Tavini Atu ki a Ieova a Koi Tuai o Oko Mai Aso ka Toeaina ei

1, 2. (a) Ne a pati fesoasoani ne fakaosofia a Solomona ke tusi atu ki talavou? (e) Kaia e ‵lei foki a pati fesoasoani a Solomona ki Kelisiano ko taki 50 tupu tausaga io me ma‵tua atu?

NE FAKAOSOFIA a te tupu ko Solomona ke fai atu ki talavou: “Ke masaua . . . te Atua [ko Ieova] . . . i aso konei koi ‵tupu ake ei koutou, [koi tuai o] oko mai aso ka toeaina ei koutou.” Ne a “aso ka toeaina” ei? Ne fakaaoga ne Solomona a pati fakauiga ke fakamatala mai a fakalavelave kolā ka oko ki ei a tino ma‵tua​—pole‵pole a lima, se ma‵losi a vae, ‵to a nifo, se ile ‵lei, ‵tuli a taliga, sinā te ulu, kae mākau te foitino. E seai se tino e ‵tau o faka‵tali ke oko ki te tulaga tenā ko kamata ei a ia o tavini atu ki a Ieova.​—Faitau te Failauga 12:1-5.

² E tokouke a Kelisiano ko taki 50 tupu io me ma‵tua atu a koi ma‵losi. Kāti e sinā olotou ulu, kae seki oko ki te tulaga vāivāi telā ne fakamatala mai ne Solomona. E mata, e mafai o aoga ki Kelisiano ma‵tua konei a pati fesoasoani kolā ne fai atu ki talavou: “Ke masaua . . . te Atua”? Se a te mea e fakauiga ki ei a pati fesoasoani konā?

3. Se a te mea e aofia i te masauaga o ‵tou Mafuaga Sili?

³ Faitalia te uke o tausaga ne tavini atu ei tatou ki a Ieova, se mea ‵lei ke ma‵nava malie aka tatou i se taimi kae mafaufau faka‵lei ki te fakaofoofogia o ‵tou Mafuaga. E mata, e se fakaofoofogia a te ola? E se mafai eiloa o malamalama te tagata i te faigata o te faitega o mea. Ko oko eiloa i te uke o mea kese‵kese ne fai ne Ieova ke mafai ne tatou o fia‵fia i te olaga i auala e uke. Kafai e mafau‵fau tatou ki mea ne faite ne Ieova, e toe fakamalosi aka i ei a ‵tou loto fakafetai ki tena alofa, tena poto, mo tena malosi. (Sala. 143:5) Kae kafai e masaua ne tatou a ‵tou Mafuaga Sili, e fakaasi atu i ei me e mafaufau ‵loto tatou ki ‵tou tiute ki a ia. A te mafaufau ‵loto penā, e fakaasi atu ei a ‵tou loto fakafetai ki ‵tou Mafuaga mai te tavini katoatoa atu ki a ia i ‵tou olaga kātoa.​—Fai. 12:13.

AVANOAGA SĒ FUAFUAGINA FAKAMULI IFO I TE OLAGA

4. Se a te fesili e mafai ne Kelisiano ma‵tua kae atamai o ‵sili ifo ki a latou eiloa, kae kaia?

⁴ Kafai ne maua ne koe te atamai e pelā me se tino matua i tausaga e uke, e isi se fesili tāua ke ‵sili ifo ki a koe eiloa, ‘Ne a aku mea ka fai ki toku olaga i te taimi nei a koi malosi au?’ E pelā me se Kelisiano atamai, e maua ne koe avanoaga kolā e se maua ne nisi tino. E mafai ne koe o akoako atu ki tamaliki a mea kolā ne tauloto ne koe mai i a Ieova. E mafai ne koe o fakamalosi a nisi tino mai te taku atu ki a latou a mea gali ne maua ne koe i te taviniga ki te Atua. Ne ‵talo atu te tupu ko Tavita ke maua ne avanoaga ke fai penā. Ne tusi mai tou tagata: “Te Atua , ko oti ne akoako ne koe au ka koi tamaliki. . . . Te Atua, au nei ko matua, mo toku ulu foki ko sina, sa tiakina mai au! Fakatasi mai koe ki a au i taimi e folafola atu ei ne au tou ‵mana mo tou malosi ki tupulaga katoa fakamuli.” ​—Sala. 71:17, 18.

