Mai lalo i te pulega a te Atua, ne ‵kau fakatasi a mea katoa ne faite kae ola mo te filemu

Kaia e Ma‵nako ei Tatou ki te Malo o te Atua?

I te kamataga o tala fakasolopito o tino e tokotasi fua te Pule, ko te ‵tou Mafuaga, telā ko Ieova tena igoa. Ne pule mai a ia mo te alofa. Ne faite ne ia se koga gali mō ‵nofo a tino, telā ko te fatoaga o Etena. Ne tuku atu foki ne ia ki a latou a meakai e uke ‵ki. E se gata i ei, ne tuku atu foki ne ia ki tino a galuega aoga ke fai ne latou. (Kenese 1:28, 29; 2:8, 15) Moi fai ne talia ne tino te pulega alofa a te Atua penei e ola nei latou mo te filemu.

Ko Atamu e puke ne ia te fuagalakau ne fakatapu ma ‵kai lāua ki ei telā ne tuku atu ne Eva. — Ne ‵teke a tino muamua ki te Atua e pelā me ko te lotou Pule

E fakaasi mai i te Tusi Tapu me i te agelu ‵teke, telā ne fakaigoa fakamuli ki a Satani te Tiapolo, ne ‵teke atu ki te saolotoga o te Atua ke pule. Ne fai mai a ia me ka fia‵fia atu a tino e aunoa mo te takitakiga mo te pulega a te Atua. Se mea fakafanoanoa me ne tau‵tali a ‵tou mātua muamua ko Atamu mo Eva i te mea ne fai ne Satani kae ‵teke atu ki te Atua.—Kenese 3:1-6; Fakaasiga 12:9.

Ona ko te ‵teke atu o Atamu mo Eva ki te Atua telā ko te lā Pule, ne galo atu ei te koga ‵nofo gali o lāua ko te Palataiso mo te fakamoemoega ke ola lāua ki te se-gata-mai e aunoa mo ne masaki. (Kenese 3:17-19) Ne pokotia foki lā tama‵liki kolā ne fa‵nau fakamuli mai i te fakaikuga ne fai ne lāua. E fai mai te Tusi Tapu me ona ko te agasala a Atamu, “ne oko mai ei te agasala ki te lalolagi, mo te mate e auala i te agasala.” (Loma 5:12) Ne iku atu foki te agasala ki se suā mea matagā: “Te taimi ne pule ei te tagata ki te suā tagata kae logo‵mae i ei.” (Failauga 8:9) I nisi tugapati, kafai e pule atu a tino ki a latou eiloa, ka isi faeloa ne fakalavelave.

KO KAMATA A PULEGA A TĀGATA

Ko Nimalota e tu mo te fakamatamata. I ana tua, ko tino e faite se fale. — Nimalota ne ‵teke ki a Ieova

A te tino muamua ke fai pelā me se pule telā ne taku mai i te Tusi Tapu ko Nimalota. Kae ne ‵teke atu a ia ki te pulega a Ieova. Kamata mai i a Nimalota, ne fakaaoga ‵se faeloa ne tino pule olotou tulaga pule. I se 3,000 tausaga ko ‵teka, ne tusi mai te Tupu ko Solomona: “Ne lavea ne au a loimata o tino ne fakasauagina, kae e seai se tino ke fakamafanafana atu ki a latou. Kae e maua ne olotou pule fakasaua a te malosi.”—Failauga 4:1.

E penā foki loa i aso nei. I te 2009, e fai mai se tusi a Malo ‵Soko, me i pulepulega ma‵sei e foliga mai pelā me ko te “pogai e tasi e ‵tupu ei a fakalavelave ma‵sei i te olaga nei.”

TENEI TE TAIMI KE NA GA‵SUE!

E ma‵nako te lalolagi ki ne pule tai ‵lei atu mo se malo tai ‵lei atu. Kae tenā loa te mea ne tauto mai ki ei te ‵tou Mafuaga!

Ata: Ikuga o pulega a tāgata. 1. Se fafine Asia e sagasaga i se auala lailai kae puke tena tamaliki e tagi. 2. Se toeaina masaki i tena moega i te fakaimasaki. 3. Ne sotia e fanafana i te taua. 4. Ne tino ‵teke kaitāua e paka‵laga valevale kae puke a faka‵pulaga i olotou lima. 5. Se fafine mo tena tama e ‵kilo atu ki te kilasi o te lotou mataloa e mafā. 6. Se fakai e ‵fonu i pefu mo koga e au mai ei a ausaga mo uaea o iti. — Ke oko ki toe malo ‵lei eiloa o tino, ne seki mafai ne latou o faka‵lei a fakalavelave faiga‵ta o tino

Ko oti ne fakatu aka ne te Atua se Malo, io me se pulega, telā ka sui ne ia a pulega katoa a tāgata, kae “ka tumau eiloa a te malo tenā ki te se-gata-mai.” (Tanielu 2:44) Tenei te Malo e ‵talo faeloa ki ei te fia miliona o tino. (Mataio 6:9, 10) Kae e se ko te Atua ka pule ki te malo tenei. Ko oti ne fili ne ia se tino telā ne ola pelā me se tagata ke fai mo Pule. Ko oi te tino ne fili ne te Atua?