A te ‵Sala Atu ki te Amiotonu e Maua i ei se Puipuiga

“Ke mua koutou o ‵sala . . .[te] amiotonu [o te Atua].”​—⁠MATAIO 6:⁠33.

1, 2. Se a te fakaikuga ne fai ne se fafine Kelisiano e tokotasi, kae kaia ne fai ei ne ia te fakaikuga tenā?

NE GALUE se fafine koi malielie kae se Kelisiano i Asia e pelā me se failautusi i te ofisa o te malo. Ne fakamaoni a ia mai te oko vave atu ki te galuega kae se fakamāumau taimi foki i tena galuega. Kae ona ko tena galuega e se tumau, ne ‵tau o fai se iloiloga ki ei. Ne fai atu te pule o te matagaluega tenā ki ei me e mafai o fakatumau ne ia tena galuega kae siki aka foki tena tulaga ki luga māfai e finalalolagi laua. Ne ‵teke katoatoa ne ia te mea tenā, faitalia te fakaseai atu o tena galuega.

² E mata, ne fai ne te fafine Kelisiano tenā se mea e se na lo ko ‵lei? Ikai, ne tautali faka‵lei a ia i pati a Iesu: “Ke mua koutou o ‵sala . . . [te] amiotonu [o te Atua].” (Mataio 6:33) Ne sili atu te tāua ki a ia ke tautali atu i fakatakitakiga amio‵tonu i lō te mauaga o se mea ‵lei mai te faiga o amioga finalalolagi se ‵tau.​—⁠1 Kolinito 6:18.

Te Tāua o te Amiotonu

3. Se a te amiotonu?

³ E fakasino atu a te “amiotonu” ki te ‵piki ‵mau ki fakatakitakiga fakavae i mea tau amioga. I te Tusi Tapu, e fakauiga te pati tenā i te ‵gana Eleni mo te ‵gana Epelu ki te “‵tonu katoatoa.” E se ko te fia amiotonu, telā ko te fakamasino ne koe a koe eiloa e ‵tusa mo mea e talitonu koe ki ei. (Luka 16:15) A te amiotonu ko te ‵tonu katoatoa e ‵tusa mo tulaga o Ieova. Ko te amiotonu eiloa a te Atua tenā.​—⁠Loma 1:17; 3:21.

4. Kaia e tāua ei te amiotonu ki se Kelisiano?

⁴ Kaia e tāua ei te amiotonu? Me e fiafia a Ieova, te Atua “amiotonu,” ki ana tino māfai e fakamasani latou o fai te mea tonu. (Salamo 11:7; Faataoto 2:​20-22; Sapakuka 1:13) So se tino telā e se amiotonu e se mafai o maua ne ia se fesokotakiga pili mo ia. (Faataoto 15:⁠8) Tenā te pogai ne fakamalosi atu ei te apositolo ko Paulo ki a Timoteo: “Fakagata manakoga fakatamatane, kae kausaki atu . . . i te amiotonu” fakatasi mo nisi uiga tāua. (2 Timoteo 2:22) Tenā foki loa te pogai ne aofia ei ne Paulo a te “amiotonu ke fai mo otou ufifatafata” i te taimi ne fakasolo mai ei ne ia a vaega kese‵kese o te ‵tou gatu tau faka-te-agaga.​—⁠Efeso 6:14.

