Ko Fai “te Tino Foliki” mo Fai te “Tokoafe”

“Ka fai te tino foliki mo fai te tokoafe, kae ko te tamā tino ka fai mo fai se fenua malosi.”—ISAIA 60:22, NW.

1, 2. (a) Kaia e ufi ei te lalolagi ne te pouliga i aso nei? (e) Ne gasolo aka pefea o maina mai te mainaga mai i a Ieova ki luga i ana tino?

“ANISI malo ka ufi ne te pouliga, ka ko te mainaga o te Aliki [ko Ieova] ka maina mai ki luga i a koe; a te mainaga o tena fakatasi mai ka i luga i a koe.” (Isaia 60:2) E fakamatala faka‵lei mai ne pati konā, a te tulaga i te lalolagi nei talu mai te 1919. Ne ‵teke atu a Lotu Kelisiano ‵Se ki te fakailoga o te fakatasi mai o Iesu Keliso e pelā me ko te tupu. A ia ko “te mainaga o te lalolagi.” (Ioane 8:12; Mataio 24:3) Ona ko te “kaitaua” lasi o Satani, te pule o te “malosi o te lalolagi pouliuli i aso nei,” ko oti ne fai te 20 senitenali tenei mo fai te ‵toe vaitaimi fakasauā kae masei i tala katoa o tino. (Fakaasiga 12:12; Efeso 6:12) E ‵nofo atu te tokoukega o tino i te pouliga faka-te-agaga.

² Kae koi maina mai te mainaga i aso nei. E “maina mai” a Ieova ki luga i ana tavini, te ‵toega o tino fakaekegina, kolā e fai mo fai ne sui i te lalolagi nei o tena fafine fakatusa i te lagi. (Isaia 60:1) Kae maise eiloa talu mai te lotou fakasaolotoga mai i te ‵nofo pologa i Papelonia i te 1919, ko fakamaina atu ne latou te ‵malu o te Atua ‘ke maina atu te lotou mainaga i mua o tino.’ (Mataio 5:16) Mai i te 1919 ki te 1931, ne gasolo faeloa o momea aka te maina o te mainaga o te Malo o te Atua, me ne tiakina ne tino konā a nisi manatu faka-Papelonia kolā ne ‵toe mai kae ne ‵nofo sai‵tia muamua latou i ei. Ne gasolo o tokouke latou, kae ne lau i te fia sefulu afe latou me ne fakataunu mai ne Ieova a tena folafolaga tenei: “Ka ko koutou tino Isalaelu kola e toe, ka fakapotopoto ne au koutou pela me ne mamoe ko foki mai ki te lafu. E pela me se malae lausiusi e fonu i mamoe, e pena foki te otou fenua me ka toe fonu i tino.” (Mika 2:12) I te 1931, ne momea aka te manino o te ‵malu o Ieova ki luga i ana tino i te taimi ne talia ei ne latou te igoa ko Molimau a Ieova.—Isaia 43:10, 12.

3. Ne fakamaoni mai pefea me ka maina atu te mainaga mai i a Ieova ki nisi tino, kae e se ko te kau fakaekegina fua?

³ E mata, ka maina atu fua a Ieova ki luga i tino kolā ne ‵toe mai o te “lafu foliki”? (Luka 12:32) Ikai. Ne fakasino atu te mekesini ko te Watch Tower i a Setema 1, 1931, ki te suā potukau. I se fakamatalaga ‵lei e uiga ki te Esekielu 9:1-11, ne fakaasi atu i ei me i te tino e puke ne ia te mea tusitusi telā ne faipati ki ei i fuaiupu konā, e sui ne ia te ‵toega o te kau fakaekegina. Ko oi ka fakamailoga olotou lae ne te “tagata” tenā? Ko ‘nisi mamoe,’ kolā e fakamoe‵moe ke ola latou ki te se-gata-mai i te lalolagi palataiso. (Ioane 10:16; Salamo 37:29) I te 1935, ne maina ei a tino me i te potukau tenā o ‘nisi mamoe’ ko “te vaitino tokouke, . . . mai fenua katoa” kolā ne matea atu ne te apositolo ko Ioane i te fakaasiga. (Fakaasiga 7:9-14) Talu mai te 1935 ke oko mai ki aso nei, ko oti ne ‵saga malosi atu ki te fakamaopoopoga o te vaitino tokouke tenā.

