Gasuesue E ‵Tusa Mo Te ‵Talo Alofa A Iesu

1, 2. Fakamatala mai te mea ne fai ne Iesu mō ana apositolo fakamaoni i te otiga ne fakamanatu ne latou te Paseka i te 33 T.A.

KO TE afiafi po o Nisani 14 i te tausaga e 33 T.A. Ko oti ne fakamanatu ne Iesu mo ana taugasoa a te Paseka, telā ne fakamasaua atu ki a latou a te auala ne fakasaoloto ei ne te Atua olotou tupuga mai te ‵nofo pologa i Aikupito. Kae ko ana soko fakamaoni e maua ne latou i se auala e lasi atu a te “fakaolataga ki te se-gata-mai.” Kae i te suā aso, a te lotou Takitaki telā e seai sena agasala ka tamate ne ana fili. Ka ‵fuli a te faifaiga fakatakalialia tenei ki se fakamanuiaga. Ka fakavae a te faka‵saoga o tino mai te agasala mo te mate ki te toto maligi o Iesu.​—Epe. 9:12-14.

² Ko te mea ke sē puli i a tatou a te fakatokaga alofa tenei, ne kamata ei ne Iesu se fakamanatuga fou ke sui ki ei te Paseka. Ne fai ne ia te mea tenei mai te ‵tofitofiga o se falaoa sē faka‵fete kae tufatufa atu ki ana apositolo fakamaoni e toko 11, ana muna: “E fakauiga te mea tenei ki toku foitino telā ka tuku atu mō koutou. Ke fai faeloa te mea tenei mo fai se fakamasauaga ki a au.” Ne fai foki ne ia penā ki se ipu uaina ‵kula, kae fai atu ki a latou: “E fakauiga a te ipu tenei ki te feagaiga fou e auala i toku toto, telā ka ‵ligi ki tua mō koutou.”​—Luka 22:19, 20.

3. (a) Se a te ‵fuliga lasi ne tupu mai tua o te mate o Iesu? (e) Ne a fesili e ‵tau o mafau‵fau tatou ki ei e uiga ki te ‵talo a Iesu i te Ioane mataupu e 17?

³ Ko pili fua o oti atu te feagaiga mua o te Tulafono i te va o te Atua mo te fenua o Isalaelu. Kae ka sui ne se feagaiga fou i te va o Ieova mo soko fakaekegina o Iesu. Ne mafaufau ‵mafa a Iesu ki te ola ‵lei o te fenua fou faka-te-agaga tenei. Ne mavae‵vae te fenua o Isalaelu kae sē ‵kau fakatasi i mea fakalotu, kae ne masiasi malosi i ei te igoa tapu o te Atua. (Ioa. 7:45-49; Galu. 23:6-9) E ‵kese mai i ei, ne manako a Iesu ke ‵kau tasi ana soko ko te mea ke mafai o ga‵lue fakatasi latou o faka‵malu te igoa o te Atua. Tela la, se a te mea ne fai ne Iesu? Ne fai atu ne ia a te ‵toe ‵talo gali eiloa telā e mafai o faitau ki ei so se tino. (Ioa. 17:1-26; onoono ki te ata i te kamataga.) E mafai o toe ‵kilo tatou ki ei kae fesili ifo, “E mata, ne tali atu te Atua ki te ‵talo a Iesu?” E ‵tau foki mo tatou o suke‵suke kae fesili ifo ki a tatou eiloa, “E mata, e gasuesue au e ‵tusa mo mea i te ‵talo?”

TOE MEA TĀUA KI A IESU

4, 5. (a) Ne mea e tauloto ne tatou mai te fakatomuaga o te ‵talo a Iesu? (e) Ne tali atu pefea a Ieova ki te fakamolemole totino a Iesu e uiga ki tena taimi mai mua?

⁴ Ne leva ‵ki te po ne faipati atu ei ne Iesu ki ana soko a te iloaga tāua mai te Atua. Tenā ne kilo aka ei ona mata ki te lagi kae ‵talo: “Te Tamana, ko oko mai te itula; ke faka‵malu aka tau tama ko te mea ke faka‵malu koe ne tau tama, e pelā eiloa mo te tukuatuga ne koe ki a ia a te pule i luga i tino katoa, ko te mea ke mafai o tuku atu ne ia a te ola se-gata-mai ki a latou katoa kolā ko oti ne tuku atu ne koe ki a ia. . . Ko oti ne faka‵malu ne au a koe i te lalolagi, me ne fakaoti ne au a te galuega telā ne tuku mai ne koe ke fai ne au. Tela la, e te Tamana, ke faka‵malu ne koe au i ou tafa e pelā eiloa mo te ‵malu telā ne maua ne au i ou tafa a koi tuai o faite te lalolagi.”​—Ioa. 17:1-5.

