“Ko Latou Kolā e ‵Sala ki a Ieova ka Seai ne Mea ‵Lei e Ma‵tiva ei Latou”

1. Se a te tulaga faigata ne oko atu ki a Tavita?

NE ‵MUNI faeloa a Tavita ke sao a ia. Ko oti ne fakaiku aka ne Saulo, te tupu malosi o Isalaelu, ke tamate tou tagata. I te taimi ne manako a Tavita ki meakai, ne fanatu a ia ki te fa‵kai o Nopa, kae fakamolemole atu ke maua ne falaoa e lima. (1 Samu. 21:1, 3) Fakamuli ifo, ne ‵muni a ia mo ana tāgata i loto i se ana. (1 Samu. 22:1) Ne oko atu pefea a Tavita ki te tulaga tenei?

2. Ne fai pefea ne Saulo ke tu a ia i se tulaga fakamataku? (1 Samuelu 23:16, 17)

² Ne loto masei a Saulo ki te takutakua mo manumaloga a Tavita i taua. Ne iloa foki ne Saulo me ona ko tena sē fakalogo ko ‵teke atu ei a Ieova ki a ia e pelā me ko te tupu o Isalaelu kae ko oti ne filifili ne ia a Tavita ke fai mo tupu. (Faitau te 1 Samuelu 23:16, 17.) Kae e pelā me ko te tupu o Isalaelu, koi mafai eiloa o fakaaoga ne Saulo se kautau lasi mo tino e tokouke kolā e ‵lago atu ki a ia, tela la, ne ‵tau o tele keatea a Tavita ke sao a ia. E mata, ne mafaufau eiloa a Saulo me e mafai ne ia o ‵teke atu ki te fuafuaga a te Atua mō Tavita? (Isa. 55:11) E se fai mai i te Tusi Tapu, kae e mautinoa i a tatou se mea e tasi: Ko fai ne Saulo a ia ke tu atu i se tulaga fakamataku. So se tino e taua atu ki te Atua e takavale faeloa!

3. Ne a lagonaga o Tavita faitalia ana fakanofonofoga?

³ A Tavita e sē se tagata fia fai tofi. Ne seki filifili ne ia a ia eiloa ke fai mo tupu o Isalaelu. Ne tuku atu ne Ieova te tofi tenā ki a ia. (1 Samu. 16:1, 12, 13) Ne takalialia malosi a Saulo ki a Tavita, e pelā me se fili. Kae ne seki ‵losi atu ne Tavita ki a Ieova mō te tulaga fakamataku ko nofo a ia i ei; io me ne fameo atu a ia me ko se lava ana meakai kae nofo fua a ia i se ana. I lō te fai penā, kāti ko te taimi ne ‵muni ei a ia i te ana tenā, ne ‵fatu ne ia a te pese gali o tavaega kolā e aofia i ei a pati i te ‵tou tusi siki fakavae: “Ko latou kolā e ‵sala ki a Ieova ka seai ne mea ‵lei e ma‵tiva ei latou.”—Sala. 34:10.

4. Ne a fesili ka mafau‵fau tatou ki ei, kae kaia e tāua ei?

⁴ I aso nei, e tokouke a tavini a Ieova ko se lava olotou meakai mo tausi te olaga.b Kae ne momea aka te faigata o te tulaga tenā i te taimi o te famai ‵pisi tenei. Kae ka gasolo aka o faigata te olaga i te taimi ko pilipili atu ei tatou ki te “fakalavelave lasi.” (Mata. 24:21) Mai manatu kona, ke tali aka ne tatou a fesili e fa: Se a te uiga me ka “seai ne mea ‵lei e [mativa]” ei a Tavita? Kaia e ‵tau ei o lotoma‵lie tatou ki mea e maua? Kaia e ‵tau ei o tali‵tonu tatou me ka tausi mai eiloa a Ieova? Kae e fakatoka pefea tatou i te taimi nei mō aso mai mua?

“KA SEAI SE MEA E MATIVA EI AU”

5-6. E fesoasoani mai pefea te Salamo 23:1-6 ke malamalama tatou i te mea ne fakauiga ki ei a Tavita i ana pati me ka “seai ne mea ‵lei e ma‵tiva ei” a tavini a te Atua?

