Fai au Sukesukega Kae Fakaasi Atu ki Nisi Tino

E maua ne tatou te malosi fou ma fai a ‵tou sukesukega ki te Tusi Tapu, kae e sili atu la te fakamalosi loto māfai ko fakaasi atu ne tatou a ‵tou taemani faka-te-agaga ne maua ki nisi tino. E fai mai te Faataoto 11:​25, penei: “So se tino e fakamalosi ne ia nisi tino ka maua ne ia a fakamalosiga.”

Kafai e fakaasi atu a ‵tou mea e tauloto ki nisi tino, ka faigofie ke masaua ne tatou kae fesoasoani mai ke ‵poko te ‵tou malamalama. Kae ona ko te mea e aoga a manatu konā ki nisi tino, ka fai foki ei ke fia‵fia tatou o fakaasi atu a taemani tāua konā ki a latou.—Galu. 20:35.

Tofotofo aka te mea tenei: I te vaiaso ma vau, ‵sala ki se avanoaga ke fakaasi atu au mea ne tauloto ki se tino. E mafai o sau‵tala ki ei mo sou kāiga, se tino i te fakapotopotoga, se tino e ga‵lue tasi koulua, se tamaliki akoga, se tuakoi io me se tino e fetaui mo koe i te galuega talai. Taumafai o fakaasi atu a fakamatalaga konā i au pati totino i se auala faigofie kae manino.

Ke masaua: Fakaasi atu au mea e tauloto ke fakamalosi aka ei nisi tino, kae e se fai i ei ke ofo fua latou.—1 Koli. 8:1.