⁵ Onoono ki toe mea tāua ki a Iesu i te kamataga o tena ‵talo. A te mea telā ne manavase malosi a ia ki ei ko te faka‵maluga o te igoa o tena Tamana faka-te-lagi, kae fetaui a te mea tenei mo te fakamolemole muamua i te ‵talo fakaakoako a Iesu: “Te Tamana, ke tapu tou igoa.” (Luka 11:2) A te suā mea telā ne manavase ki ei a Iesu ko manakoga o ana soko, ko te mea ke mafai o “tuku atu ne ia a te ola se-gata-mai ki a latou.” Mai tua i konā, fai atu ei ne ia a tena manakoga totino, penei: “Te Tamana, ke faka‵malu ne koe au i ou tafa e pelā eiloa mo te ‵malu tela ne maua ne au i ou tafa a koi tuai o faite te lalolagi.” E sili atu te taui ne tuku atu ne Ieova ki tena Tama fakamaoni i lō te mea ne fakamolemole mai a ia ki ei mai te tukuatuga o “te igoa telā e sili atu i te ‵lei i lō” so se agelu.​—Epe. 1:4.

‘TE ILOAGA O TE ATUA TONU E TOKOTASI’

6. Ne a mea e ‵tau o fai ne te kau apositolo ko te mea ke maua ne latou te ola se-gata-mai, kae iloa pefea ne tatou me ne iku manuia latou?

⁶ Ne ‵talo foki a Iesu ki mea kolā e ‵tau o fai ne tatou e pelā me ne tino agasala ko te mea ke mafai o maua ne tatou a te meaalofa faivasaga ko te ola se-gata-mai. (Faitau te Ioane 17:3.) Ana muna me e ‵tau ke “iloa tonu” faeloa ne tatou a te Atua mo Keliso. A te auala e tasi e fai ei ne tatou a te mea tenei ko te fakaaogaga o ‵tou mata mo taliga ke tauloto ki mea e uke atu e uiga ki a Ieova mo tena Tama. A te suā auala tāua e iloa tonu ei ne tatou te Atua ko te mauaga o te fiafia mai te fakagaluegaga o mea kolā ne tauloto ne tatou e uiga ki a ia. Ne tau‵tali te kau apositolo i te fakatokaga tenei, me ne ‵talo atu a Iesu, penei: “I muna kolā ne tuku mai ne koe ki a au ko oti ne tuku atu ne au ki a latou, kae ko oti ne maua ne latou konā.” (Ioa. 17:8) E ‵tau o mafaufau ‵loto faeloa latou ki pati a te Atua kae fakagalue a muna konā i olotou olaga i aso takitasi ko te mea ke maua ne latou te ola se-gata-mai. E mata, ne iku manuia a apositolo fakamaoni i te faiga o te mea tenei ke oko eiloa ki te fakaotiga o olotou olaga i te lalolagi? Ao, ne iku manuia latou. E iloa ne tatou te mea tenei i igoa o latou taki tokotasi e tusi faka‵mau eiloa i luga i fatu fakavae e 12 o te Ielusalema Fou faka-te-lagi.​—Faka. 21:14.

