Ke Fakapili‵pili Atu ki te Atua

E Tuku Mai ne Ieova ki a Tatou se Filifiliga

Teutelonome 30:​11-20

NE NOFO faeloa au o mafaufau me e se mafai ne au o fakamaoni ki a Ieova.” Ne fakamatala mai se fafine Kelisiano me i ana mafaufauga ma‵sei e pelā me se tamaliki e fai ei ke masei a ia. E mata, e penā eiloa te manatu? E mata, e fai tatou e pelā me ne tino kolā e se mafai o maua se fesoasoani ki ei? Ikai. Ne tuku mai ne Ieova a te meaalofa ko te saolotoga, ko te mea ke mafai ne tatou o fai a filifiliga e uiga ki te auala ka ola ei tatou. E manako a Ieova ke fai ne tatou a filifiliga ‵tonu, kae e fakamatala mai ne tena Muna ko te Tusi Tapu a te auala e mafai ei ne tatou o fai a te mea tenā. Ke mafau‵fau ki pati a Mose, kolā e maua ne tatou i te Teutelonome mataupu e 30.

E mata, se mea faigata ke iloa ne tatou a te mea e manako ki ei te Atua kae ke fai ne tatou?a E fai mai a Mose: “A te fakatonuga tenei e avatu ne au i te aso nei e se faigata, e mafai eiloa ne koutou o fai.” (Fuaiupu e 11) E se mafai o fakamolemole mai a Ieova ke fai ne tatou a mea kolā e se mafai ne tatou o fai. E aoga kae e mafai eiloa o fai a mea kolā e manako a ia ki ei. Kae e mafai foki o iloa ne tatou a mea konā. E se manakogina ke olo atu tatou ki “luga i te lagi” io me ke faima‵laga atu ki te “suā feitu o te moana” ko te mea ke tauloto ne tatou a mea e manako ki ei a Ieova. (Fuaiupu e 12, 13) E fakaasi manino mai ne te Tusi Tapu a te auala e ‵tau ei mo tatou o ola.​​—⁠Mika 6:⁠8.

Kae e se faimālō ne Ieova tatou ke faka‵logo ki a ia. E fai mai a Mose: “Ko tuku atu ne au ke filifili koutou i mea konei, te ‵lei me ko te masei, te ola me ko te mate.” (Fuaiupu e 15) E maua ne tatou a te saolotoga ke filifili ne tatou a te ola io me ko te mate, te ‵lei io me ko te masei. E mafai o filifili ne tatou ke tapuaki kae faka‵logo ki te Atua telā e maua i ei a fakamanuiaga, io me se faka‵logo ki a ia kae ke logo‵mae i ikuga o te mea tenā. E fai eiloa ne tatou a te filifiliga ki auala e lua konei.​​—⁠Fuaiupu e 16-​18; Kalatia 6:​7, 8.

E mata, e tāua ki a Ieova a te auala telā e filifili ne tatou? Ao, e tāua ‵ki! Ne fakaosofia ne te Atua a Mose ke fai mai penei: “Ko te ola e ‵tau o filifili ne koutou.” (Fuaiupu e 19) Kae e mafai la pefea o filifili ne tatou a te ola? Ne fakamatala mai a Mose: “Alofa ki te Aliki te otou Atua, faka‵logo ki a ia kae tali‵tonu ki a ia.” (Fuaiupu e 20) Kafai e a‵lofa tatou ki a Ieova, ka ma‵nako tatou o faka‵logo ki a ia kae ‵piki ‵mau kae a‵lofa fakamaoni foki tatou ki a ia faitalia me ne a mea e ‵tupu. E auala i te vaegā olaga tenā, e filifili ne tatou te ola​—⁠ko te ‵toe olaga ‵lei i te vaitaimi nei fakatasi mo te fakamoemoega ko te ola se-gata-mai i te lalolagi fou a te Atua.​—⁠2 Petelu 3:​11-​13; 1 Ioane 5:⁠3.

E akoako mai i pati a Mose a te munatonu fakamalosi loto. Faitalia me ne a mea e ‵tupu ki a koe i te lalolagi masei tenei, a koe e sē se tino fakaalofa: e se malaia foki koe. Ne faka‵malu ne Ieova koe ki te meaalofa ko te saolotoga. E tonu, e mafai ne koe o filifili ke alofa ki a Ieova, ke fakalogo ki a ia, kae ke tumau foki tou alofa fakamaoni ki a ia. Kafai e fai ne koe se vaegā filifiliga penā, ka fakamanuia ne Ieova au taumafaiga.

A te munatonu tenei​—⁠me e maua ne tatou te saolotoga ke fai ‵tou filifiliga ke a‵lofa kae tavini atu ki a Ieova​—⁠ne fakamafanafana atu ki te fafine telā ne fai mai ana pati i te kamataga. E fai mai a ia: “E alofa eiloa au ki a Ieova. I nisi taimi, e puli i a au me i te ‵toe mea tāua ko te manatu tonu me e alofa eiloa au ki a Ieova. Tela la e mafai eiloa o fakamaoni au.” E mafai ne koe o fai a te mea tenā fakatasi mo te fesoasoani o Ieova.

[Fakamatalaga mai lalo]