“Ko oi ka Mataku au ki ei?”

“E tusa eiloa me faitaua mai oku fili ki a au, e tumau eiloa toku fakatuanaki ki te Atua.”—SALAMO 27:3.

KA FESOASOANI ATU PEFEA A FUAIUPU KOLĀ E ‵SOKO MAI KE MAUA NE KOE A TE LOTO MALOSI?

Salamo 27:1

Salamo 27:4

Salamo 27:11

1. Ne a fesili ka fesoasoani mai a te Salamo e 27, ke tali aka ne tatou?

KAIA e uke ei a mea e fai ne tatou i te galuega talai faitalia te gasolo o ma‵sei a fakanofonofoga i te lalolagi? Kaia e fia‵fia ei tatou o fakaaoga a ‵tou taimi mo malosi e uke i te galuega talai faitalia a fakalavelave faiga‵ta i mea tau tupe i te lalolagi? E mafai pefea o fakatumau a ‵tou loto ma‵losi māfai a te tokoukega o tino e ma‵taku i te taimi mai mua? E tuku mai ki a tatou i te pese a te tupu ko Tavita i te Salamo e 27 a tali ki fesili konei.

2. Se a te mea e fai ne te mataku malosi ki se tino, kae se a te loto talitonu e maua ne tatou?

² E kamata ne Tavita a te salamo tenei ki pati konei: “A te Aliki ko toku mainaga mo toku fakaolataga; e seai se tino e mataku au ki ei. A te Aliki e puipui ne ia a au mai mea faigata katoa; ka se mataku lele eiloa a au.” (Salamo 27:1) A te mataku, io me ko te mataku malosi, e mafai o fai ei se tino ke vāivāi ‵ki telā ko sē mafai ei ne ia o fai so se mea. Kae ko te tino telā e talitonu fakamaoni ki a Ieova e maua ne ia te loto malosi kae e se mata mataku. (1 Petelu 3:14) Kafai e fai ne tatou a Ieova mo fai ‵tou lafiga kae tali‵tonu ki a ia, e mautinoa ‵lei me ‘ka tokagamalie ‵tou olaga, kae seai se mea e ma‵taku ki ei.’ (Faataoto 1:33; 3:25) Kaia la?

“A IEOVA KO TOKU MAINAGA MO TOKU FAKAOLATAGA”

3. I te auala fea e fai ei a Ieova mo ‵tou mainaga, kae se a te mea e ‵tau o fai ne tatou?

³ Kafai e fai mai te Tusi Tapu me i a “Ieova ko toku mainaga,” e fakauiga i ei me e akoako tatou ne Ieova ki te munatonu. (Salamo 27:1, NW) Kāti e fakaasi mai ne te mainaga tonu se mea fakamataku io me se mea e ‵pono i ‵tou auala, kae e se tapale ne ia kea‵tea. E ‵tau o ‵poto tatou i ‵tou faifaiga ki mea kolā e matea ne tatou. I se auala tai ‵pau, e fakaasi mai ne Ieova ki a tatou a te uiga o mea kolā e matea ne tatou ko ‵tupu i te lalolagi. E fakaasi mai foki ne ia ke iloa ne tatou a te fakamataku o te fakanofonofoga o mea tenei. E tuku mai ne ia a fakatakitakiga mai te Tusi Tapu kolā e fesoasoani mai faeloa ki a tatou, kae e ‵tau o fakagalue aka a mea kolā e tauloto ne tatou. Kafai e fai penā, ka ‵poto atu tatou i ‵tou fili io me ko ‵tou faiakoga.—Salamo 119:98, 99, 130.

4. (a) Kaia ne fai mai ei a Tavita mo te loto talitonu: “A Ieova ko toku . . . fakaolataga”? (e) Ka faka‵sao māfea ne Ieova ana tavini?

