Filifili ke Tavini ki a Ieova a Koi Talavou Koe
“Ke tumau koe i mea ‵tonu kolā ne akoako atu ei koe, kae ne talitonu faka‵lei foki koe ki ei.”—2 TIMOTEO 3:14.
1. E kilo atu pefea a Ieova ki te taviniga e fai ne ana Molimau talavou?
ETĀUA ‵ki a te taviniga tapu a talavou ki a Ieova me ne tusi ne ia se valoaga e uiga ki a latou: “A te aso e taua ei koe mo ou fili, ka ‵kau fakatasi mai ou tino ki a koe. Ka olo atu foki au tamataene ki a koe i luga i mauga tapu, e pelā mo te ‵sau i te vaveao.” (Salamo 110:3) Ao, e fakatāua malosi ne Ieova a talavou kolā e lotoma‵lie o tavini atu ki a ia.
2. Ne a fakamalosiga faka-te-foitino e fe‵paki mo talavou i aso nei e uiga ki olotou olaga mō aso mai mua?
2 A koutou e talavou i te fakapotopotoga Kelisiano, e mata kai tuku atu koe ki a Ieova? Kāti ka faigata ke filifili aka ne talavou e tokouke ke tavini atu latou ki te Atua tonu. E fakamalosi atu a takitaki o pisinisi, faiakoga, kae i nisi taimi ko kāiga mo taugasoa, ki talavou ke kausaki atu ki fakamoemoega faka-te-foitino. Kafai e kausaki atu a talavou ki fakamoemoega faka-te-agaga, e takalia‵lia sāle a tino o te lalolagi ki a latou. Ako te tonuga loa, a te tavini atu ki te Atua tonu ko te ‵toe auala ‵lei e mafai o kausaki ki ei. (Salamo 27:4) I te feitu tenei, ke mafau‵fau ki fesili e tolu konei: Kaia e ‵tau ei o tavini atu koe ki te Atua? E mafai pefea o manuia tou olaga e pelā me se tino tukugina atu ki te Atua faitalia a pati mo faifaiga a nisi tino e fai e uiga ki a koe? Ne a avanoaga ‵gali o te taviniga tapu e mafai o ma‵tala mai ki a koe?
A te ‵Toe Mea ‵Lei ko te Tavini Atu ki a Ieova
3. E pokotia pefea tatou i mea a Ieova ne faite?
3 Kaia e ‵tau ei o tavini atu koe ki te Atua tonu kae ola? E tuku mai i te Fakaasiga 4:11 a te pogai tāua: “Te motou Aliki mo te motou Atua! E ‵tau eiloa o maua ne koe a te ‵malu, te vikiga, mo te ‵mana. Me ne faite ne koe a mea katoa, kae mai i tou loto foki, ne faite ei ne koe a mea ke tino mai kae ke ola foki.” A Ieova ko te Māfuaga fakaofoofogia o mea katoa kolā ne faite. Ko tafaga te gali o te lalolagi! Ne faite ne Ieova a—lakau, pulalakau, manu, te tai, mauga mo vaitafe. E fai mai te Salamo 104:24, penei: “A te lalolagi ko ‵fonu i mea ola a te [Atua].” E pefea te lasi o te ‵tou loto fakafetai me ko oti ne tuku mai ne Ieova ki a tatou se foitino mo se mafaufau ko te mea ke fia‵fia tatou i te lalolagi mo mea ‵gali i luga i ei! E mata, e se fakamalosi aka ne ana mea fakaofoofogia ne faite ke tavini atu tatou ki a ia?
4, 5. Ne a galuega a te Atua ne fai ei ke fakapilipili atu a Iosua ki a Ieova?
