Ke ‵Sala Muamua Faeloa Ki “Tena Amiotonu”

“Ke mua koutou o ‵sala tena Malo mo tena amiotonu; kae ka fakaopoopo atu a mea katoa konā ki a koutou.”​—MATAIO 6:33.

1, 2. Se a te amiotonu o te Atua, kae e fakavae ki te a?

“KE MUA koutou o ‵sala tena Malo.” (Mataio 6:33) A te fakamalosiga a Iesu tenei i tena Lauga i luga i te mauga e lauiloa i Molimau a Ieova i aso nei. E taumafai eiloa tatou o fakaasi atu i feitu katoa o ‵tou olaga, me e fia‵fai malosi tatou ki te Malo tenā kae e ma‵nako foki tatou ke a‵lofa fakamaoni ki ei. Kae e ‵tau foki o tausi i ‵tou mafaufau a te lua o vaega o ana pati konei, “mo tena amiotonu.” Se a te amiotonu o te Atua, kae se a te uiga ke ‵sala muamua ki ei?

² A pati i te ‵gana mua mō te “amiotonu” e mafai foki o fakauiga ki “fakamasinoga ‵tonu” io me ko te “fai mea tonu.” Tela la, a te amiotonu o te Atua ko te fai mea tonu e ‵tusa mo ana tulaga amio‵tonu. E pelā me ko te Mafuaga, e nofo mo Ieova a te aiā ke fakatoka ne ia a te tulaga e uiga ki te mea ‵lei mo te mea masei, te mea tonu mo te mea ‵se. (Fakaasiga 4:11) Kae ko te amiotonu o te Atua e sē se fakasologa loa o tulafono mo fakatonuga ma‵keke. Kae e fakavae eiloa tena amiotonu ki uiga o Ieova e pelā mo te faiga o fakamasinoga ‵tonu, fakatasi mo te alofa, tena poto, mo tena ‵mana. Tela la, e ‵soko fakatasi a te amiotonu o te Atua mo te faiga o tena loto mo tena fuafuaga. E aofia i ei a mea kolā e fakamoemoe a ia ke fai ne tino kolā e ma‵nako o tavini atu ki a ia.

3. (a) Se a te uiga ke ‵sala muamua ki te amiotonu o te Atua? (e) Kaia e ‵lago atu ei tatou ki tulaga amio‵tonu kae ‵lei katoatoa o Ieova?

³ Se a la te uiga ke ‵sala muamua ki te amiotonu o te Atua? A te tali faigofie ki ei, ko te faiga o te loto o te Atua ko te mea ke fakafiafia atu ki a ia. E aofia i te ‵sala atu ki tena amiotonu a te taumafai o ola e ‵tusa mo ana tulaga ‵lei katoatoa kae e se ko ‵tou tulaga. (Faitau te Loma 12:2.) E aofia i te vaegā olaga tenei a te ‵tou fesokotakiga totino mo Ieova. E se ko te faka‵logo fua ki ana tulafono ona ko te ma‵taku i a tatou ma fakasala. I lō te fai penā, a te ‵tou a‵lofa ki te Atua e fakamalosi ne ia tatou ke taumafai o fakafiafia a ia mai te ‵lago atu ki ana tulaga, kae e se ko ‵tou tulaga totino. E matea ne tatou me e tenā eiloa a te mea tonu e ‵tau o fai, ko te pogai eiloa tenā ne faite ei tatou ko te mea ke fai ne tatou. E pelā mo Iesu Keliso, te Tupu o te Malo o te Atua, e ‵tau o fia‵fai malosi tatou ki te amiotonu.​—Epelu 1:8, 9.