⁴ A pati a Tavita i te Salamo 27:1 e fakaasi mai i ei me ne seki puli i tou tagata a te auala ne fakasao ei a ia ne Ieova i taimi ko ‵teka. E pelā me se fakaakoakoga, ne fakasao tou tagata ne Ieova “mai leona mo ulosa.” Ne fesoasoani atu foki a Ieova ke fakatakavale ne tou tagata a te ‵toa ko Koliata. Fakamuli ifo, ne taumafai a te tupu ko Saulo o ‵velo a Tavita ki se tao, kae ne fakasao a ia ne Ieova i taimi takitasi konā. (1 Samuelu 17:37, 49, 50; 18:11, 12; 19:10) E se tioa eiloa o fai mai a Tavita mo te loto talitonu: “A Ieova ko toku . . . fakaolataga”! Ka faka‵sao ne Ieova ana tavini, e pelā mo te fakasaoga ne ia a Tavita. Ka fai ne ia māfea a te mea tenā? Māfai ko oko mai a “te fakalavelave lasi.”—Fakaasiga 7:14; 2 Petelu 2:9.

MASAUA A TAIMI TAKITASI NE FESOASOANI EI A IEOVA KI A KOE

5, 6. (a) E fesoasoani mai pefea a mea e masaua ne tatou ke momea aka a ‵tou loto ma‵losi? (e) Kaia e ‵lei ei ke mafau‵fau tatou ki te auala ne fesoasoani atu ei a Ieova ki ana tino i taimi ko ‵teka?

⁵ E mafai o faitau ne tatou se mea tāua telā e mafai o fesoasoani mai ke momea aka ‵tou loto ma‵losi i te Salamo 27:2, 3. (Faitau.) Ne masaua ne Tavita a taimi kolā ne fakasao ei a ia ne Ieova. (1 Samuelu 17:34-37) Ne fakamalosi atu a mafaufauga konā ki tou tagata, ko te mea ke mafai ne ia o fa‵ki i toe tulaga faiga‵ta. E mata, koi masaua ne koe te auala ne fesoasoani atu ei a Ieova ki a koe i taimi ko ‵teka? E mata, ne fakamalosi atu a mafaufauga konei ki a koe? E pelā me se fakaakoakoga, kai ‵talo malosi aka loa koe e uiga ki se fakalavelave telā ne fakafanoanoa atu ki a koe? E mata, ne iloa fakamuli ne koe a te auala ne tuku atu ei ne Ieova ki a koe a te poto mo te malosi ke kufaki i te fakalavelave tenā? E mata, e masaua ne koe a te auala ne fesoasoani atu ei a Ieova ke faka‵lei aka ne koe a nisi fakalavelave kolā ne fakafaigata i ei a tou tavini atu ki a ia mo te fiafia? Io me masaua ne koe a te auala ne tuku atu ei ne ia a avanoaga ‵fou i tena taviniga? (1 Kolinito 16:9) E pefea ou lagonaga māfai e mafaufau nei koe ki taimi konā? E ‵tau o tumau te fakatalitonu atu o mafaufauga konā ki a koe me i a Ieova e mafai o fesoasoani atu ki a koe ke kufaki io me faka‵lei aka a toe tulaga mo fakalavelave faiga‵ta.—Loma 5:3-5.

⁶ Ne a mea ka fai ne tatou māfai e fai ne se malo malosi se togafiti ke fakaseai a Molimau a Ieova e pelā me se fakapotopotoga? Ko oti ne taumafai a nisi tino fakamuli nei o fai a te mea tenā, kae ne seki manumalo latou i ei. Kafai e masaua ne tatou a te auala ne fesoasoani atu ei a Ieova ki ana tino i taimi ko ‵teka, ka loto ma‵losi eiloa tatou o kufaki i so se mea e tupu i taimi mai mua nei.—Tanielu 3:28.

KE LOTO FAKAFETAI KI TE TAPUAKIGA ‵MA

7, 8. (a) E ‵tusa mo te Salamo 27:4, se a te mea ne fakamolemole atu a Tavita ke maua ne ia mai i a Ieova? (e) Se a te faletapu faka-te-agaga lasi ‵ki o Ieova, kae e tapuaki atu pefea tatou i ei i aso nei?