4. Ko oi a “tupu” mo “malo” kolā e fakasino atu ki ei i te Isaia 60:3?

⁴ Ne taku malie mai te fakamaopoopoga tenā i te valoaga a Isaia, penei: “A malo ka o‵mai ki tou mainaga, pena foki a tupu ka o‵mai ki te mainaga o te ata ao o tou aso fou.” (Isaia 60:3) Ko oi a “tupu” kolā e faipati ki ei i konā? Ko te ‵toega o te toko 144,000, kolā e pule fakatasi mo Iesu Keliso i te Malo faka-te-lagi, kae e takitaki ne latou te faiga o te galuega talai. (Loma 8:17; Fakaasiga 12:17; 14:1) I aso nei, e lau fua i afe a tino kolā e ‵toe mai o te ‵toega fakaekegina kae e sili fakafia atu te aofaki o “malo,” ko latou kolā e fakamoe‵moe ke ola i te lalolagi kae ko olo atu latou ki a Ieova ke maua ei a akoakoga kae e ‵kami mai foki ne latou a nisi tino ke fai penā.—Isaia 2:3.

Tavini Loto Finafinau a Ieova

5. (a) Ne a mea e fakaasi mai i ei me ne seki ‵pafu te loto finafinau o tino o Ieova? (e) Ne a atufenua ne fakaofoofogia i ei a fakaopoopoga i te 1999? (Ke onoono ki te fakasologa i te itulau e 25 ki te 28.)

⁵ E pefea te lasi o te loto finafinau telā ne fakaasi atu ne Molimau a Ieova i aso nei i tausaga katoa o te 20 senitenali tenei! Kae faitalia me e gasolo o uke olotou tofotofoga, ne seki gasolo o vāivāi te lotou loto finafinau i te taimi ko pili ei o oko atu ki te tausaga ko te 2000. Koi fakatāua malosi ne latou te fakatonuga tenei a Iesu: “Ke fai a tino o atufenua katoa mo fai ne soko.” (Mataio 28:19, 20, NW) Ne oko atu te aofaki o tino talai o te tala ‵lei i te ‵toe tausaga faka-te-taviniga i te 20 senitenali ki te ‵toe aofaki sili ko te toko 5,912,492. Se mea fakaofoofogia me ne fakamāumāu ne latou te aofaki ko te 1,144,566,849 o itula i te fai‵pati atu ki nisi tino e uiga ki te Atua mo ana fuafuaga. Ne fai ne latou a toe āsiga e 420,047,796 ki tino fia‵fia kae ne fai sāle ne latou a a‵koga faka-te-Tusi Tapu e 4,433,884 e aunoa mo se ‵togi. E pefea te fakaofoofogia o te lipoti tenā e uiga ki te loto finafinau i te faiga o te galuega!

6. Se a te fakatokaga fou telā ne fai mō paenia, kae ne a mea ne ‵tupu i ei?

⁶ I a Ianuali i te tausaga ko teka, ne faka‵pula ne te Potukau Pule me ne ‵fuli ne latou te aofaki o itula e ‵tau o fakamāumāu sāle ne te kau paenia. Ne fakaaogā ne tino e tokouke a te avanoaga tenā ke kamata o fai latou mo fai ne paenia tumau mo paenia lago‵lago. E pelā mo te tala e tasi, i masina e fa i te kamataga o te 1999 e sili fakafa atu te aofaki o tusi fakamolemole ne maua ne te ofisa lagolago i Holani ke fai latou mo fai ne paenia tumau i lō te vaitaimi foki tenā i te tausaga mai mua atu i ei. Ne lipoti mai ne te kau Kana: “Talu mai te taimi ne kamata ei te aofaki ‵fou o itula mō te kau paenia, ne gasolo aka faeloa ki luga a te aofaki o omotou paenia tumau.” I te tausaga faka-te-taviniga ko te 1999, ne oko atu te aofaki o paenia i te lalolagi kātoa ki te toko 738,343—se fakaasiga gali ‵ki o te loto ‘finafinau o fai te mea ‵lei.’—Tito 2:14.

