Ke Fai mo Fai se Soa Fesoasoani i lō te Maimoa Atu Fua
1. E mafai pefea o fakaakoako atu tatou ki te kilokiloga a te apositolo ko Paulo i te taimi e ga‵lue fakatasi ei tatou mo nisi tino i te galuega talai?
1 Ne kilo atu a te apositolo ko Paulo ki taimi ne fakamāumāu ne ia mo ana taina tali‵tonu e pelā me ne avanoaga ke “fakatau fakama‵losi aka ei.” (Loma 1:12) Kafai e ga‵lue koulua mo te suā tino talai i te galuega talai, e mata, e fakaaoga faka‵lei ne koe te taimi tenei ke fakamalosi kae fesoasoani atu ki a ia? I lō te maimoa atu fua, kaia e se fakaasi atu ei a te auala ne fai ei koe mo fai se tino talai magoi?
2. Ne a mea e mafai o fakamalosi aka ki ei ne tatou a te loto talitonu i ‵tou soa i te galuega talai, kae kaia e tāua ei?
2 Ke Fakamalosi Aka te Loto Talitonu: E se lava te loto tali‵tonu o nisi tino talai, kae lavea atu i olotou foliga io me ko olotou leo. E mafai o fakamalosi aka ne tatou te lotou loto tali‵tonu mai i te fakamālō atu mo te loto kātoa ki a latou. Ne a nisi auala e mafai o fakamalosi aka te loto talitonu? E fakaasi ‵tonu atu ne se ovasia faimalaga e tokotasi ana lagonaga mataku mo te auala ne ‵talo atu faeloa a ia ke manumalo i lagonaga penā. Ne iloa ne te suā taina a te mea telā e mafai o fesoasoani atu ki a ia ke maua te loto talitonu, ko te: “Fakamisikata atu. I nisi taimi e ‵tau o ‵talo atu au ke maua te fesoasoani ke mafai o fakaasi atu a tamā mea fo‵liki penā.” E mata, e isi se mea ne fesoasoani atu ki a koe ke maua te loto talitonu i te galuega talai? Ke fakaasi atu ki tou soa i te galuega talai.
3. Ne a mea e mafai o fakaasi atu ne tatou ki ‵tou soa kolā e mafai o fesoasoani atu ke momea aka te magoi i tena galuega talai?
3 Ke Fakatau Fakaasi Atu a Auala Kese‵kese: Kai maua aka eiloa ne koe se fakamatalaga kamata io me se fesili, kāti se mea e uiga ki se mea ne tupu i te fenua, telā e magoi ke kamata ki ei se sau‵talaga? Kai maua aka eiloa ne koe a ikuga ‵gali mai te fakaopoopo atu o se manatu totino ki pati fakatomua fesoasoani? Ke fakamatala atu ki tou soa. (Faata. 27:17) I te taimi e olo atu ei o fai se toe asiga, e mafai o fakamatala atu ne koe a te mea e fakamoemoe koe ki ei ke fai i te āsiga tenā mo te auala ke fai ei. Mai tua o se akoga faka-te-Tusi Tapu, e mafai o fakamatala atu ne koe ki tou soa a te pogai ne filifili aka ei ne koe se manatu fakapito, se tusi siki, io me se auala ke akoako atu ko te mea ke fakataunu ei a manakoga o te tino akoga.
4. Kaia e ‵tau ei o fia fesoasoani atu tatou ki ‵tou taina talai?
4 Ne seki ‵saga atu fua a tino talai i te senitenali muamua o fesoasoani ki tino sē tali‵tonu. Ne lavea foki ne latou te tāua ke fakatau fakamalosi te suā tino ki te suā tino. (Galu. 11:23; 15:32) Ne fakamasani ne te apositolo ko Paulo a Timoteo kae fakamalosi atu ke fakaasi atu ki nisi tino a mea ne tauloto ne ia. (2 Timo. 2:2) Kafai e se puli i a tatou o fai a mea ‵lei ki taina Kelisiano i te galuega talai, e se momea aka fua i ei te lotou fia‵fia mo te magoi kae e fakafiafia foki eiloa ne tatou a te ‵tou Tamana faka-te-lagi.—Epe. 13:15, 16.