E ‵Tau o Fakasiusiu a Fuaga ko te Mea ke ‵Tupu Aka

1. Se a te mea e ‵tau o fakasiusiu ko te mea ke tupu aka?

¹ E ‵tau o fakasiusiu a fuaga kolā ne ‵toki i se fatoaga ko te mea ke ola ‵lei aka. E penā foki loa a fuaga o te munatonu kolā e ‵toki i loto o tino i ‵tou koga talai. (1 Koli. 3:6) E ‵tau o fai ne tatou a toe āsiga kae fakasiusiu a fuaga fakatusa konei mai i te fakaaogaga o te Muna a te Atua māfai e ma‵nako tatou ke ‵mau olotou aka, ke ‵tupu aka, kae ke ola ‵lei foki.

2. E mafai pefea o fakatoka ne tatou se fakavae mō te suā āsiga?

² Ke ‵Sili Atu se Fesili: Kafai e fakatoka au pati fakatomua, kaia e se fakatoka foki ei ne koe se fesili gali ko te mea ke mafai o tali ne koe māfai ko toe āsi atu koe? Ke fakasae aka a te fesili tenā māfai ko oti te lua sau‵talaga muamua, kae fai a fakatokaga mautinoa ke toe foki atu. E ‵lei eiloa ki tino e tokouke ke filifili aka se mea mai i te tusi ko te Akoakoga Mai i te Tusi Tapu telā ka mafai ei o fakaasi atu ne latou a te faiga o se akoga faka-te-Tusi Tapu.

3. Ne a fakamatalaga e uiga ki te tino fiafia e mafai o aofia i mea e fakamau ne koe?

³ Ke Fakamau Faka‵lei a Fakamatalaga: I te taimi eiloa e oti atu ei tau āsiga muamua, ke fakaavanoa ne mū taimi ke fakamau faka‵lei a fakamatalaga. Ke tusi ki lalo a te igoa o te tino mo tena fakatuatusi. Se mea ‵lei foki ke tusi ki lalo a te po o te masina mo te taimi ne fai‵pati ei koulua, mea ne sau‵tala koulua ki ei, mo tusi ne tuku atu ne koe, māfai e isi. E mata, ne fai mai ne ia a te lotu e kau atu a ia ki ei? E mata, e isi sena kāiga? E mata, ne taku mai ne ia a mea e fiafia a ia ki ei mo mea e manavase a ia ki ei? A vaegā fakamatalaga penā ka fesoasoani atu ke fakafetaui aka au fakamatalaga i aso mai mua. Ke tusi foki ki lalo a te taimi ne lotoma‵lie ki ei koulua ke toe foki atu koe pelā foki mo te fesili telā ka tali aka i ei.

4. Kafai ko toe āsi atu tatou ki se tino fiafia, kaia e ‵tau ei o tumau tatou i te ‵foki sāle atu?

⁴ Ke Tumau: Ka se malōlō eiloa a Satani i ana taumafaiga ke “ave keatea te muna” ne ‵toki i te loto o se tino. (Male. 4:14, 15) Tela la, ke mo a ma ‵fiu vave koe māfai e tai faigata ke toe maua ne koe a te tino fiafia i te fale. E mata, e mafai ne koe o lafo atu se tusi io me e tuku atu se tamā tusi i te fale? Ne kamata ne se paenia se akoga toetoe mo se fafine kae ne seki mafai o toe maua ne ia tou fafine i te fale, telā ne lafo atu ei ne ia se tusi. I te taimi ne toe maua ei ne te tuagane a tou fafine i te fale, ne fakaasi mai ne te fafine tenei a te otia malosi o tena loto ona ko te fiafia tonu telā ne fakaasi atu ki a ia. I te taimi e fakasiusiu ei ne tatou a fuaga o te munatonu, e mafai o maua ne tatou a te fiafia telā e māfua mai i te lavea atu me ko tupu aka, ko matua ‵lei, kae “‵fua mai ki taki tolu sefulu nisi, e taki ono sefulu nisi, kae taki selau a nisi.”—Male. 4:20.