A Koe Se Situati Fakatuagagina!

‘A koutou e se pule i a koutou eiloa.’​—1 KOLINITO 6:19.

KA TALI MAI PEFEA NE KOE?

Ne a mea ne fai ne situati i aso mua?

Ne a tiute e manakogina ke fai ne situati katoa a te Atua?

E pelā me ne situati, e ‵tau o ‵kilo atu pefea tatou ki te taviniga telā ne tuku mai ki a tatou?

1. Kafai e mafau‵fau a tino e uiga ki pologa, se a te mea e mafau‵fau latou ki ei?

ISE 2,500 tausaga ko ‵teka, ne tusi mai se tino tusitala Eleni: “E seai se tino e manako ke fai a ia mo pologa.” E lotoma‵lie a tino e tokouke i aso nei ki te mea tenā. Kafai e mafau‵fau a tino ki pologa, e mafau‵fau latou ki tino kolā ne faimālō ke tavini atu ki nisi tino kae fai masei atu ki ei. A olotou galuega ne fai e aoga fua ki tino kolā e pule atu ki luga i a latou.

2, 3. (a) Se a te tulaga e maua ne tavini loto fia‵fia a Keliso? (e) Ne a fesili e uiga ki galuega a situati ka mafau‵fau tatou ki ei?

² Ne fai mai a Iesu me i ana soko ne tavini io me ne pologa loto mau‵lalo. E pelā me ne pologa, e se fakamalalo io me fai ma‵sei a Kelisiano tonu. E maua ne pologa konei se tulaga āva, fakatuagagina, kae fakaaloalogina. E pelā me se fakaakoakoga, ke mafaufau ki pati a Iesu e uiga ki te “tavini” e tokotasi mai mua malie eiloa o Tena mate. Ne folafola mai ne Keliso me ka tuku atu ne ia a tiute ki se “tavini fakamaoni kae poto.”​—Mataio 24:​45-47.

³ Onoono la, me i se tala e tai ‵pau, ne taku a te tavini tenā ki te “situati.” (Faitau te Luka 12:​42-44.) A te tokoukega o Kelisiano fakamaoni kolā koi ola nei e se ne vaega o te situati fakamaoni tenā. E ui i ei, e fakaasi mai i te Tusi Tapu me i tino katoa kolā e tavini atu ki te Atua e fai pelā me ne situati. Ne a tiute e aofia i ei? E ‵tau o ‵kilo atu pefea ki ei? Ke maua a tali, ke suke‵suke tatou ki mea kolā ne fai ne situati i aso mua.

TIUTE O SITUATI

4, 5. Ne a tiute ne fai ne situati i aso mua? Tuku mai ne fakaakoakoga.

⁴ I aso mua, a te situati se tavini fakatuagagina telā e ‵tofi aka ke onoono ki te kāiga io me ko pisinisi a tena matai. E tausi ne ia a kope mo tupe a tena matai, kae pule atu ki nisi tavini. E lavea ne tatou a te mea tenei i a Elisesa, telā ne tausi ne ia a kope e uke o Apelaamo. Kāti ko Eliesa telā ne uga atu ne Apelaamo ke fano ki Mesopotamia o filifili mai se avaga ma Isaako. Se galuega tāua ‵ki eiloa!​—Kenese 13:2; 15:2; 24:​2-4.

⁵ A te mokopū o Apelaamo ko Iosefa ne tausi atu ki te kāiga o Potifala. (Kenese 39:​1, 2) I se taimi fakamuli ifo, ne isi se situati a Iosefa telā ne ‵tofi aka ke ‘pule i te fale o Iosefa.’ Ne talimālō ne te situati tenā a taina e tokosefulu o Iosefa. Mai i te fakatonuga a Iosefa, ne fakatoka ei ne ia a mea e uiga ki te ipu siliva telā ne “kaisoa.” E fakaasi mai i te mea tenei a te lasi o te tali‵tonu o matai ki olotou situati.​—Kenese 43:​19-25; 44:​1-12.