4. Kaia e tāua ‵ki ei ke ‵sala atu ki te amiotonu o te Atua?

⁴ E pefea te tāua ke ‵sala ki te amiotonu o Ieova? Mafaufau ki te manatu tonu tenei: Ne fakavae a te tofotofoga muamua i te fatoaga o Etena ki te mea tenei, ki te talia ne Atamu mo Eva a te saolotoga o Ieova ke fakatoka ne ia a fakanofonofoga mō lāua io me ikai. (Kenese 2:17; 3:5) A te lā fakata‵mala o fai penā ne aumai i ei ki a tatou a puapuaga mo te mate ona ko tatou ne o‵mai i te lā gafa. (Loma 5:12) I te suā feitu, e fai mai penei a te Muna a te Atua: “Taumafai ke maua ne koe te loto alofa kae fai mea tonu, kae ka ola leva koe; ka fakaaloalogina koe ne tino kae fai faka‵lei ne latou a koe.” (Faataoto 21:21) E tonu, a te ‵sala muamua ki te amiotonu o te Atua e maua i ei se fesokotakiga fealofani mo Ieova, telā ka iku atu eiloa ki te ‵tou fakaolataga.​—Loma 3:23, 24.

Te Fakamataku o te Fia Amiotonu

5. Se a te mea fakamataku e ‵tau o ‵kalo keatea tatou mai ei?

⁵ I tena tusi ki Kelisiano i Loma, ne faka‵mafa atu ne te apositolo ko Paulo se mea fakamataku telā e ‵tau o ‵kalo keatea tatou katoa mai ei māfai tatou e ma‵nako ke manuia i te ‵sala muamua atu ki te amiotonu o te Atua. I ana pati e uiga ki ana tino Iutaia, ne fai mai a Paulo: “Kae e molimau foki au ki a latou me lasi te lotou toaga ki te Atua, ka ko te mea e seai eiloa se mainaga i a latou. Ona ko te lotou va‵lea i te amiotonu telā ne aumai mai te Atua, ne taumafai foki latou ke tu te lotou mea tonu, telā, ko se tuku atu ei latou katoatoa ki te amiotonu o te Atua.” (Loma 10:2, 3) E ‵tusa mo pati a Paulo, ne seki malamalama a tino tapuaki konā i te amiotonu o te Atua me ne fakalavelave malosi latou i te lotou taumafai ke tu eiloa te lotou amiotonu.a

6. Se a te kilokiloga e ‵tau o ‵kalo keatea tatou mai ei, kae kaia?

⁶ E tasi te auala e mafai ei o ‵to atu tatou ki te malei tenā ko te faiga o ‵tou taviniga ki te Atua e pelā me se fakatau‵faiga, mai te fakatusatusaga o tatou ki nisi tino. E faigofie ke takitaki atu tatou ne te kilokiloga tenei ke tō fakatāua ne tatou a ‵tou mea e mafai o fai. Kae ko te tonuga loa, kafai e fai tatou penā, ka puli ei i a tatou a te amiotonu o Ieova. (Kalatia 6:3, 4) A te lagona tonu mō te faiga o te mea tonu ko te ‵tou a‵lofa ki a Ieova. So se taumafaiga ke tu te ‵tou amiotonu e fakaseai i ei a te ‵tou a‵lofa ki a ia.​—Faitau te Luka 16:15.

