E Aoga te Muna a te Atua ki te Faiga o Akoakoga
1. Se a te matua o te fono o te fenua mō te tausaga faka-te-taviniga ko te 2014, kae se a te fesili ka tali aka i te polokalame tenei?
1 A Ieova ko te ‵toe faiakoga ‵lei eiloa i te iunivesi. (Isa. 30:20, 21) E akoako pefea ne Ieova tatou? Ko oti ne tuku mai ne ia se tusi telā e sili atu i nisi tusi katoa—ko tena Muna fakaosofia, ko te Tusi Tapu. E aoga pefea ki a tatou a akoakoga mai te Atua i te feitu faka-te-foitino, feitu faka-te-mafaufau, lagonaga, mo te feitu faka-te-agaga? Ka tali aka eiloa a te fesili tenei i te polokalame o te ‵tou fono o te fenua mō te tausaga faka-te-taviniga ko te 2014. A te matua o te polokalame, “E Aoga te Muna a te Atua ki te Faiga o Akoakoga,” telā e fakavae ki te 2 Timoteo 3:16.
2. Ne a fesili kolā ka fakaasi mai i olotou tali a manatu tāua?
2 Onoono ki Manatu Tāua Konei: Ka fakaasi mai a manatu tāua o te polokalame i tali ki fesili konei:
• E pokotia pefea ‵tou olaga i akoakoga mai te Atua? (Isa. 48:17, 18)
• Kafai e taumafai tatou o fai a ‵fuliga ki ‵tou fakanofonofoga ko te mea ke mafai o tavini atu ki a Ieova i te taviniga tumau, se a te mea e mafai o tali‵tonu katoatoa tatou ki ei? (Mala. 3:10)
• Ne a ‵tou mea e ‵tau o fai māfai ko fakafesagai atu tatou ki “akoakoga kese‵kese kolā e ‵fou”? (Epe. 13:9)
• E mafai pefea ne tatou o tau‵tali atu ki te auala e “akoako atu” ei a Iesu? (Mata. 7:28, 29)
• Kaia e ‵tau ei mo faiakoga i te fakapotopotoga o akoako muamua latou? (Loma 2:21)
• Ne a mea e aoga ei a te Muna a te Atua? (2 Timo. 3:16)
• Ka pokotia pefea a tino i te ‘lūlūga’ o atufenua? (Haka. 2:6, 7)
• Se a te mea e maua ei ne Ieova a te loto talitonu ki a tatou? (Efe. 5:1)
• Kaia e ‵tau ei o ga‵lue malosi tatou ke tumau tatou i akoakoga a Ieova? (Luka 13:24)
3. Kaia e tāua ei ke ‵kau kae ‵saga tonu atu tatou ki te polokalame tenei ko oti ne fakatoka faka‵lei mō te taimi tonu?
3 I te kamataga o te 2 Timoteo mataupu e 3, a koi tuai o tusi ne ia a pati kolā e fakavae ki ei a te matua o te polokalame tenei, ne fakamatala mai ne Paulo a taimi faiga‵ta kolā e fakamailoga ki ei a aso fakaoti. Ne tusi mai a ia: “Kae ko tino amio ma‵sei kae fakaloi‵loi tino ka gasolo aka mai te masei o na ma‵sei atu eiloa. E faka‵se ne latou a nisi tino kae e faka‵segina foki latou.” (2 Timo. 3:13) Tela la, ko te mea ke se faka‵segina tatou, se mea tāua ‵ki ke faka‵logo kae fakagalue ne tatou a akoakoga mai te Atua! Tela la, ke na fakaiku aka ne tatou ke ‵kau kae ‵saga tonu atu ki te polokalame tenei ko oti ne fakatoka faka‵lei mō te taimi tonu.