“Sa Fakalagolago Lele Eiloa Ki Tou Iloa”

“Talitonu ki te Aliki [Ieova] mo tou loto kātoa. Sa fakalagolago lele eiloa ki tou iloa.”—FAATAOTO 3:5.

1, 2. (a) Ne a tulaga e mafai o fakafesagai atu tatou ki ei? (e) Kafai e fakafesagai atu ki tulaga faiga‵ta, te faiga o filifiliga tāua, io me ‵teke atu ki se tofotofoga, ko oi te tino e ‵tau o fakalago‵lago tatou ki ei, kae kaia?

NE ‵PONO ne te pule o Cynthiaa a nisi vaega o tena kamupane kae fakamalō‵lo a nisi tino ga‵lue i ei. E mafaufau a Cynthia me kāti ko pili foki a ia o fakamalōlō. Ne a ana mea ka fai māfai ko se galue a ia? Ka ‵togi pefea ne ia a lā pili? E manako se tuagane Kelisiano ko Pamela o fanatu ki te koga telā e manakogina malosi i ei a tino talai o te Malo, kae e mata, e ‵tau eiloa o fano a ia? E isi foki se mea telā ne manako malosi ki ei te tamataene ko Samuelu. Ne onoono faeloa a ia ki ata ma‵sei i te taimi koi foliki ei a ia. Kae i te taimi tenei ko luasefulu tupu ei ana tausaga, ne malosi ‵ki te fakaosoosoga ke toe fai ne ia te mea tenā. E mafai pefea o ‵teke atu ne ia te fakaosoosoga tenā?

² Ko oi te tino e fakalagolago koe ki ei māfai ko fepaki koe mo tulaga faiga‵ta, te faiga o filifiliga tāua, io me ko te ‵teke atu ki tofotofoga? E mata, e fakalagolago koe ki a koe eiloa, io me e “tuku atu ki te Aliki [Ieova] a mea e manavase koe ki ei”? (Salamo 55:22) E fai mai te Tusi Tapu, “A te Aliki [Ieova], e onoono faeloa ki tino amio‵tonu kae talia io me fakalogologo foki ki olotou fakatagi.” (Salamo 34:15) Tela la, e tāua ‵ki eiloa ke tali‵tonu tatou ki a Ieova mo ‵tou loto kātoa kae ke mo a e fakalago‵lago ki ‵tou iloa!—Faataoto 3:5.

3. (a) Se a te mea e aofia i te talitonu ki a Ieova? (e) Kaia e ma‵nako ei a nisi tino ke fakalago‵lago latou ki te lotou iloa?

³ A te talitonu ki a Ieova mo te loto kātoa e aofia i ei a te faiga o mea e ‵tusa mo ana auala, telā ko te faiga o tena loto. Ko te mea ke fai ne tatou a te mea tenā, e tāua ‵ki ke tumau tatou i te fakapili‵pili atu ki a ia e auala i te ‵talo kae akai ‵tonu atu ki a ia mō tena takitakiga. Kae e faigata eiloa ki tino e tokouke ke fakalagolago katoatoa ki a Ieova. E pelā me se fakaakoakoga, ne fakaasi ‵tonu mai ne se tuagane Kelisiano ko Lynn penei, “A te taumafai ke fakaasi atu a te loto talitonu katoatoa ki a Ieova se mea faigata ki a au.” Kaia? Ne fai mai a ia, “E se iloa ne au a toku tamana, kae ko toku mātua e se fia tausi mai ki a au i te feitu faka-te-foitino e pelā foki ki oku lagonaga. Tela la, ne taumafai au ke tausi ne au a au eiloa.” Ona ko te auala ne puti aka ei a ia, ne faigata ‵ki ke talitonu katoatoa a Lynn ki so se tino. A te lasi o te atamai o se tino mo te iku manuia o ana taumafaiga e mafai foki o fai ne ia a te tino ke fakalagolago ki a ia eiloa. Mai te fakalagolago ki tena mea e iloa, e mafai o tausi ne se toeaina a te fakapotopotoga ki tena iloa e aunoa mo te fakalagolago muamua ki te Atua e auala i se ‵talo.