5. E mafai pefea ne Kelisiano ma‵tua o fakailoa atu ki nisi tino a mea ne tauloto ne latou?

⁵ E mafai pefea o fakailoa atu ne koe te poto telā ne maua ne koe i tausaga e uke? E mata, e mafai ne koe o ‵kami a tavini talavou o te Atua ki tou fale e pelā me se mea fakamalosi loto? E mata, e mafai ne koe o fakamolemole atu ki a latou ke olo tasi mo koe i te galuega talai faka-Kelisiano kae fakaasi atu ki a latou a te fiafia ne maua ne koe i te taviniga ki a Ieova? Muna a Eliu: “Ne faipati ifo au ki a au eiloa, me ko koutou e ‵tau o fai‵pati, ko koutou tino ma‵tua e ‵tau o fakaasi otou taofi.” (Iopu 32:7) Ne fakamalosi atu te apositolo ko Paulo ki fāfine Kelisiano ata‵mai ke fakama‵losi atu a nisi tino e auala i olotou pati mo fakaakoakoga. Ne tusi mai a ia: “A fāfine ma‵tua . . . ke fai mo faiakoga o mea ‵lei.”​—Tito 2:3.

MAFAUFAU KI AU MEA E MAFAI O FAI KE FESOASOANI ATU KI NISI TINO

6. Kaia e se ‵tau ei mo Kelisiano ma‵tua o manatu māmā ki olotou mea e mafai o fai?

⁶ Kafai koe se Kelisiano atamai, e uke au mea e mafai o fai. Ke mafaufau ki mea kolā ne seki iloa ne koe i te 30 io me ko te 40 tausaga ko ‵teka, kae nei, ko malamalama koe i ei. E mafai ne koe o fakagalue mo te atamai a fakatakitakiga fakavae mai te Tusi Tapu i te olaga. E seai se fakalotolotolua me e mafai ne koe o fakaoko atu a muna‵tonu mai te Tusi Tapu ki loto o nisi tino. Kafai koe se toeaina, e iloa ne koe o fesoasoani atu ki taina kolā ko ‵seke mo te auala. (Kala. 6:1) E se taumate ko oti ne tauloto koe ki te auala e fakatonutonu ei a galuega fai o te fakapotopotoga, matagaluega o fono, io me ko te faitega o te Kingdom Hall. Kāti e iloa ne koe o fakamalosi atu ki tokitā ke fakaaoga a togafiti fakatokitā kolā e se fakaaoga i ei a te toto. Kafai foki koe koi fou ki te munatonu, ko maua eiloa ne koe te atamai tāua i te olaga. Pelā me se fakaakoakoga, kafai ne puti aka ne koe a tamaliki, ka lasi eiloa te poto e maua ne koe. E fai eiloa a Kelisiano ma‵tua mo fakamalosiga ki tino o Ieova e auala i te akoako, takitaki, kae fakamalosi atu a taina mo tuagane.​—Faitau te Iopu 12:12.

7. Ne a akoakoga aoga e mafai ne Kelisiano ma‵tua o tuku atu ki talavou?

⁷ E mafai pefea o fakaaoga katoatoa ne koe au mea e mafai o fai? E se taumate e mafai ne koe o fakaasi atu ki talavou a te auala e kamata ei akoga faka-te-Tusi Tapu. Kafai koe se tuagane, e mata, e mafai ne koe o fakaasi atu ki mātua koi fo‵liki a te auala e mafai ei latou o tumau i te faiga o mea faka-te-agaga i te taimi e tausi atu ei ki tamaliki fo‵liki? Kafai koe se taina, e mata, e mafai ne koe o akoako a taina talavou ke fai a lāuga mo te loto finafinau kae ke apo malosi e pelā me ne tino talai o te tala ‵lei? E mata, e mafai ne koe o fakaasi atu ki a latou te auala e āsi atu ei ki taina mo tuagane ma‵tua ke fakamalosi aka latou i te feitu faka-te-agaga? Kafai foki ko sē maua ne koe te malosi faka-te-foitino telā ne masani o maua ne koe, koi maua eiloa ne koe avanoaga ‵lei ke akoako a talavou. E fai mai te Muna a te Atua: “E tavae ne tatou te malosi o talavou, kae fakaava tatou ki te ulusina o toeaina.”​—Faata. 20:29.