⁵ Se a te mea ne fakauiga ki ei a Tavita i ana pati me “ka seai se mea ‵lei e [ma‵tiva] ei” a tavini a Ieova? E mafai o maua ne tatou se tali mai te mafaufau ki pati tai ‵pau i te Salamo e 23. (Faitau te Salamo 23:1-6.) Ne kamata ne Tavita a te salamo tenā ki pati konei: “A Ieova ko toku Tausi Mamoe. Ka seai se mea e mativa ei au.” Ne taku mai ne Tavita i te salamo kātoa a mea kolā e tumau tonu te lotou tāua—ko fakamanuiaga faka-te-agaga e uke kolā ne maua ne ia mai te taliaga ne ia a Ieova e pelā me ko tena Tausi Mamoe. E takitaki ne Ieova a Tavita “i auala o te amiotonu,” kae e ‵lago atu mo te fakamaoni ki a ia i taimi ‵lei mo taimi sē ‵lei. Ne iloa ne Tavita me ka se sao faeloa a ia mai fakalavelave i tena olaga i “laukele moukua” o Ieova. E mafai o loto vaivāi a ia i nisi taimi e pelā eiloa me e sasale atu a ia “i te vanu pouli kae ‵poko,” kae ka isi foki ne ana fili. Kae ka “se mataku” eiloa a Tavita me i a Ieova ko tena Tausi Mamoe.

⁶ Ko maua ne tatou te tali ki te ‵tou fesili: Se a te uiga me ka “seai ne mea ‵lei e [mativa]” ei a Tavita? Ne maua ne ia a mea katoa i te feitu faka-te-agaga. Ne seki fakalagolago tena fiafia ki mea faka-te-foitino. Ne lotomalie a Tavita ki mea ne tuku atu ne Ieova. A te mea telā ne sili atu te tāua ki a ia ko fakamanuiaga mo te puipuiga mai tena Atua.

7. E ‵tusa mo te Luka 21:20-24, se a te tulaga faigata ne fepaki mo Kelisiano i Iuta?

⁷ Mai i pati a Tavita, ko lavea atu a te tāua ke maua ne tatou se kilokiloga ‵lei ki mea faka-te-foitino. E mafai eiloa o fia‵fia tatou ki ‵tou kope faka-te-foitino, kae e se ‵tau o fai mo fai te ‵toe mea tāua i te olaga. Tenā eiloa te manatu tāua ne malamalama i ei a Kelisiano i te senitenali muamua i Iuta. (Faitau te Luka 21:20-24.) Ne fakailoa atu ne Iesu ki a latou me ka “nikoi ne kautau” a te fa‵kai o Ielusalema. Kafai ko tupu te mea tenā, ko ‵tau mo latou o “na kamata o ‵tele ki luga i mauga.” Ka iku atu te mea tenā ki te lotou faka‵saoga kae ka uke ‵ki a mea e ‵tau o tiaki ne latou. I nai tausaga ko ‵teka, ne fai mai penei Te Faleleoleo Maluga: “Ne tiaki ne latou olotou fatoaga mo fale, kae ne seki puke foki ne latou olotou kope mai olotou fale. Ne tali‵tonu latou ki te puipuiga mo te fesoasoani o Ieova, kae ne fakamuamua ne latou tena tapuakiga i lō nisi mea katoa kolā e mafai o foliga mai e pelā me e tāua.”

8. Se a te akoakoga tāua e tauloto ne tatou mai te mea ne tupu ki Kelisiano i te senitenali muamua kolā ne ‵nofo i Iuta?

⁸ Se a te akoakoga tāua e tauloto ne tatou mai te mea ne tupu ki Kelisiano i te senitenali muamua kolā ne ‵nofo i Iuta? Ne fai mai Te Faleleoleo Maluga telā ne taku atu mai luga: “Kāti ka tofotofogina tatou e uiga ki ‵tou kilokiloga ki kope faka-te-foitino; e mata, e tafasili i te tāua a mea konā, io me e sili atu i te tāua a te fakaolataga telā ka maua ne tino katoa kolā e ‵lago atu ki te Atua? E tonu, kāti ka aofia i te auala e ‵tele ei tatou keatea a nisi mea faiga‵ta mo te sē maua ne tatou a nisi mea kolā e ma‵nako tatou ki ei. E ‵tau o toka tatou ke fai so se mea telā e manakogina, e pelā mo te mea ne fai ne ‵tou taina i te senitenali muamua kolā ne ‵tele keatea mai Iutaia.”c

