Fesili Mai Tino Fai‵tau

Ko oi te “fafine” telā ne faipati ki ei i te Isaia 60:​1, kae i te auala fea ne ‘tu a ia ki luga’ kae “maina atu”?

Isaia 60:1 e faitau penei: “Tu ki luga, e te fafine, ke maina atu, me i tou mainaga ko vau. A te ‵malu o Ieova ko maina atu ki luga i a koe.” E fakaasi mai i te fakamatalaga me i te “fafine” ko Siona, io me ko Ielusalema, te laumua o Iuta i te taimi tenā.a (Isa. 60:14; 62:​1, 2) A te fakai ko Ielusalema e sui ne ia a te fenua kātoa o Isalaelu. E lua a fesili ka tali aka ne tatou e uiga ki te tusi faitau tenei: Muamua la, anafea kae i te auala fea ne “tu ki luga” a Ielusalema kae maina atu tena mainaga faka-te-agaga? Te lua, e mata, e isi se fakataunuga lasi o pati a Isaia i ‵tou aso nei?

Anafea kae i te auala fea ne “tu ki luga” a Ielusalema kae maina atu tena mainaga faka-te-agaga? Ne seki mafai o toe faite aka a te faletapu i Ielusalema i te taimi koi ‵nofo fakapagota ei a tino Iutaia i Papelonia i tausaga e 70. Kae mai tua o te fakatakavalega o Papelonia ne Metai mo Pelesia, ne toe fakasaoloto a te kau Isalaelu kolā e ‵nofo i te Emupaea o Papelonia ke toe ‵foki ki te lotou fenua kae toe fakatu aka a te tapuakiga tonu. (Esela 1:​1-4) I te kamataga o te 537 T.L.M., ne toe ‵foki atu se ‵toega o tino fakamaoni mai matakāiga e toko 12. (Isa. 60:4) Ne kamata o ofo atu ne latou a taulaga ki a Ieova, fakamanatu a ‵kaiga fakamanatu, kae toe faite aka a te faletapu. (Esela 3:​1-4, 7-11; 6:​16-22) I te taimi foki tenā, ne toe kamata o maina atu a te ‵malu o Ieova ki Ielusalema—ki tino o te Atua kolā ko toe ‵foki mai. Ne fai latou e pelā me se mainaga fakatusa ki te fenua, kolā ne ‵nofo i te pouliga faka-te-agaga.

Kae ko valoaga a Isaia konei ne seki fakataunu katoatoa i Ielusalema mua. A te tokoukega o tino Isalaelu ne seki tumau i te faka‵logo ki te Atua. (Nee. 13:27; Mala. 1:​6-8; 2:​13, 14; Mata. 15:​7-9) Fakamuli ifo, ne ‵teke atu foki latou ki te Mesia, ko Iesu Keliso. (Mata. 27:​1, 2) I te 70 T.A., ne fakaseai atu ei a Ielusalema fakatasi mo tena faletapu i te lua o taimi.

Ne ‵valo mai a Ieova me ka tupu a te mea tenā. (Tani. 9:​24-27) E manino ‵lei me e se ko tena fuafuaga ke fakataunu ne te Ielusalema i te lalolagi nei a vaega katoa o te valoaga i te Isaia mataupu 60.

E mata, e isi se fakataunuga lasi o pati a Isaia i ‵tou aso nei? Ao, kae e fakasino atu ki te fafine fakatusa—“te Ielusalema i luga.” Ne tusi mai te apositolo ko Paulo e uiga ki tou fafine: “Ko ia ko te ‵tou mātua.” (Kala. 4:26) A Ielusalema i luga ko te vaega o te fakapotopotoga a te Atua i te lagi, telā e aofia i ei a tino faka-te-agaga fakamaoni. A ana tama‵liki e aofia i ei a Iesu mo te toko 144,000 Kelisiano faka-te-agaga kolā ne fakaekegina, kae e maua ne latou a te fakamoemoega i te lagi, e pelā mo Paulo. Ka fai a Kelisiano fakaekegina e pelā me “se fenua tapu”—“te Isalaelu a te Atua.”—1 Pe. 2:9; Kala. 6:16.

I te auala fea ne “tu ki luga” a Ielusalema i luga kae “maina atu”? Ne fai penā e auala i ana tama‵liki fakaekegina i te lalolagi. Onoono ki te auala e tai ‵pau ei a mea e ‵tupu ki a latou mo mea kolā ne ‵valo mai i te Isaia mataupu 60.

A Kelisiano fakaekegina konei e ‵tau o “‵tu ki luga” me ne ‵nofo atu latou i te pouliga faka-te-agaga i te taimi ne salalau atu ei a te aposetasi mai tua o te ‵mateatuga o te kau apositolo i te lua senitenali T.A. (Mata. 13:​37-43) I te taimi tenā, ne ‵nofo fakapagota latou i Papelonia te Sili, telā ko te emupaea o lotu ‵se i te lalolagi kātoa. Ne tumau eiloa a te kau fakaekegina i te ‵nofo fakapagota ke oko eiloa ki “te gataga o te olaga tenei,” se vaitaimi telā ne kamata mai i te tausaga ko te 1914. (Mata. 13:​39, 40) E se leva, mai tua ifo i te 1919, ne fakasaoloto latou kae se leva mea loa ko kamata o maina mai a te mainaga faka-te-agaga e auala i te faiga ne latou o te galuega talai.b I tausaga fakamuli, ne maua ne tino mai fenua katoa a te mainaga tenā, e aofia i ei a te ‵toega o te Isalaelu a te Atua—ko “tupu” kolā ne taku mai i te Isaia 60:3.—Faka. 5:​9, 10.

I aso mai mua, ka fakasalalau atu ne Kelisiano fakaekegina a te mainaga o te Atua i se auala tai lasi atu. Pefea la? Kafai ko ‵mate latou, ka fai latou mo vaega o te “Ielusalema fou,” io me ko te toko 144,000 o tupu mo faitaulaga lagolago, telā ko te avaga a Keliso.—Faka. 14:1; 21:​1, 2, 24; 22:​3-5.

Ka isi eiloa se tusaga o te Ielusalema fou i te fakataunuga o te Isaia 60:1. (Fakatusa te Isaia 60:​1, 3, 5, 11, 19, 20 ki te Fakaasiga 21:​2, 9-11, 22-26.) E pelā mo te Ielusalema i te lalolagi nei, ko te laumua o te malo i Isalaelu mua, ka fai a te Ielusalema Fou, fakatasi mo Keliso, mo fai a te malo i te lalolagi fou. E mafai pefea ne te Ielusalema fou o “fanaifo mai te lagi mai te Atua”? Mai te saga atu ki mea e fai i te lalolagi. A tino mai atufenua katoa kolā e ma‵taku ki te Atua “ka sa‵sale . . . i tena mainaga.” Ka fakasaoloto foki latou mai te agasala mo te mate. (Faka. 21:​3, 4, 24) E pelā mo te mea ne ‵valo mai ne Isaia mo nisi pelofeta, ona ko te mea tenā, ka “toe faka‵fou ei a mea katoa.” (Galu. 3:21) Ne kamata a te faka‵fouga lasi tenā i te taimi ne kamata ei o fai a Keliso mo Tupu kae ka gata atu i te fakaotiga o te Pulega a Keliso i te Afe Tausaga.