7. Se a te uiga o te “iloa tonu” o te Atua, kae kaia e tāua ‵ki ei te mea tenā?

⁷ E ‵tusa mo mau a tino a‵koga i te ‵gana Eleni, a te tugāpati Eleni telā ne ‵fuli ki te “iloaga tonu” e mafai foki o ‵fuli ki te “e ‵tau ke iloa faeloa” io me “e ‵tau o tumau i te iloa.” E fetaui ‵lei a uiga e lua konā kae tāua foki. E tuku mai i te fakamatalaga mai lalo o te Reference Bible a te suā ‵fuliga ki te Ioane 17:3, “te lotou iloa e uiga ki a koe.” Tela la, ke “iloa tonu” se faifaiga tumau telā e iku atu ki te tauliaga ko te “iloa” o te Atua. A te iloa tonu o te ‵toe Tino sili i te iunivesi, e aofia i ei a mea e uke atu i lō te ‵piki fua i te mafaufau a uiga mo te fuafuaga a te Atua. A te iloa tonu o Ieova e aofia i ei se fesokotakiga ‵pili kae alofa mo ia pelā foki mo taina mo tuagane. “A te tino telā e se alofa,” e fakamatala mai te Tusi Tapu, “e seki iloa ne ia te Atua.” (1 Ioa. 4:8) Tela la, e aofia foki i te iloa o te Atua a te fakalogo ki a ia. (Faitau te 1 Ioane 2:3-5.) Mafāga o tauliaga ke fai koe mo fai se tokotasi telā e iloa ne ia a Ieova! Kae kafai e fai tatou pelā mo Iuta te Isikaliota, e mafai o galo a te tauliaga tāua tenei. Ke na ga‵lue malosi tatou ke fakatumau a te tauliaga tenā. I te fakaotiga, ka mafai o maua ne tatou a te meaalofa faivasaga ko te ola se-gata-mai.​—Mata. 24:13.

“ONA KO TOU IGOA”

8, 9. Se a te fakavae tonu o te galuega talai a Iesu i te lalolagi, kae ne a tuu fakalotu ne ‵teke atu a ia ki ei?

⁸ I te otiga ne fai‵tau ki te ‵talo a Iesu i te Ioane mataupu e 17, ko oi e mafai o fakalotolotolua i te ‵poko o te alofa o Iesu, e se ki ana apositolo fua i te taimi tenā kae ki ana soko foki i te taimi mai mua? (Ioa. 17:20) E ‵tau foki ke malama‵lama tatou i ‵tou faka‵saoga e se ko te mea telā e tāua malosi ki a Iesu. A te fakavae tonu o tena galuega talai i te lalolagi mai te kamataga ke oko ki te fakaotiga ko te fakamalugaga mo te faka‵maluga o te igoa o tena Tamana. Pelā me se fakaakoakoga, i te taimi ne faka‵pula ei ne Iesu a tena galuega i te sunako i Nasaleta, ne faitau ne Iesu a te pelugā tusi a Isaia: “Ko i luga i a au te agaga o Ieova, me ne fakaeke ne ia au o folafola atu te tala ‵lei ki tino ma‵tiva.” Kāti ne fakaasi manino atu ne Iesu a te igoa o te Atua i te taimi ne faitau ei ne ia a te fakatonuga tenei.​—Luka 4:16-21.

⁹ A koituai o fanaifo a Iesu ki te lalolagi, ko leva ne fakamalosi atu a takitaki lotu ke sē fakaaoga ne tino a te igoa o te Atua e ‵tusa mo tuu faka-Iutaia. E mautinoa i a tatou me ne ‵teke atu a Iesu ki tuu kolā e se ‵lago ki ei te Tusi Tapu. Ana muna ki tino ‵teke: “Au ne vau i te igoa o toku Tamana, kae e se talia ne koutou au. Moi fai ne vau se tino i tena igoa eiloa, penei ko oti ne talia ne koutou te tino tenā.” (Ioa. 5:43) I nāi aso mai mua o tena mate, ne fakaasi mai ne Iesu a te mea telā ne manavase tonu a ia ki ei i te olaga e auala i te ‵talo: “Tamana, faka‵malu tou igoa.” (Ioa. 12:28) Tela la, e se ‵tau o ‵poi tatou me ne fakaasi mai ne Iesu a tena manavase ki te igoa o tena Tamana i te ‵talo telā e suke‵suke nei tatou ki ei.

10, 11. (a) Se a te mea ne aofia i te fakailoatuga ne Iesu a te igoa o tena Tamana? (e) Se a te fakamoemoega e ‵tau o ga‵lue ki ei a soko o Iesu?

¹⁰ Ne ‵talo atu a Iesu: “Ko oti ne fakaasi atu ne au a tou igoa ki tāgata kolā ne tuku mai ne koe ki a au mai te lalolagi. Ko ou tino latou, kae ne tuku mai ne koe latou ki a au, kae ne faka‵logo latou ki au muna. E se gata i ei, au e se nofo faeloa i te lalolagi, a ko latou e ‵nofo eiloa i te lalolagi, kae ka fanatu au ki a koe. Te Tamana Tapu, ke tausi ne koe latou ona ko tou igoa telā ko oti ne tuku mai ne koe ki a au, ko te mea ke tasi latou e pelā mo tāua e tasi.”​—Ioa. 17:6, 11.

