Ke Tufa Atu i a Tesema te Tala ‵Lei Napa 38!
1. Ne a fesili ka mafau‵fau ki ei a tino e uiga ki tino ‵mate, kae ka tali aka pefea a fesili konei i a Tesema?
1 A te mate se fili o tino katoa, faitalia me ne a olotou talitonuga. (1 Koli.15:26) E fia iloa ne tino e tokouke me kofea nei a tino ‵mate kae e mata, e mafai o toe fetaui mo latou. Tela la, ka ‵kau atu a fakapotopotoga i te lalolagi kātoa i te tufatufaatuga o te Tala ‵Lei Napa 38, telā e fakaulutala penei “E Mata, e Mafai Eiloa o Toe Ōla Mai a Tino ‵Mate?” kae ka fai i loto i se masina. Ka kamata a te galuega fakapito tenei i a Tesema po 1. Mai tua o te tufatufaatuga fakapito tenei, ka fakaaoga ei a te Tala ‵Lei Napa 38 i te galuega talai e pelā me se tamā pepa.
2. Ne fakatoka pefea te Tala ‵Lei Napa 38?
2 Te Auala ne Fakatoka ei: Ne fakatoka a te Tala ‵Lei Napa 38 ke mafai o ‵fetu fakaloaloa ko te mea ke lavea atu a te koga mai mua telā e maua i ei a pati konei “Se a tau tali . . . ao? ikai? kāti la?” Kafai e ‵tala ne te tino faitau a te Tala ‵Lei, ka lavea ne ia a te tali mai te Tusi Tapu ki te fesili telā ko te ulutala o te mataupu, penā foki loa mo te aoga o folafolaga i te Tusi Tapu ki a ia. Ka mafai foki o lavea atu ne ia a pogai e mafai ei o talitonu a ia ki te Tusi Tapu. A te itulau fakaoti o te Tala ‵Lei e maua atu i ei se fesili gali ke mafau‵fau ki ei kae ‵kami atu ei a ia ke tauloto ki mea e uke atu.
3. Ka tufatufa atu pefea a te Tala ‵Lei Napa 38?
3 Te Auala ka Tufa Atu ei: Ka ‵pau eiloa te galuega tenei mo te tufatufaatuga o pepa ‵kami mō te Fakamanatuga mo te Fono o te Atufenua. Ka tuku mai ne toeaina a takitakiga ki te auala ke oko atu ki koga talai katoa, e ‵tusa loa mo te tusi ne maua ne latou i a Apelila 1, 2013. A fakapotopotoga kolā e fo‵liki olotou koga talai e mafai o fesoasoani atu ki fakapotopotoga ‵pili kolā e ‵lasi olotou koga talai. Kafai ko puke mai au Tala ‵Lei Napa 38, masaua ke puke fua te aofaki telā ka manakogina ne koe mō te vaiaso e tasi. I te taimi e fai ei te galuega tenei, kafai ko oti ne tufa atu a ‵kopi mai fale ki fale i ‵tou koga talai, ko mafai ei o tufatufa atu a ‵kopi i koga talai kolā e tokouke a tino i ei. Kafai e oti ne tufa atu a ‵kopi katoa kae seki oti te masina, ko ‵tau ei o ofo atu a te tusi mō te masina. I te Aso Ono muamua, ka ‵saga tonu atu ki te faiga o te galuega fakapito tenei i lō te kamataga o akoga faka-te-Tusi Tapu. I fakaotiga o te vaiaso, e ‵tau foki o ofo atu a mekesini māfai e ‵lei. E mata, e fai ne koe a fakatokaga ke kau katoatoa atu ki te galuega fakapito tenei?