4. Ne a mea ka sau‵tala tatou ki ei i te mataupu tenei?

⁴ E fakamoemoe a Ieova ke fai ne tatou a taumafaiga ‵tonu ke ola e ‵tusa mo ‵tou ‵talo kae ke gasue‵sue e ‵tusa mo tena loto. E mafai la pefea o fakapaleni aka ne tatou a te fakaeke atu o ‵tou fakatagi ki a ia mo te faiga o taumafaiga ke faka‵lei aka a fakalavelave faiga‵ta? Kafai ko oko atu ki te taimi ke fai ei a filifiliga, ne a mea e ‵tau o fakaeteete tatou i ei? Kaia e tāua ei a te ‵talo māfai ko taumafai tatou ke ‵teke atu a tofotofoga? Ka sau‵tala tatou ki fesili konei mai te onoono ki fakaakoakoga i te Tusi Tapu.

Kafai ko Logo‵mae Tatou

5, 6. Ne a mea ne fai ne Hesekia i te taimi ne fakamatakutaku ei a ia ne te tupu o Asulia?

⁵ E uiga ki te tupu o Iuta ko Hesekia, e fai mai te Tusi Tapu, penei: “A ia e fakamaoni eiloa ki te Aliki kae e seki ‵teke eiloa ki ei; e tausi faka‵lei eiloa a ia ki fakatonuga katoa a te Aliki kolā ne tuku ki a Mose.” “A Hesekia ne talitonu eiloa ki [a Ieova] te Atua o Isalaelu.” (2 Tupu 18:5, 6) Ne saga atu pefea a Hesekia i te taimi ne uga atu ei ne te tupu o Asulia ko Sanelivi ana sui—e aofia i ei a te ofisa Asulia—ki Ielusalema fakatasi mo se kautau tokouke? Ko oti ne puke ne te kautau malosi o Asulia a fa‵kai ma‵losi e uke o Iuta, kae ko saga atu nei a Sanelivi ki Ielusalema. Ne ulu atu a Hesekia ki te fale o Ieova kae kamata o ‵talo, penei: “[Ieova], te motou Atua, faka‵sao mai matou mai i te kau Asulia, ko te mea ke iloa ne malo katoa o te lalolagi me ko koe te Aliki, ko te Atua.”—2 Tupu 19:14-19.

⁶ Ne gasuesue eiloa a Hesekia e ‵tusa mo tena ‵talo. Mai mua o fanatu a ia ki te faletapu o ‵talo, ne fakatonu atu a ia ki tino ke mo a e ‵saga atu ki pati fakaitaita a te ofisa Asulia. Ne uga atu foki ne Hesekia ana ofisa ki te pelofeta ko Isaia, ke maua mai ne pati fakatonutonu mai i a ia. (2 Tupu 18:36; 19:1, 2) Ne fai ne Hesekia a mea katoa kolā ne ‵tau o fai ne ia. I te taimi tenei, ne seki taumafai eiloa tou tagata o fai se mea telā e se fetaui mo te loto o Ieova e pelā mo te ‵sala atu ki te fesoasoani o te kau Aikupito io me ko fenua i olotou tafa. I lō te fakalagolago ki tena iloa, ne talitonu a Hesekia ki a Ieova. Mai tua o te tamatega ne agelu a Ieova a tāgata a Sanelivi e toko 185,000, ne “foki” atu ei a Sanelivi ki Nineva.—2 Tupu 19:35, 36.