7. Ne fakasino atu pefea a Iesu ki te fakalavelave ko te fia amiotonu?

⁷ Ne manavase a Iesu ki “tino kolā e leake eiloa me e amio‵tonu latou, kae fakaseaoga nisi.” Ne fakasino atu a ia ki te fakalavelave ko te fia amiotonu mai te faiatuga o te tala fakatusa tenei: “E tokolua tino ne olo ake ki te Fale Tapu o ‵talo; a te tokotasi se Falesaio, ka ko te suā tino se tagata ao lafoga. A te Falesaio ne tu ake i a ia eiloa kae ‵talo atu penei: ‘Te Atua, au e fakafetai atu ki a koe, i a au e se pelā mo nisi tino ‵faomea, tino amio ma‵sei, tino mulilua, e se pelā foki mo te tagata ao lafoga telā. Au e fakalikiliki fakalua i te vaiaso, e fai taulaga foki au ki te tasi vae sefulu o mea katoa e maua ne au.’ Ka ko te tagata ao lafoga, ne tu pili mai, e se mafai o kilo ake ona mata ki te lagi, kae pāpā ki tena fatafata, ana muna: ‘Te Atua, a koe ke alofa mai ki a au te tagata agasala!’ Au e fai atu ki a koutou, ne fanaifo a te tagata tenei ki tena fale ko takuamiotonugina, kae se penā te suā tino; me so se tino e fakamaluga a ia ne ia eiloa, e fakamalalogina, ka ko te tino e fakamalalo a ia ne ia eiloa, ka fakamalugagina.”​—Luka 18:9-14.

Te Suā Mea Fakamataku​—Ko te Manako “Ke to ‵Lei Koe”

8, 9. Se a te uiga “ko to ‵lei,” kae se a te mea e mafai o takitaki atu ne ia tatou ki ei?

⁸ A te suā mea fakamataku e manakogina ke ‵kalo keatea tatou mai ei ne fakamatala mai i te Failauga 7:16: “Sa manako ke to ‵lei koe, io me manako ke to poto koe, ai a ka sōna fai fua ei koe ke mate?” Kae ne toe fai mai a pati fakaosofia i te Tusi Tapu, e pelā mo te mea e matea atu i te fuaiupu e 20, ke tuku mai i ei se pogai ke ‵kalo keatea tatou mai se vaegā kilokiloga penā: “E seai se tino i te lalolagi e fai faeloa ne ia te mea tonu kae se mafai o ‵se.” A te tino telā e fai i a ia “ko to ‵lei” e fakatoka eiloa ne ia ana tulaga mō te amiotonu kae fakamasino foki ne ia a nisi tino ki ei. Kae e se iloa ne ia me mai te fai penā, ko fakamaluga aka ei ne ia ana tulaga ke ma‵luga atu i tulaga o te Atua kae ko fai ei ne ia a ia eiloa ke se amiotonu i te kilokiloga a te Atua.

⁹ A te mafaufau i a koe “ko to ‵lei,” io me e pelā mo te ‵fuliga i nisi Tusi Tapu, ko “to silia tou amiotonu” io me “fia amiotonu,” e mafai o iku atu ki te fakafesili ne tatou a te auala e fakatoka ei ne te Atua a mea. Kae e ‵tau o masaua ne tatou me kafai e fakafesili ne tatou a te ‵lei io me ko te ‵tonu o ikuga e fai ne Ieova, ko kamata ei o fakama‵luga aka ne tatou a ‵tou tulaga amio‵tonu ke ma‵luga atu i tulaga o Ieova. E pelā me ko fakamasino ne tatou a Ieova e ‵tusa mo ‵tou tulaga e uiga ki te mea tonu mo te mea ‵se. Kae ko Ieova ko te tino telā e isi sena aiā ke fakatoka ne ia a tulaga mō te amiotonu, kae e se ko tatou!​—Loma 14:10.

10. E pelā mo Iopu, se a te pogai e mafai ei o fakamasino ne tatou a te Atua?

¹⁰ E tiga eiloa e seai se tino i a tatou e manako tonu ke fakamasino ne ia te Atua, e mafai eiloa o takitaki atu tatou ke fai penā ona ko ‵tou tulaga sē ‵lei katoatoa. E faigofie ke fai penā māfai e matea ne tatou se mea telā e se ‵lei i ‵tou faka‵tau io me māfai e logo‵mae tatou i se puapuaga. Ne fai foki ne te tagata fakamaoni ko Iopu a te mea ‵se tenā. Ne fakamatala muamua mai i a Iopu se tagata “amiotonu kae fai mea tonu, ne mataku ki te Atua kae ‵kalo keatea mai mea ma‵sei.” (Iopu 1:1, Tusi Paia, Samoa) Kae ne pokotia a Iopu i puapuaga kolā ne ‵sae aka kae e se ‵tau o maua ne ia. Ne takitaki atu a Iopu ne te mea tenei ke taku tonu atu “tena amiotonu i lō te amiotonu o te Atua.” (Iopu 32:1, 2, Tusi Paia, Samoa) Ne ‵tau o faka‵tonu aka a te kilokiloga a Iopu. Tela la, e se ‵tau o ‵poi tatou māfai e fai foki tatou penā. Kafai e tupu se mea penā, se a te mea ka fesoasoani mai ke faka‵tonu aka a ‵tou manatu?