¹¹ E uke atu a mea ne aofia i te fakailoatuga o te igoa o tena Tamana ki ana soko i lō te faipati atu fua o te igoa tenā. Ne fesoasoani atu foki a Iesu ke iloa ne latou me se a te mea e sui mai ne te igoa o te Atua, kolā ko uiga fakaofoofogia o te Atua mo ana faifaiga ki a tatou. (Eso. 34:5-7) E se gata i ei, e fesoasoani atu faeloa a Iesu ki ana soko mai tena tulaga ‵malu i te lagi ke fakailoa atu te igoa o Ieova i te lalolagi kātoa. Se a te mea e fakamoemoe ki ei? Ke tokouke atu a soko e mafai o fakamaopoopo mai a koi tuai o gata atu te olaga masei tenei. I te taimi tenā, ka fai ne Ieova se igoa fakaofoofogia mō ia me ka faka‵sao ne ia ana molimau a‵lofa fakamaoni!​—Eseki. 36:23.

“KO TE MEA KE TALI‵TONU TE LALOLAGI”

12. Ne a mea e tolu e ‵tau o fai ko te mea ke manuia tatou i ‵tou galuega faka‵sao tino?

¹² Ne galue malosi a Iesu i tena nofoga i te lalolagi o fesoasoani ki ana soko ke taua atu ki olotou vāivāiga. Ne ‵lei ki a latou a te faiga tenei ko te mea ke mafai ne latou o fakaoti a te galuega telā ne kamata ne Iesu. Ne ‵talo atu a Iesu: “E pelā eiloa mo au ne uga mai ne koe ki te lalolagi, e uga atu foki ne au latou ki te lalolagi.” Ko te mea ke manuia latou i te galuega faka‵sao tino tenei, ne faka‵mafa mai ne Iesu a mea tāua e tolu kolā e manakogina. Te mea muamua, e ‵talo atu a ia ke sē fai ana soko mo fai ne vaega o te lalolagi a Satani. Te lua, e ‵talo atu a ia ke faka‵malu aka latou, io me fakatapu, mai te fakaaoga ne latou a muna‵tonu o te Muna a te Atua. Te tolu, ne akai atu faeloa a Iesu ke mafai o ‵kau fakatasi ana soko i te fusi o te alofa telā e maua foki i tena va mo tena Tamana. E manakogina i ei a te iloilo ifo o te tino ki a ia eiloa. E ‵tau mo tatou taki tokotasi o fesili ifo, ‘E mata, e gasuesue au e ‵tusa mo fakamolemole e tolu a Iesu?’ Mai te saga atu ki mea konei, e fakaasi mai ei ne Iesu a te loto talitonu “ko te mea ke tali‵tonu te lalolagi i a au ne uga mai ne koe.”​—Faitau te Ioane 17:15-21.

13. Ne tali aka pefea te ‵talo a Iesu i te senitenali muamua  T.A.?

¹³ E mafai o lavea ne tatou me ko oti ne tali te ‵talo a Iesu māfai e suke‵suke tatou ki Galuega a te kau Apositolo i te Tusi Tapu mai tua o tusi Evagelia e fa. Mafaufau ki mavaevaega kolā ne mafai o maua i va o Kelisiano mua, me ne aofia i a latou a tino Iutaia mo tino mai Fenua Fakaa‵tea, tino ma‵tiva mo tino mau‵mea, pologa mo matai o pologa. E ui i ei, ne ‵kau fakatasi a tino katoa telā ne mafai o faka‵tusa latou ki vaega kese‵kese o se foitino mo te lotou Ulu ko Iesu. (Efe. 4:15, 16) Se fakataunuga fakavavega eiloa i te lalolagi mavae‵vae a Satani! E ‵tau o avatu a tavaega katoa ki a Ieova me ne fai ne ia ke maua te ‵kau fakatasi mai te malosi o tena agaga tapu.​—1 Koli. 3:5-7.

