E Pefea te Tāua o te Igoa o Ieova ki a Iesu?

1-2. (a) Se a te mea ne fai ne Iesu i te po mai mua malie o tamate a ia? (e) Ne a fesili ka sau‵tala tatou ki ei i te mataupu tenei?

KO TE fakaafiafi o te Aso Fa, Nisani 14, i te 33 T.A., kae ko pili a Iesu o fakatogafiti, fakamasino, taku fakamasei, fakapuapuaga, kae tamate. Ne fatoa oti te lotou ‵kaiga fakapito mo ana apositolo fakamaoni i se potu i luga o se fale. I te otiga o te ‵kaiga tenā, ne fai atu ne Iesu ana toe pati fakamalosi ki ana apositolo. Kae mai mua malie o tiakina ne latou te potu tenā, ne mānava malie a Iesu kae fai atu ne ia se ‵talo tāua ‵ki. Ne fakamau ne te apositolo ko Ioane a te ‵talo tenā i te Ioane mataupu 17.

² Se a te mea e fakaasi mai ki a tatou i te ‵talo a Iesu e uiga ki mea ne manavase a ia ki ei i te taimi tenā? E fakaasi mai pefea i te ‵talo tenā a te mea telā ne tāua ki a ia i tena galuega talai i te lalolagi nei? Ke na sau‵tala nei tatou ki tali o fesili konei.

“KO OTI NE FAKAILOA ATU NE AU TOU IGOA KI A LATOU”

3. Ne a pati a Iesu e uiga ki te igoa o Ieova, kae se a te mea ne fakauiga a ia ki ei? (Ioane 17:​6, 26)

³ I tena ‵talo, ne fai mai a Iesu: “Ko oti ne fakailoa atu ne au tou igoa ki a latou.” E tonu, ne fakasae aka ne ia fakalua taimi me ko oti ne fakailoa atu ne ia te igoa o Ieova ki ana soko. (Faitau te Ioane 17:​6, 26.) Se a te mea ne fakauiga a ia ki ei? E mata, ne fakaasi atu ne ia ki a latou se igoa telā e seki iloa ne latou? A soko o Iesu ne tino Iutaia, tela la, ko leva ne iloa ne latou te igoa o te Atua, ko Ieova. A te igoa tenā ne sae mai fakafia afe taimi i Tusitusiga Tapu i te ‵gana Epelu. Tela la, i te faiatuga a Iesu, “Ko oti ne fakailoa atu ne au tou igoa ki a latou,” ne seki fakauiga a ia me ne akoako ne ia latou me i te igoa o te Atua ko Ieova, kae ne akoako ne ia latou me ko Ieova se vaegā tino pefea. Ne fesoasoani atu a ia ki ana soko ke iloa faka‵lei ne latou a Ieova, ana fuafuaga, ana galuega, mo ana uiga, telā e seai eiloa se tino e iloa ‵lei ne ia, kae na ko Iesu fua.

4-5. (a) E mafai pefea o tāua ki a tatou te igoa o se tino? (e) Ne iloa faka‵lei pefea ne soko o Iesu a te igoa o Ieova?

⁴ Ke fai se fakatusaga, mafaufau aka la me isi se toeaina i tau fakapotopotoga e igoa ki a David kae ko ia foki se tokita. Ko leva ne iloa ne koe te taina tenā. Kae i se aso e tasi, ko tupu se fakalavelave ki a koe, kae ko manakogina a togafiti fakatokita. E avatu fakavave koe ki te fakaimasaki e galue ei te taina tenā, kae fakaaoga ne ia tena poto fakatokita ke fakasao ei tou ola. E mata, ko isi aka foki se mea e iloa nei ne koe e uiga ki te taina tenā? Ao. E se gata fua i te iloa ne koe a David e pelā me se toeaina, kae ko iloa foki ne koe a ia nei e pelā me se tokita telā ne fakasao ne ia tou ola.

⁵ I se auala tai ‵pau, ko leva ne iloa ne soko o Iesu a te igoa o Ieova. Kae ne gasolo o tāua atu te igoa tenā ki a latou ona ko te galuega talai a Iesu. Kaia e mafai ei o fai atu tatou penā? Me ne fakaasi mai ne Iesu a mea e uiga ki tena Tamana e auala i ana pati mo faiga. Tela la, ne kamata o “iloa” faka‵lei ne ana soko a Ieova mai te fakalogo‵logo ki te auala ne akoako ei a Iesu mo te kilo‵kilo atu ki ana faifaiga ki tino.—Ioa. 14:9; 17:3.