5. E mafai pefea o ‵sala atu a tino se ‵lei katoatoa ki te amiotonu?

⁵ E tonu, e seai se tino e katoatoa tena amiotonu. E maua ne tino katoa a te tulaga se ‵lei katoatoa mai i a Atamu, kae ko agasala a tino katoa, e se amio‵tonu talu mai te taimi ne fa‵nau mai ei latou. Kae, ne fai mai Iesu me e ‵tau o ‵sala tatou ki te amiotonu. E mafai pefea o fai se mea penā? Me ne tuku mai ne Iesu a tena ola ‵lei katoatoa e pelā me se togiola mō tatou, kae kafai e fakatuanaki tatou ki te taulaga tenā, e fiafia a Ieova o fakamagalo ne ia ‵tou agasala. (Mataio 20:28; Ioane 3:16; Loma 5:​8, 9, 12, 18) I luga i te fakavae tenā, i te taimi e tauloto ei tatou ki tulaga amio‵tonu o Ieova kae kausaki malosi o faka‵logo ki ei​—⁠mai te ‵talo mō se fesoasoani ke manumalo tatou i ‵tou vāivāiga​—⁠ko talia ei ne Ieova a te ‵tou tapuakiga. (Salamo 1:6; Loma 7:​19-​25; Fakaasiga 7:​9, 14) Ma‵faga o fakamafanafanaga gali!

Te Amiotonu i Loto i se Lalolagi sē Amiotonu

6. Kaia ne fai ei te lalolagi mo fai se koga fakamataku ki Kelisiano i aso mua?

⁶ I te taimi ne maua ei ne soko o Iesu a te fakatonuga ke molimau atu ki “kapakapalagi o te lalolagi,” ne fakafesagai atu eiloa latou ki se tulaga faigata. (Galuega 1:⁠8) A te koga kātoa telā ne tuku atu ke ga‵lue latou i ei ne nofo “i lalo i te pule a te Tino Masei,” ko Satani. (1 Ioane 5:19) Ko pisia a te lalolagi kātoa i te agaga masei telā ne fakamalosi aka ne ia, kae e tuku faka‵sau atu ei a Kelisiano ki ana fakamalosiga lai‵lai. (Efeso 2:⁠2) Ki a latou, ne fai te lalolagi mo fai se koga fakamataku. Ko te ‵sala muamua atu fua ki te amiotonu o te Atua ne mafai ei ne latou o kufaki kae fakatumau te lotou fakamaoni. Ne kufaki eiloa a te tokoukega o latou, kae ne nāi tino fua ne ‵fuli keatea mai te ‘auala o te amiotonu.’​—⁠Faataoto 12:28; 2 Timoteo 4:10.

7. Ne a tiute e manakogina ke ‵teke atu ei a Kelisiano ki fakamalosiga ma‵sei?

⁷ E mata, ko saogalemū te lalolagi mō Kelisiano i aso nei? E se tāitāi eiloa! Ko silia atu nei tena masei i lō te senitenali muamua. E se gata i ei, ko oti ne ‵pei ifo a Satani ki te lalolagi kae taua atu nei ki Kelisiano fakaekegina i se auala fakamataku, ko te ‵toega o te “fanau . . . a te fafine, ko latou katoa kolā e faka‵logo ki fakatonuga a te Atua, kae fakamaoni foki ki te mea tonu e fakaasi mai ne Iesu.” (Fakaasiga 12:​12, 17) E taua atu foki a Satani ki so se tino telā e ‵lago atu ki te “fanau” tenei. Kae e se mafai eiloa o ‵muni a Kelisiano mai te lalolagi. E ui eiloa e se fai latou mo fai ne vaega o te lalolagi, e ola eiloa latou i ei. (Ioane 17:​15, 16) Kae e ‵tau o talai latou i ei ke ‵sala atu ei ki tino loto ‵lei kae akoako latou mo fai ne soko o Keliso. (Mataio 24:14; 28:​19, 20) Telā la, e tiga eiloa e se mafai ne Kelisiano o ‵kalo katoatoa keatea mai fakamalosiga ma‵sei a te lalolagi nei, e ‵tau o ‵teke atu latou ki ei. Ke na mafau‵fau nei tatou ki fakamalosiga e fa konei.

