“E Isi se Tino Poto mo te Malamalama i a Koutou Na?”

“E isi se tino poto mo te malamalama ia koutou na? Ke fakaasi mai la tona olaga ‵lei i ana galuega e ‵tusa mo te loto malalo mo te poto.”—IAKOPO 3:13.

1, 2. Ne a pati e mafai o fai atu e uiga ki tino e tokouke kolā e tali‵tonu i a latou e ‵poto?

KO OI te tino i tau faka‵tau e poto kae malamalama tonu? E mata, ko ou mātua, se toeaina, io me se polofesa i se kolisi? Kāti e mafai o pokotia tau kilokiloga e uiga ki te tino poto i te auala ne puti aka ei koe mo ou fakanofonofoga. Kae e fakatulaga muamua ne tavini a te Atua a tena kilokiloga e uiga ki te mea tenā.

² E se ko tino ‵poto katoa i te kilokiloga a te lalolagi e maua ne latou te poto tonu i te kilokiloga a te Atua. E pelā mo Iopu, ne faipati atu a ia ki tino kolā ne tali‵tonu i a latou e ‵poto, kae tenei tena fakaikuga e uiga ki a latou: “E seai eiloa se tino o latou e maua ne au ke tai poto mai.” (Iopu 17:10) Ne tusi mai te apositolo ko Paulo e uiga ki nisi tino kolā ne ‵teke atu ki te poto o te Atua: “Ne manatu ifo latou me i a latou e ‵poto, kae tela la e va‵lea fua.” (Loma 1:22) Kae e auala i te pelofeta ko Isaia, ne faka‵mafa mai ne Ieova te mea tenā: “A koutou ko malaia! A koutou e mafaufau pelā i a koutou ko oko eiloa i te ‵poto.”—Isaia 5:21.

3, 4. Ne a mea e manakogina ko te mea ke maua ne se tino te poto tonu?

³ E manino ‵lei me e manakogina ke iloa ne tatou a mea e fai i ei ke maua ne se tino te poto tonu, ke maua ei ne ia te taliaga a te Atua. E tuku mai te mainaga tenei i te Faataoto 9:10, Tusi Paia, Samoa: “A te mataku ki a Ieova ko te kamataga o te poto, kae ko te iloaga e uiga ki te ‵Toe Tino Sili i te Tapu ko te malamalama tenā.” E ‵tau o maua ne te tino poto te mataku tonu ki te Atua kae āva ki ana tulaga amio‵tonu. Kae e uke atu a mea e manakogina i lō te iloa atu fua me e ola te Atua mo te taliaga o ana auala. E fakamalosi mai te soko ko Iakopo ke mafau‵fau tatou ki te mea tenei. (Faitau te Iakopo 3:13.) Onoono ki te tugāpati: “Ke fakaasi mai la tona olaga ‵lei i ana galuega.” E ‵tau o matea atu te poto tonu i au mea mo au pati e fai i aso katoa.

⁴ E aofia i te poto tonu te faiga o fakaikuga ‵lei mo te fakaaogāga o te poto mo te malamalama i se auala aogā. Ne a la faiga e fakaasi atu ei me e maua ne tatou te vaegā poto tenā? E fakasolo mai ne Iakopo a nisi mea kolā e fakatalitonu mai ei i faifaiga a latou kolā e ‵poto.a Ne a ana pati kolā e mafai o fesoasoani mai ke maua ne tatou mo ‵tou taina tali‵tonu se fesokotakiga ‵lei, e pelā foki mo tino i tua o te fakapotopotoga?

E Lavea te Tino Poto i Ana Faiga

5. E ola pefea te tino telā e maua ne ia te poto tonu?

⁵ Se mea aogā ke toe fai atu me ne ‵soko tasi ne Iakopo a te poto mo amioga ‵lei. Ona ko te mataku ki a Ieova ko te kamataga o te poto, e taumafai malosi eiloa te tino poto o ola e ‵tusa mo auala mo tulaga amio‵tonu o te Atua. E se fa‵nau mai tatou mo te poto mai te Atua. E ui i ei, e mafai o maua ne tatou mai te sukesuke faeloa ki te Tusi Tapu mo te mafaufau ‵loto ki ei. Ka fesoasoani mai a mea konei ke fai ne tatou te mea telā e fakamalosi mai i te Efeso 5:1: ‘E ‵tau ke pelā koutou mo te Atua.’ Ko te lasi o te ‵tou ola i te fakaakoako atu ki a Ieova, ko te lasi foki o te fakaasi atu ne tatou o te poto i ‵tou mea e fai. E ma‵luga fakafia atu a auala o Ieova i lō auala o tino. (Isaia 55:8, 9) Tela la, kafai e fakaakoako tatou ki auala o Ieova i te faiga o se mea, ka matea ei ne tino mai tua me e isi se mea telā e ‵kese ei tatou mo latou.

