Pulega sē Fakamaoni ka Palele Atu!

“Ke fakamoemoe koe ki te Aliki kae fakalogo ki ana fakatonuga . . . kae ka lavea foki ne koe a tino amio ma‵sei ka afuli keatea [io me fakaseai].”​—SALAMO 37:34.

E MATA, e ‵pau koe mo tino e tokouke kolā e ma‵taku me ka se mafai eiloa o fakaseai katoatoa atu a pulega sē fakamaoni? Kafai e penā loa, e malamalama tatou i te pogai e mataku ei koe. I tala fakasolopito katoa, ko oti ne tofotofo aka ne tino a vaegā malo kese‵kese. Kae ne seki mafai eiloa ne latou o fakaseai katoatoa atu a pulega sē fakamaoni. E mata, e isi se fakamoemoega me ka oko mai se taimi ka fakamaoni ei a tino katoa i olotou faifaiga ki nisi tino?

Se mea fakafiafia me e tali mai eiloa te Tusi Tapu penei, ao! E fai mai i ei me ko pili o fakaseai ne te Atua a pulega sē fakamaoni i ‵tou lalolagi. Ka fai pefea ne ia a te mea tenā? E auala i tena Malo, se pulega faka-te-lagi telā ka ‵fuli katoatoa ne ia ‵tou lalolagi. Ko te Malo foki eiloa tenā ne akoako ne Iesu ana soko ke ‵talo ki ei. I te ‵talo telā e taku i nisi taimi ko te ‵Talo a te Aliki, ne fai mai a Iesu, penei: “Ke oko mai tou malo. Ke fai te mea e loto koe ki ei.”​—Mataio 6:​10, Tusi Tapu i te ‵Gana Tuvalu.

E uiga ki te Pule o te Malo tenā, ko Iesu Keliso, e ‵valo mai te Tusi Tapu, penei: “E faka‵sao ne ia a tino ma‵tiva kolā e ka‵laga ki a ia, mo latou foki kolā e puapuagatia kae se amanaia ne tino. E alofa a ia ki tino vāivāi mo tino ma‵tiva; e faka‵sao foki ne ia a olotou ola. E fakaola ne ia latou mai tino sauā mo tino mata‵mua.” (Salamo 72:​12-14) Ke masaua la, me ne alofa atafai a Iesu ki a latou kolā ne pokotia i pulega sē fakamaoni, kae ka fai eiloa ne ia se mea e uiga ki faifaiga ma‵sei! Ma‵faga o fakamafanafanaga gali.

Mai lalo i te Pule alofa kae malosi tenā, ka fakaseai eiloa ne te Malo o te Atua a pulega sē fakamaoni mai ‵tou lalolagi. E pefea la? Mai te fakaseai katoatoa atu o pogai e tolu kolā ne māfua mai ei a pulega sē fakamaoni.

Te Malosi o te Agasala

I te taimi nei, e ‵tau mo tatou katoa o taua atu ki manakoga agasala kolā e mafai o fai ei ke kaima‵nako tatou. (Loma 7:​21-23) Koi isi eiloa ne tino ‵lei kolā e ma‵nako o fai te mea tonu. E fakatuanaki eiloa latou ki te tāua o te toto maligi o Iesu, kae ka mafai o fakamagalogina olotou agasala.a (1 Ioane 1:​7, 9) Ka maua ne vaegā tino penā a mea aoga mai te ‵toe fakaasiga sili o te alofa o te Atua, e pelā mo te mea e fai‵tau ne tatou i te Ioane 3:16: “Ona ko te lasi o te alofa o te Atua ki te lalolagi ne tuku mai ei ne ia tena Tama fagasele e tokotasi, ko te mea ke se fakaseai atu so se tino e fakatuanaki ki a ia kae ke maua ne ia te ola se-gata-mai.”

Ka fai eiloa ne te Atua se mea fakaofoofogia mō tino fakamaoni. I te lalolagi fou mai mua nei, ka fakaseai ne ia a vaega katoa o te agasala, kae fai ne ia ke gasolosolo malie a tino fakamaoni ki te tulaga ‵lei katoatoa kae amiotonu. (Isaia 26:9; 2 Petelu 3:13) Ka sē toe mafai ne te malosi o te agasala o fai so se tino ke sē fakamaoni. Mai lalo i te pulega a te Malo o te Atua, a tino fakamaoni “ka toe fakasaoloto . . . mai te pologa ki te masei [io me ko te sē fakamaoni].”​—Loma 8:​20-22.

Te Malosi o te Lalolagi Masei e Ola Tatou i ei

Se mea fakafanoanoa, me e ma‵nako tonu a tino e tokouke i aso nei o fakapuapuaga a nisi tino. E se amanaia latou ki tino fatauva mo tino ma‵tiva, kae fakamalosi atu foki ki nisi tino ke sē fakamaoni. E fakatonu mai te Tusi Tapu ki tino taki tokotasi penā: “A tino amio ma‵sei ke tiaki olotou uiga ma‵sei kae ‵fuli aka foki a olotou mafaufauga.” Kafai e sala‵mo a tino taki tokotasi sē fakamaoni penā, e tauto mai te Tusi Tapu me ka “fakamagalo ne ia [te Atua] a agasala a tino.”​—Isaia 55:7.

E tigā te feitu tenā, ka fakaseai eiloa ne te Atua a latou kolā e loto ma‵keke kae sē ma‵nako o ‵fuli o olotou olaga. E auala i te Malo o te Atua, ka fakataunu eiloa a folafolaga i te Tusi Tapu: “Ke fakamoemoe koe ki te Aliki kae fakalogo ki ana fakatonuga . . . kae ka lavea foki ne koe a tino amio ma‵sei ka afuli keatea [io me fakaseai].” (Salamo 37:34) Kafai ko fakaseai atu a tino amio ma‵sei, ka sē toe pokotia a tino tapuaki fakamaoni o te Atua i pulega sē fakamaoni.

Te Malosi o Satani te Tiapolo

E tulaga muamua i tino agasala loto ma‵keke ko Satani te Tiapolo. Ko oko eiloa i te loto fakafetai o tatou me ko pili o fakatapu ne Ieova a Satani ke mo a e toe fakamalosi atu ki tino. I te fakaotiga loa, ka fakaseai katoatoa ei ne te Atua a Satani. Ka sē toe mafai eiloa ne te tino masei tenei o fakamalosi atu ki tino ke sē fakamaoni.

E tonu, a te manatu me ka fakaseai ne te Atua a mafuaga o pulega sē fakamaoni e mafai o fai fua pelā me ne mafaufauga sē mautinoa. Kāti ka mafaufau koe penei, ‘E mata, e mafai ne te Atua o fai a ‵fuliga konā? Kafai e mafai, kaia la ne seki na fai ei ne ia te mea tenā?’ A mea konā ne fesili aoga, kae e tuku mai ne te Tusi Tapu a tali fakamalie loto ki ei.b E ‵kami ne matou koe ke sukesuke ki mea kolā e akoako mai i te Tusi Tapu e uiga ki aso mai mua, ko te taimi telā ka fakaseai atu ei a pulega sē fakamaoni ki te se-gata-mai.

[Fakamatalaga fakaopoopo]