4 A te suā pogai e tavini atu ei ki a Ieova e maua i pati a te takitaki o Isalaelu ko Iosua. I aso fakaoti o tena olaga, ne fai atu a Iosua ki tino o te Atua: “E iloa faka‵lei ne koutou katoa i otou ‵kano loto taki tokotasi, me i te Aliki te otou Atua ko oti ne tuku atu ne ia ki a koutou a mea ‵lei katoa, kolā ne tauto a ia ke tuku atu. A tautoga katoa a ia ne fai, ko oti katoa ne fakataunu.” Kaia ne mafai ei o fai atu a pati konā ne Iosua?—Iosua 23:14.
5 E pelā me se tamaliki ne tupu aka i te fa‵kai o Aikupito, kāti ne iloa ne Iosua a folafolaga a Ieova ke tuku atu ki te kau Isalaelu se fenua mō latou. (Kenese 12:7; 50:24, 25; Esoto 3:8) Kae ne onoono atu eiloa a Iosua ki te kamataga o fakataunu ne Ieova tena folafolaga tenā mai te tukuatuga o Mala e Sefulu ki luga i Aikupito kae faimālō atu ki a Falao valea ke tuku a tino Isalaelu ke olo. A Iosua se tokotasi o tino telā ne sao atu i te Tai Kula, kae ne matea eiloa ne ia te tamatega o Falao mo tena kautau i te tai. I se malaga loa i loto i te “vao lasi kae fakamataku” o te koga lavaki i Sinai, ne lavea ne Iosua te auala ne fakatoka ei ne Ieova a mea katoa ne ma‵nako ki ei te kau Isalaelu. Ne seki ai eiloa se tino ne mate i te fiainu mo te fiakai. (Teutelonome 8:3-5, 14-16; Iosua 24:5-7) I te okomaiga o te taimi ke fakatakavale ei ne te kau Isalaelu a te fenua malosi ko Kanana kae ulu atu ki loto i te Fenua o te Folafolaga, ne lavea ei ne Iosua mo nisi tino Isalaelu a te ‵lago atu o te Atua telā e tapuaki latou ki ei ki te galuega tenei.—Iosua 10:14, 42.
6. Se a te mea ka fesoasoani atu ki a koe ke ati aka se manakoga ke tavini atu ki te Atua?
6 Ne iloa ne Iosua me ne tausi eiloa a Ieova ki Ana folafolaga. Tela la, ne fai atu ei a Iosua: “Ka ko au mo toku kāiga, e tavini eiloa matou ki te Aliki [ko Ieova].” (Iosua 24:15) Kae e a koe? Kafai e mafaufau koe ki tautoga kolā ko oti ne fakataunu ne te Atua tonu mo tautoga kolā ka fakataunu ne ia, e mata, e manako koe o tavini atu ki a ia e pelā mo Iosua?
7. Kaia e tāua ei a te papatiso ki te vai?
7 A te mafaufau ‵loto ki galuega a Ieova ko oti ne fai mo ana folafolaga‵gali kae fakatuagagina katoatoa, e ‵tau o fai ei ke gasue‵sue tatou o tuku atu ‵tou ola ki a Ieova kae ke fakamailoga te mea tenā e auala i te papatisoga ki te vai. A te papatisoga se lasaga tāua telā e ‵tau o fai ne tino kolā e ma‵nako o tavini ki te Atua. E fakaasi manino mai te mea tenei ne te ‵tou Fakaakoakoga sili, ko Iesu. Mai mua o kamata tena galuega e pelā me ko te Mesia, ne fanatu tou tagata ki a Ioane te Papatiso ke papatiso a ia. Kaia ne fai ei ne Iesu a te mea nei? Ne fai mai a Iesu fakamuli ifo: “Me i a au ne seki fanaifo mai te lagi o fai te mea e loto eiloa au ki ei, kae ne fanaifo au o fai te mea e loto ki ei te tino telā ne uga mai ne ia au.” (Ioane 6:38) Ko te mea ke fakailoga tena tukuatuga ke fai te loto o tena Tamana, ne papatiso ei a Iesu.—Mataio 3:13-17.