6. Kaia e fai ei te loto maulalo mo fakamaoniga o te amioatua, kae ne a mea e aofia i te uiga tenei?

⁶ E fakaasi mai ne Iakopo a te auala e tasi ke fai ei pelā mo Ieova ko te mauaga o “te loto malalo mo te poto.” E tiga eiloa e aofia te loto maulalo i te filemu, e ‵tau o malosi ‵lei se Kelisiano i te tausiga o ana amioga, ka fesoasoani atu ei ke paleni a ia i ana mea e fai. E ui eiloa e seai se tapulā ki tena malosi, e loto maulalo a te Atua, kae se ma‵taku tatou o olo atu ki a ia. Ne ‵lei katoatoa te fakaasimaiga ne te Tama a te Atua te loto maulalo o tena Tamana, ne mafai ei ne ia o fai mai penei: “O‵mai ki a au a koutou katoa kolā e fi‵ta i te ‵mafa otou amoga, me ka avatu ne au ki a koutou a te malologa. Ke amo ne koutou taku amoga, kae fakaakoako mai ki a au, me i a au e filemu kae loto malalo; e maua foki i ei ne koutou a te tokaga malie otou agaga.”—Mataio 11:28, 29; Filipi 2:5-8.

7. Kaia e mafai ei o ‵kilo atu tatou ki a Mose e pelā me se fakaakoakoga ‵lei o te loto maulalo?

⁷ E faipati foki te Tusi Tapu e uiga ki nisi tino kolā ne takutakua i te loto maulalo. A Mose se tino e tokotasi i a latou konā. Ne uke ‵ki ana tiute, kae ne fakamatala mai penei e uiga ki a ia, a Mose “se tagata loto malalo; ko te ‵toe tagata loto malalo eiloa i te lalolagi.” (Numela 11:29; 12:3) Kae mafaufau la ki te malosi ne tuku ne Ieova ki a Mose ke fai ne ia Tena loto. Ne fiafia a Ieova o fakaaogā a tino loto mau‵lalo ke fakataunu ei ana fuafuaga.

8. Kaia e mafai ei ne tino se ‵lei katoatoa o fakaasi atu “te loto malalo mo te poto”?

⁸ E manino ‵lei me e mafai o fakaasi mai ne tino se ‵lei katoatoa “te loto malalo mo te poto.” Kae e a tatou? E mafai pefea o faka‵lei atu ne tatou te fakaasiatuga o te uiga tenei? A te loto maulalo se fuataga e tasi o te agaga tapu o Ieova. (Kalatia 5:22, 23) E mafai o ‵talo tatou mō tena agaga kae taumafai malosi o fakaasi atu ana fuataga, mo te tali‵tonu me ka fesoasoani mai eiloa te Atua ke faka‵lei aka te fakaasiatuga ne tatou o te loto maulalo. E maua ne tatou se fakamalosiga mautinoa ke fai penā mai i pati konei a te faisalamo: “E takitaki ne [te Atua] a tino loto maulalo ki te auala tonu kae akoako foki ne ia a latou ki tena kanoloto.”—Salamo 25:9.

9, 10. Ne a taumafaiga e manakogina ko te mea ke fakaasi atu ne tatou te loto maulalo, kae kaia?

⁹ E tiga te feitu tenā, e mafai o uke ‵ki a taumafaiga e fai ke faka‵lei aka ei te feitu tenei. Ona ko te auala ne puti aka ei tatou, kāti ka faigata ki nisi o tatou ke maua te loto maulalo. E se gata i ei, e mafai o fakamalosi mai a tino e ola fakatasi mo tatou ke sē maua ne tatou te loto maulalo, i olotou pati me e “‵tau o taui atu te masei ki te masei.” Kae e mata, e ‵lei te mea tenā? Kafai e kamata o ‵ka se tamā afi i tou fale, e mata, ka tamate ne koe ki oela io me ki vai ‵moko? Ka ‵ka malosi atu te afi māfai e ‵ligi ne koe a oela ki ei, kae kafai e ‵ligi ne vai ‵moko ki ei ko mafai ei o mate te afi. E penā foki a pati i te Tusi Tapu mō tatou: “A te tali i te leo filemu e galo ei te kaitaua, kae kafai se tino e tali mo te leo malosi e fakatupu fua ne ia te kaitaua.” (Faataoto 15:1, 18) Kafai e toe sae aka se kinauga i loto io me i tua o te fakapotopotoga, e mafai o matea atu te auala e fakaasi atu ei ne tatou te poto tonu mai te saga atu ki ei i se auala filemu?—2 Timoteo 2:24.

