Ieova.’ A te pati Eleni telā ne ‵fuli ki te “olioli eiloa” e fakauiga tonu eiloa ki te “fakava‵vave.” E se mafai ne tatou o fakava‵vave aka te taimi koi ‵toe ke oko ki te oko mai o te aso o Ieova. Kae, i te taimi e faka‵tali ei tatou ki te aso tenā, ka foliga mai me ka oko vave mai te taimi tenā māfai e fakalave‵lave faeloa tatou i te galuega a te Atua.​​—1 Kolinito 15:58.

¹⁹ A te mafaufau ‵loto ki te Muna a te Atua mo fakamasauaga kolā e maua mai i ei, ka fai ei ke mafai o fai ne tatou a te mea tenei​​—“te nofo fakamoemoe ki (olioli kae fakava‵vave) te oko mai” o te aso tenā, e tonu, ko te “nofo fakatalitali faeloa” ki ei. (2 Petelu 3:​12, The Amplified Bible; The New Testament, by William Barclay) E aofia i fakamasauaga konei ko nisi valoaga e uke kolā e ‵valo mai i ei a te oko mai o te aso o Ieova, kae penā foki mo te fia o fakamanuiaga ka maua ne tino kolā e ‵nofo ‘fakatali‵tali ki te aso o Ieova.’​​—Sefanaia 3:8.

20. Se a te fakamalosiga e ‵tau o faka‵logo tatou ki ei?

²⁰ Tenei eiloa te taimi mō tatou ke faka‵logo ki fakamalosiga kolā ne tuku mai e auala i te pelofeta ko Sefanaia: “Koi tuai foki o oko mai a te kaitaua malosi o te Aliki, koi tuai o oko mai te aso ka fakaasi mai ei tena kaitaua fakamataku. ‵Fuli mai ki te Aliki, koutou katoa tino loto malalo o te fenua, kolā e faka‵logo ki ana fakatonuga. Ke fai ne koutou a te mea tonu, kae olo atu koutou mo te loto malalo ki mua o te Aliki. E se taumate ka ‵sao mai koutou mai te fakasalaga i te aso e fakaasi ei ne te Aliki [ko Ieova] tena ita.”​​—Sefanaia 2:​2, 3.

21. Se a te mea ka fai eiloa ne tino o te Atua i te 2007?

²¹ Ko tafaga la te fetaui ‵lei o te tusi siki fakavae telā ne filifili aka mo te tausaga e 2007: ‘A te aso fakamataku o Ieova ko pili mai.’ E tali‵tonu a tino o te Atua me “ko pili mai eiloa, kae e vave o oko mai!” (Sefanaia 1:​14) “E oko mai eiloa, kae ka se tuai foki.” (Sapakuka 2:3) Tela la, i te taimi e fakatali‵tali ei tatou ki te aso tenā, ke na matapula‵pula eiloa tatou e uiga ki te vaitaimi ko ola ei tatou, i te iloa atu me ko pili mai eiloa te fakataunuga fakaoti o valoaga konei!

E Mafai o Tali Mai ne Koe?

• Se a ‘te aso fakamataku o Ieova’?

• Kaia e se fia ‵saga atu ei a tino e tokouke ki te tāua o taimi konei?

• Kaia ne ‵tau ei o gasue‵sue fakavave mo te matapula‵pula a Kelisiano i te senitenali muamua?

• E fakamalosi aka pefea ne tatou a te ‵tou matapula‵pula?

[Ata i te itulau e 11]

Te tusi siki fakavae o te tausaga mō te 2007 ko te: ‘A te aso fakamataku o Ieova ko pili mai.’ ​​—Sefanaia 1:​14.