Fakaaoga Faka‵lei Ke Aoga Tou Olaga I Aso Nei
A TE OLAGA e aunoa mo ikuga fakalogo‵mae mai i masaki, tulaga matua, mo te mate—se olaga gali ‵ki eiloa e mafai o maua ne koe! Kae tiga te feitu tenā, koi ‵fonu eiloa a te olaga i aso nei i fakalavelave mo mea faiga‵ta. Se a te mea e mafai o fesoasoani atu ki a koe ke fakaaoga faka‵lei te olaga i aso nei? E maua i te Tusi Tapu a te takitakiga telā e mafai o iku atu ki se olaga fiafia kae fakamalie loto i te taimi nei. Mafaufau aka la ki nisi mea faiga‵ta i te olaga mo te auala e mafai o fesoasoani mai ei te Tusi Tapu.
MAUAGA O TE LOTOMALIE
Te fakatakitakiga mai te Tusi Tapu: “Ke ‵kalo kea‵tea mai te fiafai ki tupe i otou olaga, kae ke lotoma‵lie ki mea ko maua ne koutou.” —Epelu 13:5.
I aso nei, e uke ‵ki a mea e fai mai ne tino me e ‵tau o maua ne tatou. Kae e fai mai te Tusi Tapu me e mafai eiloa ne tatou o “lotoma‵lie ki mea ko maua ne” tatou. I te auala fea?
‵Kalo kea‵tea mai “te fiafai ki tupe.” E talia ne tino so se mea faitalia me fakamasei i ei a olotou ola ‵lei, kāiga, vā fakataugasoa, amioga, ke oko foki ki olotou tulaga—ona ko te “fiafai ki tupe.” (1 Timoteo 6:10) E se taitai eiloa o lava i ei! I te fakaotiga, a te tino telā e fiafai ki koloa “ka se mafai o lotomalie.”—Failauga 5:10.
Fakatāua a tino, kae e se ko koloa. E tonu, e aoga a kope faka-te-foitino. Kae e se mafai ne mea konei o a‵lofa mai io me fakaasi mai te loto fakafetai ki a tatou; ko tino fua e mafai o fai penā. A te mauaga o se “taugasoa tonu” e mafai o fesoasoani mai ke maua ne tatou se olaga fakamalie loto.—Faataoto 17:17.
E MAFAI O FAKAAOGA FAKA‵LEI TOU OLAGA I ASO NEI MAI TE TAUTALI KI TE TAKITAKIGA I TE TUSI TAPU
KUFAKI MĀFAI KOE E MASAKI
Te fakatakitakiga i te Tusi Tapu: “A te loto fiafia se vailakau ‵lei.”—Faataoto 17:22.
E pelā me se “vailakau ‵lei,” e mafai o fesoasoani mai a te fiafia ke kufaki tatou i ma‵saki. Kae e mafai pefea o maua ne tatou a te fiafia māfai e ma‵saki tatou?
Ke loto fakafetai. Kafai e mafau‵fau faeloa tatou ki ‵tou fakalavelave, ka ma‵sei ki a tatou a “aso katoa.” (Faataoto 15:15) I lō te fai penā, “fakaasi atu te [‵tou] loto fakafetai,” ko pati a te Tusi Tapu. (Kolose 3:15) Ke loto fakafetai ki mea ‵lei i te olaga, faitalia te foliki o te mea tenā. Te tōga o te mata o te lā i te afiafi, te matagi agiagi malie, mo se fakamisikata mai se tino pele—a mea konei e mafai o fai ei ke momea aka te ‵lei o ‵tou olaga.
Fai a mea mō nisi tino. Kafai foki a ‵tou ola ‵lei e se ‵lei, kae e “sili atu te fiafia o te tino telā e tuku atu ana mea i lō te maua ne ia.” (Galuega 20:35) Kafai e loto fakafetai a tino ki ‵tou taumafaiga, ka maua eiloa ne tatou se lagonaga lotomalie, kae ko se mafaufau ‵mafa tatou ki ‵tou fakalavelave. E mafai o fai ‵tou olaga ke ‵lei atu mai te fesoasoani atu ki nisi tino ke fai ke tai ‵lei atu a olotou olaga.
FAKAMALOSI AKA SE OLAGA AVAGA
Te fakatakitakiga mai te Tusi Tapu: “Ke fakamautinoa aka ei ne koutou a mea kolā e sili atu i te tāua.”—Filipi 1:10.
A tauavaga kolā e se uke olotou taimi e fakatasi mo olotou avaga e mafai o fakamasei i ei olotou fesokotakiga. Tela la, e ‵tau mo tāgata mo fāfine a‵vaga o ‵poto ke fakamuamua olotou avaga—se tasi o mea e sili atu i te tāua i te olaga.
Fai mea fakatasi. I lō te saga eiloa o fai a mea e manako koe ki ei, kaia e se palani ei ke fai fakatasitasi lua mea? “E ‵lei atu te tokolua i lō te tokotasi,” ko pati i te Tusi Tapu. (Failauga 4:9) Kafai e tokolua, e mafai o kūka se mea‵kai, fakamalosi‵losi foitino, mānava malie o inuinu, io me fai se tafaoga.
Fakaasi atu tou alofa. E fakamalosi mai te Tusi Tapu ko te tagata mo te fafine avaga ke fakatau a‵lofa kae āva te suā tino ki te suā tino. (Efe. 5:28, 33) A te fakamisikata, te ‵sai atu, io me se meaalofa foliki e mafai eiloa o fakamalosi ne ia te avaga. E tonu, e ‵tau o fai atu ne taki tauavaga a pati fakatauavaga i a lāua eiloa tokolua.—Epelu 13:4.