TE TAVINI ATU I KOGA KOLĀ E LASI TE MANAKOGA I EI

8. Ne a mea ne fai fakamuli ne te apositolo ko Paulo i te olaga?

⁸ Ne fakaaoga katoatoa ne te apositolo ko Paulo ana mea e mafai o fai ke tavini fakamuli atu ki te Atua i te olaga. Mai te taimi ne fakasaoloto ei tou tagata mai te falepuipui i Loma, kāti i te 61 T.A., ne kufaki eiloa a ia i tausaga faiga‵ta e uke o te taviniga fakamisionale, kae ne mafai o nofo a ia i Loma o talai i ei. (2 Koli. 11:23-27) E seai se fakalotolotolua me ne fakatāua eiloa ne taina i te fa‵kai lasi tenā a te ‵lago atu faeloa o tou tagata. Kae ne matea ne Paulo me e lasi atu te manakoga i nisi fenua. Ne faka‵soko ana galuega fakamisionale fakatasi mo Timoteo mo Tito, kae ne ma‵laga atu latou ki Efeso, Keleta, kae kāti ne olo foki ki Maketonia. (1 Timo. 1:3; Tito 1:5) E se iloa ne tatou me ne āsi atu a ia ki Sepania me ikai, kae ne fakamoemoe tou tagata ke fai penā.​—Loma 15:24, 28.

9. Ko te taimi fea kāti ne fano ei a Petelu o galue i te koga telā e lasi te manakogina o tino talai i ei? (Ke onoono ki te ata i te kamataga.)

⁹ Kāti ko 50 tupu tausaga o te apositolo ko Petelu i te taimi ne fano ei tou tagata ki te koga telā e lasi te manakogina o tino talai i ei. Kaia e mafai ei o tonu a te mea tenā? Kafai ne tai ‵pau ana tausaga mo Iesu io me tai matua atu, ko ‵tau o nofo ki te 50 tausaga tena matua i te taimi ne fetaui ei mo nisi apositolo i Ielusalema i te 49 C.E. (Galu. 15:7) I se taimi mai tua o te fetauiga tenā, ne fano a Petelu o nofo i Papelonia, kāti o talai ki tino Iutaia e tokouke i te kogā koga tenā. (Kala. 2:9) Ne nofo atu tou tagata i konā i te taimi ne tusi ei a tena tusi muamua, kāti i te 62 T.A. (1 Pe. 5:13) E mafai o faigata a te nofo atu i se fenua fakaa‵tea, kae ne seki talia ne Petelu a tena tulaga matua ke faka‵tuka atu ki te fiafia telā e maua ne ia mai te tavini katoatoa atu ki a Ieova.

10, 11. Ke taku mai se tala e uiga ki se tino telā ne fano o galue i se koga e lasi te manakogina o tino talai i ei i se taimi fakamuli ifo i tena olaga.

¹⁰ I aso nei, ne iloa ne Kelisiano e tokouke kolā ko taki 50 tupu tausaga kae ma‵tua atu me ko ma‵fuli olotou fakanofonofoga kae ko mafai ne latou o tavini atu ki a Ieova i auala fou. Ko oti ne olo atu a nisi tino ki koga kolā e lasi te manakogina o tino talai i ei. Pelā me se fakaakoakoga, ne tusi mai a Robert: “I te taimi ne iloa ei ne māua avanoaga kolā e ta‵kato mai i mā mua, a ko au mo taku avaga ko taki 50 tupu tausaga te ma‵tua. Ko oti ne tiakina ne te mā tama tagata e tokotasi a te fale, ko seai ne mā mātua ke tausi atu ki ei, kae ne maua ne māua se tofi foliki. Ne galue aka ne au me kafai e ‵togi ki tua a te mā fale, e lava loa a tupe ke ‵togi te mā kaitalafu kae tausi māua ki ei ke oko ki te taimi e maua ei taku tupe litaea. Ne lagona ne māua a te tokouke o tino i Bolivia e fia‵fia ke fai olotou akoga faka-te-Tusi Tapu kae ko te olaga i ei e faigofie. Tenā ne fakaiku ei ke olo māua. A te fakamasani ki te koga fou ko ‵nofo māua i ei e se faigofie. Ko oko eiloa te ‵kese o mea katoa i ei mo mea kolā ne masani māua ki ei i Amelika ki Matū. Kae ne taui faka‵lei mai eiloa a mā taumafaiga.”

¹¹ Ne toe fai mai a Robert: “A te mā olaga kātoa nei ko fakalavelave faeloa i galuega fai a te fakapotopotoga. Ko oti ne papatiso a nisi tino kolā ne fai ne māua olotou akoga i te Tusi Tapu. E tasi te kāiga ne a‵koga mo māua e ola i se olaga ma‵tiva i se fa‵kai foliki e tai ‵mao. Kae i vaiaso takitasi, e ma‵laga mai eiloa a tino o te kāiga tenā i se malaga faigata ki fakatasiga. E mata, e fakaataata ne koutou a te fia‵fia o māua i te ‵kilo atu ki te gasolo ki mua o te kāiga mo te tamaliki tagata matua ko kau ki te taviniga fakapaenia?”

