Te Tala ‵Lei mō Tino Ma‵tiva

EFAATALITONU mai te Muna a te Atua ki a tatou, penei: “A tino ma‵tiva e se mafai o fakapuligina.” (Salamo 9:​18) E fai mai foki te Tusi Tapu e uiga ki ‵tou Mafuaga, penei: “E tuku ne koe ki ei a mea e lava mō latou, kae fakama‵lie ne koe olotou manako.” (Salamo 145:16) A te fakamoemoega tenei e fakamatala mai i loto i te Muna a te Atua e sē se moemiti fua. E mafai o tuku mai ne te Atua Malosi Katoatoa a te mea telā e manakogina ke fakagata ki ei a te tulaga mativa. Ne a mea e ‵tau o maua ne tino ma‵tiva?

Ne fakamatala mai ne se tino poto i mea tau tupe mo fesoasoani ki fenua ma‵tiva me e manakogina ne fenua ma‵tiva se “tino pule kaimalie.” A te manatu ke fakagata te tulaga mativa e manakogina i ei se tino telā e isi sena malosi ke fai ne ia mo te kaimalie a ‵fuliga kolā ka fakagata i ei a te mativa. E mafai o toe fai atu tatou me i te tino pule telā e mafai o fakagata ne ia te tulaga masei o te mativa e ‵tau o fai pelā me se tino pule i te lalolagi me i nisi fenua e maua ne latou a mea aoga io me taui atu ne latou a nisi fenua kolā e seai ne olotou mea. E se gata i ei, a te tino pule telā e mafai o fakagata ne ia te mativa e mafai o fai ne ia se mea e uiga ki te pogai o te mativa​​—se uiga kaimanako ne ‵tupu aka mo tatou. E mafai o maua pefea ne tatou se vaegā pule ‵lei penā?

Ne uga atu ne te Atua a Iesu mō se tala ‵lei ki tino ma‵tiva. I te taimi ne tu atu ei a Iesu o faitau te fakatonuga ne maua ne ia mai te Atua, ana muna: “Ko i luga i a au te Agaga o te Aliki. Ne faū ne ia au o lauga atu te tala ‵lei ki tino ma‵tiva.”​​—Luka 4:​16-​18.

Se a te Tala ‵Lei?

Ne filifili ne te Atua a Iesu ke fai mo Tupu. A te mea tenei se tala ‵lei tonu eiloa. A ia ko te Pule ‵lei ke fakagata ne ia te tulaga mativa ona me (1) e ‵tau o pule mai a ia ki tino katoa kae nofo mo te malosi ke fai penā; (2) e alofa a ia ki tino ma‵tiva kae akoako ne ia ana soko ke tausi atu ki a latou; a ko te (3) e mafai o fakaseai ne ia a te pogai o te mativa, ‵tou vāivāiga ke kaima‵nako. Ke na onoono nei tatou ki vaega konei e tolu o te tala ‵lei.

1. Te pulega a Iesu ki luga i fenua katoa E fai mai te Muna a te Atua e uiga ki a Iesu, penei: “Ne avatu ki a ia te pule . . . ko te mea ke tavini atu ki a ia a tino katoa o malo katoa mo ‵gana kese‵kese.” (Tanielu 7:14) E mata, e fakaataata ne koe a feitu ‵lei ke pule mai fua se malo e tasi ki luga i tino katoa? Ko pili nei o seai ne taua mo kinauga ki luga i mea o te lalolagi. Ka maua ne tino katoa a mea aoga. Ne tuku mai ne Iesu a te fakatalitonuga me ka maua ne ia te malosi e pelā me ko te Pule o te lalolagi kātoa. Ne folafola mai a ia: “Ko oti ne tuku mai ki a au a te pule kātoa i te lagi mo te lalolagi.”​​—Mataio 28:18.

2. Te alofa atafai o Iesu mō tino ma‵tiva I tena taviniga i te lalolagi, ne fakaasi atu ne Iesu a tena alofa atafai mō tino ma‵tiva. E pelā mo se fafine telā ne fakamāumāu ne ia ana kope katoa ke ‵togi ki ei ana vailakau ne patele atu ki te kapa o te gatu o Iesu, kae fakamoemoe ke ‵lei a ia. Ne puapuaga a ia i tausaga e 12 i te tafe o tena sua kae e mautinoa eiloa me ne oge toto ‵ki eiloa a ia. E ‵tusa mo te Tulafono, ne mafai eiloa o fai ne ia ke se ‵ma so se tino telā ne patele a ia ki ei. Kae ne atafai a Iesu ki a ia. Ne fai atu a ia: “Taku tama, ko tou fakatuanaki ko ola ei koe. Na fano la mo te manuia, i a koe ko ‵lei.”​​—Maleko 5:​25-34.

E isi se malosi o akoakoga a Iesu ke ‵fuli ne ia a loto o tino ko te mea ke fakaasi atu foki ne latou a te alofa atafai. E pelā me se fakaakoakoga, mafaufau la ki te tali a Iesu ki se tagata telā ne manako ke iloa ne ia o fakafiafia te Atua. Ne iloa ne te tagata me e manako te Atua ke a‵lofa tatou ki ‵tou tuakoi, kae ne fesili atu a ia ki a Iesu: “Ko oi la toku tuakoi?”

