Te ‵Toe Fanau Fou Ne a Mea e Fakataunu Mai i ei?

KAIA ne fakaaoga ei ne Iesu a te tugapati ko te ‘fanau mai i te agaga,’ i te taimi ne faipati ei a ia e uiga ki te papatisoga ki te agaga tapu? (Ioane 3:5) Kafai e fakaaoga i se auala fakatusa, a te pati “fanau” e fakauiga ki te “kamataga,” e pelā mo te “fanau mai o se atufenua.” Tela la, a te tugapati ko te “‵toe fanau fou” e fakaasi mai i ei se “kamataga fou.” Tela la, a pati fakatusa ko te “fanau mai” mo te “‵toe fanau fou” e faka‵mafa mai i ei a te manatu me ka is se kamataga fou i te fesokotakiga o te Atua mo tino kolā e papatiso ki te agaga tapu. E tupu pefea te ‵fuliga katoatoa tenā i te lotou fesokotakiga mo te Atua?

I tena fakamatalaga ki te auala e fakatoka ei a tino ne te Atua mō te pulega i te lagi, ne fakaaoga ne te apositolo ko Paulo se tala fakatusa mai i te olaga faka-te-kāiga. Ne tusi atu a ia ki Kelisiano i ana aso me ka “fai” latou “mo tamapuke a te Atua,” tela la, ka fesokotaki atu te Atua ki a latou e pelā me “ko ana fanau.” (Kalatia 4:5; Epelu 12:7) Ke maina tatou i te auala e fesoasoani mai ei a te fakaakoakoga e uiga ki te tama puke, ke malamalama tatou i te vaegā ‵fuliga e ‵tau o tupu māfai ko papatiso se tino ki te agaga tapu, ke toe mafaufau ki te tala fakatusa e uiga ki se talavou tagata telā e manako o kau atu ki se akoga telā ne fakatoka fua mō tino o se fa‵kai e tasi tenā.

Se ‵Fuliga Telā ne Māfua Mai i te Pukega o se Tama

I te tala fakatusa, ne seki mafai o kau atu te talavou tenā ki te akoga me e se aofia a ia i tino o te fa‵kai tenā. Nei la, ke mafaufau me ko tupu se ‵fuliga lasi i se aso e tasi. Ko oti eiloa ne saina a ia ne se tamana o se kāiga mai i te fa‵kai tenā. E pokotia pefea te talavou tenā i te mea tenā? Ia, ona ko te mea ko oti ne saina a ia e pelā me se tama, ko maua nei ne ia a saolotoga kolā e ‵pau mo nisi talavou i te fa‵kai tenā​—e aofia i ei a te saolotoga ke kau atu ki te akoga. Ne ‵fuli katoatoa ne tena sainaga ana fakamoemoega.

E fakaasi mai i te mea tenei a mea kolā e ‵tupu i se auala tai fakaofoofogia atu ki tino kolā e aofia i te ‵toe fanau fou. Mafaufau ki nāi mea kolā e tai ‵pau ei. Ka taliagina te talavou tenā i te tala fakatusa ke kau atu ki te akoga māfai fua e fetaui a ia mo mea kolā e manakogina​— ko te fai mo fai se tino o te fa‵kai tenā. Kae ne seki mafai o fetaui ‵lei a ia eiloa mo te mea tenā. E penā foki a nisi tino kolā ka tuku atu se koga mō latou i te Malo o te Atua, io me ko te pulega faka-te-lagi, kae māfai fua e fetaui ‵lei latou ki mea e manakogina ke ulu atu ei latou​—telā e ‵tau o “toe fanau mai” latou. Kae ne seki mafai eiloa ne latou o fakafetaui aka ki te mea tenā me e fakalagolago ki te Atua ki te ‵toe fanau fou.