“TOU IGOA, TELĀ KO OTI NE TUKU MAI NE KOE KI A AU”

6. I te auala fea ne tuku atu ne Ieova ki a Iesu a Tena igoa? (Ioane 17:​11, 12)

⁶ Ne fai atu a Iesu i tena ‵talo mō ana soko penei: “Tausi ne koe latou ona ko tou igoa telā ko oti ne tuku mai ne koe ki a au.” (Faitau te Ioane 17:​11, 12.) E mata, e fakauiga te mea tenei me ka taku a Iesu i te taimi nei ki a Ieova? Ikai. I tena ‵talo, ne fakasino atu a Iesu ki te pati “tou igoa” ki te igoa o Ieova. Tela la, ne seki mafuli te igoa o Ieova ki te igoa o Iesu. Kae se a la te mea e fakauiga ki ei a Iesu i ana pati me ko oti ne tuku atu te igoa o te Atua ki a ia? Muamua la, ne fai a Iesu e pelā me ko te sui o Ieova mo te Tukumuna. Ne vau a ia i te igoa o tena Tamana kae fai a galuega fakaofoofogia i te igoa tenā. (Ioa. 5:43; 10:25) E se gata i ei, a te igoa Iesu e fakauiga eiloa ki a “Ieova ko te Fakaolataga.” E tonu, a te uiga o te igoa o Iesu e aofia i ei te igoa o Ieova.

7. Fakamatala mai te pogai e mafai ei o faipati a Iesu i te igoa o Ieova.

⁷ Ke malamalama i te pogai e mafai o faipati a Iesu mō Ieova, mafaufau ki te fakaakoakoga tenei. E mafai ne se tino pule o uga atu se tino ke faipati mō ia. Tela la, kafai e faipati te tino tenā, e ‵pau eiloa tena tulaga pule mo te pule o ia. I se auala tai ‵pau, ne sui ne Iesu a Ieova kae faipati atu ki tino i Tena igoa.—Mata. 21:9; Luka 13:35.

8. Kaia ne fai mai ei a Ieova me e fanatu a Iesu “i” tena igoa mai mua foki loa o vau a Iesu ki te lalolagi? (Esoto 23:​20, 21)

⁸ I tena tulaga e pelā me ko te Muna, ne fai a Iesu e pelā me ko te Tukumuna a Ieova mai te fakaoko atu a fakamatalaga mo fakatonuga ki nisi tama faka-te-agaga a te Atua e pelā foki ki tino. (Ioa. 1:​1-3) Ko Iesu eiloa te agelu ne uga atu ne Ieova ke tausi te kau Isalaelu i te taimi ne ‵nofo ei latou i te koga lavaki. I te taimi ne fai atu ki tino Isalaelu ke faka‵logo ki te agelu tenā, ne fai atu a Ieova: “Me e fanatu a ia i toku igoa.”a (Faitau te Esoto 23:​20, 21.) Ne fanatu a Iesu “i” te igoa o Ieova me ne fai a ia mo sui o Ieova kae ko ia eiloa te tino tonu e fakamaluga kae faka‵malu ne ia te igoa o tena Tamana.

“TOKU TAMANA, FAKA‵MALU TOU IGOA”

9. Pefea te tāua o te igoa o Ieova ki a Iesu? Fakamatala mai.

⁹ E pelā mo te mea ne sau‵tala tatou ki ei, a koi tuai o vau a Iesu ki te lalolagi, a te ‵toe mea tāua ki a ia ko te igoa o Ieova. I tena nofoga i te lalolagi, ne fakaasi mai foki ne ia i ana mea ne fai a te tāua o te igoa o Ieova ki a ia! I te taimi ko pilipili atu ki te fakaotiga o tena galuega talai, ne ‵talo atu a Iesu ki a Ieova, penei: “Toku Tamana, faka‵malu tou igoa.” I konā foki loa, ne tali atu tena Tamana i se leo maluga mai te lagi, penei: “Ko oti ne faka‵malu ne au kae ka toe faka‵malu foki ne au.”—Ioa. 12:28.

10-11. (a) Ne faka‵malu pefea ne Iesu a te igoa o Ieova? (Onoono foki ki te ata.) (e) Kaia e manakogina ei ke faka‵malu kae fakamaluga aka te igoa o Ieova?

¹⁰ Ne faka‵malu foki ne Iesu a te igoa o tena Tamana. Pefea la? Ne fakaasi atu ne ia a uiga fakaofoofogia o tena Tamana mo ana faifaiga ki nisi tino. Kae ne fai foki ne ia se isi mea aka i tafa o te faka‵maluga o te igoa tenā. Ne ‵tau o fakatalitonu atu ne Iesu me ne fai ne Ieova te mea tonu kae ko tena igoa e ‵tau o faka‵malugina.b Ne fakaasi mai ne Iesu te tāua o te mea tenei i te taimi ne akoako ne ia ana soko ki te ‵talo fakaakoako. Ana muna: “Te motou Tamana telā i te lagi, ke tapu tou igoa.”—Mata. 6:9.