I tena tali ne fakamatala atu ne Iesu se fakatusa lauiloa e uiga ki se tagata telā ne faimalaga atu mai Ielusalema ki Ieliko kae ne puke ne tino ‵faomea kae “tiakina ei me ko tai mate.” Ne livaliva ifo se faitaulaga i te auala tenā kae fakaseke o fano i te suā feitu o te auala. Ne fai foki penā te tino Levi. “Kae isi se tagata Samalia ne malaga atu i te alatu tenā, ne oko atu ki te tagata tenā, kae i te laveaga ne ia, ko oko eiloa i tena alofa ki a ia.” Ne ‵mulu ne ia a pa‵kiaga o te tagata tenā, avatu ne ia ki se fale talimālō, kae ‵togi ne ia te tino tenā ke tausi atu ki te tagata pakia tenei. Ne fesili atu a Iesu: “Ko oi la te tino . .  ko te tuakoi o te tagata telā ne ta ne tino ‵faomea?” Ne tali atu a ia me “ko te tino telā ne alofa ki a ia.” Kae ne fai atu a Iesu: “Fano la koe, kae ke fai foki ne koe penā.”​​—Luka 10:​25-​37.

E tauloto ne tino kolā ko fai mo Molimau a Ieova a vaegā akoakoga penā e uiga ki a Iesu kae ‵fuli olotou kilokiloga e uiga ki te fesoasoani atu ki tino kolā e ma‵nako ki se fesoasoani. E pelā me se fakaakoakoga, ne tusi ne se tino tusitala i tena tusi ko te Women in Soviet Prisons a mea e uiga ki tena masaki i te taimi ne galue ei a ia i te falepuipui i te Potma i te kogāloto o te 1960. “I toku masaki, ne fai eiloa a [Molimau] e pelā me ne nēsi atamai. Ne seki manako foki au ki se isi tino ke tausi au. Ne fakaopoopo mai a ia: “E ‵kilo atu a Molimau ki te mea tenei e pelā me ko te lotou tiute ke fesoasoani atu ki tino katoa, faitalia te kese‵kese o talitonuga mo fenua ne au‵mai i ei.

I te taimi ne seki ai ei ne galuega a nisi Molimau a Ieova i Ancon, Ecuador ona ko pokotiaga i mea tau tupe o te fenua, ne fakaiku aka ne olotou taina Molimau ke fai ne salasalaga sene mō latou; ne fakatoka ne latou a mea‵kai kae ‵togi atu ki tino faiika kolā ko ‵foki mai i te faiikaga i te po. Ne fesoasoani fakatasi a tino katoa i te fakapotopotoga, e aofia i ei a tama‵liki. Ne kamata latou i te tasi i vaveao katoa ko te mea ke toka olotou mea‵kai māfai ko ‵foki aka a pōti i te fa. A sene kolā ne maua ne Molimau ne vaevae katoa e ‵tusa mo manakoga o tino taki tokotasi.

E fakaasi mai i vaegā tala penā me i te fakaakoakoga mo akoakoga a Iesu e isi eiloa sena malosi ke ‵fuli ei a kilokiloga a tino ke fesoasoani atu ki tino kolā e ma‵nako ki se fesoasoani.

3. Te malosi o Iesu ke ‵fuli ne ia a uiga masani o tino A te manakoga ke kaima‵nako se mea telā e iloa kae talia ne tatou katoa. E taku ne te Tusi Tapu ki te “agasala.” Ne tusi mai foki a te apositolo ko Paulo, penei: “Tela la, ko maua ne au i te tulafono tenei e galue nei, e leake eiloa au me ko te mea ‵lei telā e fai ne au ke tu ei te tulafono, kae tagaila se mea masei fua.” Kae ne fakaopoopo mai a ia: “Ko oi la ka fakaola ne ia a au mai i te foitino mate tenei? Fakafetai ki te Atua, e alatu i te ‵tou Aliki ko Iesu Keliso!” (Loma 7:​21-​25) Ne fakasino atu a Paulo i konei ki te auala e fakaola ei ne te Atua, e auala i a Iesu a tino tapuaki ‵tonu mai manakoga agasala telā ne fa‵nau mai mo tatou, se manakoga kaimanako, telā ko te māfuaga o te tulaga mativa. E mafai pefea o tupu te mea tenei?

I te taimi o te papatisoga a Iesu, ne fakaasi atu ne Ioane te Papatiso a Iesu ki tino kolā e ‵nofo i konā, ana muna: “Kiloke, telā te Tamā Mamoe a te Atua ka ave ne ia keatea a agasala a te lalolagi.” (Ioane 1:​29) Ko pili o ‵fonu te lalolagi i tino kolā ne fakasaoloto mai te agasala, e aofia i ei a te manakoga ke kaimanako. (Isaia 11:9) Ka fakaseai atu ne Iesu a te māfuaga o te tulaga mativa.

Ko oko eiloa i te fakafiafia ke mafau‵fau ki te taimi ka maua ei ne tino katoa a mea e ma‵nako latou ki ei! E fai mai te Muna a te Atua, penei: “A tino katoa ka ‵nofo filemu i olotou togavine mo togāmati, kae ka seai se tino e toe fai ne ia ke ma‵taku latou.” (Mika 4:4) E fakamatala mai ne pati ‵gali konā a te taimi ka lotoma‵lie ei a tino katoa ki galuega, puipuiga, mo te avanoaga ke ola i se lalolagi e aunoa mo te mativa, kae ‵viki atu katoa ki a Ieova.