TE MANAKOGA I KOGA E FAI‵PATI KI ‵GANA FAKAA‵TEA

12, 13. Ke taku mai se tala e uiga ki se Kelisiano telā ne kamata o tavini atu ki a Ieova i auala ‵fou i te otiga ne li‵taea.

¹² E mafai ne fakapotopotoga mo potukau kolā e fai‵pati ki ‵gana fakaa‵tea o maua a mea aoga e uke mai i fakaakoakoga a taina mo tuagane ma‵tua. E lasi foki te fiafia e maua i te ga‵lue i koga penā. Pelā me se fakaakoakoga, e tusi mai a Brian: “Ne maua ne au mo taku avaga a te filemu o te olaga i taku okoga ki te tausaga li‵taea o Peletania ko te 65. Ko oti ne tiakina ne mā tamaliki a te fale, kae seai eiloa ne tino fia‵fia e maua ne māua ke fai akoga faka-te-Tusi Tapu. I te taimi eiloa tenā ne fetaui ei au mo se tagata Saina koi talavou e fai ana sukesukega i te akoga maluga i konā. Ne talia ne tou tagata te ‵kamiga ke vau a ia ki ‵tou fakatasiga, kae ne kamata māua o sukesuke fakatasi ki te Tusi Tapu. Mai tua o nāi vaiaso, ne kamata o aumai ne tou tagata a tena taugasoa Saina. E lua vaiaso fakamuli ifo, kae aumai ne tou tagata a te tokotolu, oti aka aumai ei te tokofa o ana taugasoa.

¹³ “I te taimi ko pili ei o fakamolemole mai te tokolima o Saina ke fai se akoga faka-te-Tusi Tapu, ne manatu aka au, penei, ‘Ona fua ko au ko 65, e se fakauiga i ei me e ‵tau au o li‵taea mai te taviniga ki a Ieova.’ Tenā, ne fesili ei au ki taku avaga telā e lua tausaga e foliki ifo i a au, me e manako a ia o tauloto ki te ‵gana Saina. Ne fakaaoga ne māua a leo ne puke ki kaseti ke tauloto mai i ei. Ko sefulu tausaga ko ‵teka ne fai ei te mea tenā. A te talai atu i koga e fai‵pati ki ‵gana fakaa‵tea ne fai ei ke mafau‵fau māua i a māua ko toe talavou. Ko oti ne suke‵suke fakatasi māua mo tino Saina e toko 112! Ko oti ne ‵kau mai a te tokoukega o latou ki fakatasiga. E tokotasi mai i a latou e tavini fakatasi nei mo māua e pelā me se paenia.”

KE FIAFIA I TE FAIGA O TE MEA E MAFAI NE KOE

14. Se a te pogai e mafai ei o fia‵fia a Kelisiano ma‵tua, kae fakamalosi atu pefea ki a latou a te fakaakoakoga a Paulo?

¹⁴ Faitalia me maua ne Kelisiano e tokouke kolā ko taki 50 tupu tausaga avanoaga ‵lei ke fai a mea ‵fou i te taviniga ki a Ieova, e se ko tino katoa e mafai ne latou o fai. A nisi tino o latou e fakamasaki‵saki, kae ko nisi tino e tausi olotou tamaliki kolā e fakalagolago ki a latou io me ko olotou mātua kolā ko ma‵tua. E fiafia eiloa koe māfai e iloa ne koe me e fakatāua ne Ieova so se mea e fai ne koe i tena taviniga. Tela la, i lō te manavase ki mea e se mafai ne koe o fai, ke fiafia o fai a te mea e mafai ne koe o fai. Ke mafaufau ki te fakaakoakoga a te apositolo ko Paulo. E uke tausaga ne fakatapu ei tou tagata ma tiakina te fale, ko sē mafai ei o faka‵soko ana malaga fakamisionale. Kae ko so se taimi e āsi atu ei a tino ki a ia, e faipati tou tagata ki a latou e uiga ki Tusitusiga Tapu kae fakamalosi atu latou i te fakatuanaki.​—Galu. 28:16, 30, 31.

