E ‵Pau mo Nisi Tusi Aka?

“A Tusitusiga Tapu katoa ne māfua mai i te Atua, kae e aoga . . . , ko te mea ke poto ‵lei te tagata o te Atua, kae ke toka ‵lei a ia mō te faiga o galuega ‵lei katoa.” —2 TIMOTEO 3:16, 17.

ESE ko tino katoa e lotoma‵lie me i te Tusi Tapu e aoga mō mea katoa. A ko koe? Tefea te mea i mea kolā e fakasolo atu mai lalo e fakamatala faka‵lei mai i ei a tau kilokiloga e uiga ki te Tusi Tapu?

• Se galuega o tusi aoga

• Se tusi telā e ‵pau a tena tāua mo nisi tusi tapu aka e uke

• Se tusi o tala mua telā e maua i ei a akoakoga i mea tau amioga

• Ko te Muna a te Atua

E tenei la te fesili, E mata, e tāua a te mea telā e talitonu koe ki ei? Mafaufau ki pati a te Tusi Tapu e uiga ki ei: “Me i mea katoa kolā ne tusi i aso mua ne tusi ke akoako ei tatou, me e auala i te ‵tou kufaki mo fakamafanafanaga mai i Tusitusiga Tapu, ko mafai ei o maua ne tatou a te fakamoemoega.” (Loma 15:4) Tela la, ne fakatoka a te Tusi Tapu ke akoako kae fakamafanafana mai ki a tatou kae tuku mai foki ki a tatou se fakamoemoega.

E ui i ei, kafai a te Tusi Tapu se galuega fua o tusi aoga io me se tusi fua e tasi mai tusi tapu e uke, e mata, ka talitonu koe ki ei ke akoako atu ki a koe kae ‵taki atu tou kāiga, maise loa māfai e ‵kese a te fekau i ei mo te mea telā e mafaufau koe me tonu? Kafai a te Tusi Tapu se fakaputuga fua o tala ‵kai, e mata, e maua ne koe se fakamafanafanaga mo se fakamoemoega mai i ana tautoga?

I te suā feitu, e lau i miliona a tino ko oti ne a‵koga ki te Tusi Tapu e lotoma‵lie me i te Tusi Tapu ko te Muna eiloa a te Atua. Kaia? Se a te mea e ‵kese ei a te Tusi Tapu mai nisi tusi katoa? E ‵kami ne matou a koe ke mafaufau ki mea e lima e ‵kese ei a te Tusi Tapu mai i nisi tusi aka.