Se a te mea ne ‵fuli ei te tulaga o te talavou tenā? Ko te sainaga o te tamaliki tenā. E tonu, ne seki ‵fuli i ei a foliga mo uiga o te talavou. Mai tua o tena sainaga, koi tumau eiloa a mea katoa e uiga ki a ia. Kae mai tua ko oti ne fai a mea katoa e uiga ki te sainaga o se tamaliki, ko maua ei ne te talavou tenei se tulaga fou. A te ‵tonuga loa, ko maua ne ia se kamataga fou​—ko te ‵toe fanau fou, i se auala fakatusa. Ne fai a ia mo fai se tama, telā ne maua ei ne ia te saolotoga ke kau atu ki te akoga kae ke fai mo fai se vaega o te kāiga o tena tamana puke.

E penā foki loa, ne ‵fuli ne Ieova te tulaga o se potukau o tino sē ‵lei katoatoa mai i te faiga o mea e ‵tau o fai e ‵tusa mo te tulafono ke puke ne ia latou e pelā me ne tamaliki. Ne tusi atu ki taina tali‵tonu a te apositolo ko Paulo, telā ne aofia i te potukau tenā, penei: “Me i te agaga telā ne tuku atu ne te Atua ki a koutou, . . . ne fai ne ia koutou ke fai mo tamapuke a te Atua, kae i te ‵mana o te agaga e ka‵laga ei tatou ki te Atua penei, ‘Tamana! Toku Tamana!’ Ko te agaga eiloa telā e molimau mai ki agaga o tatou, me i a tatou ko fanau a te Atua.” (Loma 8:​15, 16) E tonu, e auala i te sainaga o se tamaliki, ne iku atu ei a Kelisiano konā ki te fai mo fai ne vaega o te kāiga o te Atua, io me ko “tamaliki a te Atua.”​—1 Ioane 3:​1, 2; 2 Kolinito 6:​18.

E tonu, a te pukega o tino konā ne te Atua ne seki ‵fuli i ei olotou uiga mo foliga, me koi sē ‵lei katoatoa eiloa latou. (1 Ioane 1:8) E tiga eiloa te feitu tenā, e pelā mo nisi fakamatalaga a Paulo, mai tua o te faiga o mea katoa e ‵tau o fai ki te pukega o tamaliki, ne maua ei ne latou se tulaga fou. I te taimi foki eiloa tenā, ne ‵toki ne te agaga o te Atua i tama puke konā a te talitonuga malosi me ka ‵nofo fakatasi latou mo Keliso i te lagi. (1 Ioane 3:2) A te loto talitonu katoatoa telā ne māfua mai i te agaga tapu ne tuku atu ei ki a latou se kilokiloga fou e uiga ki te olaga. (2 Kolinito 1:​21, 22) E tonu, ne maua eiloa ne latou se kamataga fou​—te ‵toe fanau fou, i se auala fakatusa.

I te faipati mai e uiga ki tama puke a te Atua, e fai mai te Tusi Tapu: “Ka fai latou mo faitaulaga a te Atua mo Keliso, kae ka pule fakatasi latou mo ia i te afe o tausaga.” (Fakaasiga 20:6) Ka maua fakatasi ne tama puke a te Atua mo Keliso se koga e pelā me ne tupu i te Malo o te Atua, io me ko te pulega faka-te-lagi. Ne fai atu a te apositolo ko Petelu ki taina tali‵tonu, me e maua ne latou “te koga telā e se oko ki ei te pala, te masei mo te magemage” kae e “tausi ne ia i te lagi” mō latou. (1 Petelu 1:​3, 4) Se tinā fakamanuiaga tāua ‵ki eiloa!

Kae e sae aka foki se fesili i te mataupu tenei e uiga ki te pulega. Kafai a tino kolā e ‵toe fanau mai ka pule e pelā me ne tupu i te lagi, ko oi la ka pule atu latou ki ei? Ka fakamatala mai te tali ki te fesili tenā i te mataupu telā e ‵soko mai.

[Ata i te itulau e 10]

Ne a pati a Paulo e uiga ki te pukega o se tamaliki?