MEA E MAFAI O FAI ONA KO TE ˋTOGI ˋMAFA O MEA

Ke Lotomalie ki au Mea ko Maua

A tino kolā e lotomaˋlie ki olotou mea ko maua e fiaˋfia i olotou olaga. Kae kafai ko maˋfuli olotou fakanofonofoga, e fai ne latou a fakamaˋfuliga ko te mea ke mafai o ola latou e ˋtusa mo olotou mea ko maua.

POGAI E TĀUA EI

Ne fai mai se fafine poto i mea tau te mafaufau ko Jessica Koehler, me i tino kolā e lotomaˋlie ki olotou mea ko maua e sili atu te ˋlei o te kilokiloga e maua ne latou ki te olaga i lō nisi tino. Ne iloa foki ne tou fafine me e se lasi te loto masei i a latou. Tela la, e se ˋpoi tatou me i tino kolā e lotomaˋlie ki olotou mea ko maua e sili atu te lotou fiaˋfia kae e se manavase malosi foki. A te ˋtonuga loa, a toe tino fiaˋfia i te olaga nei ko latou kolā e se uke olotou tupe. Ko oti ne fakamaoni aka a te ˋtonu o te mea tenā ne tino kolā e tāua atu ki a latou a mea kolā e se mafai o ˋtogi ki tupe, e pelā mo te fiafia e maua mai te uke o taimi e fakamāumāu mo kāiga mo taugasoa.

“Kafai ko maua a ˋtou meakai mo ˋtou gatu, ka lotomaˋlie eiloa tatou i ei.”—1 Timoteo 6:8.

MEA E MAFAI NE KOE O FAI

Sa fakapauˋpau ki nisi tino. Kafai e fakapauˋpau ne koe tou olaga faigofie ki te olaga maumea o se tino, ka mafai eiloa o se lotomalie koe ki au mea ko maua, io me kaisano. E se gata i ei, e mafai o se ˋtonu a mea kolā ne fakapauˋpau ne koe. A nisi tino kolā e uke ˋki olotou kope e mafai o ˋlasi ˋki olotou kaitalafu. Ne fai mai a Nicole, telā e nofo i Senegal, penei: “E se manakogina ke uke aku mea ko te mea ke fiafia au. Kafai e lotomalie au ki aku mea ko maua, e fiafia eiloa au faitalia me uke atu a mea e maua ne nisi tino.”

ˋTofo te mea tenei: Sa onoono ki fakaˋpulaga mo mea i te itaneti kolā e fakaasi mai ei te uke o tupe mo te olaga ˋtogi ˋmafa telā e maua ne nisi tino.

“Faitalia te uke o mea a se tino kae e se maua mai i ei ne ia a te ola.”—Luka 12:15.

Ke loto fakafetai. A tino loto fakafetai e sili atu te lotou lotomaˋlie ki mea ko maua ne latou kae e se mafauˋfau me e ˋtau o maua ne latou a mea e uke. Ne fai mai a Roberton, mai Haiti: “E fakaaoga ne au a taimi ke mafaufau ki faifaiga aˋlofa ne fakaasi mai ne nisi tino ki a au mo toku kāiga. Ko fakaasi atu ei ne au ki tino konā a te lasi o toku loto fakafetai mō mea ne fai ne latou. E akoako foki ne au taku tama tagata telā ko valu ana tausaga ke iloa ne ia o fai atu fakafetai māfai ko maua ne ia se mea.”

ˋTofo te mea tenei: Tusi ki lalo se mea telā ne “loto fakafetai” koe ki ei. Kāti ko te malosi ˋlei o koe, se kāiga pele, taugasoa ˋtonu, io me ko te gali o te la telā ko tō ki lalo.

“Te tino e loto fiafia e tumau eiloa i te fai ˋkaiga.”—Faataoto 15:15.

I nisi taimi, e se faigofie ke lotomaˋlie tatou ki mea ko maua. Kae e aoga ˋki eiloa a taumafaiga e fai ne tatou! Kafai e filifili ne tatou ke lotomaˋlie ki mea ko maua, ko tena uiga ko filifili ne tatou a te fiafia—se suā uiga telā e se mafai o ˋtogi ki tupe.