¹¹ Kaia e ‵tau ei o faka‵malu kae fakamaluga aka te igoa o Ieova? I te fatoaga o Etena, ne fakamasiasi kae fakamasei ne Satani te Tiapolo a Ieova te Atua. Ne ‵losi atu a Satani i a Ieova e loi kae taofi ne ia se mea ‵lei mai i a Atamu mo Eva. (Kene. 3:​1-5) Ne fai mai foki a Satani me e ‵se te auala e fai ei ne Ieova a mea. Ne fakamasei eiloa ne ‵losiga ‵se a Satani a te ata io me ko te igoa o Ieova. Fakamuli ifo, i aso o Iopu, ne ‵losi atu a Satani me i tino e tavini ki a Ieova ona fua ko mea e maua ne latou mai i a Ia. Ne fai atu foki te tino loi tenā me ka fakagata ne tino a te lotou tavini atu ki a Ieova māfai ko fe‵paki latou mo fakalavelave, me e se a‵lofa tonu latou ki a Ia. (Iopu 1:​9-11; 2:4) Ne manakogina se vaitaimi leva ke fakamaoni aka me ko oi e loi, ko Ieova io me ko Satani.

“E TUKU ATU NE AU TOKU OLA”

12. Ona ko tena alofa ki te igoa o Ieova, se a te mea ne loto fiafia a Iesu o fai?

¹² Ona ko tena alofa mō Ieova, ne manako a Iesu o fai a mea katoa e mafai ne ia o fai ke faka‵malu kae fakamaluga aka te igoa o Ieova. “E tuku atu ne au toku ola,” ne fai mai a Iesu. (Ioa. 10:​17, 18) E tonu, ne toka eiloa a ia o mate mō te igoa o Ieova.c Ne fulitua atu a tino ‵lei katoatoa muamua eiloa e tokolua, ko Atamu mo Eva ki a Ieova kae ‵kau ki a Satani. E ‵kese mai ei, ne loto fiafia eiloa a Iesu ke vau ki te lalolagi nei kae ke fakamaoni atu a tena alofa mō Ieova. Ne fai ne ia te mea tenei mai te ola i se olaga fakamaoni. (Epe. 4:15; 5:​7-10) Ne fakatumau tena fakamaoni i tena olaga kātoa, ke oko eiloa ki tena mate i te pou fakasaua. (Epe. 12:2) I te auala tenei, ne fakatalitonu mai ne ia tena alofa ki a Ieova mo Tena igoa.

13. Kaia e fai ei a Iesu pelā me ko te tino tonu ke fakamaoni aka ne ia i a Satani se tino loi? (Onoono foki ki te ata.)

¹³ Ne fakatalitonu mai ne Iesu i tena olaga kātoa me i a Satani se tino loi, ka e se ko Ieova! (Ioa. 8:44) Ne iloa faka‵lei ne Iesu a Ieova i lō so se isi tino telā ne ola. Moi ne ‵tonu a ‵losiga katoa ne fai ne Satani e uiga ki a Ieova, penei ne ‵tau o iloa ne Iesu. Kae ne tumau eiloa a Iesu i te ‵puluga o te ata mo te igoa o Ieova. E tiga loa ne foliga mai e pelā me ne tiakina ne Ieova a ia, ne loto fiafia eiloa a Iesu ke mate i lō te fulitua atu ki tena Tamana alofa.—Mata. 27:46.d

“KO OTI . . . NE FAKAOTI NE AU A TE GALUEGA TELĀ NE TUKU MAI NE KOE”

14. Ne taui atu pefea ne Ieova a te fakamaoni o Iesu?

¹⁴ I tena ‵talo i te ‵toe po mai mua o mate, ne fai atu a Iesu: “Ko oti . . . ne fakaoti ne au a te galuega telā ne tuku mai ne koe ke fai ne au.” Ne talitonu a ia me ka taui atu ne Ieova a tena fakamaoni. (Ioa. 17:​4, 5) Kae se mea tonu eiloa me ne talitonu a Iesu ki tena Tamana. Ne seki manako a Ieova ke tumau a ia i loto i te tanuga. (Galu. 2:​23, 24) Ne toe fakatu aka ne ia a Iesu ki se tulaga tai maluga atu i te lagi. (Fili. 2:​8, 9) Fakamuli loa, ne kamata o pule mai a Iesu e pelā me ko te Tupu i te Malo o te Atua. Ne a mea ka fai ne te Malo tenā? Ne tuku mai ne Iesu te tali i te taimi ne akoako ne ia ana soko ke ‵talo atu, penei: “Ke oko mai tou Malo. Ke fai te mea e loto koe [Ieova] ki ei i te lalolagi nei, e pelā mo te faiga i te lagi.”—Mata. 6:10.

