Ko Pili Mai te Aso o te Fakamasinoga a Ieova!
“A te aso fakamataku o te Aliki [ko Ieova] ko pili—ko pili mai eiloa, kae e vave o oko mai!”—SEFANAIA 1:14.
KO PILI nei o gasuesue a Ieova o fakaseai atu a tino ma‵sei. Faka‵logo! Tenei eiloa tena faka‵pulaga: “Ka fakamalaia ne au a tino amio masei. Ka fakamalaia foki ne au a tino katoa, kae ka seai eiloa se tino e toe.” (Sefanaia 1:3) Konā a pati a te Aliki Sili ko Ieova ne fai mai e auala i tena pelofeta ko Sefanaia, kāti ko te tama a te mokopū o te Tupu fakamaoni ko Hesekia. A te faka‵pulaga tenā, ne fai i aso o te Tupu ‵lei ko Iosia, ne seki ‵valo mai i ei se ikuga ‵lei mō tino ma‵sei kolā e ‵nofo i te fenua o Iuta.
2 E seai se fakalotolotolua me ne fakamalosi aka ne te valoaga a Sefanaia a te mafaufau o te talavou ko Iosia, ke iloa ne ia a te manakoga ke ave keatea mai i Iuta a tapuakiga lai‵lai. Kae ko mea ne fai ne te tupu i te ave keateaga mai i te fenua a lotu ‵se ne seki ave katoatoa i ei a amioga ma‵sei mai i tino io me ko te fakamagaloga o agasala a tena tupuna, ko te Tupu ko Manase, telā ne ‘tamate ne ia a tino e seai ne mea ‵se.’ (2 Tupu 24:3, 4; 2 Nofoaiga Tupu 34:3) Tela la, e oko mai eiloa a te aso o te fakamasinoga a Ieova.
3 Kae ka isi ne tino kolā ka ‵sao atu i te aso fakamataku tenā. Tela la, ne fakamalosi mai penei a te pelofeta a te Atua: “Koi tuai koutou o mage‵mage kae mate e pela me se pulalakau, koi tuai foki o oko mai a te kaitaua malosi o te Aliki, koi tuai o oko mai te aso ka fakaasi mai ei tena kaitaua fakamataku. Fuli mai ki te Aliki, koutou katoa tino loto malalo o te fenua, kola e faka‵logo ki ana fakatonuga. Ke fai ne koutou a te mea tonu, kae olo atu koutou mo te loto malalo ki mua o te Aliki. E se taumate ka ‵sao mai koutou mai te fakasalaga i te aso e fakaasi ei ne te Aliki tena ita.” (Sefanaia 2:2, 3) Ona ko te mafaufau ki te fakamoemoega ke sao atu tatou i te aso o te fakamasinoga, ke na gasue‵sue tatou o suke‵suke faka‵lei ki te tusi i te Tusi Tapu ko Sefanaia. Ne tusi te tusi tenei i Iuta mai mua o te 648 T.L.M., se vaega o te “muna fakapelofeta” a te Atua telā e ‵tau o ‵saga atu tatou katoa ki ei mo ‵tou loto kātoa.—2 Petelu 1:19.
Ko Fakaoko Atu te Fakasalaga a te Atua
4 A “te fekau tela ne tuku mai ne te Aliki” ko Ieova ki a Sefanaia e kamata ki te faka‵pulaga telā ne siki mai mua atu. E folafola mai penei a te Atua: “A te Aliki ne faipati mai penei, ‘Ka fakamasei ne au a mea katoa i te lalolagi; ko tino fakatasi mo manu vae fa pela foki a manu eva mo ika. Ka fakamalaia ne au a tino amio masei. Ka fakamalaia foki ne au a tino katoa, kae ka seai eiloa se tino e toe. Ko au, te Aliki [ko Ieova], tena ne faipati atu.”—Sefanaia 1:1-3.
5 E tonu me ne aumai ne Ieova a te gataga ki amioga matagā i te fenua o Iuta. Ko oi ne fakaaogā ne te Atua ke ‘fakama‵sei a mea katoa i te lalolagi’? E tiga eiloa e foliga mai me ne ‵valo mai ne Sefanaia i te vaega muamua o te pulega a te Tupu ko Iosia, telā ne kamata i te 659 T.L.M., ne fakataunu a pati fakavaloaga konā i te fakamaofaga o Iuta mo tena laumua, ko Ielusalema, ne te kau Papelonia i te 607 T.L.M. I te taimi tenā, ne “fakamasei” ei a tino amio ma‵sei i Iuta.
