E Mata, e Mafai o Maua te Lotomalie?

“A te lotomalie e fai ne ia a tino ma‵tiva ke mau‵mea; a te sē lotomalie e fai ne ia a tino mau‵mea ke ma‵tiva.”​—Benjamin Franklin.

E ‵TUSA mo pati ‵poto konā, ne iloa aka ne tino e tokouke me e se mafai o ‵togi a te lotomalie e pelā mo nisi mea ‵togi. E se tioa eiloa me i te lotomalie se lagonaga fiafia telā e foliga mai me e faigata o fakamatala i se lalolagi telā e fakamalosi aka i ei se manakoga mō kope e uke, fakamoemoega ma‵luga, io me ko te vaegā olaga o nisi tino! E mata, ko oti ne pokotia koe i se mea e tasi mai i mea konei?

• E masani o tuku atu ne tino fakasalalau a faka‵pulaga e uke me e mafai o maua a te lotomalie mai i te ‵togiga o mea e uke.

• A te fakatau‵fai i galuega ‵togi io me ko akoga e fakamalosi atu ke mafaufau me i a koe e tāua māfai e fai fua ne koe a mea katoa kolā e mafaufau koe me e fai ne nisi tino.

• E se lava a te amanaia o tino ki mea e fai ne koe mō latou.

• E fai ne taugasoa ke fiafai koe ki mea ko maua ne latou.

• E se maua a tali ki au fesili tāua e uiga ki te olaga.

E mata, e mafai eiloa o maua a te lotomalie māfai e fakafesagai atu ki vaegā tulaga faiga‵ta penā? Ne fakasino atu a te apositolo ko Paulo ki te “auala ki te lotomalie.” I nisi taimi, ne ola a ia i se olaga maumea kae i nisi taimi, ko mu‵tana fua ana mea. Ne fakatāua a ia ne ana taugasoa kae ne fakatauemu atu a nisi tino ki a ia. Kae ne fai mai a ia me ko oti a ia “ne akoako . . . ke toka au mo se mea o mea konei i so se koga.”​—Filipi 4:11, 12.

A te lotomalie se mea ‵funa ki tino kolā e seki taumafai ke maua ne latou, kae e pelā mo pati a Paulo, e mafai o fakamasani atu ki ei. Ko ‵kami atu nei ne matou a koe ke mafaufau ki auala e lima e uiga ki te lotomalie kolā e maua i te Muna a te Atua, ko te Tusi Tapu.