⁷ E fesoasoani mai a te ‵tou a‵lofa ki te tapuakiga tonu ke maua ne tatou a te loto malosi. (Faitau te Salamo 27:4.) I aso o Tavita, a “te fale o te Aliki [Ieova]” ko te faleie tapu. Ne fai ne Tavita ke toka a mea katoa ko te mea ke mafai ne tena tama ko Solomona o faite se faletapu gali mō Ieova. I se fia selau tausaga fakamuli ifo, ne fakamatala mai ne Iesu me ka isi se taimi ka sē olo ei a tino ki te faletapu o tapuaki ki a Ieova. (Ioane 4:21-23) Ne fai ne Ieova se fakatokaga telā e mafai ei ne tatou o tapuaki atu ki a ia i te auala telā e talia ne ia. E talia ne ia a ‵tou tapuakiga māfai e fakatuanaki tatou ki te taulaga togiola a Iesu. I te Epelu mataupu e 8 ki te 10, ne fai mai te apositolo ko Paulo me i te fakatokaga tenei se faletapu faka-te-agaga lasi ‵ki telā “ne seki faite ki lima o tino” telā e mafai ei o tapuaki atu tatou ki te Atua. Ne fakamatala mai ne Paulo me i te faletapu tenei ne kamata o fakatu aka mai i te taimi ne papatiso ei a Iesu kae ofo atu a ia eiloa ke fai te loto o Ieova i te 29 T.A. (Epelu 10:10) E tapuaki atu pefea tatou i te faletapu tenei? E auala i te ‵talo atu ki a Ieova “mo te loto fakamaoni mo te fakatuanaki katoatoa,” kae talai atu mo te loto malosi ki nisi tino e uiga ki a ia. E tapuaki atu foki tatou i te faletapu tenei māfai e ‵kau atu tatou ki fakatasiga mo taimi e fai ei a tapuakiga a kāiga. (Epelu 10:22-25) Ka fesoasoani mai a ‵tou a‵lofa ki te tapuakiga tonu ke tumau tatou i te faiga o mea konei i aso fakaoti faiga‵ta konei.

⁸ I te lalolagi kātoa, e fakaaoga ne tavini fakamaoni a Ieova a olotou taimi e uke i te galuega talai, te taulotoga o ‵gana ‵fou, mo te olo ki koga kolā e manakogina malosi i ei a tino talai o te Malo. E fakaasi mai ne latou me e ‵pau latou mo te faisalamo. Ne fakamolemole atu tou tagata ki a Ieova mō te mea fua e tasi. Ne manako tou tagata ‘ke nofo a ia i te fale o te Aliki i tena olaga kātoa, ko te mea ke ofo a ia i te ‵lei kātoatoa o te Aliki.’ E ma‵nako a tavini a Ieova i aso nei ke fakamanuia latou ne ia, kae ma‵nako latou o tapuaki atu ki a ia faitalia me se a te mea e tupu.—Faitau te Salamo 27:6.

TALITONU KI TE FESOASOANI O TE ATUA

9, 10. Se a te uiga o te fakatalitonuga telā e tuku mai i te Salamo 27:10?

⁹ E fakaasi mai i pati a Tavita a te lasi o tena talitonu ki te fesoasoani o Ieova. Ana muna: “E mafai ne toku tamana mo toku mātua o tiakina au, ka ko te Aliki ka tausi ne ia a au.” (Salamo 27:10) Mai mea kolā ne faitau ne tatou i te 1 Samuelu mataupu e 22, e iloa i ei ne tatou me ne seki tuku tiaki ne mātua o Tavita a tou tagata. Kae i aso nei e tokouke a tino ko oti ne ‵tuli kea‵tea ne olotou kāiga. Ne maua ne te tokoukega o tino kolā ne tuku tiaki ne olotou kāiga a te fesoasoani mo te puipuiga mai te fakapotopotoga Kelisiano.