6 I te valoaga e uiga ki faifaiga a te Atua ki tapuakiga ‵se, e fai mai penei a te Sefanaia 1:4-6: “Ka fakasala ne au a tino o te fakai o Ielusalema mo tino katoa o te fenua ko Iuta. Ka fulu faka‵ma ne au a faifaiga katoa o te tapuakiga ki a Paala kola koi fai eiloa i te fenua, kae ka seai se tino tokotasi e masaua ne ia a faitaulaga fapau‵pau kola ne tavini ki a ia. Ka tamate ne au so se tino o latou tela e fanake ki te tuafale o tapuaki atu ki te la, io me ki te masina, io me ki fetu. Ka ‵ta fakamasei ne au a tino kola e tapuaki mai ki a au, kae tauto fakamaoni ki a au, kae oti aka, ko fai a tautoga a latou ki te atua ko Milikoma. Ka ta fakapalele foki ne au a latou kola ko fulitua mai ki a au kae e se tautali mai ki a au, ko latou kola ko se o‵mai ki a au io me fakamolemole mai ki a au ke takitaki ne au a latou.”
7 Ne fakasala ne Ieova a tino o Iuta mo Ielusalema. Ne fakaiku aka ne ia ke tamate a tino tapuaki ki te atua o te fanafanau a te kau Kanana ko Paala. Ne fakaigoa a atua kese‵kese i te fenua ki a Paala ona ko te mea e mafau‵fau ana tino tapuaki me e tuku mai kae isi foki olotou malosi ki faifaiga a te fenua. E pelā mo te kau Moapi mo te kau Mitiana, ne tapuaki atu foki latou ki a Paala i te Mauga o Peolo. (Numela 25:1, 3, 6) Ne ‵ta fakapalele ne Ieova a faitaulaga a Paala i Iuta kātoa, mo faitaulaga Levi sē fakamaoni kolā ne solitulafono ki te Atua mai i te ‵kau fakatasi mo latou.—Esoto 20:2, 3.
8 Ne ‵ta fakapalele foki ne te Atua a tino kolā e “tapuaki atu ki te la, io me ki te masina, io me ki fetu.” (2 Tupu 23:11; Ielemia 19:13; 32:29) Ne fakaoko atu foki te kaitaua o te Atua ki tino kolā e taumafai o palu fakatasi a te tapuakiga tonu mo tapuakiga ‵se, mai i te faiga o ‘tautoga a latou ki a Ieova kae oti aka loa ko fai a tautoga konā ki te atua ko Milikoma.’ A Milikoma ko te suā igoa o Moloka, ko te atua pule o te kau Amoni. E aofia i te tapuakiga ki a Moloka a te ofoatuga o tama‵liki.—1 Tupu 11:5; Ielemia 32:35.
Ko Pili Mai te Gataga o Lotu Kelisiano ‵Se!
9 A mea katoa konei e fakamasaua faka‵lei mai i ei ki a tatou e uiga ki Lotu Kelisiano ‵Se, kolā e aofia malosi i tapuakiga ‵se mo te iloiloga o uiga o fetu. Kae ko tena tusaga i te ofoatuga o te fia miliona o tino i fatafaitaulaga o taua kolā e ‵lago atu ki ei a faifeau ko se faka‵tau eiloa i te matagā! Ke mo a eiloa ma fai tatou pelā mo tino sē fakamaoni i Iuta, kolā ‘ko fulitua atu ki a Ieova kae e se tautali ki a ia,’ mai i te sē fia‵fia mo te sē toe fia ‵sala atu ki tena takitakiga. I lō te fai penā, ke na tumau tatou i te ‵tou fakamaoni ki te Atua.
