E Mata, a te Mativa se Fakailoga o te sē Fiafia o te Atua?
NE FAI atu te Atua ki te kau Isalaelu mua: “E seai eiloa se tino i a koutou e mativa.” Ne fai penei ona ko te mea ne aofia i te Tulafono telā ne tuku atu ne ia ki a latou, a fakatonuga e uiga ki auala e tausi ei a tino ma‵tiva kae ke oko foki loa ki te fakamagaloga o kaitalafu. (Teutelonome 15:1-4, 7-10) Tela la, e se ‵tau o isi ne tino ma‵tiva i tino Isalaelu, me ne tauto atu a Ieova me ka fakamanuia ne ia latou. Kae ne fakalagolago eiloa te fakamanuiaga tenā ki te fakalogo ki te Tulafono, telā ne fakata‵mala te kau Isalaelu o faka‵logo ki ei.
Kae e se fakauiga i ei, me i tino kolā e se uke olotou mea faka-te-foitino e se fiafia ki ei te Atua, kae ko tino kolā e uke atu olotou mea e fakamanuia ne te Atua. E tokouke a tavini fakamaoni a te Atua e ma‵tiva i te feitu faka-te-foitino. A te pelofeta ko Amosa se tausi mamoe, mo se tino tausi fatoaga loto maulalo. (Amosa 1:1; 7:14) I aso o te pelofeta ko Elia, i te taimi ne oko atu ei te oge meakai ki luga i Isalaelu, ne ‵tau o fakalagolago a Elia ki te uiga talimalo o se fafine mativa ko mate tena avaga, telā ne tuku fakavavega atu faeloa a falaoa mo sinu i te taimi o te oge. Ne seki maumea a Elia mo te fafine ko mate tena avaga; ne tuku atu fua ne Ieova a mea e lava ke tausi ei a lāua.—1 Tupu 17:8-16.
E mafai eiloa o ma‵tiva a tino ona ko fakalavelave ‵tupu fakafuasei. A fakalavelave ‵tupu fakafuasei mo masaki e mafai o fai ei se tino ke se galue mō se vaitaimi io me ko se toe galue eiloa. Kae e mafai ne te mate o tiakina mai a tama‵liki kolā e seai ne mātua mo fafine ko seai ne avaga. Ke oko foki eiloa ki fakanofonofoga sē ‵lei penā e sē se fakamaoniga o te sē fiafia o te Atua. A te tala o Naomi mo Luta se fakaakoakoga fakamalosi loto e uiga ki te alofa atafai o Ieova ki tino kolā e ma‵tiva. E tiga eiloa ne ma‵tiva malosi a Naomi mo Luta ona ko te ‵mate atu o lā avaga, ne fakamanuia lāua ne Ieova te Atua kae ne fai foki ne ia a fakatokaga ke tausi atu ki lā manakoga.—Luta 1:1-6; 2:2-12; 4:13-17.
E manino ‵lei, me i te mativa e sē se fakamaoniga o te sē fiafia o te Atua. A latou kolā e fakamaoni ki a Ieova te Atua e mafai o maua ne latou a te loto talitonu ki pati a te tupu ko Tavita: “Au nei ko toeaina, ko leva eiloa toku olaga, kae seki iloa eiloa ne au se tino amio ‵lei ke tiakina ne te Aliki, io me ko ana tama‵liki foki ke akai meakai.”—Salamo 37:25.
[Ata i te itulau e 8]
E tiga eiloa ne ma‵tiva malosi, ne fakamanuia ne te Atua a Naomi mo Luta kae tausi atu foki mo te alofa ki a lāua