Ke mo a ma Fakatalave Koe —Mai te Fakafesagai Atu ki Tou Tulaga Fakalavelave
1. Kaia e fakatalave ei a nisi tino ke ofo atu se akoga faka-te-Tusi Tapu?
1 E fakatalave a nisi tino ke ofo atu se akoga faka-te-Tusi Tapu ona ko te lotou tulaga fakalavelave. A te tausi atu ki se akoga faka-te-Tusi Tapu e manakogina i ei a taimi e uke. E manakogina a taimi ke fakatoka kae fai te akoga, mo te fesoasoani atu ki te tino akoga ke manumalo i ana fakalavelave totino. Ne fai mai te apositolo ko Paulo me ne tuku atu tena ola kātoa ke fesoasoani ki tino Tesalonia ke iloa ne latou a Ieova. (1 Tesa. 2:7, 8) E mafai pefea o fai ne tatou a akoga faka-te-Tusi Tapu faitalia ‵tou tulaga fakalavelave?
2. E pokotia pefea a te auala e fakaaoga ei ‵tou taimi i te ‵tou a‵lofa ki a Ieova?
2 E Manakogina a Taimi e Uke i te Tavini Atu ki a Ieova: Tenei te munatonu faigofie, e manakogina a taimi e uke ke tavini atu ki a Ieova. E pelā mo te fakaaogaga faeloa ne tatou a taimi ke ‵kau atu ki fakatasiga, te galuega talai, ke faitau te Tusi Tapu, mo te ‵talo. Ka fakaavanoa faeloa mo te fiafia ne se tino avaga a taimi ke fakamāumāu fakatasi ne ia mo tena avaga. E pefea te lasi atu o te ‵tou fia‵fia ke “fakaaoga” faka‵lei ‵tou taimi ke tapuaki atu ki a Ieova ona ko te mea e a‵lofa tatou ki a ia. (Efe. 5:15-17; 1 Ioa. 5:3) E ‵tusa mo pati a Iesu, a te galuega ko te faiga o akoga faka-te-Tusi Tapu se vaega tāua o te ‵tou taviniga ki a Ieova. (Mata. 28:19, 20) A te mafaufau ‵loto ki te mea tenei ka fesoasoani mai ke mo a ma taofi aka tatou mai i te taliaga o te tiute ke fai se akoga faka-te-Tusi Tapu.
3. E mafai pefea o tausi atu tatou ki se akoga faka-te-Tusi Tapu faitalia te fakalavelave mai o nisi fakanofonofoga ki ‵tou fakatokaga mō te galuega talai?
3 Kae e a māfai ko fakalavelavegina tatou ne galuega ‵togi, masaki tumau, io me ko tōfiga i te fakapotopotoga? E fai ne nisi tino talai a akoga faka-te-Tusi Tapu i te telefoni io me e auala i te itaneti. A latou kolā e fakalavelavegina ne masaki tumau, ne fakatoka olotou akoga faka-te-Tusi Tapu ke olo atu ki olotou fale o fai olotou akoga i ei. Ne fakatoka ne nisi tino se tino talai fakamaoni ke fesoasoani atu ki te faiga o te akoga māfai ko se avanoa latou.
4. Ne a fakamanuiaga e maua mai i te kau atu ki te galuega ko te faiga o akoga faka-te-Tusi Tapu?
4 Ne maua eiloa ne Paulo a te fiafia lasi mai i te fakaaogaga o ana taimi mo te malosi ke fesoasoani atu ki nisi tino ke tauloto ki te munatonu. (Galu. 20:35) I te taimi ne mafaufau ei a ia ki fua o ana galuega ‵mafa i Tesalonia, ne fakaosofia aka ei a ia ke fakafetai atu ki a Ieova. (1 Tesa. 1:2) E mafai o momea aka te ‵tou fia‵fia mo te lotomalie i te galuega talai māfai e se talia ne tatou a ‵tou tulaga fakalavelave ke taofi aka ei tatou mai i te faiga o akoga faka-te-Tusi Tapu.