10 A nisi pati a te pelofeta e fetaui ‵lei eiloa mo tino fai mea ‵se i Iuta mo tino amio ma‵sei i ‵tou aso nei. E fai mai penei a te Sefanaia 1:7: “Ko pili mai a te aso o te Aliki, ko te aso tela ka matea ei a galuega a te Atua, tela la, ke filemu koutou i tena oko mai. Ko fakatoka a te Aliki o tamate a ona tino ke pela me se taulaga [“ko oti ne faka‵malu ne ia ana tino ‵kami,” NW].” A “tino ‵kami” konei ko fili o Iuta mai i Kaletaia. A te “taulaga” ko te fenua ko Iuta, e aofia i ei tena laumua. Ne faka‵pula mai ne Sefanaia a te fuafuaga a te Atua ke fakaseai a Ielusalema, kae ne fakasino atu foki te valoaga tenei ki te fakaseaiga o Lotu Kelisiano ‵Se. A te ‵tonuga loa, ona ko te pili mai o te aso o te fakamasinoga a te Atua i aso nei, e ‵tau mo te lalolagi kātoa o ‵nofo “filemu” i mua o te Aliki Sili ko Ieova kae fakalogologo ki pati kolā e fai mai ne ia e auala i te “lafu foliki” o soko fakaekegina o Iesu mo olotou taugasoa, ko nisi “mamoe.” (Luka 12:32; Ioane 10:16) Ka oko atu te fakaseaiga ki tino katoa kolā ka se faka‵logo kae ‵teke atu ki te pulega e auala i te Malo o te Atua.—Salamo 2:1, 2.
Se Aso o te ‵Tagi Fanoanoa—Ko Pili Mai
11 E uiga ki te aso o Ieova, e fakaopoopo mai penei a te Sefanaia 1:8-11: “I te aso o te tamatega tena, ka fakasala ne au a tino maluga, tamaliki tagata a tupu, mo tino katoa kola e fai ne latou a tu mo amioga mai fenua fakaatea. Ka fakasala foki ne au a latou katoa kola e tapuaki e pela me ne tino fapau‵pau, mo latou kola e kai‵soa kae tatino ko te mea ke fakafonu ne latou a te fale o te pule o latou ki koloa kaisoa. Muna a te Aliki [ko Ieova]: ‘I te aso foki tena, ka lagona ne koutou te leo o te tagi mai te Mataloa o Ika i loto i te fakai o Ielusalema. Ka lagona foki ne koutou se leo tagi fanoanoa i koga fou o te fa‵kai mo te leo pakū i mauga. Paka‵laga kae ‵tagi manafai ko lagona ne koutou a te mea tenei, a koutou kola e nofo i te vaega ki lalo o te fa‵kai lasi, me ka mate katoa a tino maukoloa!’ ”
12 Ne sui a te Tupu ko Iosia ne Ioasasa, Ieoiakimo, mo Ieoiakini. I te taimi ne pule mai i ei a Setekaia, ne kamata mai i ei te fakamaseiga o Ielusalema. E tiga eiloa ne fe‵paki latou mo fakalavelave faiga‵ta penā, e foliga mai me e isi eiloa ne tino ne fia ‵lei olotou ata i mua o tino mai i atufenua ‵pili mai kae ne “fai ne latou a tu mo amioga mai fenua fakaatea.” E penā foki i aso nei, e fakamaoni mai ne tino e tokouke i auala kese‵kese me e se fai latou mo fai ne vaega i te fakapotopotoga a Ieova. E pelā me ne vaega o te fakapotopotoga a Satani, ka fakasala latou.
13 A “te aso” tenā o te fakasalaga o Iuta e fakaata mai i ei a te aso o Ieova ke fakaoko mai te fakamasinoga ki ana fili, ke fakagata a amioga ma‵sei, kae ke fakamaoni atu i ei a te ‵tonu o tena pulega. E pelā mo te osoatuga a Papelonia ki Ielusalema, ka lagona atu se tagi fanoanoa e vau mai i te Mataloa o Ika. Kāti ne fakaigoa penā ona ko te mea e pili ki te maketi ika. (Neemia 13:16) Ne ulu atu a tino e tokouke o Papelonia ki te koga telā ne fakaigoa ki te vaega ki lalo o te fa‵kai, kae ko te “leo pakū i mauga” kāti e fakauiga ki te pakū‵kū mai o te kau Kaletaia kolā ko pili o oko mai. Ka lagona “se leo tagi fanoanoa” mai i tino e ‵nofo i Maktesh, kāti i te Vanu ki luga o Tyropoeon. Kaia e ‵tagi fanoa‵noa ei latou? Me ka fakagata te fakatau togi o mea, e aofia foki i ei a faifaiga a “tino maukoloa.”