Te Malei ko te Finalalolagi

8. Kaia ne ‵fuli atu ei a tino Isalaelu o tapuaki ki atua o tino Moapi?

⁸ A ko pilipili o palele atu te lotou malaga i te koga lavaki i tausaga e 40, ne tiakina ne tino Isalaelu e tokouke a te auala o te amiotonu. Ne lavea ne latou a auala e uke ne faka‵sao ei ne Ieova a latou, kae ko pilipili fua o ulu atu latou ki loto i te Fenua o te Folafolaga. Kae i te toe taimi tāua eiloa tenā, ne ‵fuli atu ei latou o tavini ki atua o te kau Moapi. Kaia? Ne ‵to atu latou ki loto i “manakoga agasala.” (1 Ioane 2:16) E fai mai te tala: “Ne moe sāle olotou tāgata mo fāfine Moapi.”​—⁠Numela 25:⁠1.

9, 10. Se a te tulaga i aso nei e tāua i ei ke masaua faeloa ne tatou te malosi o manakoga ‵se faka-te-foitino?

⁹ E fakaasi mai i te mea tenā a te auala e mafai ei ne manakoga agasala o fakama‵sei a tino kolā e se fakaeteete. Se mea ‵lei ke maua ne tatou se akoakoga mai te mea tenā, maise eiloa me ko oti ne talia a amioga finalalolagi e pelā me se vaega masani o te olaga i aso nei. (1 Kolinito 10:​6, 8) E fai mai se lipoti mai te Iunaite Sitete: “Mai mua o te 1970, ne seki talia i te tulafono ke ‵nofo fakapouliuli se tokolua i kogā koga katoa o Amelika. Nei la, ko fai fua te mea tenā e pelā me se mea masani. Ko silia atu mo te āfa a tauavaga kolā ne ‵nofo fakapouliuli muamua kae fatoā fakaipoipo.” E se fai fua te faifaiga tenā mo nisi faifaiga faivalevale aka foki i se fenua e tasi. E fai katoa a faifaiga konā i te lalolagi kātoa, kae e fakafanoanoa me ko oti ne tau‵tali atu a nisi Kelisiano i ei​—⁠kae ‵galo atu ei olotou tulaga i loto i te fakapotopotoga Kelisiano.​—⁠1 Kolinito 5:11.

¹⁰ E se gata i ei, ko salalau valevale a fakamalosiga ke finalalolagi i atufenua katoa. E fakamalosi mai i tamunei mo polokalame i televise me e ‵lei faeloa ke fai ne talavou a amioga fakatauavaga mai mua o te fakaipoipoga. E fakaasi mai a amioga fakasotoma e pelā me se faifaiga masani. Kae e fakaasi fakamaea mai foki i ata e uke a faifaiga fakatauavaga i se auala manino ‵lei. E faigofie foki o lavea atu a ata o faifaiga fakatauavaga penā i te Internet. E pelā mo te lipoti a se tino tusi tala i se nusipepa, e uiga ki te fokimaiga a tena tamaliki tagata ko fitu ana tausaga mai te akoga i se aso e tasi, kae pati ‵pole atu ki tena tamana e uiga ki sena taugasoa i te akoga telā ne maua ne ia i te Internet a ata o fāfine e ‵nofo fuafua kae fai ne latou a faifaiga fakatauavaga sē ‵tau. Ne mataku malosi tena tamana, kae e mata, e tokofia a tama‵liki ko oti ne lavea ne latou a vaegā ata penā kae sē fakaasi atu ki olotou mātua? E se gata i ei, e tokofia a mātua e iloa ne latou a mea kolā e aofia i tafaoga i vitiō kolā e ta‵fao i ei a olotou tama‵liki? E aofia i nisi tafaoga lauiloa a amioga finalalolagi matagā e pelā foki mo faifaiga fakatemoni mo amioga fakasauā.