7. Ne a fakamafanafanaga e mafai o maua ne tatou mai i ‵talo a Hana mo Iona?

⁷ A Hana, te avaga a Elekana, te tagata Levi, ne fakalagolago foki ki a Ieova i te taimi ne fanoanoa ei a ia ona ko tena sē fanafanau. (1 Samuelu 1:9-11, 18) Ne luaki atu a te pelofeta ko Iona mai te tinae o se ika lasi mai tua o tena ‵talo, penei: “[Ieova], i toku puapuaga ne kalaga atu ei au ki a koe, kae ne tali mai koe ki a au. Mai lalo i te lalolagi o tino ‵mate ne tagi au ki se fesoasoani, kae ne lagona ne koe.” (Iona 2:1, 2, 10) Ko oko eiloa te fakamafanafana mai ke iloa aka me faitalia a tulaga faiga‵ta, e mafai eiloa o ‵talo kae “fakatagi” atu tatou ki a Ieova ke fesoasoani mai!—Faitau te Salamo 55:1, 16.

8, 9. Ne a mea ne fakatāua ne Hesekia, Hana, mo Iona i olotou ‵talo, kae ne a mea e tauloto ne tatou mai i ei?

⁸ A tala o Hesekia, Hana, mo Iona e tuku mai ei ki a tatou se akoakoga tāua e uiga ki mea kolā e se ‵tau o puli i ‵tou ‵talo māfai e logo‵mae tatou. Ne logo‵mae eiloa a lagonaga o latou konei e tokotolu. Kae e fakaasi mai i olotou ‵talo me ne seki manava‵se fua latou ki a latou eiloa kae ne ‵sala atu latou ki se fakamafanafanaga mai i olotou fakalavelave. Ne tāua malosi eiloa ki a latou a te takuleiga o te igoa o te Atua, tena tapuakiga, mo te faiga o tena loto. Ne logo‵mae a Hesekia i te ‵losiga telā ne fakasae aka ki te igoa o Ieova. Ne tauto a Hana ke tuku atu ne ia tena tamaliki telā e manako malosi a ia ki ei ke tavini atu i te faleie tapu i Sailo. Kae ne fai atu a Iona, penei: “Ka ko au e . . . fakamaoni foki o fai a mea ne tauto atu ei au.”—Iona 2:9.

⁹ Kafai e ‵talo atu tatou mō se faka‵saoga mai tulaga faiga‵ta, se mea poto ke iloilo ne tatou a ‵tou lagonaga. E mata, e taumafai fua tatou ke faka‵lei aka te fakalavelave, io me masaua faeloa ne tatou a Ieova mo ana fuafuaga i ‵tou mafaufau? E faigofie o matafitafi atu i a tatou a mea faka-te-agaga māfai ko logo‵mae tatou, kae ko kamata o manava‵se e uiga ki ‵tou fakalavelave totino. Kafai e ‵talo atu tatou ki te Atua mō se fesoasoani, ke ‵saga tonu atu ‵tou mafaufau ki a Ieova, te faka‵maluga o tena igoa, mo te fakamalugaga o tena pulega sili i te lagi mo te lalolagi. A te faiga penā e fesoasoani mai ke fakatumau ne tatou se kilokiloga ‵lei faitalia me e se taunu a te mea telā ne fakamoe‵moe tatou ki ei. I nisi taimi e ‵tali mai ne Ieova ‵tou ‵talo mai te tukumaiga ne ia o te malosi e manakogina ke kufaki tatou i fakalavelave.—Faitau te Isaia 40:29; Filipi 4:13.

Te Faiga o Filifiliga

10, 11. Ne a mea ne fai ne Iosefatu i te taimi ne fakafesagai atu ei a ia ki se tulaga telā ko se iloa ne ia o faka‵lei aka?

¹⁰ E mafai pefea o fai ne koe a filifiliga ‵mafa i te olaga? E mata, e fai muamua tau filifiliga, ko ‵talo ei koe ki a Ieova ke fakamanuia mai te filifiliga ne fai ne koe? Mafaufau ki te mea ne fai ne Iosefatu, te tupu o Iuta, i te taimi ne taua atu ei a te kautau Amoni mo Moapi ki a ia. Ne seai eiloa se malosi o te fenua o Iuta ke taua atu ki a latou. Ne a mea ne ‵tau o fai ne Iosefatu?