14 E pefea te lasi ka fai ei ne Ieova a te sukesukega ki tino kolā e fai mai me e tapuaki ‵tonu atu latou ki a ia? E faka‵soko mai penei te valoaga: “I te taimi tena, ka fano au mo se moli o fainaina a koga pouli o Ielusalema, ka fakasala ne au a tino kola e fakalagolago eiloa ki te lotou malosi kae talitonu eiloa i a latou kae e fai ake penei, ‘E se mafai ne te Aliki o fai se mea lei io me se mea masei.’ Olotou koloa ka fao malo, mo fale foki o latou ka fakamaseigina. Ka se nofo lele eiloa a latou i fale e faite nei ne latou io me e inu i uaina mai togavine kola e toki nei ne latou.”—Sefanaia 1:12, 13.
15 A faitaulaga aposetate o Ielusalema ne palu fakatasi ne latou a te tapuakiga a Ieova mo tapuakiga ‵se. E tiga eiloa ne tokagamalie latou, e ‵sala aka latou ne Ieova o aumai latou ki tua, e pelā me se mainaga o se moli e oko atu ki te pouliga faka-te-agaga telā e ‵lafi i ei latou. E seai se tino ka sao i te folafolaatuga mo te fakaokomaiga o te fakamasinoga a te Atua. Kae e se manava‵se a aposetate kolā e fakalago‵lago atu ki te lotou malosi eiloa. E se ma‵nako latou ke fakalavelave atu so se folafolaga a te Atua ke aofia a ia i faifaiga a tino kae e se ‵sao latou i te fakaokomaiga o te fakamasinoga a te Atua ki luga i a latou. Ka seai foki se tino telā e kau atu nei ki lotu ‵se e sao, e aofia i ei a tino o Lotu Kelisiano ‵Se mo tino kolā ko fulitua atu ki te tapuakiga a Ieova. Mai i te sē fia ‵saga atu ki te manatu me konei eiloa “a aso fakaoti,” e fai mai latou penei i olotou loto, “E se mafai ne te Aliki o fai se mea lei io me se mea masei.” Ko oko eiloa i te ‵se o latou!—2 Timoteo 3:1-5; 2 Petelu 3:3, 4, 10.
16 Ko oti ne fakailoa atu ki tino aposetate o Iuta me ka fakamasei ne te kau Papelonia te lotou maumea, fakamaofa olotou fale, kae ave ne latou a fuataga o olotou togāvine. Ka se tāua a mea faka-te-foitino māfai ko oko atu te fakamasinoga a te Atua ki luga i Iuta. Ka fai foki penā i te taimi e oko mai ei te aso o te fakamasinoga a Ieova ki luga i te fakanofonofoga tenei o mea. Tela la, ke na maua ne tatou se kilokiloga faka-te-agaga kae ‘fakaputu a koloa i te lagi’ mai i te tumau i te fakamuamua o te taviniga ki a Ieova i ‵tou olaga!—Mataio 6:19-21, 33.
‘A te Aso Fakamataku o Ieova ko Pili Mai’
17 E pefea te pili mai o te aso o te fakamasinoga a Ieova? E ‵tusa mo te Sefanaia 1:14-16, e tuku mai ne te Atua a te fakatalitonuga tenei: “A te aso fakamataku o te Aliki [ko Ieova] ko pili—ko pili mai eiloa, kae e vave o oko mai! Ka fai a te aso tena me se aso fakamataku, me i sotia loto toa eiloa ka tagi me ko seai ne fakamoemoega o latou! Ka fai te aso tena mo se aso o te kaitaua fakamataku, se aso o te puapuaga kae logomae, se aso o te fakamaofaga mo te fakamaseiga, se aso o te pouliga kae pouli tagataga, se aso pouli kae kaumanā, se aso e lagona ei te leo o pu o te taua mo te leo taua o sotia kola e tau ki fakai lasi ne puipui ki olo fakatasi mo olotou taoa.”
18 Ne fakailoa atu ki faitaulaga mo pelenise agasala o Iuta, pelā foki mo tino agasala me ko ‘pili mai te aso fakamataku o Ieova.’ Ne ‘oko fakavave atu a te aso o Ieova’ ki tino Iuta. E penā foki i ‵tou aso nei, ke mo a eiloa ma mafaufau se tino me koi ‵mao ‵ki a te fakaokomaiga o te aso o te fakamasinoga a Ieova. I lō te fai penā, e pelā eiloa mo te gasuesue fakavave o te Atua i Iuta, ka ‘fakavave’ foki a ia i tena aso o te fakamasinoga. (Fakaasiga 16:14, 16) Ko tafaga la te fakamataku o te taimi tenā mō tino katoa kolā e se fia ‵saga atu ki fakailoaga a Ieova e auala i ana Molimau kae fakata‵mala ke puke ‵mau ki te tapuakiga tonu!