9. Se a te fakamalosiga e maua ne koe mai pati fakatonutonu a te apositolo ko Paulo ki tino Epelu?

⁹ E a, e mafai o fakaataata ne koe te faigata ki Kelisiano konā me toeitiiti ko tiaki olotou mea katoa kae toe kamata se olaga fou? Ne manakogina ne latou te fakatuanaki ke fakalago‵lago ki a Ieova ke tausi atu ki a latou. Kae ne maua eiloa ne latou se fesoasoani. I se lima tausaga mai mua o nikoi ne tino Loma a Ielusalema, ne fai atu ne te apositolo ko Paulo a manatu fesoasoani aoga ki tino Epelu: “Ke ‵kalo kea‵tea mai te fia‵fai ki tupe i otou olaga, kae ke lotoma‵lie ki mea ko maua ne koutou. Me ne fai mai a ia: ‘Ka se tiaki lele eiloa ne au a koe, kae ka se tuku tiaki lele eiloa ne au a koe.’ Ko te mea ke loto ‵toa tatou o fai aka: ‘A Ieova ko toku fesoasoani; ka se mataku eiloa au. Ne a mea e mafai ne tino o fai mai ki a au?’” (Epe. 13:5, 6) E mautinoa me ne faigofie ke talia a te olaga faigofie ne tino kolā ne faka‵logo ki pati a Paulo a koi tuai o oko atu a te kautau Loma. Ne mautinoa eiloa i a latou me ka fesoasoani atu a Ieova i te tausiga o latou. E fakamaoni mai i pati a Paulo me e mafai foki o maua ne tatou te loto talitonu tenā.

“KA LOTOMA‵LIE EILOA TATOU I EI”

10. Se a te “mea e ‵tau o fai” telā ne fakaasi mai ne Paulo ki a tatou?

¹⁰ Ne fai atu foki ne Paulo a pati fakatonutonu tai ‵pau ki a Timoteo, kae aoga foki ki a tatou. Ne tusi atu a ia: “Tela la, kafai ko maua a ‵tou meakai mo ‵tou gatu, ka lotoma‵lie eiloa tatou i ei.” (1 Tim. 6:8) E mata e fakauiga i ei me ko se mafai eiloa o ‵kai tatou ki mea‵kai gali, maua se fale ‵lei mo ‵nofo, io me ‵togi ne gatu ‵fou i nisi taimi? E se tenā te mea ne fakauiga ki ei a Paulo. Ne fai mai a Paulo me e ‵tau mo tatou o lotoma‵lie ki so se mea faka-te-foitino ko maua ne tatou. (Fili. 4:12) Tenā te mea ne tauloto ne Paulo e uiga ki te “mea e ‵tau o fai.” A te ‵toe kope tāua o tatou ko te ‵tou fesokotakiga mo te Atua, e se ko so se kope faka-te-foitino e maua ne tatou.—Sapa. 3:17, 18.