¹⁰ E toka a Ieova o tausi ana tavini māfai foki loa e tuku tiaki latou ne nisi tino. Tela la, e mautinoa i a tatou me ka tausi atu eiloa a ia ki a latou māfai e fe‵paki latou mo nisi mea faiga‵ta. E pelā me se fakaakoakoga, kafai e manava‵se tatou ki te auala e tuku atu ei ne tatou a mea kolā e ma‵nako ki ei ‵tou kāiga, masaua me ka fesoasoani mai a Ieova ki a tatou. (Epelu 13:5, 6) E malamalama a ia i ‵tou ‵tulaga mo mea kolā e ma‵nako tatou ki ei.

11. Ne a mafaufauga o tino e uiga ki a tatou e pelā me ne Molimau a Ieova māfai e fakaasi atu a ‵tou tali‵tonu ki a Ieova? Tuku mai se fakaakoakoga.

¹¹ Ke mafaufau ki te fakaakoakoga a Victoria, se tino e akoga ki te Tusi Tapu i Liberia. Ne tiaki a tou fafine mo ana tamaliki e tokotolu ne te tagata telā ne ‵nofo mo ia. E tigā eiloa e seai se fale mo se galuega a tou fafine, ne seki fakagata a tena sukesukega ki te Tusi Tapu, kae ne papatiso fakamuli i ei tou fafine. I te aso e tasi, ne maua ne tena tamaliki fafine telā ko 13 tausaga te matua, se pausi tupe e ‵fonu i tupe. Ne seki lau ne Victoria mo tena tamaliki fafine a tupe me e se ma‵nako ke fakaosoosogina lāua ke puke ne mea kolā e se i a lāua. Ne fesokotaki fakavave atu lāua ki te sotia telā i a ia te pausi tupe. Ne fai atu tou tagata ki a lāua me moi fai ne fakamaoni a tino katoa e pelā mo Molimau a Ieova, ka ‵lei kae filemu atu a te lalolagi kātoa. Ne fakaasi atu ne Victoria ki te sotia a te tautoga a Ieova e uiga ki se lalolagi fou mai loto i te Tusi Tapu. Ne ofo masei a te sotia i te fakatuanaki mo te fakamaoni o tou fafine telā ne tuku ei ne tou tagata ki a Victoria se aofaki lasi o tupe kolā ne toe faka‵foki atu ne tou fafine ki a ia. E iloa ne tino i te lalolagi me i Molimau a Ieova e fakamaoni faeloa. Ona ko te tali‵tonu kātoatoa o latou ki te tausiga a Ieova, e fakamaoni ei latou.

12. Kaia e tumau ei tatou i te tavini atu ki a Ieova faitalia me mafai o seai se galuega io me ko tupe? Tuku mai se fakaakoakoga.

¹² Io me fakaataata i te mafaufau me pefea a lagonaga o Tomasi, se tino talai seki papatiso i Sierra Leone. Ne kamata o galue tou tagata e pelā me se faiakoga, kae ko tai kātoa te tausaga e seki ai eiloa se peofuga o ia. Ne manakogina ke sau‵tala fakatasi a Tomasi mo te pule o te akoga ko te mea ke maua a tena togi. A te pule tenei se faifeau, kae ne fai atu tou tagata ki a Tomasi me i mea kolā e tali‵tonu ki ei a Molimau a Ieova e se talia i loto i te akoga. Muna a te faifeau me e se ‵tau o fai a Tomasi mo fai se Molimau a Ieova māfai e manako ke tumau a ia i tena galuega. Ne tiakina ne Tomasi a te galuega tenā faitalia me seai ne tupe ne maua ne ia mai tupe kolā ne ‵tau o ‵togi atu ki a ia. Mai tua i konā, ne maua ne Tomasi se isi galuega i te faitega o letio mo selefoni. E fakaasi mai i fakaakoakoga e uke me kafai e tali‵tonu fakamaoni tatou ki a Ieova, ka sē ma‵taku lele tatou me ka sē maua a mea kolā e manakogina ne tatou. Ona ko Ieova ne faite ne ia a mea katoa kae puipui faeloa ne ia ana tino, e iloa ‵lei ne tatou me ka tausi mai a ia ki a tatou.