14. Ne tali aka pefea te ‵talo a Iesu i aso nei?

¹⁴ Se mea fakafanoanoa me ne seki tumau a te ‵kau fakatasi tenei mai tua o te ‵mate o te kau apositolo. Ne sae aka se aposetasi lasi e pelā mo te mea ne folafola mai, kae ne iku atu ki te mavae‵vae o Fenua Lotu Kelisiano ki potukau. (Galu. 20:29, 30) Kae i te 1919, ne fakasaoloto ne Iesu ana soko fakaekegina kolā ne ‵nofo pologa ki lotu ‵se kae fakamaopoopo fakatasi latou i “te fusi ‵lei katoatoa telā e fai ei ke ‵kau fakatasi a tino.” (Ko. 3:14) Se a te ikuga o te lotou galuega talai i te lalolagi kātoa? E silia atu i te fitu  miliona o “nisi mamoe” mai i “atufenua katoa, matakāiga katoa, tino katoa, penā foki loa mo ‵gana katoa” ko oti ne ‵futi mai ke tasi te lafu mamoe mo te kau fakaekegina a te Atua. (Ioa. 10:16; Faka. 7:9) Mafāga o tali fakaofoofogia ki te ‵talo a Iesu, “ke iloa ne te lalolagi i a au ne uga mai ne koe a ko koe e alofa ki a latou e pelā mo tou alofa mai ki a au.”!​—Ioa. 17:23.

SE FAKAOTIGA FAKAFIAFIA

15. Se a te fakamolemole fakapito ne fai atu ne Iesu e uiga ki ana soko fakaekegina?

¹⁵ Mai mua malie o te afiafi po o Nisani 14, ne tuku atu ne Iesu te ‵malu, io me ko te fakaaloalo, ki ana apositolo e auala i te faiga o se feagaiga mo latou ke pule fakatasi mo ia i tena Malo. (Luka 22:28-30; Ioa. 17:22) Tela la, ne ‵talo atu a Iesu e uiga mo latou katoa kolā ka fai mo ana soko fakaekegina: “Te Tamana, e pelā mo mea ko oti ne tuku mai ne koe ki a au, e manako au, ke ‵nofo foki latou i te koga e nofo au i ei, ko te mea ke lavea ne latou toku ‵malu telā ne tuku mai ne koe ki a au, me i a koe ne alofa mai ki a au a koi tuai o faite te lalolagi.” (Ioa. 17:24) E māfua mai i te mea tenei a te fiafia kae sē ko te loto ma‵sei o nisi mamoe a Iesu kae fakatalitonu mai a te mea tenā i te ‵kau fakatasi o Kelisiano ‵tonu katoa i te lalolagi i aso nei.

16, 17. (a) Se a te fakaikuga ne fakaasi mai ne Iesu i te fakaotiga o tena ‵talo? (e) Se a te mea e ‵tau o fakaiku aka ne tatou ke fai?

¹⁶ Mai i fakamalosiga a olotou takitaki lotu, ne filifili a te tokoukega o tino i te lalolagi ke ‵teke atu latou ki te fakamaoniga matea me e isi ne tino ‵kau fakatasi o Ieova kolā e iloa tonu ne latou a ia. E penā foki loa i aso o Iesu. Tenā ne fakaoti ei tena ‵talo ki pati fakafiafia konei: “Te Tamana amiotonu, se mea tonu me e seki iloa ne te lalolagi a koe; kae ko oti ne iloa ne au a koe, ko iloa foki ne latou konei me i a au ne uga mai ne koe. Ko oti ne fakailoa atu ne au tou igoa ki a latou kae ka toe fakailoa atu ne au, ko te mea ke maua ne latou te alofa telā ne alofa mai ei koe ki a au a ko au ke ‵kau fakatasi foki mo latou.”​—Ioa. 17:25, 26.

¹⁷ Ko oi e mafai o fakafiti ne ia i a Iesu ne gasuesue eiloa e ‵tusa mo tena ‵talo? E pelā me se Ulu o te fakapotopotoga, e tumau eiloa a ia o fesoasoani mai ke fakailoa atu ne tatou a te igoa mo te fuafuaga a tena Tamana. Ke tumau eiloa tatou i te ‵nofo mai lalo i tena takitakiga mai te faka‵logo mo te loto finafinau ki tena fakatonuga ke talai atu kae fai a soko. (Mata. 28:19, 20; Galu. 10:42) Ke ga‵lue malosi foki tatou i te fakatumauga o ‵tou ‵kau fakatasi. Mai te faiga o mea konei, ka gasue‵sue eiloa tatou e ‵tusa mo te ‵talo a Iesu, e tavae atu ei ki te igoa o Ieova kae maua i ei ne tatou a te fiafia se-gata-mai.