11. Se a te akoakoga e uiga ki te lotomalie ki mea ko maua ne tauloto ne tatou mai pati a Mose ki tino Isalaelu?

¹¹ E mafai o ‵kese te ‵tou kilokiloga mo te kilokiloga a Ieova e uiga ki mea e manakogina ne tatou. Mafaufau ki pati a Mose ki tino Isalaelu mai tua o te 40 tausaga ne ‵nofo ei latou i te koga lavaki: “Me i a Ieova te otou Atua ne fakamanuia ne ia otou mea katoa ne fai. E iloa ‵lei ne ia te otou sa‵salega i loto i te koga lavaki fakamataku tenei. A Ieova te otou Atua ne fakatasi faeloa ki a koutou i tausaga e 40 konei, kae e seai eiloa se mea ne ma‵tiva koutou i ei.” (Teu. 2:7) I te 40 tausaga konā, ne fagai eiloa ne Ieova a tino Isalaelu ki te manai. Ke oko ki olotou gatu—ko gatu eiloa ne ‵mai mo latou mai Aikupito—ne seki ‵pala eiloa. (Teu. 8:3, 4) E tiga eiloa ne ‵kilo atu a nisi tino ki mea konei me e se lava, ne fakamasaua atu a Mose ki tino Isalaelu me ne maua eiloa ne latou a mea katoa. Ka fiafia eiloa a Ieova māfai e lotoma‵lie tatou ki mea ko maua—ke loto fakafetai ki mu mea ko maua, ke ‵kilo atu ki ei me se fakamanuiaga, kae ke fakafetai atu foki e uiga ki ei.

KE LOTO TALITONU ME KA TAUSI KOE NE IEOVA

12. Se a te mea e fakaasi mai i ei me ne talitonu a Tavita ki a Ieova, kae e se ki a ia eiloa?

¹² Ne iloa ne Tavita me e fakamaoni kae atafai malosi a Ieova ki a latou kolā e a‵lofa ki a Ia. E tiga eiloa ne fakamataku tena ola i te taimi ne ‵fatu ne ia te Salamo 34, kae ne lavea ne mata o te fakatuanaki o Tavita a “te agelu a Ieova e nofo i tafa” o ia. (Sala. 34:7) Kāti ne fakatusa ne Tavita a te agelu a Ieova ki se sotia telā e matapulapula faeloa ki te fili. E tiga eiloa a ia se toa mafi i taua, kae ko oti foki ne tauto atu a Ieova me ka fai a ia mo tupu, ne seki fakalagolago lele a Tavita ki tena atamai i te fakaaogaga o te siligi io me ko te pelu ke fakatakavale te fili. (1 Samu. 16:13; 24:12) Ne talitonu a Tavita me ka ‘fakasao ne te agelu a Ieova a latou kolā e ma‵taku ki a ia.’ E tonu, e se fakamoe‵moe tatou ke maua se puipuiga fakavavega i aso nei. Kae e iloa ne tatou me e seai se tino telā e talitonu ki a Ieova ka tumau i ana logo‵maega.

13. Kafai ko taua mai a Koka mai Makoka, kaia ka foliga atu ei me i a tatou e fakatakavalegofie, kae kaia e se ‵tau ei o ma‵taku tatou? (Onoono ki te ata i te ‵kava.)

¹³ I aso mai mua nei, ka tofotofogina eiloa a te ‵tou loto tali‵tonu ki te mafai ne Ieova o puipui tatou. Kafai ko taua atu ki tino o te Atua a Koka mai Makoka, ko atufenua ‵kau fakatasi, ka foliga mai me ka ‵tu atu tatou i se tulaga fakamataku. E ‵tau mo tatou o tali‵tonu me e mafai kae ka faka‵sao foki ne Ieova tatou. Ka foliga atu tatou ki atufenua e pelā me ne mamoe vāi‵vai e aunoa mo se tino ke puipui ne ia tatou. (Eseki. 38:10-12) Ka seai ne ‵tou meatau kae seki fakaakoako foki ki taua. Ka ‵kilo mai a atufenua ki a tatou pelā me e fakatakavalegofie. Ka se lavea ne latou a mea e lavea ne tatou ki ‵tou mata o te fakatuanaki—se kautau o agelu e ‵tu i tafa o tino o te Atua, kolā ko toka o taua atu mō tatou. Ka lavea pefea ne atufenua a latou me e se fakatuanaki latou ki te Atua? Ka ‵poi eiloa latou māfai ko fesoasoani mai a kautau o te lagi o taua atu ki a latou!—Faka. 19:11, 14, 15.