11. E mafai pefea o maua ne se kāiga se puipuiga mai te finalalolagi o te lalolagi?

¹¹ E mafai pefea o ‵teke atu se kāiga ki vaegā “fakafiafiaga” ma‵sei penā? Mai te ‵sala muamua ki te amiotonu o te Atua, mo te ita fitifiti ma aofia koe i so se faifaiga matagā. (2 Kolinito 6:14; Efeso 5:⁠3) A mātua kolā e onoono faka‵lei ki mea e fai ne olotou tama‵liki kae faka‵goto ki loto o olotou tama‵liki a te alofa ki a Ieova mo ana tulafono amio‵tonu e ‵pui ei latou mai i ata mo tafaoga i vitiō kolā e ‵fonu i faifaiga fakatauavaga e pelā foki mo nisi fakaosoosoga sē amio‵tonu.​—⁠Teutelonome 6:​4-9.a

Te Fakamataku o Fakamalosiga Mai Tino o te Fenua

12. Se a te fakalavelave telā ne sae aka i te senitenali muamua?

¹² Ne faka‵lei fakavavega ne Paulo se tagata i tena nofoga i Lusa, i Asia Foliki. E fai mai te tala: “I te laveaga ne te vaitino te mea ne fai ne Paulo, ne paka‵laga a latou i te gana Lukaonia: ‘Ko oko mai a atua ki lalo i a tatou e pelā mo ne tino!’ Ne fakaigoa ne latou a Panapa ko Seu, ka ko Paulo ko Heleme, me i a Paulo ko ia ko te failauga sili.” (Galuega 14:​11, 12) Fakamuli ifo, ne ma‵nako a te vaitino eiloa tenā o tamate a Paulo mo Panapa. (Galuega 14:19) E manino ‵lei me ne fakamalosigina a tino konā ne tino o te fenua. E foliga mai me i nisi tino mai te fa‵kai tenā kolā ne fai pelā me ne Kelisiano ne seki tiakina katoatoa ne latou olotou talitonuga se aogā. I tena tusi ki Kelisiano i Kolose, ne fai atu a Paulo ke fakaeteete latou i te “ifo ki agelu.”​—⁠Kolose 2:18.

13. Ne a nisi tuu mo aganuu kolā e ‵tau o ‵kalo keatea mai i ei a Kelisiano, kae maua ne tatou i fea a te malosi ke fai penā?

¹³ I aso nei, e ‵tau foki mo Kelisiano ‵tonu o ‵kalo keatea mai tuu mo aganuu masani kolā e fakavae ki akoakoga ‵se fakalotu kae se fetaui mo fakatakitakiga faka-Kelisiano. E pelā mo nisi fenua, a fakamanatuga masani e pelā mo te fanaumaiga mo te mate o se tino e fakavae ki te akoakoga loi me e isi se agaga telā e tumau i te ola mai tua o te mate. (Failauga 9:​5, 10) E isi foki se tuu i nisi fenua telā e ‵kati keatea ei a nisi vaega o koga tapu o tama‵liki fāfine.b A te faifaiga tenei se mea masei telā e se fetaui mo te alofa atafai telā e ‵tau o fakaasi atu ne mātua ki olotou tama‵liki. (Teutelonome 6:​6, 7; Efeso 6:⁠4) E mafai pefea o ‵teke atu a Kelisiano ki tuu masani a te fenua kae tiakina atu a vaegā faifaiga penā? Mai te tali‵tonu katoatoa ki a Ieova. (Salamo 31:⁠6) Ka fakamalosi kae tausi ne te Atua amiotonu a tino kolā e fai atu mo olotou loto kātoa a pati konei: “A koe ko toku lafiga mo toku puiga. Koe ko toku Atua; e fakatuanaki au ki ei.”​—⁠Salamo 91:2; Faataoto 29:25.

Ke se Puli i a Koutou a Ieova

14. Se a te polopolokiga ne fai atu ne Ieova ki tino Isalaelu mai mua malie loa o ulu atu latou ki te Fenua o te Folafolaga?

¹⁴ Mai mua malie loa o ulu atu a tino Isalaelu ki loto i te Fenua o te Folafolaga, ne polopoloki atu a Ieova ki a latou ke se fakapuli ne latou a ia. Ana muna: “Masaua ke sa puli i a koutou a te Aliki te otou Atua; masaua o tausi ana tulafono katoa konei ka avatu ne au ki a koutou i te aso nei. Kafai ko ma‵lie koutou i meakai e maua ne koutou, kae ko toka foki otou fale ‵gali ne faite, kae ko uke foki otou pulumakau mo mamoe mo siliva mo aulo, mo nisi mea a koutou ko gasolo o uke, masaua la, ke mo a e maua ne koutou te loto fakamatamata kae fakapuli i otou loto a te Aliki te otou Atua.”​—⁠Teutelonome 8:​11-14.

