KE FAKAPILIPILI ATU KI TE ATUA
“Kiloke! Ko Faka‵fou ne Au a Mea Katoa”
E mata, e manako koe ke maua te malosi ‵lei kae ola i se taimi leva fakatasi mo tou kāiga? E mata, e manako koe ke ola i se lalolagi telā e fai eiloa a te ‵mae, logo‵mae, mo te mate mo fai ne mea mua? E se fai eiloa a te vaegā lalolagi penā mo fai se moemiti fua. E ‵kese mai i ei, ko pili eiloa o maua se lalolagi fou kae amiotonu, me ko oti ne fuafua ne te Atua te mea tenā. Onoono la ki te fakamatalaga o te auala ka fakataunu ei tena fuafuaga i te Fakaasiga 21:3-5.—Faitau.
“Ka ‵solo keatea ne [te Atua] a loimata katoa mai i olotou mata.” (Fakaasiga 21:4) Ne a vaegā loimata ka ‵solo ne ia keatea? E se ko loimata o te fiafia io me ko loimata kolā e puipui ei ‵tou mata. E fakasino atu eiloa te folafolaga a te Atua ki loimata kolā e māfua mai i logo‵maega mo te fanoanoa. Ka se fakamalō fua ne te Atua a vaegā loimata penā; ka ‵solo katoatoa eiloa ne ia keatea mai i te fakaseaiatuga o te māfuaga o loimata sē ‵lei konā—ko logo‵maega mo te fanoanoa.
“Ka se toe ai se mate.” (Fakaasiga 21:4) Se a foki la te suā mea e sili atu i te mate telā e fakamāfua aka ne ia a loimata o te fanoanoa? Ka fakasaoloto ne Ieova a tino faka‵logo mai i te malosi o te mate. E pefea la? Mai i te fakaseaiatuga o te pogai tonu o te mate; ko te agasala telā ne togi mai ne Atamu. (Loma 5:12) Ka toe avatu ne Ieova a tino faka‵logo ki te tulaga ‵lei katoatoa e ‵tusa eiloa mo te taulaga togiola a Iesu.a Ko “fakaseai atu” ei a te ‵toe fili sili, ko te mate. (1 Kolinito 15:26) Ka mafai ne tino fakamaoni o ola e ‵tusa mo te mea ne fuafua ne te Atua mō latou, ko te ola—ki te se-gata-mai mo te malosi ‵lei katoatoa.
“Ka se toe ai foki . . . se ‵mae.” (Fakaasiga 21:4) Ne a vaegā ‵mae ka se toe ai? Ka se toe ai ne mea kolā e taku ki te ‵mae o te mafaufau, lagonaga, mo te ‵mae i te feitu faka-te-foitino ona ko te agasala mo te tulaga sē ‵lei katoatoa kae puapuaga i ei a olaga o te fia miliona o tino.
Ko pili eiloa o maua se lalolagi e aunoa mo loimata, te mate, mo te ‵mae. E mafai o fesili mai koe, ‘Kae i fea?’ ‘E mata, e fakasino atu eiloa a te folafolaga a te Atua e uiga ki te ola i te lagi?’ Ikai. Mafaufau ki pogai e se fakasino atu ki ei. Muamua la, ne kamata a te folafolaga ki pati konei “Ko ‵nofo nei mo tino te faleie o te Atua,” kae ko tino e ‵nofo i te lalolagi. (Fakaasiga 21:3) A te lua, e fakamatala mai i te folafolaga tenei se lalolagi telā “ka se toe ai se mate”—se lalolagi telā ne isi muamua i ei a te mate kae ka fakaseai atu. Ne seki maua atu eiloa te mate i te lagi, kae ko leva eiloa ne maua atu i te lalolagi. E manino ‵lei i ei, me i te folafolaga a te Atua ki se olaga tai ‵lei atu ka fakataunu eiloa i te lalolagi nei.
E manako a Ieova ke tali‵tonu tatou ki tena folafolaga e uiga ki te lalolagi fou kae amiotonu. Mai tua o te fakamatalamaiga o fakamanuiaga ka oko mai, e fakamaoni mai ne ia tena folafolaga penei: “Kiloke! Ko faka‵fou ne au a mea katoa.” Kae ne toe fai mai a ia: “Tusi a pati konei ki lalo, me e fakamaoni kae ‵tonu a pati konei.” (Fakaasiga 21:5) Kaia e se tauloto ei koe ki mea e uke atu e mafai o fai ne koe mo ou tino pele ko te mea ke mafai o aofia koutou i tino tapuaki fia‵fia kolā ka lavea ne latou a te fakataunuga ‵malu o te folafolaga a te Atua?
Tusi fai‵tau mō te masina o Tesema
a Ke tauloto ki mea e uke atu e uiga ki te taulaga togiola a Keliso, ke onoono ki te mataupu e 5 o te tusi ko te Ne a Mea e Akoako ‵Tonu Mai i te Tusi Tapu? telā ne ‵lomi ne Molimau a Ieova.
Ka faka‵masa ne te Atua a vaitafe o loimata kolā e ‵sali mai ona ko logo‵maega mo te fanoanoa