¹¹ E fai mai te Tusi Tapu, penei: “Ne mataku Iosefatu, tenā ne ‵talo atu ei ki te Aliki mō se fesoasoani.” Ne fakatonu atu a ia ki tino Iuta katoa ke fakalikiliki kae ke fakamaopoopo a tino katoa ke “ka‵laga ki [a Ieova] mō se fesoasoani.” Kae ne tu atu a ia i mua o te fakapotopotoga o Iuta mo Ielusalema kae ‵talo. I tena ‵talo, ne fakamolemole atu a ia: “A koe ko te motou Atua! Fakasala atu latou, me i a matou ko se aoga i te kautau lasi tenei e taua mai ki a matou. Ko se iloa ne matou o fai se mea, ka ko matou e fakalagolago atu ki a koe mō se fesoasoani.” Ne lagona ne te Atua tonu a te ‵talo a Iosefatu kae ne faka‵sao fakavavega ne ia latou. (2 Nofoaiga Tupu 20:3-12, 17) Kafai ko fai a filifiliga, maise loa a mea kolā e pokotia i ei ‵tou feitu faka-te-agaga, e mata, e se ‵tau o fakalagolago tatou ki a Ieova i lō te fakalagolago ki ‵tou poto totino?

12, 13. Se a te fakaakoakoga ne tuku mai ne te tupu ko Tavita i te faiga o filifiliga?

¹² Ne a mea e ‵tau o fai ne tatou māfai ko fe‵paki mo tulaga kolā e foliga mai me faigofie ke faka‵lei aka—me ko oti foki ne ‵tu atu tatou i se tulaga penā muamua? E maua ne tatou ne manatu fesoasoani ki ei mai te tala o te tupu ko Tavita. I te taimi ne taua atu ei a te kau Amaleka ki te fa‵kai o Sikilaka, ne puke ne latou a avaga a Tavita mo tama‵liki penā foki mo ana tāgata. Ne fesili atu a Tavita ki a Ieova, penei: “E a, e ‵tau au o fano o afuli te kau kolā ne taua mai ki toku fa‵kai?” Ne tali atu a Ieova: “Fano o afuli, me e maua eiloa ne koe, ko faka‵sao foki ei ne koe a otou tino ne ave fakapagota.” Ne fakalogo a ia kae ne “faka‵sao ne Tavita a tino katoa ne ave ne latou.”—1 Samuelu 30:7-9, 18-20.

¹³ I se taimi mai tua ifo o te taua a te kau Amaleka, ne taua atu a tino Filisitia ki Isalaelu. Ne toe fakamolemole atu a Tavita ki a Ieova kae ne maua ne ia se tali manino. Ne fai atu te Atua: “Fano o taua atu ki a latou, me e tuku atu eiloa ne au te manumalo!” (2 Samuelu 5:18, 19) Mai tua malie ifo i ei, ne toe taua atu te kau Filisitia ki a Tavita. Ne a ana mea ka fai i te taimi tenei? Ne mafai fua o fai atu a ia, penei: ‘Ko oti au ne fakafesagai atu ki se tulaga tai ‵pau penei fakalua taimi. Ka taua atu eiloa au ki fili o te Atua, e pelā mo te mea ne fai ne au muamua.’ Io me e mata, ka ‵sala atu eiloa a Tavita ki te fakatakitakiga a Ieova? Ne seki fakalagolago a Tavita ki mea ne ‵tupu ki a ia i aso mua. Kae ne toe ‵talo atu eiloa a ia ki a Ieova. Kae ne fiafia eiloa a ia me ne fai ne ia te mea tenā! Ne ‵kese ‵ki a fakatakitakiga ne maua ne ia i te taimi tenei. (2 Samuelu 5:22, 23) Kafai e fakafesagai atu ki se tulaga tai ‵pau, e ‵tau o fakaeteete tatou ke mo a ma fakalago‵lago tatou ki mea ko oti ne ‵tupu i aso ko ‵teka.—Faitau te Ielemia 10:23.

