Te Mea Tonu E Uiga Ki Amaketo

“Agaga ma‵sei . . . ne olo ki tupu o te lalolagi kātoa . . . , kae ne fakamaopoopo latou ne mea konā i te koga telā e taku faka-Epelu ko Amaketo.” (I a matou a mataimanu ‵kese.)—FAKAASIGA 16:14, 16, New Revised Standard Version.

AMAKETO ko te igoa o te koga. E foliga mai me i te koga tenā e se maua i so se koga i te lalolagi nei.

Se a loa te uiga tonu o te pati “Amaketo”? Kaia la e isi faeloa sena sokoga ki se mea e tupu, e pelā mo se taua?

Ne Maopoopo i te Koga e Taku ko Amaketo

A te pati Epelu tonu ko te Har–Magedon ne fakauiga tonu loa ki te “Mauga o Mekito.” E tiga eiloa ko seai se mauga tonu penā e tu mai nei, a ko te koga telā e iloa pelā me ko Mekito koi isi eiloa. E tu atu a ia i te magaauala ki mātu togāla o te koga telā ne ‵nofo i ei a te fenua mua o Isalaelu. E uke a taua ne fai i tafa o te kogā koga tenā. Tenā ne isi ei se sokoga o te igoa o Mekito ki taua.a

Tela la, a te uiga tonu o Mekito, e fakauiga loa me kaia e taua ei latou kae e se fakauiga pelā me ne a taua e fai i konā. A Mekito se vaega o te Fenua o te Folafolaga telā ne tuku atu ne Ieova te Atua ki te kau Isalaelu. (Esoto 33:1; Iosua 12:7, 21) Ne tauto atu a ia ki tino konā me ka puipui ne ia latou mai i olotou fili, kae ne fai eiloa ne ia. (Teutelonome 6:18, 19) E pelā me se fakaakoakoga, ne puipui fakavavega ne Ieova a te kau Isalaelu mai te kautau a te tupu o Kanana ko Iapino mo tena takitaki kautau ko Sesela i Mekito.—Famasino 4:14-16.

Tela la, e lasi ‵ki eiloa a te fakauigaga o te pati “Amaketo.” E tau atu a te mea tenā ki se fe‵pakiga, se mea telā e fe‵paki i ei a potukau ma‵losi e lua.

E faipati eiloa te valoaga i te Fakaasiga ki se taimi pili mai mua nei telā ka fakamalosi aka i ei ne Satani mo ana temoni a malo o tāgata ke fakamaopoopo olotou kautau, telā ka fakamatakutaku mai ei ki tino o te Atua mo olotou mea e fai. Ka iku atu a te osomaiga tenā ki te ‵mate o te fia miliona o tino māfai ko fakatakavale ne te Atua a tino konā e fakasagatau mai.—Fakaasiga 19:11-18.

Kaia ne māfua mai ei i te Atua, telā e fakamatala mai i te Tusi Tapu e pelā me e “loto fakamagalo, . . . e alofa, kae fui kaitaua,” a te ‵mate o tino e tokouke? (Neemia 9:17) Ko te mea ke malamalama i faifaiga a te Atua, e manakogina ke tali ne tatou a fesili e tolu konei: (1) Ko oi ne kamata ne ia te taua? (2) Kaia ne aofia i ei a te Atua? (3) Ne a ikuga tumau ka aumai ne te fe‵pakiga tenei ki te lalolagi mo tino e ‵nofo i ei?

1. KO OI NE KAMATA NE IA TE TAUA?

A te taua i Amaketo e sē se faifaiga o te kaitaua o te Atua. I lō te fai penā, ka puipui ne te Atua a tino ‵lei mai i a latou kolā e taua atu ki a latou. A tino faka‵tupu taua i te fe‵pakiga tenei ko “tupu o te lalolagi nofoaki kātoa,” ko takitaki o te lalolagi. Kaia e taua atu ei latou? Me e fakagasue‵sue eiloa ne Satani a malo mo kautau ke taua katoatoa atu ki tino kolā e tapuaki atu ki a Ieova te Atua.—Fakaasiga 16:13, 14; 19:17, 18.