19 A te fakaokoatuga o te kaitaua o te Atua ki luga i Iuta mo Ielusalema ne fai mo fai “se aso o te puapuaga kae logomae.” A te kau Papelonia kolā ne olo atu, ne fakaoko atu ne latou a logo‵maega e uke ki tino o Iuta, e aofia i ei a te puapuaga o te mafaufau i te fakafesagai atu ki te mate mo te fakamaofaga. A te “aso o te fakamaofaga mo te fakamaseiga” tenā, ne pouli kae kaumanā, kae pouli tagataga, kāti e se i se auala fakatusa fua kae ne tupu tonu foki eiloa penā, me ne lavea atu a te afusaga mo te fakatau tamatega i koga katoa. “Se aso e lagona ei te leo o pu o te taua mo te leo taua o sotia,” kae ne seki aogā lele eiloa a fakailoaatuga konā.
20 Ne seki ai eiloa se aogā o tino leoleo o Ielusalema i te taimi ne fakamaofa ei ne te kau Papelonia a “taoa.” A taumafaiga o te fakanofonofoga masei tenei ka seai eiloa se aogā māfai e ‵teke atu ki meatau a te kautau faka-te-lagi a te Atua, telā ka fakaaogā muamua ne ia ki te fakamaseiga o mea e ‵tusa mo te fakasologa o mea. E mata, e fakamoemoe koe ke sao atu i ei? E mata, ko oti ne tu mautakitaki koe i te feitu o Ieova, telā e “puipui ne ia latou katoa kola e a‵lofa ki a ia, kae ka fakamalaia ne ia a tino amio ma‵sei”?—Salamo 145:20.
21 Ko tafaga la te matagā o te aso o te fakamasinoga telā ne ‵valo mai i te Sefanaia 1:17, 18! Ne fai mai Ieova penei: “Ka aumai ne au a puapuaga pena ki tino, ko te mea ke takase se a tino katoa ke pela me ne tino kivi. Ko oti a latou ne agasala i oku mua, kae nei, a toto o latou ka ligi ne au pela me se vai, ka ko foitino mate o latou ka pala eiloa i luga o te laukele. I te aso e fakaasi ei ne te Aliki tena kaitaua fakamataku, ka se mafai lele eiloa ne siliva io me ko aulo katoa a latou o fakasao latou, me i te lalolagi katoa ka fakamaseigina ne te afi o tena kaitaua. Ka aumai ne ia se ikuga—se ikuga fakapoi—ki tino katoa kola e ola i te lalolagi.”
22 E pelā mo mea ne fai i aso o Sefanaia, ka aumai foki ne Ieova a te puapuaga “ki tino katoa kola e ola i te lalolagi,” ko tino kolā e se fia faka‵logo ki tena fakailoaga. Ona ko te lotou agasala ki te Atua, ka sasale atu a latou e pelā me ne tino ‵kivi, kolā ko se mafai o maua se fakasaolotoga. I te aso o te fakamasinoga a Ieova, “a toto o latou ka ligi ne au pela me se vai,” e pelā me se mea ko se aogā. Ka fakaseai latou i se auala fakamasiasi, me ka faka‵fonu ne te Atua a te lalolagi ki foitino—ke oko foki eiloa ki nisi vaega o te foitino—o tino ma‵sei konei e pelā me ne mea “pala.”
23 E seai se tino e mafai ne ia o faka‵sao a tino kolā e ‵teke atu ki te Atua mo ana tino. E se mafai foki ne siliva io me ko aulo o fakasaoloto a tino fai mea ‵se i Iuta, ke oko foki eiloa ki koloa e uke mo tino faitogafiti, ka se mafai o tuku mai ne latou se puipuiga io me se faka‵saoga i ‘te aso fakamataku o Ieova’ ki Lotu Kelisiano ‵Se mo te ‵toega o te fakanofonofoga tenei o mea. I te aso tenā o fakaikuga, a “te lalolagi katoa ka fakamaseigina ne te afi o tena kaitaua” i te taimi e tamate ei ne ia a tino ma‵sei. Ona ko te mea e fakatuanaki tatou ki te muna fakapelofeta a te Atua, e tali‵tonu tatou me ko ‵nofo nei tatou i te “gataga o te lalolagi.” (Tanielu 12:4) Ko pili mai te aso o te fakamasinoga a Ieova, kae ko pili o fakaoko mai ne ia a te taui ma sui ki ana fili. Kae ko te valoaga a Sefanaia e tuku mai i ei se fakamoemoega mō te fakasaolotoga. Ne a la mea e ‵tau o fai ne tatou māfai e ma‵nako tatou ke ‵sao atu i te aso o te kaitaua o Ieova?