13. Kaia e fakalave‵lave malosi ei a taina mo tuagane i atufenua ma‵tiva i te faiga o te galuega talai?

¹³ E fakalave‵lave malosi a taina mo tuagane i atufenua ma‵tiva e uke i te faiga o te galuega talai. Kaia? Ne tusi mai se ofisa lagolago e tasi: “A te tokoukega o tino kolā e talia a akoga faka-te-Tusi Tapu e seai ne galuega, tela la, e uke atu a taimi e maua ne latou ke fai a sukesukega i te aso. E uke atu foki a taimi e maua ne taina mo tuagane ke talai. Ne talia vave ne tino me ko ola nei tatou i aso fakaoti ona ko tulaga ma‵sei kolā e lavea ne latou i olotou tafa.” I te suā atufenua, e maua ne te tokoukega o tino talai taki tokotasi a akoga faka-te-Tusi Tapu e silia atu i te tokotolu. Ne tusi mai se misionale telā ne galue i konā mō tausaga e silia atu i te 12: “E maua ne te tokoukega o taina mo tuagane a taimi e uke ke talai kae fai a akoga faka-te-Tusi Tapu ona ko te mu‵tana o mea e fakalavelave atu ki a latou.”

14. I auala fea ka puipui ei ne te Atua a te vaitino tokouke?

¹⁴ Ko oti ne tauto a Ieova ke fesoasoani, puipui, kae faka‵sao a tena fakapotopotoga, i te feitu faka-te-foitino mo te feitu faka-te-agaga, kae e tali‵tonu tatou me ka tausi eiloa a ia ki tena tautoga. (Salamo 37:28; 91:1-3) Ka isi se vaitino tokouke kolā ka ‵sao i te “fakalavelave lasi.” (Fakaasiga 7:9, 14) Tela la, ka puipui ne te Atua a te vaitino tokouke tenā mai te sē talia ne ia ke fakaseai ana tino katoa i aso fakaoti o te fakanofonofoga tenei. A te suā auala ka puipui ei ne Ieova latou ko te tuku atu ki a latou a mea katoa e manakogina ke kufaki latou i tofotofoga kae ke fakatumau te va fakataugasoa o latou mo ia. Kae i Amaketo, ka puipui ne Ieova ana tavini mai te faka‵saoga o olotou ola.

‘TE ALIKI [IEOVA] AKOAKO MAI KI AU OU AUALA’

15, 16. E aoga pefea ki a tatou māfai e fakagalue aka ne tatou a mea kolā e akoako mai ne te Atua? Tuku mai se fakaakoakoga.

¹⁵ Kafai e ma‵nako tatou ke tumau ‵tou loto ma‵losi, e ‵tau ke akoakogina faeloa tatou ne te Atua. E fakatalitonu mai a te mea tenei i te fakatagi a Tavita: “Te Aliki, akoako mai ki a au mea kolā e loto koe ki ei ke fai ne au, i te mea e tokouke oku fili.” (Salamo 27:11) Ke akoakogina ne te Atua, e ‵tau o faka‵logo faka‵lei tatou ki pati i te Tusi Tapu mo fakatakitakiga kolā e maua ne tatou mai te fakapotopotoga a Ieova. E ‵tau foki o fakagalue fakavave ne tatou a mea kolā e tauloto tatou ki ei. E pelā me se fakaakoakoga, e tokouke a tino ko oti ne fakagalue ne latou a polopolokiga ‵poto ko te mea ke fakafaigofie aka olotou olaga. Ko oti ne ‵togi olotou kaitalafu kae fakatau atu a mea kolā ko sē manakogina ne latou. Tela la, kafai ko fano o masei a te tulaga o te maumea, e mu‵tana fua a fakalavelave tau tupe e manava‵se ki ei. Nei, ko sē ‵tau o toe ga‵lue malosi latou ke ‵togi faeloa a mea kolā e se manakogina tonu ne latou. Kae ko uke atu a mea e mafai o fai ne latou i te galuega talai. E ‵tau mo tatou katoa o fesili ifo ki a tatou eiloa, ‘E mata, e fakagalue fakavave aka ne au a mea katoa kolā e faitau ne au i te Tusi Tapu mo lōmiga a te tavini fakamaoni kae poto, māfai foki loa e faigata ‵ki ke fai ne au penā.’—Mataio 24:45.