8. Kaia ne fakaiku aka ei ne Timoteo ke tapuaki atu a ia ki te Atua, kae ne a mea e mafai o fai ne koe?
8 Ke mafaufau foki ki te tala o Timoteo, se talavou Kelisiano telā ne tuku atu ne Ieova ki ei a galuega mo tauliaga e uke. Kaia ne fakaiku aka ei ne Timoteo ke tapuaki atu a ia ki te Atua tonu? E fai mai te Tusi Tapu me ‘ne akoako atu ki a ia a mea kae ne talitonu foki ki ei.’ (2 Timoteo 3:14) Kafai ko oti ne sukesuke koe ki te Muna a te Atua kae talitonu me e ‵tonu ana akoakoga, ko ‵pau eiloa koe mo Timoteo. Nei la, e manakogina ke fai sau fakaikuga. Kaia e se faipati ei koe ki ou mātua e uiga ki te mea e manako koe o fai? Fakatasi mo toeaina i te fakapotopotoga, ka fesoasoani atu ou mātua ke malamalama koe i manakoga faka-te-Tusi Tapu e uiga ki te papatisoga.—Faitau te Galuega 8:12.
9. E mafai pefea o pokotia a nisi tino māfai ko papatiso koe?
9 Kafai ko papatiso koe, ka fai eiloa te mea tenā e pelā me se kamataga tafasili i te ‵lei i te tavini atu ki te Atua tonu. Mai te faiga o te mea tenei, ko kau atu ei koe ki se fakatau‵telega loa telā ka maua ei te taui ko te ola se gata mai mo te fiafia telā ka maua nei mai te faiga o te loto o te Atua. (Epelu 12:2, 3) Ka avatu foki i ei ne koe te fiafia ki tino o tou kāiga kolā ko ‵nofo i loto i te fakatau‵telega tenei mo ou taugasoa i te fakapotopotoga Kelisiano. Ako te ‵toe mea tāua, ko te fai ne koe a te loto o Ieova ke fiafia. (Faitau te Faataoto 23:15.) E tonu, kāti ka se maina a nisi tino e uiga ki te pogai o tau fakaikuga ke tapuaki atu ki a Ieova, kae kāti ka se fia‵fia latou ki ei. Kāti ka ‵teke atu foki latou ki a koe. Kae ka mafai eiloa o fakafesagai atu koe ki tofotofoga konei mo te manuia.
Kafai ko se Fia‵fia kae ‵Teke Atu a Nisi Tino ki a Koe
10, 11. (a) Ne a fesili e mafai o fesili atu ne tino e uiga ki tau fakaikuga ke tavini atu ki te Atua? (e) Se a te mea e tauloto ne koe mai te auala ne tali atu ei a Iesu ki fesili e uiga ki te tapuakiga tonu?
10 E mafai o ‵numi ou taugasoa i te akoga, ou tuakoi mo ou kāiga i tau fakaikuga ke tavini atu ki a Ieova. Kāti e fia iloa ne latou te pogai ne filifili ei ne koe ke tautali atu i te auala tenei kae ka fia iloa ne latou ou tailtonuga. Ka saga atu pefea koe ki ei? E tonu, e ‵tau o iloilo aka ne koe ou mafaufauga mo lagonaga ko te mea ke mafai ne koe o fakamatala atu a pogai e uiga ki tau filifiliga. Kae i te tali atu ki fesili e uiga ki ou talitonuga, a te fakakoakoga a Iesu ko te ‵toe auala sili ke tau‵tali ki ei.
