Se Tusi Mai te Potukau Pule

“Ko ‵tau nei koutou o fai mo fai ne faiakoga.” (Epe. 5:12) Mafaufau ki te mea tenā! A Ieova—te ‵toe Faiakoga sili i te ‵lei i te iunivesi—e ‵kami ne ia tatou ke akoako a nisi tino e uiga ki a ia! A so se tiute ke akoako atu te munatonu e uiga ki a Ieova—i te kāiga, i te fakapotopotoga, io me i te galuega talai—se tauliaga tāua kae se tiute ‵mafa foki. E mafai pefea o manuia tatou?

E maua te tali i pati a te apositolo ko Paulo kolā ne tusi ki a Timoteo: “Tumau i te faitau atu i mua o tino katoa, fakamalosi kae akoako atu latou.” Ne toe fakaopoopo atu a Paulo: “Me kafai e fai ne koe a mea konei ka fakasao ne koe a koe eiloa mo latou kolā e faka‵logo ki a koe.” (1 Timo. 4:13, 16) E isi se fekau faka‵sao tino e ‵tau o folafola atu ne koe. Tela la, se mea tāua eiloa ke tumau koe i te faitau mo te akoako atu ko te mea ke gasolo o atamai koe i ei. Ne fakatoka te polosiua tenei ke fesoasoani atu ki a koe ke fai penā. Mafaufau ki nai mea e maua i ei.

Se tusi faitau i itulau takitasi telā e fai pelā me se fakatakitakiga mai te Tusi Tapu kae isi sena sokoga ki te manatu io me se fakaakoakoga o te manatu telā e ‵tau o fakagalue aka

A Ieova ko te “Faiakoga Tafasili i te Maluga.” (Isa. 30:20) E ui eiloa ka fesoasoani atu te polosiua tenei ke fai ke atamai malosi koe i te faitau mo te akoako atu, ke mo a ma puli me i te Mafuaga o te ‵tou fekau ko Ieova kae e aumai ne ia a tino ki a ia. (Ioane 6:44) Tela la, ‵talo faeloa ke maua te agaga tapu. Fakaaoga faeloa te Muna a te Atua. Saga tonu ki a Ieova, kae e se ki a koe eiloa. Taumafai o ati aka i loto o au tino fakalogo‵logo se alofa telā e ‵poko ki a ia.

Ko oti ne ‵kami koe ke akoako atu te ‵toe fekau tāua telā ne tuku mai ki tino. E tali‵tonu matou me kafai e fakalagolago koe ki “te malosi telā e tuku atu ne te Atua,” ka manuia eiloa koe. —1 Pe. 4:11.

Otou taina faiakoga,

Potukau Pule o Molimau a Ieova