6. Ne a tiute kese‵kese e maua ne toeaina Kelisiano?

⁶ I te fia o senitenali fakamuli ifo, ne tusi mai te apositolo ko Paulo me e ‵tau o fai a ovasia Kelisiano e pelā me ne ‘situati a te Atua.’ (Tito 1:7) E pelā me ne tausi mamoe o te “lafu mamoe a te Atua,” e takitaki ne ovasia a te fakapotopotoga. (1 Petelu 5:​1, 2) E tonu, e kese‵kese olotou tiute. Pelā me se fakaakoakoga, a te tokoukega o ovasia Kelisiano i aso nei e ga‵lue i te fakapotopotoga e tasi. A ovasia faima‵laga e tavini atu i fakapotopotoga e uke. Kae ko sui o te Komiti o Ofisa Lagolago e tausi atu ki fakapotopotoga i atufenua katoa. Kae e fakamoemoe eiloa ke fakataunu ne tino katoa olotou tiute mo te fakamaoni. E ‵tau mo latou katoa o tuku atu se “tala ki te Atua.”​—Epelu 13:17.

7. E iloa pefea ne tatou me i Kelisiano katoa e fai pelā me ne situati?

⁷ Kae pefea la a te tokoukega o Kelisiano a‵lofa fakamaoni kolā e se ne ovasia? Ne tusi atu ne te apositolo ko Petelu se tusi ki Kelisiano katoa, penei: “Ke fakaaoga a meaalofa kolā e maua ne tino taki tokotasi ke tavini atu ei te suā tino ki te suā tino e pelā me ne situati ‵lei o te alofa tauanoa o te Atua telā e fakaasi mai i auala kese‵kese.” (1 Petelu 1:1; 4:10) Ne fakaasi mai ne te Atua a tena alofa tauanoa mai te tukumaiga ki a tatou katoa a meaalofa, kope, mea e mafai o fai, io me ko taleni kolā e mafai o fakaaoga ne tatou ke aoga ki ‵tou taina tali‵tonu. Tela la, a tino katoa kolā e tavini atu ki te Atua ne situati. E talitonu kae āva mai ki a tatou, kae e fakamoemoe a ia ke fakaaoga faka‵lei ne tatou a mea kolā ne tuku mai ne ia ki a tatou.

A TATOU KO TINO O TE ATUA

8. Se a te fakatakitakiga e tasi e ‵tau o masaua ne tatou?

⁸ Ke mafau‵fau nei tatou ki fakatakitakiga fakavae e tolu kolā e manakogina ke mafaufau ki ei e pelā me ne situati. Te mea muamua: A tatou katoa ko tino o te Atua kae e ‵tau o fakafiafia atu ki a ia. Ne tusi mai a Paulo: ‘A koutou e se pule i a koutou eiloa me i a koutou ko oti ne ‵togi ki se ‵togi,’ ko te toto maligi o Keliso. (1 Kolinito 6:​19, 20) Ona ko tatou ko tino o Ieova, e ‵tau eiloa o faka‵logo tatou ki ana tulafono kolā e se ‵mafa malosi. (Loma 14:8; 1 Ioane 5:3) A tatou foki ko pologa a Keliso. E pelā mo situati i aso mua, e lasi te saolotoga e maua ne tatou​—kae e isi ne tapulā ki ‵tou saolotoga. E ‵tau eiloa o fai ‵tou tiute e ‵tusa mo fakatonuga. Faitalia te uke o tauliaga e maua ne tatou, a tatou ko tavini a te Atua mo Keliso.

9. Ne fakamatala mai pefea ne Iesu a te fesokotakiga i te va o te matai mo te pologa?

⁹ Ne fesoasoani mai a Iesu ke malamalama tatou i te fesokotakiga i te va o te matai mo te pologa. E tasi te taimi ne faipati atu a Iesu ki ana soko e uiga ki se pologa telā ne vau ki te fale i te otiga ne galue i te aso kātoa. E mata, ne fai atu te matai: “Vau fakavave o kai”? Ikai. E fai atu a ia: “Fakatoka se mea mo oku kai i te afiafi, pei tou gatu situati kae tavini mai ke oko ki te taimi e oti ei au ne kai kae inu; ka oti au, ko mafai ei koe o kai kae inu.” Ne fakagalue aka pefea ne Iesu a te tala fakatusa tenā? “E penā foki koutou, kafai ko oti ne fai ne koutou a mea kolā ne tuku atu ke fai, ko fai atu ei penei, ‘A matou ne pologa e seai ne aoga. A mea kolā ko oti ne fai ne matou ko mea fua kolā ne ‵tau eiloa o fai ne matou.’ ”​—Luka 17:​7-10.