E se Iloa ne Tatou a Mea ‵Tonu Katoa

11, 12. (a) Kafai e mafau‵fau tatou me e isi se mea ne seki ‵tau o fai, se a te mea e ‵tau o masaua ne tatou? (e) Kaia e mafai ei o mafaufau se tino me e isi se mea sē ‵lei ne fakaasi mai i te tala fakatusa a Iesu e uiga ki tino ga‵lue i te togavine?

¹¹ A te mea muamua ke masaua me e se iloa faeloa ne tatou a mea ‵tonu katoa. Tenā eiloa te mea ne tupu ki a Iopu. Ne seki iloa ne ia a te fono a tama a te Atua ko agelu i te lagi i te taimi ne ‵losi ‵se atu ei a Satani e uiga ki a ia. (Iopu 1:7-12; 2:1-6) Ne seki iloa ne Iopu i ana fakalavelave ne māfua mai eiloa i a Satani. E tonu, e se mafai o mautinoa i a tatou me ne iloa tonu ne Iopu a Satani io me ikai! Tela la, ne leake eiloa tou tagata i ana fakalavelave ne māfua mai i te Atua. E tonu, e faigofie ke fai ne tatou ne fakaikuga ‵se māfai e se iloa ne tatou a mea katoa.

¹² Mafaufau ki te tala fakatusa a Iesu e uiga ki tino ga‵lue i te togavine. (Faitau te Mataio 20:8-16.) Ne fakamatala mai ne Iesu i konei e uiga ki te pule o se kāiga telā ne ‵togi atu ne ia ana tino ga‵lue katoa ki se ‵togi e tasi, faitalia me ne ga‵lue latou i te aso kātoa io me se itula fua e tasi. Se a tau faka‵tau e uiga ki te mea tenā? E mata, e ‵tau te mea tenā? Kāti ka kau atu eiloa koe ki a latou kolā ne ga‵lue i te aso kātoa i te ‵vela o te la. Kāti ka mafaufau koe me e ‵tau eiloa o uke atu olotou tupe e maua! Ona ko te mea tenā, e mafai o ‵kilo atu ki te pule tenā e pelā me e se alofa kae e se ‵tau foki ana mea e fai. Ke oko foki ki tena tali ki tino kolā ne fameo me ne fakaaoga ‵se ne ia tena tulaga pule. Kae e mata, e iloa ne tatou a mea katoa e uiga ki ei?