¹⁰ E pelā mo te mea ko oti ne matea muamua atu, e tokouke a tino kolā e fakamalosigina ne te agaga o te lalolagi e se loto maulalo, e se filemu io me tokagamalie. I lō te fai penā, e matea ne tatou me e uiga faiga‵ta kae ‵fonu i te fakamata‵mata. Ne iloa ne Iakopo te mea tenei, kae ne tuku mai ne ia a polopolokiga ko te mea ke ‵kalo keatea a tino katoa i te fakapotopotoga mai fakamaseiga a te agaga tenei. Ne a nisi mea e mafai o tauloto ne tatou mai i ana pati fakatonutonu konei?

Uiga o Tino se ‵Poto

11. Ne a uiga kolā e ‵teke atu ki te poto mai te Atua?

¹¹ Ne fakaasi ‵tonu mai ne Iakopo a uiga kolā e ‵teke ‵tonu atu ki te poto mai te Atua. (Faitau te Iakopo 3:14.) A te loto masalosalo mo kinauga ne uiga o te foitino, e se ne uiga faka-te-agaga. Mafaufau ki mea e ‵tupu māfai e fakatumau ne tatou a mafaufauga faka-te-foitino. E ono a potukau o “Kelisiano” e tausi ne latou se vaega o te Falesa o te Holy Sepulchre i Ielusalema, i te koga telā, i te lotou faka‵tau, ne tamate kae ne tanu i ei a Iesu. Ne kinau faeloa latou. I te 2006, ne fakamatala mai i te mekesini ko te Time a te mea ne tupu mai mua atu i te taimi “ne taua ei a faifeau konā i se taimi leva ‵ki, . . . kae ne fakatau pagopago ne latou a latou eiloa ki kau ‵lasi o moli gako.” Ona ko te lasi o te lotou se tali‵tonu ki a latou eiloa, fakamolemole atu ei ki se tino lotu Musilimu ke tausi aka ne ia te kī o te falesa.

12. Kafai e se lava te poto e maua, se a te mea e mafai o tupu?

¹² E se ‵tau eiloa o maua a vaegā kinauga penā i loto i te fakapotopotoga o Kelisiano ‵tonu. E tiga te feitu tenā, ona ko te lotou tulaga se ‵lei katoatoa ko oti ne fakaasi mai ne nisi tino a te loto ‵fika e uiga ki olotou manatu totino. E mafai o iku atu te mea tenā ki te faiga o kinauga. Ne matea ne te apositolo ko Paulo a te mea tenei i te fakapotopotoga i Kolinito, tusi atu ei a ia: “Kafai e kaisano‵sano koutou, kae faitaua foki te suā tino ki te suā tino, e fakamaonia ne mea konei i a koutou e ola faka te lalolagi.” (1 Kolinito 3:3) Ne oko atu te fakapotopotoga tenei ki te tulaga fakafanoanoa tenā mō se vaitaimi tai leva i te senitenali muamua. Tela la, e manakogina ke fakaeteete tatou ke mo a e ulu mai te vaegā agaga tenā ki te fakapotopotoga i aso nei.

13, 14. Taku mai ne fakaakoakoga o te auala e fakaasi mai i ei te agaga faka-te-foitino.

¹³ E mafai pefea o ulu mai se vaegā agaga penā ki loto i ei? E mafai eiloa o kamata i tamā mea fua. E pelā mo te taimi e kamata ei o fakatu se Kingdom Hall, kāti e mafai o kese‵kese a manatu e ‵sae aka e uiga ki mea e ‵tau o fai. E mafai o kinau mai se taina māfai e se talia ana manatu, kāti ka ‵pusa ki tua ana fakamaseiga e uiga ki ikuga kolā e fai. E mafai foki o se fia galue a ia i te faitega o te hall! Kāti ka puli i te tino e fai penā me i te fakataunuga o se galuega telā e aofia ei te fakapotopotoga e faka‵na sāle eiloa ki te agaga filemu i loto i te fakapotopotoga i lō auala kolā e fakaaogā i tena faiga. Ko te agaga o te loto maulalo telā ka fakamanuia ne Ieova, kae e se ko kinauga.—1 Timoteo 6:4, 5.