10. Se a te mea e fakaasi mai i ei me e fakatāua ne Ieova a ‵tou taumafaiga ke tavini atu ki a ia?

¹⁰ E tonu, e fakatāua ne Ieova a ‵tou taumafaiga ke tavini atu ki a ia. E fakatalitonu mai te Tusi Tapu ki a tatou: “Me i te Atua e sē se tino sē amiotonu ko te mea ke puli i a ia otou galuega mo te alofa ne fakaasi atu ne koutou mō tena igoa.” (Epelu 6:10) E se mafai lele o fai mai a Ieova ke fai ne tatou se mea e se ‵tau o fai. So se mea e fai mai a ia ke fai ne tatou e fai mō te ‵lei o tatou kae e se tō faigata. E ‵tusa mo te tala fakatusa a Iesu, e se fakafiafia atu te pologa ki a ia eiloa mai te fakamuamua o ana manakoga totino. Ko tena uiga, i te taimi e tuku atu ei tatou ki te Atua, ko filifili ne tatou ke fakamuamua te faiga o tena loto i ‵tou olaga. E mata, e lotomalie koe ki ei?

MEA KOLĀ E MANAKO MAI A IEOVA KE FAI NE TATOU KATOA

11, 12. E pelā me ne situati, se a te uiga e ‵tau o fakaasi atu ne tatou, kae ne a mea e ‵tau o ‵kalo kea‵tea tatou mai i ei?

¹¹ A te lua o fakatakitakiga ko te: E pelā me ne situati, e ‵pau a mea e ‵tau o faka‵logo katoa tatou ki ei. E tonu, me i nisi tiute e tuku atu ki nāi tino i loto i te fakapotopotoga Kelisiano. Kae ko te ukega o tiute, e ‵pau katoa tatou i ei. Pelā me se fakaakoakoga, e ‵tau mo tatou o fakatau a‵lofa te suā tino ki te suā tino e pelā me ne soko o Keliso kae e pelā me ne Molimau a Ieova. Muna a Iesu me i te alofa ko te fakailoga matea o Kelisiano ‵tonu. (Ioane 13:35) Kae e se a‵lofa fua tatou ki ‵tou taina. E taumafai tatou o fakaasi atu te alofa ki a latou kolā e se kāiga tatou i te fakatuanaki. A te mea tenei se mea telā e mafai kae e ‵tau o fai ne tatou katoa.

¹² E manakogina foki ke fai ne tatou a amioga ‵lei. E ma‵nako tonu tatou o ‵kalo kea‵tea mai i amioga mo vaegā olaga kolā e taku fakamasei i te Muna a te Atua. Ne tusi mai a Paulo: “A tino kolā e fina ki amioga fakatauavaga sē ‵tau, io me ko tino ifo ki tupua, io me ko tino mulilua, io me ko tino amio fakasotoma, io me ko tāgata kolā e ‵moe mo tāgata, io me ko tino kai‵soa, io me ko tino kaima‵nako, io me ko tino ko‵nā, io me ko tino fatu‵fatu, io me ko tino ‵faomea, e se mafai o maua ne latou a te Malo o te Atua.” (1 Kolinito 6:​9, 10) E manino ‵lei me e manakogina a taumafaiga ke tau‵tali i tulaga amio‵tonu o te Atua. E maua ne tatou a mea aoga e uke mai i taumafaiga penā, e aofia i ei te vaegā olaga telā e maua mai i ei te malosi ‵lei, fesokotakiga ‵lei mo nisi tino, mo se tulaga taulia i mua o te Atua.​—Faitau te Isaia 48:​17, 18.

13, 14. Se a te tiute ne tuku atu ki Kelisiano katoa, kae e ‵tau o ‵kilo atu pefea tatou ki ei?

¹³ Masaua foki la me e isi ne galuega a te situati e ‵tau o fai. E penā foki tatou. Ko oti ne tuku mai ki a tatou se meaalofa tāua​—te iloaga e uiga ki te munatonu. E fakamoemoe te Atua ke akoako atu ne tatou a te iloaga tenā ki nisi tino. (Mataio 28:​19, 20) Ne tusi mai a Paulo: “Ke talitonu te tino me i a māua ko tino fesoasoani a Keliso mo situati o mea ‵funa kae tapu a te Atua.” (1 Kolinito 4:1) Ne iloa ne Paulo me i te galuega faka-situati tenei e aofia i ei a te tausi o “mea ‵funa kae tapu” mo te fakailoa atu ki nisi tino e pelā mo te fakatonuga a te Matai, ko Iesu Keliso.​—1 Kolinito 9:16.

