Ke Puipui Tou Mafaufau

1. Se a te matua o te fono o te fenua mō te tausaga faka-te-taviniga ko te 2013, kae se a te pogai o te polokalame?

¹ Ne fakatonu atu a Iesu ki ana soko ke a‵lofa ki a Ieova mo olotou loto, ola, mo te mafaufau kātoa. (Mata. 22:37, 38) A te polokalame mō te fono o te atufenua, te fono o te fenua, mo te fono fakapito o te tausaga tenei, ne fakatoka eiloa ke fesoasoani mai ke fakamalosi aka te tino i loto i a tatou. E pelā mo te mea e masaua ne koutou, a te matua o te ‵tou fono o te atufenua ko te “Ke Puipui Tou Loto!” A te polokalame o te fono fakapito mō te tausaga faka-te-taviniga ko te 2013 e fakaaoga i ei a te matua tenei “Ke Puipui Tou Loto Lagona.” Kae ko te fakasologa o fono o te fenua kolā ka kamata i te suā masina ka fakaaoga i ei a te matua “Ke Puipui Tou Mafaufau,” telā e fakavae ki te Mataio 22:37. Ne fakatoka eiloa te polokalame tenei ke fesoasoani mai ki a tatou taki tokotasi ke iloilo aka ‵tou mafaufauga fakatasi mo se kilokiloga ke tai momea aka te fakafiafia atu ki a Ieova.

2. Ne a fesili e ‵tau o ‵sala atu tatou ki tali i te taimi e fai ei te polokalame?

² Ne a Fakamatalaga ka Tuku Mai i ei: I te taimi e fakalogo‵logo ei tatou ki te fono o te fenua, e ‵tau o ‵sala atu tatou ki tali o fesili konei, kolā e maua i ei a manatu tāua:

• E mafai pefea o ‵kalo keatea tatou mai i te ‘mafaufau faka-te-foitino’?

• E mafai pefea o fesoasoani atu tatou ki te tapalega o te veli telā e faka‵kivi ne ia a mafaufauga o tino sē tali‵tonu?

• Se a te kilokiloga e fia maua ne tatou?

• Ne a mea aoga e maua mai i te mafaufau ‵loto telā e ‵lei?

• E mafai pefea o talia ne tatou a Ieova ke fulifuli ne ia ‵tou mafaufauga?

• E mafai pefea ne avaga tāgata, mo avaga fāfine, mātua, mo tama‵liki o fesoasoani atu ki te mauaga o te fiafia i te kāiga?

• E mafai pefea o toka tatou mō te aso o Ieova?

• Se a te mea e fakauiga ki ei a te fakatoka o ‵tou mafaufau mō te faiga o galuega?

• Se a te mea aoga e maua ne tino kolā e fakagalue aka ne latou a mea kolā e tauloto ne latou?

3. Kaia e tāua ei ke ‵kau atu tatou ki aso e lua, ‵saga tonu atu, kae fakagalue a mea e tauloto ne tatou mai i ei?

³ E taua atu eiloa a Satani ki ‵tou mafaufau kae taumafai ke fakamasei ne ia. (2 Koli. 11:3) Tela la, e ‵tau o puipui ‵tou mafaufau kae pule faka‵lei atu ki ‵tou mafaufauga. E ‵tau o tumau tatou i te fakaasi atu o te mafaufau o Keliso kae ‵teke atu ki fakamalosiga mai i te lalolagi amio masei tenei. (1 Koli. 2:16) Tela la, ke fai a fakatokaga ke kau atu koe ki aso e lua o te fono o te atufenua. Ke saga tonu atu eiloa. A te fakagaluega o fakamatalaga tāua mai i ei ka fesoasoani mai ke fakatoka ‵tou mafaufau mō galuega tāua o te Malo.—1 Pe. 1:13.