¹⁴ A te isi mea e mafai o tupu māfai ko matea ne toeaina i se fakapotopotoga me e isi se toeaina telā ko oti ne tavini atu i tausaga e uke, kae nei e manino ‵lei me ko se fetaui tena tulaga mo ana tauliaga faka-te-Tusi Tapu. Kafai e matea atu ne te toeaina asiasi me ko oti ne maua ne te taina tenā se fesoasoani mautinoa i taimi ko ‵teka kae ne fakatamala o fai se faka‵leiga ki ei, ka kau atu eiloa te toeaina asiasi ki te fakaikuga tenā ke tapale tena tauliaga e pelā me se toeaina. Ka pefea te kilokiloga a te toeaina tenā ki ei? E mata, ka talia ne ia te ikuga a toeaina mo pati fakatonutonu mai te Tusi Tapu i te agaga o te loto maulalo kae fakasaga atu o faka‵lei aka ana tauliaga faka-te-Tusi Tapu ko te mea ke toe maua ne ia? Io me ka nofo a ia mo te loto kaitaua mo te loto masalosalo me ko se maua ne ia te tauliaga telā ne maua muamua ne ia? Kaia e mafai ei o fai penā se taina telā e mafaufau i a ia koi taulia kae tela la ko se tonu te mea tenā? E pefea te tāua atu ke fakaasi atu te loto maulalo mo te loto malamalama!

15. Kaia e mafaufau ei koe me ko oko eiloa i te tāua o pati polopoloki kolā e maua i te Iakopo 3:15, 16?

¹⁵ E tonu, e isi aka foki a nisi auala e mafai o sae mai i ei se vaegā uiga penā. Kae faitalia me se a te tulaga e sae aka, e ‵tau o ga‵lue malosi tatou ke ‵kalo keatea mai i uiga penā. (Faitau te Iakopo 3:15, 16.) Ne fakaigoa ne te soko ko Iakopo te uiga tenei ki se mea “faka te lalolagi” ona ko te mea tenā se uiga faka-te-foitino kae e se fakavae ki te poto mai te lagi. E fai latou pelā me ne ‘manu’ me ko ikuga konā o mafaufauga faka-te-foitino kolā e tai ‵pau eiloa mo mafaufauga o manu. E fai a uiga penā e pelā me ne “poto fakatemoni,” me e fakaasi mai i ei a uiga o fili o te Atua ko temoni. E pefea te se ‵lei ke fakaasi atu ne se Kelisiano a vaegā uiga penā!

16. Ne a fakamafulifuliga e mafai o manakogina ke fai ne tatou, kae e mafai pefea o manuia tatou i te faiga o mea konā?

¹⁶ Se mea ‵lei ke iloilo ifo a tino taki tokotasi i loto i te fakapotopotoga ki a ia eiloa kae galue o fakaseai atu a uiga penā. E pelā me ne faiakoga i te fakapotopotoga, e ‵tau faeloa o matea ne ovasia a te manakoga ke tapale keatea a vaegā uiga se aogā mai i a latou. E se faigofie ke manuia ‵tou taumafaiga i te feitu tenei ona ko ‵tou tulaga se ‵lei katoatoa mo fakamalosiga mai te lalolagi tenei. E mafai o faka‵tusa te faiga o te mea tenā ki te taumafai o kake aka i se feitu o te mauga telā e pelapelā kae molemole. E aunoa mo se mea ke ‵piki ki ei, e mafai fua o toe ‵mole ifo tatou ki lalo. E tiga te feitu tenā, kafai e ‵piki ‵mau tatou ki pati polopoloki i te Tusi Tapu, fakatasi mo te fesoasoani telā e tuku mai ne te fakapotopotoga saukātoa a te Atua i te lalolagi kātoa, e mafai eiloa o ga‵solo tatou ki mua i te feitu tenei.—Salamo 73:23, 24.

Uiga Kolā e Taumafai o Fakaasi Atu ne Tino ‵Poto

17. E ‵saga atu sāle pefea a tino ‵poto māfai e fakafesagai atu latou ki te faiga o mea ma‵sei?

¹⁷ Faitau te Iakopo 3:17. E mafai o aogā te mafaufau ki nisi uiga kolā e maua ne tatou mai te fakaasi atu o “te poto mai te lagi.” E aofia i te ‵ma ko te ‵ma mo te se lai‵lai o ‵tou mea e fai mo ‵tou lagonaga. E manakogina ke ‵teke fakavave atu ki mea matagā. E ‵tau o gasue fakavave eiloa i a ia te mea tenā. Kafai e ‵kini malie ne se tokita te koga mai lalo malie faeloa o te ‵pono o tou tulivae, se mea vave eiloa o poi te vae kae faka‵tonu fakavae ne ia a ia eiloa. E gasue i a ia eiloa; e se ‵tau o mafaufau koe ki ei. E ‵tau foki o fai penā māfai ko fakaosoosogina ke fai ne tatou a mea ma‵sei. E ‵tau o fakaoso fakavave tatou ne te ‵tou tulaga ‵ma mo te loto lagona telā ko oti ne akoakogina ki mea faka-te-Tusi Tapu ke ‵teke atu ki te faiga o mea ma‵sei. (Loma 12:9) E tuku mai i te Tusi Tapu a fakaakoakoga o tino kolā ne ‵saga atu penā i te feitu tenei, e pelā mo Iosefa mo Iesu.—Kenese 39:7-9; Mataio 4:8-10.