¹⁴ A te fakaoko atu o te munatonu ki nisi tino se faifaiga alofa telā e ‵tau o fai. E tonu, e kese‵kese a fakanofonofoga o Kelisiano. E se ‵pau a mea e mafai o fai ne tino katoa i te galuega talai. E malamalama a Ieova i te mea tenā. A te mea tāua ko te fai o te ‵toe mea e mafai ne tatou taki tokotasi o fai. I te auala tenā, e fakaasi atu ei ne tatou a te alofa kaimalie ki a Ieova mo ‵tou tuakoi.

TE TĀUA O TE FAKAMAONI

15-17. (a) Kaia e ‵tau ei o fakamaoni a te situati? (e) Ne fakamatala mai pefea ne Iesu a ikuga o te sē fakamaoni?

¹⁵ A te tolu o fakatakitakiga, telā e pili ‵ki ki te avā mea muamua, ko te: E ‵tau mo tatou o fakamaoni kae fakatuagagina. Kāti e maua ne te situati a uiga ‵lei e uke mo mea e mafai o fai, kae e seai se aoga o mea konā māfai e se fai ana tiute io me e se fakalogo ki tena matai. A te fakamaoni se mea e manakogina ko te mea ke fai te tino mo fai se situati aoga kae iku manuia. Masaua me ne tusi mai a Paulo: “A te mea telā e manakogina i situati ko te lotou fakamaoni.”​—1 Kolinito 4:2.

¹⁶ E mautinoa ‵lei me kafai e fakamaoni tatou, ka maua eiloa ne tatou a te taui. Kae kafai e se fakamaoni tatou, ka sē maua ne tatou a te taliaga a te Atua. E matea ne tatou a te fakatakitakiga tenei i te tala fakatusa a Iesu e uiga ki taleni. Ne maua ne pologa kolā ne fakamaoni o “fakagalue” a tupe a te matai a te fakamālōga mo te fakamanuiaga. Kae ne fakamasino aka a te pologa telā ne seki fakagalue ne ia a te mea telā ne tuku atu ne te matai ki a ia e pelā me e “matagā,” “paie,” kae “se aoga.” Ne tapale kea‵tea te taleni telā ne tuku atu ki a ia kae ‵pei atu a ia ki tua.​— Faitau te Mataio 25:​14-18, 23, 26, 28-30.

¹⁷ Ne toe fakasino mai foki a Iesu ki ikuga o te sē fakamaoni. Ana muna: “E isi se tagata maumea telā e isi sena situati, kae ne ‵losi atu ki te situati tenei me ne fakamāumāu ne ia a mea a tena pule. Ne ‵kami mai ei ne ia te situati tenā kae fai atu ki ei, ‘Se a te mea tenei ko logo au i ei e uiga ki a koe? A koe ko fakatea mai tau galuega me ko se mafai ne koe o tausi faka‵lei ki ei.’ ” (Luka 16:​1, 2) Me ne fakamāumāu ne te situati a mea a tena matai, fakatea ei a ia ne te matai. Se akoakoga tāua ‵ki mō tatou! E se ma‵nako lele tatou ke sē fakamaoni i mea kolā e manako mai ke fai ne tatou.

E MATA, SE MEA POTO KE FAKATAUTAU TATOU KI NISI TINO?

18. Kaia e se ‵tau ei o fakatautau tatou ki nisi tino?

¹⁸ E mafai o fesili ifo a tatou taki tokotasi penei, ‘Au se situati pefea?’ Kāti e ‵sae aka a fakalavelave māfai e fakatautau tatou ki nisi tino. E fakatonutonu mai te Tusi Tapu ki a tatou: “Ke iloilo ifo a tino taki tokotasi ki ana galuega eiloa, kae ka isi se pogai ke fiafia ei a ia e uiga ki a ia eiloa, kae ke mo a ma fakatautau ki se isi tino.” (Kalatia 6:4) I lō te fakatautau ‵tou mea e fai ki mea e fai ne nisi tino, e ‵tau o ‵saga tonu tatou ki mea kolā e mafai ne tatou taki tokotasi o fai. Ka sē puipui fua tatou ne te mea tenei mai te ‵fete i te fakamatamata kae mai te loto vāivāi foki. E ‵tau o iloa ne tatou me e mafuli‵fuli a fakanofonofoga. E se taumate, ona ko te sē malosi ‵lei te foitino, olaga matua, io me ko nisi tiute aka, ko sē mafai ei ne tatou o fai a mea katoa kolā e masani o fai ne tatou. I te suā feitu, kāti e mafai o fai ne tatou a mea e uke atu i lō mea kolā e fai ne tatou i te taimi nei. Kafai e penā loa, kaia e se taumafai ei ke tai momea aka ‵tou mea e fai?