14. Se a te fakaakoakoga e mafai o maua ne tatou mai te auala ne saga atu ei a Iosua mo nisi toeaina Isalaelu ki te kau Kipeona?

¹⁴ Ona ko te tulaga sē ‵lei katoatoa, e ‵tau mo tatou katoa—e pelā foki mo toeaina atamai—o ‵kilo atu ki a Ieova mō se takitakiga i te faiga o filifiliga. Mafaufau ki te auala ne saga atu ei a te sui o Mose, ko Iosua, pelā foki mo toeaina ma‵tua o te kau Isalaelu i te taimi ne nikoi ei latou ne tino Kipeona ‵poto kolā ne ‵funa olotou foliga ‵tonu kae fakaloiloi i a latou ne tino ne au‵mai i fenua ‵mao. E aunoa mo te fesili atu ki a Ieova, ne gasue‵sue eiloa a Iosua mo nisi tino o fai se va filemu mo te kau Kipeona, kae fai se feagaiga mo latou. E tiga eiloa ne ‵lago atu fakamuli a Ieova ki te mea tenā, ne fakamautinoa aka ne ia ke fakamau i te Tusi Tapu a te tala tenei e uiga ki te fakatamala o ‵sala atu ki tena takitakiga, ke fai mo akoakoga mō tatou.—Iosua 9:3-6, 14, 15.

Kafai e Taumafai o ‵Teke Atu ki Fakaosoosoga

15. Ke fakamatala mai a te pogai e tāua ei a te ‵talo ko te mea ke ‵teke atu ki fakaosoosoga.

¹⁵ Ona ko te mea e pologa tatou ki te “tulafono o te agasala,” e ‵tau o taua malosi tatou ki ‵tou manakoga agasala. (Loma 7:21-25) A te mea tenei se taua telā e mafai o manumalo i ei. E pefea la? Ne fai atu ne Iesu ki ana soko a te tāua o te ‵talo ke ‵teke atu a fakaosoosoga. (Faitau te Luka 22:40.) Kafai koi tumau eiloa a manakoga io me ko mafaufauga sē ‵tonu i a tatou mai tua o ‵tou ‵talo ki te Atua, e ‵tau mo tatou o tumau i te “‵talo ki te Atua” mō te poto ke mafai o fa‵ki i te fakalavelave tenei. E fakatalitonu mai ki a tatou me ka “tuku mai ne ia . . . te poto ki tino katoa i te agaga alofa mo te kaimalie.” (Iakopo 1:5) E tusi mai foki a Iakopo, penei: “Kafai e isi se tino o koutou e masaki, e ‵tau mo ia o fai atu ki toeaina o te ekalesia ke ‵talo mō ia, kae ‵mili te sinu ki luga i a ia i te igoa o te Aliki. A te ‵talo tenei, se ‵talo e fai i te fakatuanaki, kae ka fakaola ne ia te tino masaki.”—Iakopo 5:14, 15.

16, 17. Se a te toe taimi ‵lei ke ‵talo atu i ei māfai e manakogina se fesoasoani ke ‵teke ki fakaosoosoga?

¹⁶ E tāua ‵ki a te faiga o ‵talo ko te mea ke ‵teke atu ki fakaosoosoga, kae e ‵tau o iloa ne tatou a te tāua ke ‵talo atu i te taimi tonu. Mafaufau ki te tala o se tamataene telā e sae mai i te Faataoto 7:6-23. I te afiafi, ne sasale atu a ia i te auala i tafa o se fale e nofo atu ei se fafine talitagata. Ona ko fakamalosiga mo takolekolega a te fafine tenā, ne takitaki‵segina ei tou tagata kae ne tautali atu i tua o te fafine tenā, e pelā me se pulumakau ko ave o ta. Kaia ne fanatu ei te tamataene tenei ki te koga tenā? Ona ko tena “valea” mo te se lava o te malamalama telā ko nofo faeloa mo ia a manakoga ma‵sei. (Faataoto 7:7) Kae ko te taimi fea ne mafai ei o aoga ki a ia a te ‵talo? E ‵tonu, ne ‵tau o aoga ki a ia a te ‵talo ke ‵teke atu ki fakaosoosoga i so se taimi. A ko te ‵toe taimi ‵lei ne ‵tau o ‵talo i ei a ia, ko te taimi ne kamata ei o mafaufau a ia ke fanatu o sasale i te auala tenā.