7. Ne fakamanuia atu pefea a Ieova ki galuega loto finafinau a ana tavini?

⁷ E mata, ko oti ne fakamanuia ne Ieova a te galuega loto finafinau a ana tavini? Ao. Ne fai mai penei a ia e alatu i a Isaia: “Onoono aka ki ou feitu me se a te mea e tupu: A ou tino ko maopoopo o foki mai ki te lotou fenua! A au tama tagata ka o‵mai mai i koga mao; a au tama fafine ka sapasapai mai pela me ne tamaliki.” (Isaia 60:4) Koi tavini atu nei mo te loto finafinau a “tama tagata” fakaekegina mo “tama fafine” fakaekegina kolā ko oti ne fakamaopoopo mai. Kae nei la, ko fakamaopoopo mai a nisi mamoe a Iesu ke ‵kau mai ki “tama” fakaekegina a Ieova i atufenua mo fenua e 234.

“So se Galuega ‵Lei”

8. Ne a ‘galuega ‵lei’ e fai eiloa ne Molimau a Ieova?

⁸ E pānaki tonu mo Kelisiano te tiute ke talai atu te tala ‵lei o te Malo kae ke fesoasoani atu foki ki tino fia‵fia ke fai mo fai ne soko. Kae e ‵tau o fakatoka latou ki “so se galuega ‵lei.” (2 Timoteo 3:17, i ā matou a mataimanu ‵kese.) Tela la, e tausi faka‵lei ne latou mo te alofa olotou kāiga, e talimālō ne latou a nisi tino, kae e āsi sāle atu foki ki tino masaki. (1 Timoteo 5:8; Epelu 13:16) Kae e faite foki ne tino ga‵lue fakagāmua a Kingdom Halls—ko te galuega telā e molimau atu ei ki tino. I Togo, ko oti ne fakatu aka se hall e tasi, kae ne fia iloa ne nisi takitaki o te lotu tagi i konā me e mafai pefea ne Molimau a Ieova o faka‵tu aka olotou fale i a latou eiloa kae ne ‵tau o ‵togi ne te lotou ekalesia a tino ke faka‵tu aka olotou faletapu! Ne lipoti mai ne taina i Togo me ona ko te aogā o te faka‵tuga o Kingdom Halls ‵gali i nisi fa‵kai, ko taumafai ei a nisi tino ke ‵togi io me ke faka‵tu foki olotou fale i kogā koga kolā ka faka‵tu i ei ‵tou fale.

9. Ne a mea ko oti ne fai ne Molimau a Ieova i taimi ne oko mai ei a fakamaseiga fakafuasei?

⁹ I nisi taimi, e ‵tau o fai a nisi galuega ‵lei. Ne oko atu a fakamaseiga fakafuasei ki fenua e uke i te tausaga faka-te-taviniga tenei ko fano, kae ne ‵mua sāle atu te kau Molimau i nisi tino ki koga konā ke fesoasoani atu ki tino i ei. E pelā mo Honduras, ne fakamasei te lasiga o te fenua tenā i te Afā ko Miti. Ne fakatu fakavave aka ne te ofisa lagolago a komiti ke fakatoka te faiga o fesoasoani. Ne tuku atu ne Molimau i Honduras mo te fia o nisi atufenua a gatu, meakai, vailakau, mo nisi mea aka. Ne fakaaogā ne Komiti mō te Faka‵tuga o Fale olotou atamai ke toe faite aka a fale. Ne seki leva, kae ne fesoasoani atu ki ‵tou taina kolā ne ‵nofo fakaa‵lofa ona ko te fakamaseiga tenā ke toe kamata olotou faifaiga masani. I Ecuador, ne fesoasoani atu a Molimau a Ieova ki olotou taina i te taimi ne fakamasei ei olotou fale i se lofiaga fakamataku. Ne matea atu ne se tino galue i te malo olotou faifaiga tokagamalie i te faiga o te fakalavelave tenā, kae ne fai mai tou tagata penei: “Moi ne mafai o fakagalue aka ne au te potukau tenā, penei ko fai ei ne au a mea fakaofoofogia! E ‵tau o maua a vaegā tino pelā mo koutou i kogā koga katoa i te lalolagi nei.” E avatu ne vaegā galuega ‵lei konā a tavaega ki a Ieova te Atua kae e fakamaoni mai i ei me e “sili atu eiloa i te aoga o fakamalosiga faka te agaga i feitu katoa.”—1 Timoteo 4:8.