19. Kafai e seki maua ne tatou se tauliaga, kaia e se ‵tau ei o loto vāivāi tatou?

¹⁹ A te suā mea telā e ‵tau ke mafau‵fau ki ei ko tiute kolā ko maua io me kolā e ma‵nako tatou ke maua. E pelā me se fakaakoakoga, kāti e manako se taina ke tavini a ia e pelā me se toeaina i te fakapotopotoga io me tuku atu ne tofiga i fono o te fenua mo fono o te atufenua. Se mea ‵lei ke galue malosi ke maua a tauliaga penā, kae e se ‵tau o loto vāivāi tatou māfai ne fakamoe‵moe tatou ki ei kae se maua ne tatou. Ona ko pogai kolā e se malama‵lama tatou i ei, kāti ka maua a nisi tauliaga i se taimi fakamuli ifo loa i te mea telā ne fakamoemoe ki ei. Masaua me kāti ne mafaufau a Mose i a ia ko toka o ‵taki te kau Isalaelu mai i Aikupito, kae e ‵tau o fakatali a ia ki se 40 tausaga koi tuai o fai a te mea tenā. Ne lava ‵lei te taimi ke ati aka ne ia a uiga kolā e manakogina ke ‵taki ki ei a tino ‵teke kae loto ma‵keke.​—Galuega 7:​22-25, 30-34.

20. Se a te akoakoga e mafai o tauloto ne tatou mai te fakaakoakoga a Ionatana?

²⁰ I nisi taimi kāti e seai eiloa se tauliaga e tuku mai ki a tatou. E tenā loa te mea ne tupu ki a Ionatana. A iako te tama tagata a Saulo kae ne ‵tau o fai mo fai te tupu o Isalaelu. E ui i ei, ne filifili ne te Atua a Tavita telā e foliki ifo i a Ionatana, ke fai mo tupu. Ne a mea ne fai ne Ionatana? Ne talia ne ia kae ‵lago atu ki a Tavita ke oko foki eiloa ki te tulaga fakamataku ne oko ki ei tena ola. Ana muna ki a Tavita: “Ko koe ka fai mo tupu o Isalaelu, ka ko au e tulaga lua atu ki a koe.” (1 Samuelu 23:17) E mata, e lavea ne koe te manatu tāua i ei? Ne talia ne Ionatana a tena tulaga, kae ne seki loto masei a ia ki a Tavita e pelā mo tena tamana. I lō te loto ma‵sei ki tiute kolā ne tuku atu ke fai ne nisi tino, e mafai eiloa ne tatou katoa o fai faka‵lei a tiute kolā ko maua ne tatou. E mautinoa i a tatou me i loto i te lalolagi fou, ka fakama‵lie eiloa ne Ieova a manakoga tonu o ana tavini katoa.

21. E ‵tau o ‵kilo atu pefea tatou ki ‵tou taviniga e pelā me ne situati?

²¹ Ke masaua ne tatou me e pelā me ne situati, a tatou e se ne pologa kolā e faimālō ke tavini atu ki se matai sauā. I lō te fai penā, e talitonu kae āva malosi mai a Ieova ki a tatou mai te tukumaiga o galuega tāua ke fai ne tatou, e pelā mo te talaiga o te tala ‵lei i aso fakaoti konei, se galuega telā ka sē toe fai. E tuku mai ne ia ki a tatou a te saolotoga ke filifili me ka tausi pefea ne tatou a tiute kolā ne tuku mai ne ia ki a tatou. Tela la, ke fai tatou mo situati fakamaoni. Kae ke fakatāua ne tatou a te tauliaga ko maua ne tatou ke tavini atu ki te ‵toe Tino sili i te lagi mo te lalolagi kātoa.

[Ata i te itulau e 20]

Ke fai ne tatou mo te fakamaoni a tiute kolā ne tuku mai ke fai ne tatou