15. Kaia e tāua malosi ei a Kelisiano ma‵tua?

¹⁵ E amanaia foki a Ieova ki mea e mafai ne tino ma‵tua o fai i tena taviniga. E tigā eiloa ne fai mai a Solomona i aso e toeaina ei e se ko te ‵toe taimi ‵lei o te olaga, e fakatāua eiloa ne Ieova a mea kolā e mafai ne Kelisiano ma‵tua o fai e ‵viki atu ei ki a ia. (Luka 21:2-4) E loto fakafetai a fakapotopotoga ki fakaakoakoga o te fakamaoni o tavini kolā ko ‵leva i te taviniga.

16. Ne a tauliaga kāti ne seki mafai o maua ne te lomatua ko Ana, kae ne a mea ne mafai o fai ne ia ke tapuaki atu ki te Atua?

¹⁶ E li‵poti mai te Tusi Tapu me ne tumau eiloa te fafine matua ko Ana i te ‵viki atu ki a Ieova mo te fakamaoni ke oko ki te taimi ko matua ei a ia. Ko 84 tausaga te matua o te fafine ko mate tena avaga i te taimi ne fanau mai ei a Iesu. Kāti ne seki mafai o leva tena olaga ke fai mo fai se soko o Iesu, ke fakaeke ki te agaga tapu, io me fano o talai te tala ‵lei o te Malo. E ui i ei, ne fiafia eiloa a Ana o fai a te mea telā e mafai ne ia o fai. “Ne seki galo lele a ia mai te faletapu o tuku atu te taviniga tapu i te po mo te ao.” (Luka 2:36, 37) I taeao mo afiafi katoa e ofo ei ne te faitaulaga a mea ma‵nogi i te faletapu, e maopoopo fakatasi a Ana mo te vaitino i te matāfale o ‵talo lēmū atu kāti i se āfa itula. I te taimi ne matea ei ne tou fafine a te pepe ko Iesu, ne kamata a ia o “faipati atu e uiga ki te tamaliki ki tino katoa kolā e fakatali‵tali ki te fakasaolotoga o Ielusalema.”​—Luka 2:38.

17. E mafai pefea o fesoasoani atu tatou ki Kelisiano ma‵tua kae fakamasaki‵saki ke ‵lago atu ki te tapuakiga tonu?

¹⁷ I aso nei, e ‵tau o toka tatou o fesoasoani ki Kelisiano ma‵tua io me fakamasaki‵saki. Kāti e se mafai ne nisi tino kolā e fiafia tonu o ‵kau ki fakatasiga a te fakapotopotoga mo fono o fai penā. I nisi koga, e a‵lofa eiloa a fakapotopotoga o fai a fakatokaga ke fakalogo‵logo a tino ma‵tua penā ki fakatasiga e fai e auala i telefoni. I nisi koga aka, kāti e se mafai o fai a te mea tenei. Kafai foki e se mafai o ‵kau a Kelisiano ki fakatasiga, e mafai o fai olotou tusaga i te ‵lago atu ki te tapuakiga tonu. Pelā me se fakaakoakoga, e fesoasoani atu olotou ‵talo ki te iku manuia o te fakapotopotoga Kelisiano.​—Faitau te Salamo 92:13, 14.

18, 19. (a) Kaia e se iloa ei ne Kelisiano ma‵tua a te lasi o te fakamalosi atu o latou ki nisi tino? (e) Ko oi e mafai o fakagalue ne latou a pati fesoasoani konei: “Ke masaua . . . a te Atua”?

¹⁸ E mafai o sē iloa ne Kelisiano ma‵tua a te lasi o te fakama‵losi atu o latou ki nisi tino. Pelā me se fakaakoakoga, e tigā eiloa ne fakamaoni a Ana i tausaga katoa konā i te faletapu, kāti ne seki iloa ne ia me koi fakamalosi atu eiloa a tena fakaakoakoga ki nisi tino i senitenali e uke fakamuli ifo. Ne tusi eiloa i loto i te Tusi Tapu a te alofa o Ana ki a Ieova. E seai se fakalotolotolua me e ‵mau eiloa i loto o taina mo tuagane a tou alofa ki te Atua. E setioa eiloa o fai mai te Muna a te Atua: “A te ola loa ko te taui o tino amio‵tonu; a te ulu sina ko te kalauna ‵malu tenā”!​—Faata. 16:31.

¹⁹ E isi ne tapulā ki mea e mafai ne tatou katoa o fai i te taviniga ki a Ieova. Kae ko tatou kolā koi ma‵losi, ke na faka‵goto ki ‵tou loto a pati fakaosofia konei: “Ke masaua  . . . a te Atua” a koi tuai o “oko mai aso ka toeaina ei” koutou.​—Fai. 12:1.