I te kilo atu ki te saolotoga o lotu mo te faipati atu i nisi atufenua i aso nei, a te manatu me ka fakatapula ne malo io me taumafai ke fakaseai katoatoa atu so se faifaiga fakalotu se mea e se mautinoa. Kae e tiga eiloa te feitu tenā, a vaegā osomaiga penā ne ‵tupu loa i te 20 senitenali kae koi ‵tupu eiloa i ‵tou taimi nei.b Tela la, e lua a ‵kesega ‵lasi i te va o osomaiga muamua mo te mea tenei e isi sena sokoga ki Amaketo. Muamua la, a te osomaiga tenei se mea e tupu i te lalolagi kātoa. Te lua, a te mea telā ka fai ne Ieova te Atua e sili fakafia atu tena malosi i lō so se mea telā ko oti ne fai ne ia i taimi ko ‵teka. (Ielemia 25:32, 33) E fakamatala mai i te Tusi Tapu a te fe‵pakiga tenei e pelā me ko “te taua i te aso lasi o te Atua Malosi Katoatoa.”

2. KAIA NE AOFIA I EI A TE ATUA?

Ne fakatonu atu a Ieova ki ana tino tapuaki ke filemu kae ke a‵lofa ki olotou fili. (Mika 4:1-3; Mataio 5:43, 44; 26:52) Tela la, ka sē puke ne latou a meatau ke puipui ei latou māfai e oko mai a fakasauaga. Moi ne sē ulu mai te Atua o faka‵sao ana tino, penei ko oti ne ‵fulu ‵ma latou. Tela la, ko tu te igoa o Ieova te Atua io me ko faifaiga i se tulaga fakamataku. Kafai e mafai ne tino faka‵tupu taua o fakama‵sei Ana tino, e mafai eiloa o foliga mai a Ieova e pelā me e se alofa, e se fai te meatonu io me e seai sena mea e mafai o fai. E se mafai eiloa o tupu se vaegā mea penā!—Salamo 37:28, 29.

E tuku mai ne te Atua se fakailoaga ki mea kolā ka fai ne ia me e se manako a ia o fakamasei so se tino. (2 Petelu 3:9) E auala i tala i loto i te Tusi Tapu, e fakamasaua mai ne ia a mea katoa kolā ne toe taui atu ne ia i aso ko ‵teka i te taimi ne fakasagatau atu ei ki ana tino. (2 Tupu 19:35) E faka‵pula mai foki ne te Tusi Tapu me kafai e oso atu a Satani mo ana sui ki tino o te Atua i aso mai mua nei, ka toe ulu atu a Ieova ki loto kae fakaaoga tena malosi o taua atu ki tino kolā e fakamatakutaku atu ki ana tino. A te tonuga loa, ko leva ne ‵valo mai i te Muna a te Atua me ka fakaseai ne Ieova a tino amio ma‵sei. (Faataoto 2:21, 22; 2 Tesalonia 1:6-9) I te taimi tenā, ka iloa ei ne tino kolā e oso atu me i a latou e taua tonu atu eiloa ki te Atua Malosi katoatoa.—Esekielu 38:21-23.

3. NE A IKUGA TUMAU KA MAUA MAI TE FE‵PAKIGA TENEI?

A te taua i Amaketo e iku atu ki te faka‵saoga o te fia miliona o ola o tino. A te tonuga loa, se kamataga ki se vaitaimi o te filemu i luga i te lalolagi.—Fakaasiga 21:3, 4.

E faipati loa te tusi ko Fakaasiga e uiga ki se “vaitino tokouke” telā e se mafai o lau aka kae kolā ka ‵sao atu i te fe‵pakiga tenei. (Fakaasiga 7:9, 14) Mai lalo i te takitakiga a te Atua, ka fesoasoani atu eiloa a latou konei o toe fakafoki a te lalolagi ki te tulaga o te Palataiso telā ne fakatoka ne Ieova i te kamataga.

E mata, e iloa ne tatou te taimi ka oso mai ei ki tino o te Atua?

[Fakamatalaga fakaopoopo]

[Ata i te itulau e 6]

Ko oti ne puipui ne Ieova te Atua ana tino i aso ko ‵teka

[Ata i te itulau e 7]

Ka toe puipui foki ne Ieova ana tino i te taua i Amaketo