Kaia e Tumau ei a Pulega sē Fakamaoni?

“Tino . . . ma‵lalo, e ‵nofo puapuaga i te pulega a tino ma‵luga.”​—FAILAUGA 8:9.

E FAKAMATALA faka‵lei mai i te fuaiupu tenā a tala fakasolopito o pulega a tāgata. Ne pogai mai i ei a te logo‵mae mo te sē fia‵fia o tino. Ko oti ne faka‵se faeloa a tino mafaufau ‵lei mai tupulaga kese‵kese, kolā ne taumafai o fakatoka faka‵lei a te nofo ‵lei o tino ne te kaimanako mo pulega sē fakamaoni. Kaia e fai ei penā? Kaia e tumau ei a pulega sē fakamaoni? Ona ko fakamalosiga ma‵sei e tolu kolā e ‵soko mai.

1. Te malosi o te agasala.

E fai faka‵lei mai te Tusi Tapu me i a tatou e “pokotia katoa i te agasala.” (Loma 3:9) E pelā me se masaki telā ne fa‵nau mai mo tatou, e “nofo” eiloa te agasala i loto i a tatou. I te fia afe tausaga, ne “pule” mai eiloa te agasala e pelā me se tupu ki luga i tino. E tumau eiloa te galue o tena “tulafono” i loto i a tatou. Ona ko olotou manakoga agasala ne fai ei ne tino e tokouke ke fakamuamua ne latou olotou manakoga totino, ke fakavae olotou olaga ki te mauaga o kope io me ko olotou pulega i mea a nisi tino.​—Loma 5:21; 7:​17, 20, 23, 25.

2. Te malosi o te lalolagi masei e ola tatou i ei.

Ko ‵fonu eiloa te ‵tou lalolagi i te manako lasi mo te kaimanako. I vaegā koga penā, e faigata ki nisi tino ke faka‵kese latou mai tino i olotou tafa. Ona ko te fia fai tofi ko kaima‵nako ei latou ki tulaga pule. E ati aka foki ne latou a te manako malosi ki tupe mo kope​—ke silia atu i mea kolā e manakogina ne latou. Se mea fakafanoanoa, me e loto fia‵fia eiloa latou o fai a mea i auala sē fakamaoni ke fakataunu olotou fakamoemoega. I lō te ‵teke atu ki fakamalosiga ma‵sei, a tino penā e “tau‵tali i te tokoukega kolā e fai mea ‵se.”​—Esoto 23:2.

3. Te fakamalosiga a Satani te Tiapolo.

A Satani, se tino faka-te-agaga ‵teke telā “e takitaki ‵se ne ia te lalolagi nofoaki kātoa.” (Fakaasiga 12:9) E fiafia malosi a ia o takitaki ‵se a tino. E mafai o fakamalosi ne ia a te manakoga o se tino ke maua a kope mo tupe e uke ke oko ki te tulaga telā ko amio faitogafiti ei se tino.

E mata, e fakauiga i ei me i a tatou ko pule ne Satani kae e ‵tau mo tatou o faka‵logo ki a ia? Ka maua ne tatou te tali i te suā mataupu.