‘E Fo‵lau Mai Latou Pelā me ne Kaumana’

10. E tiga eiloa e gasolo o mu‵tana te aofaki o te kau fakaekegina, kaia e sili atu ei te folafolaatuga o te igoa o Ieova i te vaitaimi nei?

¹⁰ Ne fesili mai penei a Ieova: “Ne a a vakamutu konei e folau pela me ne kaumana, pela me ne lupe kola ko foki mai ki te lotou fenua? A vakamutu kona ne o‵mai mai i fenua mao, o aumai a tino o te Atua ki te lotou fenua. . . . A pui o tou fa‵kai ka faite ne tino fakaatea, ka ko olotou tupu ka tavini atu ki a koe.” (Isaia 60:8-10) A tino muamua kolā ne talia ne latou te ‘maina mai’ o Ieova ko ana “tama tagata,” ko Kelisiano fakaekegina. Kae ne o‵mai fakamuli a “tino fakaatea,” ko te vaitino tokouke, kolā e fesoasoani atu mo te fakamaoni ki olotou taina fakaekegina, kae e tau‵tali atu foki ki te lotou takitakiga i te talaiga o te tala ‵lei. Tela la, e tiga eiloa ko gasolo o tokotimomo te aofaki o te kau fakaekegina, ko sili atu nei te folafolaatuga o te igoa o Ieova i te lalolagi kātoa.

11. (a) Se a te mea telā koi fai nei, kae ne a mea ne iku mai i ei i te 1999? (e) Ko oi a atufenua e tokouke a tino ne papatiso i ei i te 1999? (Ke onoono ki te fakasologa i te itulau e 25 ki te 28.)

¹¹ Ona ko te mea tenā, ko ua‵lolo mai te fia miliona o tino e “pela me ne kaumana,” kae e faka‵lafi mai ki te fakapotopotoga Kelisiano. Ko fakaopoopo mai te fia selau afe i tausaga takitasi, kae koi ‵tala mai eiloa te avanoaga mō tino e tokouke. Muna a Isaia: “Ka tala ou mataloa i ao mo po, ko te mea ke aumai ne tupu o malo a koloa ma koe.” (Isaia 60:11) I te tausaga ko teka e toko 323,439 ne papatiso ke fakaasi atu i ei te lotou tukuatuga ki a Ieova, kae koi tuai o pono ne ia a mataloa. Koi ulu mai ki loto a “koloa tāua” o atufenua, ko tino o te vaitino tokouke. (Hakai 2:7) E se tuli keatea so se tino telā e fia tiakina ne ia te pouliga. (Ioane 12:46) Ke mo a ma galo i vaegā tino katoa konā a te lotou loto fakafetai mō te mainaga!

