Te ‵Toe Fanau Fou—Se Filifiliga Totino?

KO OI eiloa e pogai mai i ei te ‵toe fanau fou? Kafai e fakamalosi atu latou ki olotou tino fakalogo‵logo ke fai mo fai ne Kelisiano kolā e toe fa‵nau mai, e siki atu ne nisi faifeau a pati konei a Iesu: “E ‵tau mo koutou ke toe fa‵nau mai.” (Ioane 3:7) E fakaaoga ne nisi faifeau penā a pati konei e pelā me se fakatonuga, mai te fai atu penei, “Ke toe fanau mai!” E talai atu ne latou me e ‵tau eiloa o filifili ne tino tali‵tonu taki tokotasi ke faka‵logo ki a Iesu kae ke fai a mea kolā e ‵tau o fai ke oko atu ki te toe fanau fou. E ‵tusa mo vaegā fakamatalaga penā, a te toe fanau fou se filifiliga totino. Kae e mata, e fetaui ‵lei a te kilokiloga tenā mo pati ne fai atu ne Iesu ki a Nikotemo?

A te faitau faka‵lei ki pati a Iesu e fakaasi mai i ei me ne seki tuku atu ne Iesu a te saolotoga ki te tino ke filifili aka ne ia me e mata ka toe fanau mai a ia io me ikai. Kaia e fai atu ei ne tatou te mea tenei? A te tugapati Eleni ne ‵fuli ki te “toe fanau mai” e mafai foki o ‵fuli ki te “e ‵tau o toe fanau mai luga.”a Tela la, e ‵tusa mo te suā ‵fuliga tenā, e māfua mai eiloa te toe fanau fou “mai luga”​​—telā ko te, “mai te Atua i te lagi,” io me mai “te Tamana.” (Ioane 19:11; Iakopo 1:17) E tonu, ne māfua mai eiloa i te Atua.​—1 Ioane 3:9.

Kafai e masaua ne tatou a te tugapati “mai te Atua i te lagi,” e sē se mea faigata ke malamalama i te pogai e se mafai ei o māfua mai i se tino tena fanau mai. Ke mafaufau aka e uiga ki te auala ne fanau ei koe. E mata, ne fai ne koe a te filifiliga ke fanau mai ei koe? E tonu, e se penā eiloa! Ne fanau mai koe ona ko te mea ne fakafua mai koe ne tou tamana. E penā foki loa, e mafai fua o toe fa‵nau mai tatou māfai e mafua mai i te Atua, te ‵tou Tamana faka-te-lagi, a te ‵toe fa‵nau mai o tatou. (Ioane 1:​13) Tela la, e tonu eiloa a te faimaiga a te apositolo ko Petelu: “Ke fakafetai tatou ki te Atua te Tamana o te tou Aliki ko Iesu Keliso! Ona ko te lasi o tona alofa ‵nau, ne tuku mai ei te ola fou.”​—1 Petelu 1:3.

E Mata, se Fakatonuga?

Kae kāti e fai mai a nisi tino, ‘Kafai e tonu me e se mafai o fakaiku aka ne se tino ke toe fanau mai a ia, kae kaia ne tuku atu ei ne Iesu a te fakatonuga: “E ‵tau mo koutou ke toe fa‵nau mai”?’ E tāua ‵ki eiloa a te fesili tenā. E se gata i ei, kafai e foliga mai me i pati a Iesu se fakatonuga, ko tena uiga ko faimalō ne ia tatou ke fai se mea telā e se mafai eiloa ne tatou o fai. E se ‵tagi ‵lei a te manatu tenā. Tela la, e ‵tau o pefea te ‵tou malamalama i te pati me e ‵tau mo koutou o “toe fa‵nau mai”?

A te onoono faka‵lei ki te fuaiupu tenā i te ‵gana mua e fakaasi mai me ne seki fakaaoga i ei a te veape telā e fakafoliga mai i ei me se fakatonuga. I lō te fai penā, e fakauiga loa a te tugapati tenā e pelā me se manatu. I nisi tugapati, i te taimi ne fai atu ei a Iesu me e ‵tau mo koutou o “toe fa‵nau mai,” ne taku atu fua ne ia se manatu tonu, kae e sē se fakatonuga. Ne fai mai a ia: “E manakogina ke toe fanau mai koe mai luga.”​—Ioane 3:​7, Modern Young’s Literal Translation.

Ke fai se fakamatalaga e uiga ki te ‵kese o te avā pati konei, fakatonuga mo te manatu, mafaufau ki se fakatusaga. Fakaataata i tou mafaufau se fa‵kai telā e uke a akoga i ei. E tasi mai i ei, ne fakatoka se akoga ke mafai o ‵nofo i ei a tamaliki kae e ‵tau fua o ‵kau ki ei a tamaliki tonu o te fenua kolā e ‵nofo ‵mao mai i te fa‵kai tenā. I te aso e tasi, ne fanatu se tamaliki tagata telā e sē se tino tonu o te fenua tenā o fakamolemole atu ki te pule faiakoga o te akoga tenā, “Au e fia tusi toku igoa ke kau atu ki tau akoga.” Kae ne fai atu te pule faiakoga ki a ia, “Ko te mea ke mafai koe o kau mai, e ‵tau o fai koe mo fai se tino tonu o te fenua.” E tonu, e se fai a pati a te pule faiakoga e pelā me se fakatonuga. E se fakatonu atu a ia ki te tamaliki tagata, “Ke na fai koe mo fai se tino o te fenua tenā!” I lō te fai penā, e fai atu a ia, “Ko te mea ke mafai koe o kau mai, e ‵tau o fai koe mo fai se tino o te fenua tenā.” Ne taku atu fua ne te pule faiakoga a te​—fakanofonofoga e manakogina ke kau atu ki te akoga tenā. E penā foki loa, i te taimi ne fai atu ei a Iesu “e ‵tau mo koutou ke toe fa‵nau mai,” ne taku atu fua ne ia a te manatu tonu​—telā e manakogina ke ‘ulu atu ei ki loto i te Malo o te Atua.’

A te ‵toe manatu tenā​—te Malo o te Atua​—e isi foki sena sokoga ki te suā vaega o te toe fanau mai. E fai ei ke mafau‵fau ki te fesili, Se a te pogai o te ‵toe fanau mai? A te iloa ne tatou a te tali ki te fesili tenā ko te kī ki te malamalama tonu i te uiga o te ‵toe fanau mai.

[Fakamatalaga mai lalo]

[Ata i te itulau e 6]

Ne a mea e tai ‵pau ei a te ‵toe fanau mai mo te fanau tonu mai?