15. E fakamautinoa aka pefea ne tatou me e se puli i a tatou a Ieova?

¹⁵ E mata, e mafai o tupu se mea penā i aso nei? Ao, māfai e ‵kese a mea e fakamuamua ne tatou. Kae kafai e ‵sala muamua atu tatou ki te amiotonu o te Atua, ko fai ei a te tapuakiga tonu mo fai te toe mea tāua i ‵tou olaga. Ka fai ne tatou a te mea telā ne fakamalosi mai ne Paulo, “ke fakaaogā ‵tau te ukega o taimi” kae ke fakatāua ne tatou te fakavave o te manakoga ke fai te galuega talai. (Kolose 4:5; 2 Timoteo 4:⁠2) Kafai ko fakatāua atu ne tatou a te mauaga o taimi avanoa ke malo‵lo io me ke maua ei a fakafiafiaga i lō te ‵kau atu ki fakatasiga mo te galuega talai, e mafai ei o puli i a tatou a Ieova kae fakatulaga lua ne tatou a ia i ‵tou olaga. Ne fai mai a Paulo me i aso fakaoti a tino ka “sili te lotou fia‵fia ki manakoga o te foitino i lō te Atua.” (2 Timoteo 3:⁠4) E iloilo faka‵lei ne Kelisiano fakamaoni a latou eiloa ke fakamautinoa aka ei me e se maua ne latou a te vaegā kilokiloga tenā.​—⁠2 Kolinito 13:⁠5.

Ke Fakaeteete i te Uiga ko te Fia Tu Tokotasi

16. Se a te uiga ‵se ne fakaasi mai ne Eva mo nisi tino i aso o Paulo?

¹⁶ Ne manuia eiloa a Satani i ana taumafaiga ke maua ne Eva se manakoga fia tu tokotasi i te fatoaga o Etena. Ne manako a Eva ke fai eiloa ne ia ana fakaikuga e uiga ki te mea tonu mo te mea sē tonu. (Kenese 3:​1-6) Ne maua foki ne nisi tino i te fakapotopotoga i Kolinito a te uiga tenā, i te senitenali muamua. Ne mafau‵fau latou me e lasi atu te lotou iloa i lō te apositolo ko Paulo, kae ne taku ne ia latou ne apositolo ‵loi.​—⁠2 Kolinito 11:​3-5; 1 Timoteo 6:​3-5.

17. E ‵kalo keatea pefea tatou mai te atiakaga o se uiga fia tu tokotasi?

¹⁷ I te lalolagi i aso nei, e tokouke a tino “e se ‵poi i te masei, ko ‵fete i te fakamata‵mata,” kae ko oti ne pokotia a nisi Kelisiano i te vaegā kilokiloga tenā. Ko oti foki ne ‵teke atu a nisi tino o latou ki te munatonu. (2 Timoteo 3:4; Filipi 3:18) E uiga ki te tapuakiga tonu, se mea tāua ke ‵kilo atu tatou ki a Ieova mō se takitakiga kae ‵kau fakatasi mo “te tavini fakamaoni kae poto” mo toeaina i te fakapotopotoga. Tenā eiloa te auala e tasi ke ‵sala atu ei ki te amiotonu, kae puipui ei tatou mai te mauaga o te uiga fia tu tokotasi. (Mataio 24:​45-​47; Salamo 25:​9, 10; Isaia 30:21) A te fakapotopotoga o tino fakaekegina “ko te pou mo te lagolago o te munatonu.” Ne fakatoka ne Ieova te mea tenā ke puipui kae takitaki ei tatou. (1 Timoteo 3:15) Kafai e iloa ne tatou a te tāua o te mea tenā, ka fesoasoani mai i ei ke mo a e fai ne tatou ‘so se mea ona ko te fia takutakua’ kae ke fai ne tatou mo te loto maulalo a te loto o Ieova telā e amiotonu.​—⁠Filipi 2:​2-4; Faataoto 3:​4-6.