15. Ne a nisi mea ka fai ne Iesu?

¹⁵ I aso mai mua, ka taua atu a Iesu ki fili o te Atua kae ka fakaseai ne ia a tino amio ma‵sei i a Amaketo. (Faka. 16:​14, 16; 19:​11-16) Mai tua ifo, ka ‵pei atu ne ia a Satani ki te “lua ‵poko,” telā ka se mafai lele eiloa ne ia o fai se mea i ei. (Faka. 20:​1-3) Ka toe fakafoki mai ne Iesu te filemu mo te tulaga ‵lei katoatoa ki tino i tena Pulega i te Afe Tausaga. Ka toe faka‵tu mai ne ia a tino ‵mate. Ka fai ne ia te lalolagi kātoa ke liu palataiso. Kae ka fakataunu i ei a te fuafuaga a Ieova!—Faka. 21:​1-4.

16. Ne a mea ka fai i te fakaotiotiga o te Pulega i te Afe Tausaga?

¹⁶ Se a te mea e fakamoe‵moe tatou ke tupu i te fakaotiotiga o te Pulega i te Afe Tausaga? Ka fakaseai katoatoa atu i ei te agasala mo te tulaga sē ‵lei katoatoa o tino. Ka se manakogina ke fakamagalogina a agasala a tino e auala i te togiola; io me manakogina ne latou se tino ke fai pelā me se sokoga io me se faitaulaga. Kae ko te “‵toe fili, telā [ka] fakaseai atu ko te mate [telā ne māfua mai i a Atamu].” Ka seai ne tino i loto i tanuga. Ka toe faka‵tu aka a tino ‵mate ki te ola. Kae ka maua ne tino katoa i te lalolagi a te tulaga ‵lei katoatoa.—1 Koli. 15:​25, 26.

17-18. (a) Se a te mea e tupu i te fakaotiga o te Pulega i te Afe Tausaga? (e)  Ne a mea ka fai ne Iesu māfai ko oko mai te taimi ke gata ei tena pulega? (1 Kolinito 15:​24, 28) (Onoono foki ki te ata.)

¹⁷ Ne a foki a nisi mea ka ‵tupu i te fakaotiotiga o te Pulega i te Afe Tausaga? I te taimi tenā, ka tupu eiloa se mea fakapito. A te kinauga telā ne aofia i ei te faka‵maluga o te igoa o Ieova ka fakagata atu. Pefea la? I te fatoaga o Etena, ne ‵losi atu a Satani i a Ieova e loi kae e pule atu a ia ki tino e aunoa mo te alofa. Talu mai te taimi tenā, ne faka‵malu eiloa a tena igoa ne tino kolā ne āva ki a ia. Tela la, i te fakaotiga o te Pulega i te Afe Tausaga, ka fakamaluga katoatoa aka ei a tena igoa. Tenā te taimi ka fakamaoni aka ei ne tino katoa me i a Ieova se Tamana alofa i te lagi.

¹⁸ Ko pili fua o fakamaoni aka a te loi o ‵losiga katoa a Satani. Se a te mea ka fai ne Iesu māfai ko oko ki te taimi ka gata atu i ei a tena pulega? E mata, ka tautali a ia i te fakaakoakoga a Satani kae ‵teke atu ki a Ieova? Ikai! (Faitau te 1 Kolinito 15:​24, 28.) Ka toe fakafoki ne Iesu a te Malo ki tena Tamana. Ka nofo a ia mai lalo i te pulega a Ieova. Ao, e se pelā mo Satani, ka loto fiafia eiloa a Iesu o toe fakafoki atu a te tulaga pule ki a Ieova, ona ko tena alofa ki a ia.

19. E pefea te tāua o te igoa o Ieova ki a Iesu?

¹⁹ E se tioa loa o loto fiafia a Ieova ke tuku atu Tena igoa ki a Iesu! Ko oti ne fakatalitonu mai ne Iesu me i a ia ko te sui ‵lei katoatoa o tena Tamana. Tela la, e pefea te tāua o te igoa o Ieova ki a Iesu? E tāua fakafia atu ki a ia i lō so se isi mea aka. Ne loto fiafia a ia o mate mō te igoa tenā, kae ka loto fiafia eiloa a ia o toe faka‵foki atu a mea katoa ki a Ieova i te fakaotiga o te Pulega i te Afe Tausaga. E mafai pefea o tau‵tali tatou i te fakaakoakoga a Iesu? Ka sau‵tala tatou ki te tali o te fesili tenā i te suā mataupu.