FAKATOKA NEI MŌ ASO MAI MUA

14. Ne a ‵tou mea e mafai nei o fai ke fakatoka mō aso mai mua?

¹⁴ Ne a ‵tou mea e mafai nei o fai ke fakatoka mō aso mai mua? Muamua la, e ‵tau o maua ne tatou se kilokiloga ‵lei ki kope faka-te-foitino ona ko te iloa atu me e isi se taimi ka se toe aoga ei a mea konā. E ‵tau foki o lotoma‵lie tatou ki mea ko maua kae e ‵tau o fia‵fia malosi tatou ona ko te ‵tou fesokotakiga mo Ieova. Ko te lasi o te iloa ‵lei ne tatou o te ‵tou Atua, ko te lasi foki o te ‵tou tali‵tonu ki te mafai ne ia o puipui tatou māfai ko taua mai a Koka mai Makoka.

15. Ne a mea ne tauloto ne Tavita mai i mea mua ne ‵tupu me ka se mafai eiloa o fakafanoanoa ne Ieova a ia?

¹⁵ Mafaufau ki nisi mea ne fesoasoani atu ki a Tavita kae ka fesoasoani mai foki ki a tatou ke fakatoka mō tofotofoga. Ne fai mai a Tavita: “‵Tofo aka kae ka lavea atu a te ‵lei o Ieova; e fiafia a te tagata telā e faka‵lafi ki a ia.” (Sala. 34:8) E fakaasi mai i pati konā a te pogai ne mafai ei ne Tavita o fakalagolago ki te fesoasoani o Ieova. Ne fakalagolago faeloa a Tavita ki a Ieova, kae ne seki fakafanoanoa eiloa a ia ne tena Atua. I te taimi koi foliki ei, ne taua atu a Tavita ki te toa mafi Filisitia ko Koliata, kae fai atu ki te sotia fakamataku tenā: “I te aso eiloa tenei ka tuku mai koe ne Ieova ki oku lima.” (1 Samu. 17:46) Fakamuli ifo, ne galue a Tavita mō te tupu ko Saulo, telā ne taumafai fakafia o tamate a ia. Kae ko “Ieova ne fakatasi atu” ki a Tavita. (1 Samu. 18:12) Ona ko te fesoasoani o Ieova ki a Tavita i aso mua, ne iloa ne Tavita me ne mafai ne ia o fakalagolago ki a Ieova i ana fakalavelave.

16. Ne a auala aoga e mafai o “‵tofo” aka ne tatou a te ‵lei o Ieova?

¹⁶ Ko te lasi o te ‵tou ‵kilo atu ki te takitakiga a Ieova i aso nei, ko te lasi foki o te ‵tou loto tali‵tonu ki te mafai ne ia o faka‵sao tatou i aso mai mua. E manakogina te fakatuanaki mo te loto fiafia ke fakalagolago ki a Ieova i taimi e fanoi atu ke malō‵lo, ko te mea ke mafai o ‵kau atu ki ‵tou fono, io me ke fakama‵fuli ‵tou aso ga‵lue ke mafai o ‵kau ki fakatasiga katoa kae ke uke foki ‵tou taimi i te galuega talai. Mafaufau la me ko se talia ne ‵tou pule a ‵tou fanoiga kae ko faka‵tea tatou. E mata, e fakatuanaki tatou me ka se mafai o tiaki io me tuku tiaki ne Ieova tatou kae ka tausi mai faeloa ne ia tatou? (Epe. 13:5) E mafai o fakamatala atu ne tino e tokouke i te taviniga tumau a te auala ne fesoasoani atu a Ieova i taimi ne ma‵nako malosi latou ki ei. E fakamaoni eiloa a Ieova.

17. Se a te tusi siki fakavae mō te tausaga 2022, kae kaia e fetaui ‵lei ei?

¹⁷ E seai se pogai e ‵tau o ma‵taku tatou ki aso mai me e kau mai a Ieova ki a tatou. Ka se mafai o tuku tiaki ne te ‵tou Atua a tatou māfai e fakamuamua faeloa ne tatou tena loto i ‵tou olaga. Ke fakamasaua mai a te tāua ke fakatoka nei mō taimi faiga‵ta i aso mai mua, kae ke tali‵tonu me ka se mafai o tuku tiaki ne Ieova a tatou, ko oti ne filifili aka ne te Potukau Pule a te Salamo 34:10 e pelā me ko te ‵tou tusi siki fakavae mō te tausaga 2022: “Ko latou kolā e ‵sala ki a Ieova ka seai ne mea ‵lei e ma‵tiva ei latou.”