Ka Tali Mai Pefea ne Koe?
• Ne fakataunu mai pefea a te valoaga a Sefanaia ki luga i Iuta mo Ielusalema?
• Se a te mea telā e faka‵tali mai mō Lotu Kelisiano ‵Se mo tino ma‵sei katoa i ‵tou aso nei?
• Kaia e se ‵tau ei o mafau‵fau tatou me koi ‵mao ‵ki eiloa a te aso o te fakamasinoga a Ieova?
[Fesili mo te Sukesukega]
1. Se a te faka‵pulaga telā ne fai mai ne te Atua e auala i a Sefanaia?
2. Kaia ne seki mafai ei ne mea kolā ne fai ne Iosia o taofi aka a te aso o te fakamasinoga a Ieova?
3. E mafai pefea o fakamautinoa aka ne tatou me e mafai o ‵sao atu i “te aso fakamataku o te Aliki [ko Ieova]”?
4, 5. Ne fakataunu pefea a te Sefanaia 1:1-3 ki tino amio ma‵sei i Iuta?
6-8. Se a te mea telā ne ‵valo mai i te Sefanaia 1:4-6, kae ne fakataunu mai pefea te valoaga tenā i Iuta i aso mua?
9. (a) Se a te mea ko pisipisia i ei a Lotu Kelisiano ‵Se? (e) E se pelā mo tino sē fakamaoni i Iuta, se a te mea telā e ‵tau o fakaiku aka ne tatou ke fai?
10. Se a te uiga fakavaloaga o te Sefanaia 1:7?
11. Se a te uiga fakavae o te Sefanaia 1:8-11?
12. E fai pefea ne nisi tino “a tu mo amioga mai fenua fakaatea”?
13. E ‵tusa mo te valoaga a Sefanaia, se a te mea ka tupu māfai ko oso atu a Papelonia ki Ielusalema?
14. E pefea te lasi ka fai ei ne te Atua te sukesukega ki tino kolā e fai mai me e tapuaki ‵tonu atu latou ki a ia?
15. (a) Ne a mea ne ‵tupu ki faitaulaga aposetate i Ielusalema? (e) Se a te mea telā e faka‵tali mai ki tino kolā e ‵kau atu ki lotu ‵se i aso nei?
16. Ne a mea ne ‵tupu i te taimi ne fakaoko atu ei te fakamasinoga a te Atua ki luga i Iuta, kae se a te mea e ‵tau o fai ne tatou ona ko te iloaga tenā?
17. E ‵tusa mo te Sefanaia 1:14-16, e pefea te pili mai o te aso o te fakamasinoga a Ieova?
18. Kaia e se ‵tau ei o fakaiku aka ne tatou me koi ‵mao ‵ki eiloa te aso o te fakamasinoga a Ieova?
19, 20. (a) Ne a nisi mea ne aofia i te fakaokoatuga o te kaitaua o te Atua ki luga i Iuta mo Ielusalema? (e) Ona ko te fakasologa o mea kolā ka fakamasei i te fakanofonofoga tenei o mea, ne a fesili kolā e ‵sae aka?
21, 22. Ka fakataunu pefea a te Sefanaia 1:17, 18 i ‵tou aso nei?
23. E tiga eiloa ka se ‵sao atu a tino fai mea ‵se i ‘te aso fakamataku o Ieova,’ se a te fakamoemoega e tuku mai ne te valoaga a Sefanaia?
[Ata i te itulau e 9]
Ne folafola atu ne Sefanaia mo te loto toa me ko pili mai te aso o te fakamasinoga a Ieova
[Ata i te itulau e 9]
From the Self-Pronouncing Edition of the Holy Bible, containing the King James and the Revised versions
[Ata i te itulau e 11]
Ne oko atu te aso o Ieova ki luga i Iuta mo Ielusalema i te taimi ne fakatakavale ei ne Papelonia i te 607 T.L.M.