E Pefea te Tāua o te Igoa o Ieova ki a Koe?

1-2. E iloa pefea ne tatou me e tāua ‵ki eiloa te igoa o Ieova ki a Iesu?

A TE igoa o Ieova ko te ‵toe mea tāua eiloa ki a Iesu. Ko ia eiloa te tino muamua ke fakamaluga ne ia te igoa o tena Tamana. I te mataupu mai mua, ne tauloto tatou me ne loto fiafia a Iesu o mate ke fakatalitonu aka ei me i a Ieova se Atua e tapu kae ko mea katoa e fai ne ia e ‵tonu. (Male. 14:36; Epe. 10:​7-9) Kae kafai ko oti tena Pulega i te Afe Tausaga, ka fakafoki atu eiloa ne Iesu mo te loto fiafia a te pulega ki tena Tamana, ko te mea ke faka‵malu i ei te igoa o Ieova. (1 Koli. 15:​26-28) E fakaasi mai i te alofa o Iesu mō te igoa o te Atua a mea e uke ‵ki e uiga ki tena fesokotakiga mo tena Tamana. A mea katoa ne fai ne Iesu mō Ieova, e fakatalitonu mai i ei a te lasi o tena alofa mō Ieova.

² A Iesu ne vau ki te lalolagi nei ke fakailoa atu ki tino a mea e manako a Ieova ke iloa ne latou. (Ioa. 5:43; 12:13) Ne fakailoa atu ne ia ki ana soko a mea e uiga ki tena Tamana. (Ioa. 17:​6, 26) Ne akoako ne ia a tino kae fai a vavega fakaofoofogia i te igoa o Ieova. (Ioa. 10:25) Ne fakamolemole atu a Iesu ki a Ieova ke tausi ana soko “ona ko [Tena] igoa.” (Ioa. 17:11) E manino ‵lei me ne tāua ‵ki eiloa ki a Iesu a te igoa o te Atua i lō so se mea aka. Tela la, e mafai pefea o fai mai se tino i a ia se Kelisiano kae e se iloa io me e se fakaaoga ne ia te igoa o Ieova?

3. Ne a mea ka sau‵tala tatou ki ei i te mataupu tenei?

³ Ona ko tatou ne Kelisiano ‵tonu, e fakaakoao tatou ki a Iesu mai te fakaasi atu o te alofa mo te āva ki te igoa o Ieova. (1 Pe. 2:21) I te mataupu tenei, ka onoono tatou ki te pogai ne tuku ne Ieova tena igoa ki a latou kolā e folafola atu ne latou te “tala ‵lei o te Malo.” (Mata. 24:14) Ka sau‵tala foki tatou ki te tāua o te igoa o Ieova ki a tatou taki tokotasi.

“TINO MŌ TENA IGOA”

4. (a) Se a te fakatonuga ne tuku atu ne Iesu ki ana soko mai mua o toe foki a ia ki te lagi? (e) Se a te fesili ka sau‵tala tatou ki ei ona ko te fakatonuga tenā?

⁴ Mai mua malie o foki atu ki te lagi, ne fai atu a Iesu ki ana soko: “Kae ka maua ne koutou a te ‵mana māfai e oko atu te agaga tapu ki luga i a koutou, kae ka fai koutou mo molimau ki a au i Ielusalema, i Iuta kātoa mo Samalia, ke oko eiloa ki toe koga ‵mao i te lalolagi.” (Galu. 1:8) Tela la, ka talai atu te tala ‵lei ki fenua ‵mao atu mo Isalaelu. Fakamuli loa, ka maua ne tino i te lalolagi kātoa se avanoaga ke fai mo soko o Iesu. (Mata. 28:​19, 20) Kae ne fai mai a Iesu: “Ka fai koutou mo molimau ki a au.” E mata, e manakogina ke iloa ne soko ‵fou konei a te igoa o Ieova, io me ka molimau atu fua latou e uiga ki a Iesu? A mea ‵tupu kolā ne fakamatala mai i te Galuega mataupu 15 e fesoasoani mai ke tali aka ei te fesili tenā.