18. Se a te uiga o te (a) fai mo fai se tino uiga filemu? (e) fai mo fai se tino fakatupu filemu?

¹⁸ E manakogina i te poto mai te lagi ke fai foki tatou mo fai ne tino filemu. E aofia i te mea tenei te ‵kalo keatea mai te gutu kinau, te uiga fai taua, io me ko mea kolā e fakamakosu i ei te filemu. Ne toe fakalauefa mai ne Iakopo te manatu tenei i ana pati konei: “A te amiotonu ko te fuataga e maua mai i fuaga ne ‵toki i te agaga o te filemu ne tino fakatupu filemu.” (Iakopo 3:18) Onoono ki te tugāpati “fakatupu filemu.” E mata, e lauiloa tatou i te fakapotopotoga e pelā me ne tino faka‵tupu filemu io me ne tino fakamakosu te filemu? E mata, e kinau faeloa tatou mo nisi tino, e ita vave tatou io me e fakaitaita ne tatou a nisi tino? E mata, e ma‵nako tatou ke ‵saga mai a tino ki ‵tou tulaga ma‵luga, io me e ga‵lue tatou mo te loto maulalo ke tiaki a uiga kolā e se fia‵fia ki ei a nisi tino? E mata, e lauiloa tatou i te tausiga o te filemu, e vave o fakamagalo kae fakapuli atu a mea ‵se e fai mai ki a tatou? E mafai o fesoasoani mai te faiga o se iloiloga fakamaoni ki a koe eiloa me e mata, e manakogina ke faka‵lei aka te fakaasiatuga o te poto mai te lagi i te feitu tenei.

19. E mafai pefea o lauiloa se tino e pelā me se tino loto malamalama?

¹⁹ Ne aofia ne Iakopo te uiga ko te loto malamalama i tena fakamatalaga e uiga ki mea kolā e fakaasi mai i ei a te poto mai te lagi. E mata, e lauiloa tatou i te loto malamalama e uiga ki manatu o nisi tino kolā e se aofia i ei a fakatakitakiga fakavae faka-te-Tusi Tapu, kae e se vave o kinau atu ke tau‵tali mai a tino i ‵tou faifaiga masani totino? E mata, e lauiloa tatou i ‵tou uiga filemu kae loto malamalama māfai e fai‵pati mai a tino ki a tatou? E fakaasi mai i uiga konei me ko oti ne fai tatou mo fai ne tino kolā e loto malamalama.

20. Ne a mea ka iku mai māfai e fakaasi atu ne tatou a uiga o te Atua kolā fatoā oti ne sau‵tala tatou ki ei?

²⁰ Ko tafaga te lasi o te fiafia e mafai o maua i te fakapotopotoga māfai e ga‵lue a taina mo tuagane ke fakaasi ‵tonu atu a uiga o te Atua kolā ne fakaasi mai ne Iakopo! (Salamo 133:1-3) A te loto maulalo, te filemu mo te mauaga o te loto malamalama i vā o tatou ka iku atu eiloa ki te faka‵leiakaga o ‵tou fesokotakiga kae fakamaoni atu i ei me ko maua ne tatou “te poto mai te lagi.” Ka onoono tatou i te suā mataupu ki te auala e fesoasoani mai ei ke ‵kilo atu tatou ki nisi tino e pelā mo Ieova i te feitu tenei.

[Fakamatalaga mai lalo]

E Mafai o Fakamatala Mai ne Koe?

• Se a te mea e fai ne ia ke maua ne se Kelisiano te poto tonu?

• E mafai pefea o faka‵lei aka ne tatou te fakaasiatuga o te poto mai te Atua?

• Ne a uiga kolā e matea atu i tino kolā e se fakaasi atu ne latou te “poto mai te lagi”?

• Ne a uiga kolā e manako koe ke fa

[Ata i te itulau e 23]

E oko mai pefea a kinauga i aso nei?

[Ata i te itulau e 24]

E mata, e ‵teke fakavave atu koe ki mea matagā?