Fesili Mai te Kau Fai‵tau
Se a te akoakoga e tuku mai i te Faataoto 24:27, Tusi Paia, Samoa?
I te tukuatuga o pati polopoloki ki se tamataene, e fai mai te tino ne tusi ne ia te Faataoto, penei: “Fakatoka au galuega mai tua o tou fale, kae ke toka foki au fatoaga. Kafai e oti, ko ‵tau ei o ati aka ne koe tou kāiga.” Se a te manatu ne taku mai i te faataoto fakaosofia tenei ne te Atua? E ‵tau mo te tagata o fakatoka faka‵lei muamua a koi tuai o avaga a ia kae kamata tena kāiga, kae ke iloa foki ne ia a tiute kolā e aofia i se vaegā feagaiga penā.
I aso mua, ne fakauiga sāle i nisi taimi a te fuaiupu tenei me i te tagata avaga mo te tamana e se ‵tau fua o tausi atu ki tena galuega ‵togi kae e ‵tau foki o galue ke ati aka, io me fakamalosi aka tena kāiga, e auala i te akoako atu o mea faka-te-agaga ki a latou. E tiga eiloa e tonu kae fetaui ‵lei foki mo te Tusi Tapu a te manatu tenā, e se foliga mai e pelā me ko te ‵toe manatu tāua i te fuaiupu tenei. Kaia? Mafaufau ki pogai konei e lua.
Muamua la, e se fakasino atu a te fuaiupu tenei ki te atiakaga telā e fakauiga ki te fakamalosiakaga o se kāiga. I lō te fai penā, e fakasino atu a te manatu ki te faitega tonu eiloa o se fale. E mafai o fakaaoga a te pati telā ne ‵fuli ki te “ati aka”, i se auala fakatusa, ki te faitega, io me ko te atiakaga, o se kāiga—telā ko te avaga mo te faiga o tama‵liki.
A ko te lua, e faka‵mafa mai i te fuaiupu tenei a te faiga o mea i te auala ‵tau, e pelā me e fai mai, “Fai muamua te mea tenei; ka oti, ko fai ei te mea tenā.” Tela la, e mata, e mafai o fakauiga a pati i te faataoto me e ‵tau o fakamuamua a tiute i galuega ‵togi i lō tiute faka-te-agaga? Ikai!
I taimi o te Tusi Tapu, kafai ne manako se tagata o ‘faite tena fale,” io me e ati aka se kāiga mai i te taumafai ke avaga a ia, e ‵tau o fesili ifo ki a ia eiloa, ‘E mata, ko toka au ke tausi kae ‵lago atu ki se avaga fafine mo so se tamaliki telā e fanau mai?’ A koi tuai o kamata se kāiga, ko ‵tau o isi sena galuega, ko te tausi atu ki te fatoaga. Tela la, ne ‵fuli mai i te Tusi Tapu Tuvalu a te uiga tonu o te fuaiupu tenei: “Sa faite muamua tou fale mo tou kāiga, vagana ke toka mua au fatoaga kae ko talitonu foki koe me ko mafai o lava ne mea e maua ne koe mo tausi te olaga.” E mata, e aoga foki te akoakoga fakavae tenei i aso nei?
Ao. A te tagata telā e manako ke avaga a ia e ‵tau o fakatoka faka‵lei mō te tiute tenā. Kafai e malosi ‵lei a ia, ka galue eiloa a ia. E tonu, a galuega ‵mafa a te tagata i te tausiga o tena kāiga e se ‵tau fua o aofia i ei a te tausiga i te feitu faka-te-foitino. E fai mai te Muna a te Atua me i te tagata telā e se tausi atu ki manakoga faka-te-foitino, lagonaga, mo manakoga faka-te-agaga o tena kāiga e sili atu tena masei i lō te tino sē Kelisiano! (1 Timoteo 5:8) Tela la, i te fakatokaga mō te fakaipoipoga mo te olaga faka-te-kāiga, e ‵tau mo se tamataene o ‵sili ifo ne ia a vaegā fesili penei: ‘E mata, e toka au o tausi atu ki se kāiga i te feitu faka-te-foitino? E mata, e toka au ke fai mo fai se ulu o se kāiga i te feitu faka-te-agaga? E mata, ka fakataunu ne au a te tiute ke fai faeloa ne au se akoga faka-te-Tusi Tapu mo toku avaga mo aku tama‵liki?’ E faka‵mafa mai eiloa ne te Muna a te Atua a te tāua o tiute konā.—Teutelonome 6:6-8; Efeso 6:4.
Tela la, a te tamataene telā e ‵sala atu ki se avaga e ‵tau o mafaufau faka‵lei muamua ki te akoakoga fakavae i te Faataoto 24:27, Tusi Paia, Samoa. E penā foki te tamafine, e ‵tau o ‵sili ifo ki a ia eiloa me ko toka a ia mō tiute e pelā me se avaga mo se mātua. E mafai o ‵sili ifo ne se tauavaga koi fo‵liki a fesili tai ‵pau penā māfai e mafau‵fau lāua ki te putiakaga o tama‵liki. (Luka 14:28) A te ola e ‵tusa mo takitakiga fakaosofia penā e mafai o fesoasoani atu ki tino o te Atua ke ‵kalo keatea mai i mea faka‵mae loto kae ke maua se olaga faka-te-kāiga fiafia.
[Te Manatu Tāua i te itulau e 31]
Ne a fesili e uiga ki te fakaipoipoga e ‵tau o ‵sili ifo ne se tamataene ki a ia eiloa?