Te Akoakoga ‵Se Telā e Fai ei te Atua mo Fai se Tino Uiga Fakasaua

MEA E TALI‵TONU KI EI A TINO E TOKOUKE

“Mai tua o te mate, e olo atu a agaga o tino ‵mate kolā e agasala ki seoli, telā e fakapuapuagatia ei latou i seoli, ‘i te afi ki te se-gata-mai.’” (Catechism of the Catholic Church) E fai mai a nisi takitaki lotu me i seoli se koga telā e ‵vae katoatoa ei keatea mai te Atua.

TE MUNATONU MAI TE TUSI TAPU

“A te tino telā e agasala ko te tino foki tenā e mate.” (Esekielu 18:4) A tino ‵mate “e seai se mea a latou e iloa.” (Failauga 9:5) Kafai e mate te tino kae ko se iloa ne ia se mea, e mafai pefea o logo‵mae a ia i te “afi ki te se-gata-mai” io me ko te ‵mae ona ko te ‵vae keatea ki te se-gata-mai mai te Atua?

I te Tusi Tapu, a te pati Epelu mo te pati Eleni telā e masani o ‵fuli ki te “seoli” e fakasino tonu atu eiloa ki te tanuga masani o tino. E pelā mo te taimi ne logo‵mae ei a Iopu i se masaki faigata, ne ‵talo atu a ia: “E fakamoemoe eiloa au ke ‵funa aka ne koe au i toku tanuga [“i seoli,” Douay-Rheims Version].” (Iopu 14:13, Holy Bible​—Easy-to-Read Version) Ne manako a Iopu ke malōlō a ia i te tanuga, kae e se i se koga o puapuaga io me e ‵vae keatea mai te Atua.

TE POGAI E TĀUA EI

A te uiga fakasaua e se fai ei ke fia fakapili‵pili atu tatou ki te Atua; kae e fai fua i ei ke ‵kalo keatea tatou. “Ne akoako mai ki a au talu mai taku folikiga a te akoakoga e uiga ki te afi i seoli,” ko muna a Rocío, telā e nofo i Mekisiko. “Ne mataku malosi ‵ki eiloa au telā ne seki mafai o fakaataata i toku mafaufau me e isi ne uiga ‵lei o te Atua. Ne mafaufau au me i a ia se Atua mata kaitaua kae faigata.”

A te fakamatalaga manino i te Tusi Tapu e uiga ki fakamasinoga a te Atua mo te tulaga o tino ‵mate ne ‵fuli ei te kilokiloga a Rocío e uiga ki te Atua. “Ne maua ne au se lagonaga saoloto​—e pelā me se amoga ‵mafa i mea tau lagonaga ko oti ne ave keatea mai i a au,” ko muna a tou fafine. “Ne kamata o talitonu au me e manako te Atua ki te ‵toe mea ‵lei mō tatou, me e alofa mai a ia ki a tatou, kae e mafai o alofa au ki a ia. E fai a ia e pelā me se tamana telā e taofi ne ia ana tama‵liki i tena lima kae e manako ki te ‵toe mea ‵lei mō latou.”​—Isaia 41:13.

Ne taumafai a tino e tokouke ke ma‵losi latou i te feitu faka-te-agaga ona ko te ma‵taku i te afi i seoli, kae e se manako a te Atua ke tavini atu koe ki a ia ona ko koe e mataku i a ia. I lō te fai penā, ne fai mai a Iesu: “E ‵tau mo koe o alofa ki a Ieova tou Atua.” (Maleko 12:29, 30) E se gata i ei, kafai e iloa ne tatou me e se gasuesue te Atua i se auala sē fakamaoni i aso nei, e mafai foki o tali‵tonu tatou ki ana fakamasinoga i aso mai mua. E pelā mo te taugasoa o Iopu ko Eliu, e mafai o fai atu tatou mo te loto tali‵tonu: “E mata, e mafai ne te Atua Malosi o fai se mea ‵se?”​—Iopu 34:10.