13. Se a te suā kilokiloga telā e mafai o maua ne tatou i te tala fakatusa a Iesu e uiga ki tino ga‵lue i te togavine?

¹³ Ke na iloilo aka ne tatou a te tala fakatusa tenei mai i se isi kilokiloga. E mafai o fakaiku aka ne tatou me ne iloa ne te pule i te tala fakatusa i tino katoa konei e isi ne olotou kāiga ke tausi atu ki ei. A tino ga‵lue i fatoaga i aso o Iesu ne maua olotou ‵togi i aso takitasi. Ne fakalago‵lago olotou kāiga ki olotou ‵togi i aso takitasi. Mafaufau la ki te tulaga o tino kolā ne fatoa maua ne te pule i te fakaotiga o te aso kae kolā ne ga‵lue fua i se itula e tasi. Kāti ne seki mafai o fagai ne latou olotou kāiga ki te ‵togi i te itula e tasi; kae ne ma‵nako eiloa latou o ga‵lue kae ne faka‵tali latou i te aso kātoa ke maua ne olotou galuega. (Mataio 20:1-7) E se i o latou a te ‵se telā ne seki maua i ei ne olotou galuega i te aso kātoa. E seai se mea e fakaasi mai me ne taumafai eiloa latou ke se ga‵lue. Mafaufau i a koe e faka‵tali i te aso kātoa, kae e iloa ne koe me e fakalagolago a nisi tino ki tou ‵togi i te aso tenā. E pefea tou loto fakafetai ke maua sau galuega​—mo tou ofo ke maua se ‵togi telā e lava ke fagai ki ei tou kāiga!

14. Se a te akoakoga tāua e maua ne tatou mai te tala fakatusa e uiga ki te togavine?

¹⁴ Ke toe iloilo aka ne tatou a mea ne fai ne te pule. E seai se tino ne seki kātoa tena ‵togi. I lō te fai penā, ne kilo atu tou tagata ki tino ga‵lue katoa e pelā me ne tino eiloa e ‵tau o maua ne latou a te ola. Ona ko te tokouke o tino ga‵lue e mafai o maua, ne mafai o fakaaoga ne te pule a te tulaga tenā ke mu‵tana fua ana tupe e fakamāumāu ki olotou ‵togi. Kae ne seki fai ne ia a te mea tenā. Ne ‵foki atu ana tino ga‵lue katoa ki olotou fale mo tupe e lava ke fagai ki ei olotou kāiga. E mafai o ‵fuli a te ‵tou kilokiloga ki ana mea ne fai mai te mafau‵fau ki nisi mea konei. Ne alofa a ia i te faiga o tena fakaikuga kae e se ko te fakaaoga ‵se o tena tulaga pule. Se a te akoakoga e tauloto ne tatou mai i ei? Me i te mafaufau fua ki nai mea e mafai o iku atu ki te ‵se o ‵tou fakaikuga. E tonu, e faka‵mafa mai i te tala fakatusa tenei a te maluga o te amiotonu o te Atua, telā e se fakavae ki tulafono mo mea kolā e ‵tau o maua fua ne tino.

E Mafai o ‵se io me Fakatapulagina ‵Tou Kilokiloga

15. Kaia e mafai ei o ‵se kae fakatapulagina ‵tou kilokiloga?

¹⁵ A te lua o mea e ‵tau o masaua māfai e fakafesagai atu tatou ki se tulaga telā e foliga mai me e se ‵tau, ko ‵tou kilokiloga e mafai o ‵se io me fakatapulagina. E mafai o ‵se ona ko ‵tou tulaga sē ‵lei katoatoa, te uiga fapito, io me ko tuu mo aganuu. E fakatapulagina foki me e se mafai o iloa ne tatou a lagonaga mo mea i loto o tino. E ‵kese mai i ei, a Ieova mo Iesu e seai ne lā tapula penā.​—Faataoto 24:12; Mataio 9:4; Luka 5:22.

16, 17. Kaia ne seki fakaaoga ei ne Ieova tena tulafono e uiga ki te mulilua i te taimi ne agasala ei a Tavita mo Patisepa?

¹⁶ Ke iloilo aka ne tatou a te tala e uiga ki te mulilua o Tavita mo Patisepa. (2 Samuelu 11:2-5) E ‵tusa mo te Tulafono a Mose, ne ‵tau o tamate lāua. (Levitiko 20:10; Teutelonome 22:22) E tiga eiloa ne fakasala lāua ne Ieova, ne seki fakaaoga ne ia tena tulafono. E mata, ne fai ne Ieova se mea sē ‵tau? E mata, ne fapito a ia ki a Tavita kae fakaseaoga i ei ana tulaga amio‵tonu? Konā eiloa a manatu o nisi tino fai‵tau ki te Tusi Tapu.