11 I te taimi ne fesili atu ei a takitaki lotu Iutaia ki a Iesu e uiga ki te toetuga, ne siki atu ne ia se tusi faitau e uiga ki ei. (Esoto 3:6; Mataio 22:23, 31-33) I te taimi ne fesili atu ei se faiakoga o te tulafono me se a te ‵toe tulafono tafasili i te tāua, ne siki atu ne ia a fuaiupu mai te Tusi Tapu kolā e fetaui ‵lei. Ne loto fakafetai a te tagata tenā mō te tali a Iesu. (Levitiko 19:18; Teutelonome 6:5; Maleko 12:28-34) A te auala ne fakaaogā ei ne Iesu te Tusi Tapu mo te faiga o ana pati ne “kese‵kese ei manatu o tino e uiga ki a ia,” kae ne seki mafai ne tino ‵teke o fakalogo‵mae atu ki a ia. (Ioane 7:32-46) Kafai e tali ne koe a fesili e uiga ki tou talitonuga, fakaaogā te Tusi Tapu kae tali atu i te “loto maulalo mo te āva.” (1 Petelu 3:15,16) Kafai e se iloa ne koe te tali ki se fesili, fakaasi ‵tonu atu te mea tenā kae fakailoa atu me ka fai ne koe se sukesukega ki ei. Fakamuli, ko onoono ei koe ki te mataupu tenā mai te fakaaogāga o te Watch Tower Publications Index io me ko te Watchtower Library i te CD-ROM māfai e isi i tau ‵gana. Mai te fakatoka faka‵lei, ka iloa ei “ne koutou o tali atu ki so se tino e fesili mai ki a koutou.”—Kolose 4:6.
12. Kaia e se ‵tau ei o talia ne koe a fakasauāga ke fakavāivāi atu ki a koe?
12 E mafai o fakafesagai atu koe ki fesili e uke e uiga ki tau fakaikuga ke tavini atu ki te Atua e pelā foki mo ou talitonuga. A te tonuga loa, e iloa ne tatou me i te fili o te Atua, ko Satani te Tiapolo, e pule ne ia te lalolagi kātoa. (Faitau te 1 Ioane 5:19.) Se mea se tonu ke fakamoemoe koe ke talia ne tino katoa au fakamatalaga, kae e mafai eiloa o fetaui koe mo ‵tekemaiga. Kāti ka ‘faifai muna atu ki a koutou,’ a nisi tino kae ka tumau eiloa latou i te fai penā. (1 Petelu 4:4) Kae ke masaua me e se ko koe fua tokotasi e fai penā. Ne logo‵mae foki a Iesu Keliso i fakasauāga. Ne fai foki penā te apositolo ko Petelu, kae ne tusi mai, penei: “Oku taugasoa pele, sa ‵poi otou loto i te tofotofoga faigata tenā ko fetaui mo koutou, e pelā me se mea fou fatoā oko atu ki a koutou. Kae e ‵tau mo koutou o fia‵fia i te mea e ‵kau fakatasi koutou ki puapuagā o Keliso.”—1 Petelu 4:12,13.
13. Kaia e fia‵fia ei a Kelisiano māfai e fakasauāgina latou?
13 A te kufaki i fakasauāga mo ‵tekemaiga e pelā me se Kelisiano se pogai e tasi ke fia‵fia ei. Kaia? Me i te mauaga o te taliaga a te lalolagi e fakaasi atu ei me e ola eiloa koe e ‵tusa mo tulaga o Satani— kae se ko tulaga o te Atua. Ne polopoloki mai a Iesu: “Ka‵lofa i a koutou manafai a tino katoa e tavae e uiga mō koutou; me i olotou tupuna ne fai‵pati foki ne latou a mea foki eiloa konā ki pelofeta ‵loi.” (Luka 6:26) E fakaasi mai i fakasauāga me e kaitaua eiloa a Satani mo tena lalolagi ki a koe ona me ko tavini atu koe ki a Ieova. (Faitau te Mataio 5:11, 12.) Kae ko ‘fakamaseiga mō te igoa o Keliso’ se mea telā e fakafiafia ne ia koe.—1 Petelu 4:14.