¹⁶ Kafai e talia ne tatou a Ieova ke akoako mai kae fakaasi mai a te auala e ‵tau o ola tatou i ei, ka seai se pogai e ‵tau ei o ma‵taku tatou. Ne taumafai se paenia tumau i te Iunaite Sitete ke maua se tulaga ‵lei i tena koga galue telā ka fesoasoani atu ki tou tagata mo tena kāiga kātoa ke tumau i te galuega fakapaenia. Kae ne fai atu a tena pule me ka sē mafai o maua ne ia a te tulaga tenā me e seai sena pepa maluga. Moifai ne tupu ki a koe a te mea tenei, e mata, ka salamō koe me ne filifili ne koe a te taviniga tumau kae sē fano ki akoga ma‵luga? E lua vaiaso mai tua ifo, ne fakatea a te pule tenā kae ne fesili atu a te suā pule ki te taina tenā e uiga ki ana fakamoemoega. Ne fai atu te taina ki tou tagata me i a lāua mo tena avaga ne tino talai tumau o Molimau a Ieova kae e ma‵nako eiloa lāua ke tumau i te faiga o te galuega tenā. Kae koi tuai o fai atu ne te taina se isi mea aka, ne fai atu te pule: “E isi se mea ‵kese e iloa ne au e uiga ki a koutou! I te taimi ko tai mate ei toku tamana, ne o‵mai se tokolua o koutou kae faitau atu a te Tusi Tapu ki tou tagata i aso katoa. Ne tauto ei au ki au eiloa me kafai e maua ne au se avanoaga ke fesoasoani atu ki se tokotasi o Molimau a Ieova, ka fai eiloa ne au.” I te suā taeao, ne tuku atu ki te taina a te galuega telā ne seki manako a te pule mua o tuku atu ki tou tagata. Kafai e fakamuamua ne tatou a mea o te Malo i ‵tou olaga, ka tausi eiloa a Ieova ki tena tautoga ke tuku mai ki a tatou a mea katoa kolā e manakogina ne tatou.—Mataio 6:33.

E ‵TAU O MAUA TE FAKATUANAKI MO TE FAKAMOEMOEGA

17. Ne a mea ka fesoasoani mai ke sē ma‵taku tatou ki te taimi mai mua?

¹⁷ E fesoasoani mai a Tavita ke malama‵lama tatou i te tāua ke maua te fakatuanaki mo te fakamoemoega. Ne manatu aka tou tagata me ka sē mafai o maua ne ia te fakamoemoega māfai e se maua ne ia a te fakatuanaki “ke lavea ne [ia] te aga‵lei o te Aliki i te olaga nei.” (Salamo 27:13) Ka fai pefea ‵tou olaga moi fai ne seki tuku mai ne te Atua a te fakamoemoega ki a tatou kae sē iloa ne tatou a mea kolā e taku mai i te Salamo e 27? Tela la, i aso fakaoti konei, e manakogina ke ‵talo faeloa tatou ki a Ieova ke tuku mai a te malosi kae ke faka‵sao atu tatou i Amaketo.—Faitau te Salamo 27:14.

[Ata i te itulau e 23]

Ne maua ne Tavita a te malosi mai te masaua ne ia a te auala ne fakasao ei a ia ne Ieova

[Ata i te itulau e 25]

E mata, e ‵kilo atu tatou ki te tulaga faigata i mea tau tupe e pelā me se avanoaga ke fakalauefa atu ‵tou galuega talai?