5. Ne fakaasi mai pefea ne te kau apositolo mo toeaina i Ielusalema me e ‵tau o iloa ne tino katoa te igoa o Ieova? (Onoono foki ki te ata.)

⁵ I te 49 T.A., ne maopoopo eiloa te kau apositolo mo toeaina i Ielusalema ke sau‵tala ki mea e manakogina ke fai ne tino mai Fenua Fakaa‵tea ke talia latou ke fai mo Kelisiano. I te fakaotiga o te sau‵talaga, ne fai mai ne te āfa taina o Iesu, ko Iakopo a te fakamatalaga tenei: “Ne fakamatala fakalikiliki mai ne [Petelu] a te taimi muamua ne saga atu ei a te Atua ki fenua fakaa‵tea ke aumai mai i a latou ne tino mō tena igoa.” I o oi te igoa ne fakasino ki ei a Iakopo? I te sikimaiga ne ia te igoa o te pelofeta ko Amosa, ne toe fai mai a ia: “Ko te mea ke ‵sala malosi atu ki a Ieova a tāgata kolā e ‵toe mai, fakatasi mo tino o atufenua katoa, ko tino kolā e fakaigoa ki toku igoa, ko muna a Ieova.” (Galu. 15:​14-18) Ka se tauloto fua a soko ‵fou konei e uiga ki a Ieova kae ko latou foki ka ‘fakaigoa ki tena igoa.’ Ko tena uiga, ka fakailoa atu ne latou ki nisi tino a te igoa o te Atua, kae ka iloa ne tino me ka fai latou mo sui o te igoa tenā.

6-7. (a) Kaia ne vau ei a Iesu ki te lalolagi? (e) Se a te suā pogai tāua ne vau ei a Iesu ki te lalolagi?

⁶ A te igoa o Iesu e fakauiga ki te “Ieova ko te Fakaolataga,” kae ne fakaaoga ne Ieova a Iesu ke faka‵sao a tino katoa kolā e fakatuanaki ki a ia. A Iesu ne vau ki te lalolagi ke tuku mai tena ola mō tino katoa. (Mata. 20:28) E auala i te togiola, ko mafai ei o fakamagalo a agasala a tino kae maua ne latou te ola se-gata-mai.—Ioa. 3:16.

⁷ Kae kaia ne manakogina ei ke faka‵sao a tino i te taimi muamua? Ona ko te mea telā ne tupu i te fatoaga o Etena. E pelā mo te mea ne fakamatala mai i te mataupu muamua, ne ‵teke atu eiloa a mātua o tino ko Atamu mo Eva ki a Ieova, tenā ne galo atu i ei te avanoaga ke ola ki te se-gata-mai. (Kene. 3:​6, 24) Kae ne vau a Iesu ki te lalolagi nei o fai se mea telā e sili atu i te tāua i lō te faka‵saoga fua o tino agasala. Ne fakamaseigina te igoa o Ieova. (Kene. 3:​4, 5) Tela la, a te faka‵saoga o tama‵liki a Atamu mo Eva e isi sena sokoga ki te kinauga sili—ko te faka‵maluga o te igoa o Ieova. Ona ko te mea ne sui ne Iesu a Ieova kae tauave ne ia Tena igoa, ne fai ne ia se tusaga tāua ‵ki i te faka‵maluga o te igoa o Ieova.