14. Ne a mea aogā e mafai o maua māfai e tumau se tino i te fakamaoni ki a Ieova faitalia a fakasauāga?
14 Kafai e tumau tou fakamaoni ki a Ieova faitalia a ‵tekemaiga, e fa a mea aogā e mafai o maua. E avatu ne koe se molimau e uiga ki te Atua mo tena Tama. E fakamalosi aka ne tou kufaki mo te fakamaoni a taina mo tuagane. E mafai o fakamalosi atu ki tino kolā e se iloa ne latou a Ieova ke gasue‵sue o ‵sala atu ki a ia. (Faitau te Filipi 1:12-14.) Kae kafai ko matea ne koe te auala e tuku mai ei ne Ieova te malosi ke kufaki koe i tofotofoga, ka fanaka eiloa o lasi tou alofa mō ia.
E “Uke Avanoaga” e Ma‵tala mai ki a Koe
15. Ne a ‘avanoaga uke’ ne ‵tala atu ki te apositolo ko Paulo?
15 E uiga ki tena galuega i Efeso, ne tusi mai te apositolo ko Paulo: “Me uke avanoaga konei mō te galuega a te Atua” ke fai ne au. (1 Kolinito 16:8, 9) Se avanoaga lasi ‵ki ke talai atu te tala ‵lei kae fai a soko i te fa‵kai tenā. Mai te taliaga o te avanoaga tenā, ne fesoasoani atu a Paulo ki tino e tokouke ke tauloto e uiga ki a Ieova kae tapuaki atu ki a Ia.
16. Ne ulu atu pefea a te kau fakaekegina ki se “mataloa” i te 1919?
16 I te 1919 ne ‵tala ei ne Iesu Keliso i tona ‵malu fakatupu se “mataloa” i mua o te kau fakaekegina. (Fakaasiga 3:8) Ne ulu atu latou i te mataloa tenā kae kamata o talai atu te tala ‵lei, akoako a te munatonu mai te Tusi Tapu mo te loto finafinau i lō taimi mua. Se a la te ikuga o te lotou galuega? Ko oko atu nei te tala ‵lei ki te lalolagi kātoa, kae ko ‵tusa mo se fitu miliona o tino ko fakamoe‵moe ke maua ne latou te ola se gata mai i te lalolagi fou a te Atua.
17. E mafai pefea o fakaaogā ne koe a ‘avanoaga e uke mō te galuega a te Atua?’
17 E “uke avanoaga konei mō te galuega a te Atua” koi ‵tala mai eiloa ki tavini katoa a Ieova. A latou kolā e fakaaogā ne latou e maua ne latou te fiafia mo te lotomalie i te faiga o olotou tusaga e uke i te talaiatuga o te tala ‵lei. A koutou e tavini talavou a Ieova, e pefea te fakatāua ne koutou a te tauliaga lasi tenei ke fesosoani atu ki nisi tino ke “tali‵tonu ki te Tala ‵Lei!”? (Maleko 1:14,15) Kai mafaufau koe o paenia tumau io me paenia lagolago? E aofia i avanoaga kolā e ma‵tala mai ki tino e tokouke ko te galuega fakatu‵tu Kingdom Hall, galuega i te Peteli, mo te galuega fakamisionale. Ona ko te mea ko pili o palele atu te lalolagi masei a Satani, e tāua ‵ki ke aofia koutou i vaega o te taviniga o te Malo kolā e manakogina ke fai i aso katoa. E mata, ka fakaaogā ne koe ‘avanoaga e uke mō te galuega a te Atua’ konā a koi lava te taimi?
“Tofotofo Aka ke Matea Atu i a Ieova e ‵Lei”
18, 19. (a) Se a te mea ne fesoasoani atu ke maua ne Tavita se manakoga lasi ke tavini atu ki a Ieova? (e) Se a te mea e fakaasi mai me ne seki salamo lele a Tavita i tena taviniga ki te Atua?