¹⁷ I aso nei, kāti e taumafai malosi se tagata ke ‵teke atu ki te onoono ki ata ma‵sei. Kae pefea la māfai e fano a ia ki te Itaneti kae iloa ne ia me isi ne ata io me ko tamunei penā i ei? E mata, e se ‵pau eiloa a ia mo te tamataene telā ne fakasino atu ki ei te Faataoto mataupu e 7? Mafaga la o auala fakamataku ke sasale atu i ei! Ke ‵teke atu ki te fakaosoosoga ke onoono ki ata ma‵sei, e ‵tau o ‵sala atu se tino ki te fesoasoani o Ieova e auala i te ‵talo a koituai o fano a ia ki luga i te Itaneti.

18, 19. (a) Kaia e faigata ei ke ‵teke atu ki fakaosoosoga, kae e mafai pefea o fakafesagai atu koe mo te manuia ki ei? (e) Se a tau fakaikuga e ‵tau o fai?

¹⁸ E se faigofie ke ‵teke atu ki fakaosoosoga io me ke manumalo i faifaiga ma‵sei. Ne tusi mai te apositolo ko Paulo, “E ‵teke atu a manako o te foitino ki manako o te agaga, e ‵teke atu foki a manako o te agaga ki manako faka-te-foitino.” Tela la, “e se mafai ne koutou o fai a mea e ‵loto koutou ki ei.” (Kalatia 5:17) Ke fakafesagai atu ki te mea faigata tenei, e ‵tau mo tatou o ‵talo malosi māfai ko ‵sae aka a mafaufauga sē ‵tonu io me ko tofotofoga kae ke ola e ‵tusa mo ‵tou ‵talo. “Ko fakaosoosoga katoa kolā e masani o maua ne koutou i otou auala, se mea e masani eiloa o oko mai ki tino,” kae mai te fesoasoani o Ieova, e mafai eiloa o tumau tatou i te fakamaoni ki a ia.—1 Kolinito 10:13.

¹⁹ Faitalia me fe‵paki tatou mo tulaga faiga‵ta, te faiga o filifiliga tāua, io me taumafai ke ‵teke atu a fakaosoosoga, ne tuku mai ne Ieova ki a tatou se meaalofa gali—ko te fakatokaga tāua ko te faiga o ‵talo. E auala i ‵talo, e fakaasi atu ei ne tatou a ‵tou fakalagolago atu ki a ia. E ‵tau foki o tumau tatou i te akai atu ki te Atua mō tena agaga tapu, telā e takitaki kae fakamalosi ne ia tatou. (Luka 11:9-13) Kae e auala i mea katoa, ke na tali‵tonu tatou ki a Ieova kae ke mo a ma fakalagolago eiloa ki ‵tou iloa.

[Fakamatalaga fakaopoopo]

E Mata, e Masaua ne Koe?

• Ne a mea ne tauloto ne koe mai i a Hesekia, Hana, mo Iona e uiga ki te talitonu ki a Ieova?

• E faka‵mafa mai pefea i fakaakoakoga a Tavita mo Iosua a te manakoga ke fakaeteete māfai ko fai a filifiliga?

• Ko te taimi fea e ‵tau ei o ‵talo atu tatou e uiga ki fakaosoosoga?

[Ata i te itulau e 13]

I te ‵teke atu ki fakaosoosoga, ko te taimi fea e aoga malosi i ei a te ‵talo?