8. Ne a mea ne ‵tau o malamalama i ei a latou kolā ne tali‵tonu ki a Iesu?

⁸ A latou katoa kolā e fakatuanaki ki a Iesu, tino Iutaia mo tino mai Fenua Fakaa‵tea, e ‵tau o iloa ne latou te Tino e faka‵sao ne ia latou, ko Ieova te Atua, te Tamana o Iesu. (Ioa. 17:3) E se gata i ei, ka fakaigoa latou ki te igoa o Ieova. Ka manakogina foki ke malamalama latou i te tāua ke faka‵malu te igoa tenā. E faka‵na eiloa te lotou faka‵saoga ki te mea tenā. (Galu. 2:​21, 22) Tela la, ne ‵tau mo soko fakamaoni o Iesu o tauloto e uiga ki a Ieova mo Iesu. E se tioa eiloa o fakaoti ne Iesu tena ‵talo telā ne fakamau i te Ioane e 17 ki pati konei: “Ko oti ne fakailoa atu ne au tou igoa ki a latou kae ka toe fakailoa atu ne au, ko te mea ke maua ne latou te alofa telā ne alofa mai ei koe ki a au kae ko au ke ‵kau fakatasi foki mo koutou.”—Ioa. 17:26.

“KOUTOU KO AKU MOLIMAU”

9. E fakaasi atu pefea ne tatou a te tāua o te igoa o Ieova ki a tatou?

⁹ Tela la, e ‵tau mo soko ‵tonu katoa o Iesu o faka‵malu te igoa o Ieova. (Mata. 6:​9, 10) E ‵tau o fakamaluga ne latou te igoa o Ieova i mea katoa. E aofia i ei a olotou faifaiga. Kae e mafai pefea o fai ‵tou tusaga i te faka‵maluga o te igoa o Ieova, io me ko te faka‵maga o tena igoa mai fakamaseiga a Satani ki ei?

10. Se a te fono fakamasino fakatusa telā e fakamatala mai i te mataupu 42 ki te 44 o te tusi ko Isaia? (Isaia 43:9; 44:​7-9) (Onoono foki ki te ata.)

¹⁰ E faka‵mafa mai i te Isaia mataupu e 42 ki te 44 a te tāua ke faka‵malu ne tatou te igoa o Ieova. I mataupu konā, e fakamatala mai i ei se fono fakamasino fakatusa e uiga ki atua. E fesili atu a Ieova ki a latou katoa kolā e fai pelā me ne atua ke fakatalitonu atu me i a latou ne atua eiloa io me ikai. E fesili atu foki a ia me isi ne molimau ke aumai o fakamaoni aka ne latou a ‵losiga e uiga ki atua konei. Kae e seai se tino e mafai ne ia o fai te mea tenā!—Faitau te Isaia 43:9; 44:​7-9.

11. Se a te folafolaga a Ieova ki ana tino, telā ne fakamau i te Isaia 43:​10-12?

¹¹ Faitau te Isaia 43:​10-12. E fai mai a Ieova e uiga ki ana tino: “A koutou ko aku molimau, . . . Kae ko au ko te Atua.” E fesili atu a Ieova ki a latou ke tali te fesili tenei: “E a, e isi aka foki se isi Atua io me ko au fua?” (Isa. 44:8) E maua eiloa ne tatou te tauliaga ke tali te fesili tenā. Mai ‵tou pati mo faiga, e fakatalitonu atu ne tatou i a Ieova ko te Atua tonu fua e tokotasi. A tena igoa e maluga fakafia atu i nisi igoa aka. E fakatalitonu ne tatou i ‵tou olaga me e a‵lofa tonu tatou ki a Ieova kae fakamaoni ki a ia—faitalia me ne a fakamalosiga ma‵sei a Satani ki a tatou. I te auala tenei, ko maua ne tatou te avanoaga ke fesoasoani atu o faka‵malu Tena igoa.

12. Ne fakataunu pefea a te valoaga i te Isaia 40:​3, 5?

¹² Kafai e ‵lago atu tatou ki te igoa o Ieova, ko fakaakoako tatou ki a Iesu Keliso. Ne ‵valo mai a Isaia me ka isi se tino ka “fakaavanoa [io me, “fakatoka,” fml.] te auala o Ieova.” (Isa. 40:3) Ne fakataunu pefea te valoaga tenā? Ne fakatoka ne Ioane te Papatiso te auala mō Iesu, telā ne vau kae faipati foki i te igoa o Ieova. (Mata. 3:3; Male. 1:​2-4; Luka 3:​3-6) Ne fai mai foki te valoaga tenā: “A te ‵malu o Ieova ka fakaasi atu.” (Isa. 40:5) Ne tupu pefea te mea tenā? I te vauga a Iesu ki te lalolagi nei, ne sui mai ne ia a Ieova i se auala ‵lei katoatoa, e pelā eiloa me ko Ieova eiloa telā ne vau ki te lalolagi.—Ioa. 12:45.