18 E ‵kami ne te faisalamo telā ne fakaosofia a nisi tino ke “tofotofo aka ke matea atu me i a Ieova e ‵lei.” (Salamo 34:8, NW) I te taimi koi fai ei a te tupu o Isalaelu i aso mua ko Tavita e pelā me se tamaliki tausi mamoe, ne puipui ne Ieova a ia mai manu fe‵kai o te vao. Ne ‵lago atu te Atua ki a ia i te lā tauaga mo Koliata kae fakasao a ia mai nisi mea faiga‵ta e uke. (1 Samuelu 17:32-51; Salamo 18) Ona ko te lasi o te alofa atafai o te Atua, ne otia ei te loto o Tavita ke tusi mai penei: “Te Aliki te motou Atua [ko Ieova], ko oti ne fai ne koe mea e uke mō matou; e seai se tino e ‵pau mo koe! Ko oti ne fai ne koe a fuafuaga ‵gali mō matou.”—Salamo 40:5.
19 Ne ‵poko malosi te alofa o Tavita ki a Ieova kae ne manako a ia o tavae a te Atua mo tena loto mo te mafaufau kātoa. (Faitau te Salamo 40:8-10.) Ne seki salamo lele eiloa a Tavita i te fakamāumāuga o tena olaga kātoa o tapuaki atu ki te Atua tonu. A tena taviniga ki te Atua ko tena toe kope tāua— ko te pogai o tena fiafia telā e seai sena nafa. I te taimi ko matua ei, ne fai mai a Tavita: “Te Aliki, ko koe fua toku fakamoemoega, au ne fakatuanaki eiloa ki a koe mai taku folikiga. Te Atua, au nei ko matua, mo toku ulu ko sinā, sa tiakina mai au!” (Salamo 71:5, 18) Ne talitonu a Tavita ki a Ieova kae ne gasolo o malosi atu te lā vā fakataugasoa, faitalia te fanaifo ki lalo o tena malosi faka-te-foitino.
20. Kaia e fai ei a te taviniiga ki te Atua e pelā me ko te ‵toe auala sili ke fakaaogā ki ei tou olaga?
20 E fakamaoni mai i olaga o Iosua,Tavita mo Timoteo me i te tavini atu ki a Ieova ko te ‵toe auala sili ke fakaaogā ki ei tou olaga. A mea aogā se tumau kolā e maua i te lalolagi nei e se tāitāi o fetaui mo mea aogā tumau kolā ka maua ne tatou mai te ‘tavini atu ki a Ieova mo ‵tou loto kātoa mo ‵tou agaga kātoa.’ (Iosua 22:5) Kafai e seki tuku atu koe ki a Ieova e auala i te ‵talo, fesili ifo ki a koe eiloa, ‘Se a te mea e taofi ne ia au mai te fai mo fai se Molimau a Ieova?’ Kafai ko oti ne fai koe mo fai se tino papatiso telā e tapuaki ki a Ieova, e mata, e fiafia koe ke momea aka tou fiafia i te olaga? Tela la, ke fakalauefa aka tau galuega, kae tumau i te gasolo ki mua e pelā me se Kelisiano. Ka fakaasi mai i te suā mataupu te auala e mafai ei o gasolo koe ki mua i te feitu faka-te-agaga mai te tautali atu i te fakakoakoga a te apositolo ko Paulo.
Ka Tali Mai Koe Pefea?
• Ke taku mai ne pogai e lua e ‵tau ei o tavini atu tatou ki te Atua.
• Se a te mea ne fesoasoani atu ke fai ne Timoteo se fakaikuga ke tavini atu ki te Atua?
• Kaia e ‵tau ei o tu ‵mautakitaki māfai ko fe‵paki koe mo fakasauāga?
• Ne a avanoaga mō te taviniga e mafai o ‵tala atu ki a koe?
[Fakamatalaga o te Ata i te itulau e 23]
A te tavini atu ki a Ieova ko te ‵toe auala sili i te olaga
[Fakamatalaga o te Ata i te itulau e 24]
E mata, e mafai o tali ne koe a fesili e uiga ki tou talitonuga?