E se Ma‵taku Latou Faitalia a ‵Tekemaiga

12. Ne taumafai pefea a tino kolā e fia‵fai ki te pouliga o tamate ne latou te mainaga?

¹² A tino kolā e fia‵fai ki te pouliga e takalia‵lia foki ki te mainaga mai i a Ieova. (Ioane 3:19) E taumafai nisi tino i a latou o tamate te mainaga tenā. E se ‵poi tatou i ei. E tiga eiloa ne fai a Iesu mo fai “te mainaga tonu” telā “e fakamaina atu ki tino katoa,” ne fakatauemu kae ‵teke atu a tino ki a ia kae ne tamate fakamuli a ia ne tino o tena fenua. (Ioane 1:9) I te 20 senitenali tenei, ko oti foki ne fakatauemu atu ki Molimau a Ieova, ne pei latou ki te falepuipui, ne fakatapu, kae ne tamate foki me ne fakamaina faka‵lei atu ne latou te mainaga mai i a Ieova. I tausaga fakamuli nei, ko fakasalalau atu ne tino ‵teke a tala ‵loi e uiga ki tino kolā e fakamaina atu te mainaga mai te Atua. E ma‵nako nisi tino ke fakatalitonu atu ki tino me e fakama‵taku te kau Molimau a Ieova telā e ‵tau ei o taofi aka io me fakatapu latou. E mata, ne ma‵goi a taumafaiga a tino ‵teke konā?

13. Ne a mea ne ‵tupu ona ko te taumafaiga ke fakamatala faka‵lei atu a tala e uiga ki te ‵tou galuega i fale fakasalalau?

¹³ Ikai. Kafai e maua ne Molimau a Ieova se avanoaga ‵lei, ne olo atu latou ki fale fakasalalau tala ke fakamatala atu i ei a te mea tonu. Ona ko te mea tenā, ko lasi ‵ki te fakasalalauga o te igoa o Ieova i nusipepa mo mekesini, penā foki loa mo letiō mo TV. Ne ‵tupu mai i ei a mea ‵lei i te galuega talai. E pelā mo Tenimaka, ne faipati te polokalame e tasi i te TV i te fenua tenā ki te mataupu tenei “Te pogai e gasolo ei o foliki te fakatuanaki o te kau Tenimaka.” Ne fakasautala aka a Molimau a Ieova, fakatasi mo sui mai nisi lotu. Fakamuli ifo, ne fai mai penei se fafine telā ne matea atu ne ia te polokalame tenā: “E mautinoa eiloa me ko oi ne maua ne latou te agaga o te Atua.” Ne kamata o fai se akoga faka-te-Tusi Tapu fakatasi mo te fafine tenā.

14. Se a te mea ko pili o faimālō a tino ‵teke ke iloa ne latou, kae ka ma‵vale latou i ei?

¹⁴ E iloa ne Molimau a Ieova me ka ‵teke mai a tino e tokouke i te lalolagi nei ki a latou. (Ioane 17:14) Kae e fakamalosi mai eiloa te valoaga tenei a Isaia ki a latou: “A tama tagata a tino kola ne pule fakasaua ne latou a koe, ka o‵mai o ifo mo te fakaaloalo atu ki a koe. A tino katoa kola ne takalialia i a koe ka o‵mai o tapuaki i lalo o ou vae. Ka fakaigoa ne latou a koe ko ‘Te Fa‵kai o te Aliki,’ io me ko ‘Siona, te Fa‵kai o te Atua Tapu o Isalaelu.’” (Isaia 60:14) Ka ma‵vale olotou tino ‵teke, me ko pili te taimi e ‵tau ei o iloa ne latou me ne taua atu eiloa latou ki te Atua. Ko oi e mafai o manumalo i te taua tenā?

15. E maua pefea ne Molimau a Ieova a mea aogā mai ‘te tausi’ atu o malo ki a latou, kae ne fakaasi mai pefea a mea konā i te lotou galuega ko te akoako atu mo te talaiga o te tala ‵lei?