13. E mafai pefea o fakaakoako tatou ki a Iesu?

¹³ E pelā mo Iesu, a tatou ko molimau a Ieova. E tauave ne tatou te igoa o Ieova kae fakailoa atu ki tino katoa e fetaui mo tatou a ana galuega fakaofoofogia. Kae ke fai pelā me se molimau ‵lei a Ieova, e ‵tau o fakailoa atu ne tatou ki tino a te tulaga tāua o Iesu i te faka‵maluga o te igoa o Ieova. (Galu. 1:8) A Iesu ko te ‵toe Molimau sili a Ieova, kae e tau‵tali tatou i tena fakaakoakoga. (Faka. 1:5) Kae e fakaasi atu pefea ne tatou me e tāua te igoa o Ieova ki a tatou?

NISI AUALA E TĀUA EI TE IGOA O IEOVA KI A TATOU

14. E pelā mo te mea ne fakamatala mai i te Salamo 105:​3, e pefea ou lagonaga e uiga ki te igoa o Ieova?

¹⁴ E fai‵pati fakamata‵mata tatou ki te igoa o Ieova. (Faitau te Salamo 105:3.) E fiafia malosi eiloa a Ieova māfai e fai‵pati fakamata‵mata tatou e uiga ki tena igoa. (Iele. 9:​23, 24; 1 Koli. 1:31; 2 Koli. 10:17) Ke “faipati fakamatamata eiloa i a Ieova.” E ‵kilo tatou ki te mea tenei me se tauliaga ke faka‵malu tena igoa kae ‵lago atu ki a ia. E se ‵tau o ‵mā tatou o fai atu ki tino e ga‵lue tasi tatou, tama‵liki i te akoga, tuakoi, mo nisi tino i a tatou ne Molimau a Ieova! E manako te Tiapolo ke taofi ne ia tatou mai te fai‵pati ki nisi tino e uiga ki te igoa o Ieova. (Iele. 11:21; Faka. 12:17) A te ‵tonuga loa, e manako a Satani mo ana pelofeta ‵loi ke fai a tino ke puli i a latou te igoa o Ieova. (Iele. 23:​26, 27) Kae ona ko te ‵tou a‵lofa ki te igoa o Ieova, e ma‵nako tatou o ‵viki atu ki a ia i “te aso kātoa.”—Sala. 5:11; 89:16.

15. Se a te uiga ke ka‵laga atu ki te igoa o Ieova?

¹⁵ E tumau tatou i te ka‵laga atu ki te igoa o Ieova. (Ioe. 2:32; Loma 10:​13, 14) A te ka‵laga atu ki te igoa o Ieova e aofia i ei a mea e uke atu i lō fua te iloa kae fakaaoga te igoa totino o te Atua. Ko kamata o iloa ne tatou te Atua e pelā me se Tino, tali‵tonu ki a ia, kae ‵sala atu ki tena fesoasoani mo tena takitakiga. (Sala. 20:7; 99:6; 116:4; 145:18) E folafola atu foki ne tatou tena igoa mo ana uiga ki nisi tino, fakamalosi latou ke sala‵mo kae ‵fuli olotou olaga ko te mea ke maua ne latou te taliaga a te Atua.—Isa. 12:4; Galu. 2:​21, 38.

