Ke Fai a Pelofeta Pelā me se Fakaakoakoga—Sefanaia
1. I te auala fea ne tavini atu ei a Sefanaia e pelā me se pelofeta, kae se a te fakaakoakoga ‵lei ne tuku mai ne ia mō tatou i aso nei?
1 I te kogaloto o te fitu o senitenali T.L.M., ne salalau eiloa te tapuakiga ki a Paala i Iuta. Ne fatoa tamate atu eiloa te tupu masei ko Amoni, kae ko fai nei tena tama ko Iosia mo tupu. (2 Nofo.33:21–34:) I te taimi tenā, ne fakaaoga ne Ieova a Sefanaia ke fakaoko atu te fekau o Tena fakamasinoga. E tiga eiloa kāti ne vau a Sefanaia i te gafā tupu o Iuta, ne seki fakamāmā ne ia te fekau a Ieova e uiga ki te fakamaseiga o te pulega a Iuta. (Sefa. 1:1; 3:1-4) I se auala tai ‵pau, e taumafai tatou o fakaakoako atu ki te loto malosi o Sefanaia kae mo a ma talia ne tatou a ‵tou kāiga ke fakalavelave mai ki te ‵tou tapuaki atu ki a Ieova. (Mata. 10:34-37) Se a te fekau ne fakaoko atu ne Sefanaia, kae se a te ikuga?
2. Ne a ‵tou mea e ‵tau o fai ko te mea ke ‵sao atu tatou i te aso o te kaitaua o Ieova?
2 ‵Sala ki a Ieova: Ko Ieova fua e mafai o faka‵sao ne ia a tino i te aso o tena kaitaua. Tela la, ne fakamalosi ne Sefanaia a tino i Iuta ke ‵sala atu ki a Ieova, ‵sala ki te amiotonu, kae ke loto maulalo koi maua se avanoaga. (Sefa. 2:2, 3) E ‵pau eiloa mo ‵tou aso nei. E pelā mo Sefanaia, e fakamalosi ne tatou a nisi tino ke ‵sala ki a Ieova, kae e ‵tau foki o gasue‵sue tatou, kae fakaiku aka ke mo a ma “fulitua . . . ki a [Ieova].” (Sefa. 1:6) Kae e ‵sala atu tatou ki a Ieova mai te sukesuke faka‵lei ki tena Muna kae ‵talo atu mō tena takitakiga. E ‵sala atu tatou ki te amiotonu mai te ola i se olaga ‵ma. E ‵sala atu tatou ki te loto maulalo mai te atiakaga o se uiga fakalogo kae tautali ki fakatakitakiga mai te fakapotopotoga saukātoa a Ieova.
3. Kaia e ‵tau ei o fakatumau ne tatou se kilokiloga tonu i te galuega talai?
3 Ikuga ‵Lei: Ne fakamalosi atu eiloa te fekau o te fakamasinoga a Sefanaia ki nisi tino i Iuta kae maise eiloa ki te tamataene ko Iosia, telā ne kamata o ‵sala atu ki a Ieova i te taimi koi tamaliki eiloa a ia. Ne ofa ne ia fakamuli a koga tapuaki fapau‵pau i te fenua. (2 Nofo. 34:2-5) I aso nei, e tiga eiloa e ‵toki a nisi fuaga o te Malo i tafa o te auala, i koga fatufatua, mo vā o lakau makai‵kai, e isi eiloa ne nisi fuaga ne ‵toki i luga i te laukele ola ‵lei kae ‵fua mai ki fuataga e uke. (Mata. 13:18-23) E loto tali‵tonu tatou me ka tumau eiloa te fakamanuia ne Ieova a ‵tou taumafaiga i te taimi e fakalavelave ei tatou i te fakasalalauatuga o fuataga o te Malo.—Sala. 126:6.
4. Kaia e ‵tau ei o ‵nofo ‘fakatalitali tatou ki a Ieova’?
4 Ne mafau‵fau a nisi tino i Iuta me ka se gasuesue eiloa a Ieova. Kae ne fakatalitonu atu ne Ieova me ko pili o oko atu tena aso fakamataku. (Sefa. 1:12, 14) Ne maua fua ne tino kolā ne faka‵lafi ki a ia a te faka‵saoga. (Sefa. 3:12, 17) I te taimi e ‘fakatalitali ei tatou ki a Ieova,’ ka maua eiloa ne tatou te fiafia mai te tavini fakatasi atu mo ‵tou taina tapuaki ki te Atua sili!—Sefa. 3:8, 9.