¹⁷ Kae ko te tulafono tenei ne tuku atu ne Ieova ki famasino sē ‵lei katoatoa kolā e se iloa ne latou a mea i loto o tino. Faitalia olotou tapula, ne fai ne te tulafono tenei ke iloa ne latou o fai olotou fakamasinoga ke ‵pau. I te suā feitu la, e mafai o iloa ne Ieova a mea i loto o tino. (Kenese 18:25; 1 Nofoaiga Tupu 29:17) Tela la, e se ‵tau o fakamoe‵moe tatou ke fakatapula a Ieova ne se tulafono telā ne fakatoka ne ia mō famasino sē ‵lei katoatoa. Kafai e fai tatou penā, e a, ka se fai te mea tenā e pelā mo te faimālō atu o se tino telā e ‵lei katoatoa ana mata ke fakaaoga ne ia a mata kilasi ne faite mō se tino telā e se ‵lei ana mata? Ne iloa ne Ieova a mea i loto o Tavita mo Patisepa kae ne matea ne ia a te lā sala‵mo tonu. Ne fakamasino ne ia lāua e ‵tusa mo te mea tenā, i se auala alofa kae loto fakamagalo.

Ke ‵Sala Faeloa ki te Amiotonu o Ieova

18, 19. Se a te mea ka fesoasoani mai ko te mea ke se fakamasino ne tatou a Ieova e ‵tusa mo ‵tou tulaga amio‵tonu?

¹⁸ Tela la, kafai e matea ne tatou i nisi taimi se mea telā e mafau‵fau tatou me se mea sē ‵tau ko fai ne Ieova​—faitalia me e fai‵tau ne tatou i se tala i te Tusi Tapu io me se mea e tupu ki ‵tou olaga totino​—⁠ke mo a eiloa ma fakamasino ne tatou te Atua ki ‵tou tulaga amio‵tonu. Ke masaua me e se iloa ne tatou a mea ‵tonu katoa kae e mafai o ‵se io me fakatapulagina a ‵tou manatu. Ke mo a eiloa ma puli “me i te kaitaua o te tino, e se fesoasoani ki te faiga o te amiotonu a te Atua.” (Iakopo 1:19, 20) I te auala tenei, ka se mafai o “‵lou ei ne [tatou] me ko te Aliki ne pogai ei te [‵tou] ma‵sei.”​—Faataoto 19:3.

¹⁹ E pelā mo Iesu, ke na tumau tatou i te fakailoa atu me ko Ieova fua e nofo mo te saolotoga ke fakatoka ne ia te tulaga o te amiotonu mo te mea ‵lei. (Maleko 10:17, 18) Taumafai malosi ke maua se “mainaga” tonu io me se “tinā mainaga” e uiga ki ana tulaga amio‵tonu. (Loma 10:2; 2 Timoteo 3:7, The Twentieth Century New Testament) Mai te taliaga o mea konei mo te ola e ‵tusa mo te loto o Ieova, ko fakaasi atu ei ne tatou me e ‵sala muamua ne tatou “tena amiotonu.”​—Mataio 6:33.

[Fakamatalaga fakaopoopo]

E Masaua ne Koe?

• Kaia e tāua ei ke ‵sala atu ki te amiotonu o Ieova?

• Ne a mea fakama‵taku e lua e ‵tau o ‵kalo keatea tatou mai i ei?

• E mafai pefea o ‵sala muamua ne tatou a te amiotonu o te Atua?

[Ata i te itulau e 16]

Se a te akoakoga e tauloto ne tatou mai te tala fakatusa a Iesu e uiga ki te tokolua tāgata kolā ne ‵talo atu i te faletapu?

[Ata i te itulau e 17]

E mata, se mea se ‵tau ke ‵pau a ‵togi o tino kolā ne ga‵lue i te itula e tasi mo tino kolā ne ga‵lue i te aso kātoa?