16. E mafai pefea o fakatalitonu atu ne tatou i a Satani se tino loi?

¹⁶ E toka tatou ke logo‵mae mō te igoa o Ieova. (Iako. 5:​10, 11) Kafai e tumau tatou i te fakamaoni ki a Ieova i te taimi e logo‵mae ei tatou, ko fakamaoni atu ei ne tatou i a Satani se tino loi. I aso o Iopu, ne fai ne Satani te ‵losiga ‵se tenei ki a latou kolā e tavini atu ki a Ieova: “A te tagata ka tuku atu ne ia ana mea katoa ke tumau a ia i te ola.” (Iopu 2:4) Ne ‵losi mai Satani me ka tavini atu fua a tino ki a Ieova i taimi ‵lei kae kafai ko fe‵paki mo mea faiga‵ta, ka tiakina ne latou a Ieova. Ne fakatalitonu atu ne Iopu a te ‵se o te ‵losiga tenā. E maua foki ne tatou a te tauliaga ke fakatalitonu atu me faitalia me ne a mea e fai mai ne Satani ki a tatou, ka se fulitua eiloa tatou ki a Ieova. E mafai eiloa o tali‵tonu katoatoa tatou me ka tausi faeloa tatou ne Ieova ona ko tena igoa.—Ioa. 17:11.

17. Se a te suā auala e mafai ei ne tatou o faka‵malu te igoa o Ieova telā ne fakamatala mai i te 1 Petelu 2:12?

¹⁷ E fakaasi atu ne tatou te āva ki te igoa o Ieova. (Faata. 30:9; Iele. 7:​8-11) Ona ko te mea e sui ne tatou a Ieova kae tauave tena igoa, e mafai eiloa o ‵viki atu tatou ki tena igoa io me fakamasiasi ne tatou. (Faitau te 1 Petelu 2:12.) Tela la, e ma‵nako tatou o fai a mea katoa e mafai ne tatou o fai ke ‵viki atu ki a Ieova e auala i ‵tou pati mo ‵tou amioga. I te auala tenei, ka faka‵malu ei ne tatou a tena igoa ki te ‵toe mea e mafai ne tatou o fai faitalia ‵tou tulaga sē ‵lei katoatoa.

18. Se a te suā auala e mafai o fakatalitonu atu ne tatou me e tāua te igoa o Ieova ki a tatou? (Onoono foki ki te fakamatalaga mai lalo.)

¹⁸ E faka‵malu ne tatou te igoa o Ieova faitalia a mafaufauga o tino ki a tatou. (Sala. 138:2) Kaia e tāua ‵ki ei te mea tenei? Me kafai e fai ne tatou a mea kolā e fakafiafia atu ki a Ieova, kāti ka se fia‵fia a tino ki ei kae e mafai o fakamasei ne latou a tatou.a Ne toka eiloa a Iesu o mate i se mate fakamasiasi e pelā me se pagota solitulafono ko te mea ke faka‵malu ei te igoa o Ieova. Ne ‘seki saga atu a ia ki tena masiasi’ me ne seki manavase malosi a ia ki mafaufauga o tino e uiga ki a ia. (Epe. 12:​2-4) Ne saga tonu atu fua a ia o fai te loto o te Atua.—Mata. 26:39.

19. E pefea ou lagonaga e uiga ki te igoa o Ieova, kae kaia?

¹⁹ E fakamata‵mata tatou i te igoa o Ieova kae se tauliaga ke taku tatou e pelā me ne Molimau a Ieova. Ona ko te mea tenā, ka toka eiloa tatou o kufaki i so se ‵tekemaiga e fe‵paki mo tatou. E tāua fakafia atu te igoa o Ieova ki a tatou i lō a mafaufauga o tino e uiga ki a tatou. Tela la, ke na fakaiku ke tumau i te ‵viki faeloa ki te igoa o Ieova faitalia a taumafaiga a Satani ke fakavāivāi mai ki a tatou. I te auala tenei, ka fakatalitonu atu ne tatou me i te igoa o Ieova ko te ‵toe mea tāua ki a tatou, e pelā mo tena tāua ki a Iesu Keliso.