Te ‵Toe Fanau Fou—E Pefea te Tāua?

I TENA sau‵talaga kātoa mo Nikotemo, ne faka‵mafa atu ne Iesu ki a ia a te tāua o te ‵toe fanau fou, io me ko te toe fanau mai. Ne fakamaina faka‵lei atu pefea ne ia a te mea tenā?

Mafaufau ki te auala ne faka‵mafa atu ei ne Iesu i te lā sau‵talaga mo Nikotemo a te tāua o te ‵toe fanau fou. Ne fai mai a ia: “Kafai e se toe fanau mai se tino, e se mafai eiloa o matea ne ia a te Malo o te Atua.” (Ioane 3:3) A pati ko te “kafai e se” mo te “e se mafai,” e fakamatala mai i ei a te manakogina o ‵te toe fanau fou. Ke fai se fakatusaga: Kafai e fai mai se tino, “Kafai e se maina mai te la, e se mafai o isi se ao,” e fakauiga a ia me e manakogina malosi eiloa a te mainaga mai te la i te ao. I se auala tai ‵pau, ne fai mai ne Iesu me e manakogina eiloa a te ‵toe fanau mai ke mafai ei o ‘matea atu a te Malo o te Atua.’

I te fakaotiga loa, ko te mea ke ave keatea so se manatu fakalotolotolua e uiga ki te mataupu tenei, ne fai atu a Iesu: “E ‵tau mo koutou ke toe fa‵nau mai.” (Ioane 3:7) E ‵tusa mo pati a Iesu, e manino ‵lei ei me i te toe fanau mai se mea e manakogina​—se mea e ‵tau o fai​—ke ‘ulu atu ei’ se tino ki te Malo o te Atua.​—Ioane 3:5.

Ona ko te mea ne fakatāua malosi eiloa ne Iesu a te ‵toe fanau fou, e ‵tau o fakamautinoa aka ne Kelisiano me e malamalama tonu latou i te mataupu tenei. E pelā mo te mea tenei, e mata, e mafaufau koe me e mafai o filifili aka ne se Kelisiano ke toe fanau mai a ia?

[Ko manatu tāua e 5]

“Kafai e se maina mai te la, e se mafai o isi se ao”