¹⁵ Ne toe folafola mai penei a Ieova: “Ka fai ne au a koe ke takutakua kae gali, ke fai mo koga o te fiafia ki te se gata mai . . . A malo mo tupu ka tausi faka‵lei ki a koe, e pela mo te matua tela e onoono fakalei ki tena tama. Ka iloa ne koe me ko au, [Ieova] te Aliki ne fakasao ne au a koe, ko te Atua malosi o Isalaelu ne fakasaoloto ne ia a koe.” (Isaia 60:15, 16) E tonu, a Ieova ko te tino telā e fakasaoloto ne ia ana tino. Kafai e fakalagolago atu latou ki a ia, ka tumau eiloa latou “ki te se gata mai.” Kae ka “tausi” latou ne “malo,” me ka fakaaogā ne latou a avanoaga ke fakamuamua te tapuakiga tonu. E pelā me e fakaaogā faka‵lei ne latou a komipiuta mo poto ‵fou i fesokotakiga ke ‵lomi ei Te Faleleoleo Maluga i ‵gana e 121 mo te Ala Mai! i ‵gana e 62 i te taimi e tasi. Ko oti ne fakatoka se polokalame mō komipiuta telā e fesoasoani mai ki te ‵fuliga o te Tusi Tapu ko te New World Translation ki nisi ‵gana fou, kae e maua mai i ei te fiafia lasi. I te taimi ne ‵tala mai ei a Tusitusiga Kelisiano Faka-Eleni i te ‵gana Croatia i te 1999, ne ‵tagi te fia afe o tino ona ko te fiafia. Ne fai mai penei se taina matua: “Ko leva ne fakatali au ki te Tusi Tapu tenei. Nei la, e mafai ne au o mate mo te loto malie!” Ko silia atu nei te fakasalalauga o te New World Translation, ko te tusi kātoa io me se vaega i ei, i kopi e 100 miliona i ‵gana e 34.

Amioga Tafasili i te ‵Lei

16, 17. (a) E tiga eiloa e faigata, kaia e tāua ei ke tumau tatou i amioga ‵lei kolā e manako a Ieova ki ei? (e) Se a te tala telā e fakaasi mai i ei me e mafai ne talavou o ‵kalo keatea mai fakalailaiga o te lalolagi nei?

¹⁶ Muna a Iesu: “So se tino e fai ne ia a mea masei, e takalialia i te mainaga.” (Ioane 3:20) Kae i te suā feitu, a latou kolā e tumau i te mainaga e fia‵fia foki ki amioga ‵lei kolā e manako a Ieova ki ei. Ne fai mai Ieova penei e alatu i a Isaia: “A otou tino katoa ka fai ne latou a te mea tonu.” (Isaia 60:21a) Se mea faigata ke tumau i amioga ‵lei i te lalolagi telā e lauiloa i ei a amioga ma‵sei, pati ‵loi, te kaimanako, mo te fakamatamata. E pelā mo nisi atufenua, ko tai pāpā ‵lei olotou tulaga i mea tau tupe, kae se mea faigofie fua ke sipa keatea se tino ke saga atu fua a ia ki auala e mafai ei ne ia o maua ana koloa. Kae ne fakailoa mai penei a Paulo: “Ka ko tino kola e ma‵nako ke maumea latou, ko paku atu latou ki te fakaosoosoga, ka ko maleigina foki latou ne te uke o manatu va‵lea mo manako ma‵sei, kola e ‵futi ne latou ki lalo o fakamasei kae fakamalepe valevale.” (1 Timoteo 6:9) E pefea te fakafanoanoa māfai ko tō saga malosi atu se tino ki tena pisinisi kae ko fakatamala ei a ia ki toe mea tāua, e pelā mo te kau atu ki nisi Kelisiano, te taviniga tapu, amioga ‵lei, mo tiute faka-te-kāiga!