Ke Fakaakoako ki a Iesu

18. E fakamalosi mai pefea ke fakaakoako atu tatou ki a Iesu?

¹⁸ E uiga ki a Iesu, ne ‵valo mai te Tusi Tapu: “E fiafia koe ki te mea tonu kae takalialia koe i te mea masei.” (Salamo 45:7; Epelu 1:⁠9) Ma‵faga o uiga gali ke fakaakoako ki ei! (1 Kolinito 11:⁠1) Ne seki iloa fua ne Iesu a tulaga amio‵tonu o Ieova; ne fiafia malosi eiloa a ia ki ei. Telā la, i te taimi ne fakaosooso ei a ia ne Satani i te koga lavaki, ne seki fakatalave eiloa a Iesu i tena ita fitifiti ma tō a ia keatea mai te “auala o te amiotonu.”​—⁠Faataoto 8:20; Mataio 4:​3-11.

19, 20. Ne a ikuga ‵lei o te ‵sala atu ki te amiotonu?

¹⁹ E tonu, e mafai o ma‵losi ‵ki a manakoga se amio‵tonu o te foitino. (Loma 7:​19, 20) Kae kafai e tāua malosi ki a tatou a te amiotonu, ka fakamalosi mai ne te mea tenei ke ‵teke atu tatou ki te masei. (Salamo 119:165) Ka puipui tatou ne te ‵poko o te alofa ki te amiotonu māfai ko tofotofogina tatou ke fai se mea ‵se. (Faataoto 4:​4-6) Ke masaua, i so se taimi e talia ei ne tatou se tofotofoga, ko tuku atu eiloa ne tatou te manumalo ki a Satani. E pefea te ‵lei atu ke ‵teke atu ki a ia kae tuku atu te manumalo ki a Ieova!​—⁠Faataoto 27:11; Iakopo 4:​7, 8. 

²⁰ Ona ko te ‵sala atu o Kelisiano ‵tonu ki te amiotonu, “ka ‵fonu [olotou] olaga i mea ‵lei katoa kolā ko Iesu Keliso fua e mafai o fai ne ia, mō te vikiga mo te tavaega o te Atua.” (Filipi 1:​10, 11) E ‵pei latou ki “te foitino fou, telā ne faite i foliga o te Atua i te amiotonu mo te ‵malu.” (Efeso 4:24) A latou e o Ieova kae e ola latou ke tavini atu ki a ia, kae e se ko te fakafiafia atu ki a latou eiloa. (Loma 14:8; 1 Petelu 4:⁠2) Tenā loa te mea e pule ne ia olotou mafaufauga mo faifaiga. Ko tafaga la te lasi o te fiafia e avatu ne latou ki te loto o te lotou Tamana i te lagi!​—⁠Faataoto 23:24.

[Fakamatalaga mai lalo]

E Mafai o Fakamatala Mai ne Koe?

• Kaia e tāua ei ke ‵sala atu ki te amiotonu?

• E mafai pefea o ‵sala atu a Kelisiano sē ‵lei katoatoa ki te amiotonu?

• Ne a nisi mea i te lalolagi e ‵tau o ‵kalo keatea mai i ei se Kelisiano?

• E puipui pefea tatou mai te ‵sala atu ki te amiotonu?

[Ata i te itulau e 26]

Ki soko o Iesu, ne fai a te lalolagi mo fai se koga fakamataku

[Ata i te itulau e 27]

E puipuigina a tama‵liki kolā e akoako ke a‵lofa ki a Ieova mai amioga finalalolagi

[Ata i te itulau e 28]

Ne puli i nisi tino Isalaelu a Ieova i te taimi ne mau‵mea ei latou i te Fenua o te Folafolaga