¹⁷ Kae e sili atu i te faigata ki talavou ke tumau i amioga amio‵tonu, me e amio ma‵sei a tino e tokouke o te lotou kautama kae e fakaaogā foki ne latou a vailakau tapu. I Suliname, ne fanatu se tamataene taulekaleka ki te tamāfine telā ko 14 fua ana tausaga i te akoga kae ne fai atu ki a ia ke ‵moe fakatasi laua. Ne ita tou fafine, kae ne fakamatala atu ne ia me e fakatapu ne te Tusi Tapu a vaegā amioga penā seiloga ko oti ne a‵vaga a tino. Ne fakatauemu atu a nisi tamāfine i te akoga ki a ia kae ne taumafai o faimālō a ia ke ‵fuli tena fakaikuga. Olotou muna, me i tamāfine katoa e fia moe fakatasi mo te tamataene tenā. Kae ne mautakitaki eiloa te fakaikuga a te tamāfine tenā. I ne nāi vaiaso mai tua ifo i ei, ne fakailoa atu me ne maua ne te tamataene tenā a te SELAMETE, kae ne masaki malosi a ia. Ne fiafia eiloa te tamafine tenā me ne fakalogo a ia ki te tulafono a Ieova ke ‘‵kalo keatea mai te moe tasi kae seki avaga.’ (Galuega 15:28, 29) E fakatāua malosi ne Molimau a Ieova olotou talavou kolā e ‵tu ‵mautakitaki i te faiga o te mea tonu. Ona ko te lotou fakatuanaki mo te fakatuanaki o olotou mātua ko fai ei ke “takutakua” te igoa o Ieova te Atua—kae e faka‵malu atu foki ki ei.—Isaia 60:21e.

E Fakaopoopo Mai ne Ieova a Tino

18. (a) Se a te mea sili telā ne fai ne Ieova mō ana tino? (e) Ne a mea e fakamaoni mai i ei me ka tumau eiloa te tupuakaga, kae se a te fakamoemoega ‵malu telā e fakatali mai mō tino kolā e tumau i te mainaga?

¹⁸ E tonu, e fakamaina atu ne Ieova a tena mainaga ki ana tino, e fakamanuia atu ki a latou, e takitaki ne ia latou, kae e fakamalosi atu foki ki a latou. I te 20 senitenali tenei, ne matea atu ei ne latou te fakataunuga o pati konei a Isaia: “Ka fai te tino foliki mo fai te tokoafe, kae ko te tamā tino ka fai mo fai se fenua malosi. Ko au, ko Ieova, ka fakavavave ne au te faiga tenā i tena taimi tonu.” (Isaia 60:22, NW) Mai i nāi tino i te 1919, ko oti ne fai “te tino foliki” mo fai “te tokoafe.” Kae ne seki gata foki te tupuakaga tenā! I te tausaga tenei ko teka, ne ‵kau atu te toko 14,088,751 ki te Fakamanatuga o te mate o Iesu. E tokouke a tino konā e se ne Molimau kolā e talai atu. E fia‵fia tatou me ne ‵kau mai a tino konā ki te fakamanatuga tāua tenā, kae e ‵kami mai ne tatou a tino konā ke momea mai faeloa ki te mainaga. Koi fakamaina malosi mai ne Ieova tena mainaga ki ana tino. Koi tala mai te mataloa ki tena fakapotopotoga. Kae ke na fatuaki ‵tou loto ke tumau tatou i te mainaga mai i a Ieova. Māfaga o fakamanuiaga e maua nei ne tatou i ei! Kae ka pefea foki loa te fiafia telā ka maua ne tino i aso mai mua nei māfai ko tavae atu a tino katoa ki a Ieova kae ka fia‵fia foki latou ki te gali o tena ‵malu!—Fakaasiga 5:13, 14.

E Mafai ne Koe o Fakamatala Mai?

• Ko oi ne toe fakamaina atu ne latou te ‵malu o Ieova i aso fakaoti konei?

• Ne a mea e fakaasi mai i ei me ne seki gasolo o ‵pafu te loto finafinau o tino o Ieova?

• Ne a nisi galuega ‵lei e gasue‵sue malosi i ei a Molimau a Ieova?

• Faitalia a ‵tekemaiga faiga‵ta, se a te mea telā e tali‵tonu malosi tatou ki ei?

[Chart on page 17-20]

1999 TE LIPOTI A MOLIMAU A IEOVA I TE LALOLAGI

(See bound volume)

[Ata i te itulau e 31]

Koi ua‵lolo atu nei a tino ki te fakapotopotoga a Ieova