Ke ‵Fuli Au Faifaiga Ona ko Pati a Iesu
“A te tino telā ne uga mai ne te Atua, e taku mai ne ia muna a te Atua.”—IOANE 3:34.
1, 2. Se a te mea ne fakatusa ki ei a pati a Iesu i te Lauga i luga i te mauga, kae kaia e mafai ei o fai atu tatou me ne fakavae ki “muna a te Atua”?
ATE taemani lasi e tasi ne faite i aso nei ko te Star of Africa telā e 530 carat tena ‵mafa. Se fatu tāua ‵ki eiloa! Kae e sili atu te tāua o fatu tāua faka-te-agaga kolā e maua i akoakoga a Iesu i tena Lauga i luga i te mauga. E se ‵tau o ‵poi tatou i ei me ne māfua mai eiloa i a Ieova a akoakoga a Keliso! E uiga ki a lesu, ne fai te Tusi Tapu: “A te tino telā ne uga mai ne te Atua, e taku mai ne ia muna a te Atua.”—Ioane 3:34-36.
2 E tiga eiloa ne seki kātoa te afa itula te faiga o te Lauga i luga i te mauga, ne aofia i ei a manatu e 21 kolā ne siki mai i tusi e valu mai i te Tusi Tapu faka-Epelu. Tela la, ne fakavae katoatoa eiloa ki “muna a te Atua.” Ke onoono nei tatou ki auala e mafai ei ne tatou o fakagalue aka a muna tāua kolā e maua i te lauga takutakua a te Tama fakapelepele a te Atua.
“Fano Mua Koe o Faka‵lei mo te Tino Tenā”
3. I te otiga ne fakailoa atu ne ia ki ana soko a te fakamataku o te ita fakamoemoe, ne a pati polopoloki ne fai atu ne Iesu?
3 E pelā me ne Kelisiano, e fia‵fia kae filemu tatou me maua ne tatou te agaga tapu o te Atua, kae e aofia i ana fuataga te fiafia mo te filemu. (Kalatia 5:22, 23) Ne seki manako a Iesu ke galo i ana soko a te filemu mo te fiafia, telā ne fakailoa atu ei ne ia ki a latou a te fakamataku o te ita fakamoemoe, telā e mafai o iku atu ki te mate. (Faitau te Mataio 5:21, 22.) Ne toe fai atu a ia: “Kafai foki e avatu ne koe tau taulaga ki te fata faitaulaga, kae masaua ne koe me isi se mea e ita ei a se tino ki a koe, tuku la tau taulaga i tafa o te fata faitaulaga, kae fano mua koe o faka‵lei mo te tino tenā, fakamuli ko vau ei koe o tuku atu tau taulaga ki te Atua.”—Mataio 5:23, 24.
4, 5. (a) Se a te “meaalofa” ne fakasino atu a Iesu ki ei i ana pati i te Mataio 5:23, 24? (e) E pefea te tāua ke faka‵lei aka tou va mo tou taina telā e ita ki a koe?
4 A te “taulaga” telā ne faipati ki ei a Iesu ko so se taulaga telā ne ofo atu i te faletapu i Ielusalema. E pelā me se fakaakoakoga, e tāua ‵ki a taulaga manu i te taimi tenā me ne fai pelā me se vaega o te tapuakiga e fai ne ana tino ki a Ieova. Kae ne faka‵mafa mai ne Iesu se mea telā e sili atu tena tāua—ko te faka‵leiga o tou va mo se tino telā e se fiafia ki a koe a koituai o ofo atu tau taulaga ki te Atua.
5 Ke “faka‵lei mo te tino tenā” e fakauiga loa ki te ‘faka‵leiga o te va o koe mo te suā tino.’ Se a la te mea e tauloto ne tatou mai pati konei a Iesu? E mautinoa eiloa me e pokotia i ei a ‵tou faifaiga ki nisi tino e pelā foki mo ‵tou fesokotakiga mo Ieova. (1 Ioane 4:20) E tonu, e seai se aoga o taulaga e ofo atu ki te Atua i aso mua māfai e se ‵lei a faifaiga a te tino i a ia te taulaga e fai ki nisi tino.—Faitau te Mika 6:6-8.
Fakaasi Atu te Loto Maulalo
6, 7. Kaia e manakogina ei te loto maulalo i ‵tou taumafaiga ke ‵toe fakalei ‵tou fesokotakiga mo te taina telā e ita ki a koe?
6 A te faka‵leiga o tou va mo se taina telā e se fiafia ki a koe ka tofotofogina i ei tou loto maulalo. A tino loto maulalo e se kinau io me fakatau‵fai mo taina tali‵tonu e uiga ki olotou saolotoga. E fakamafua aka fua i ei se tulaga fakamataku—telā e tai ‵pau mo te mea telā ne tupu ki Kelisiano i Kolinito i aso mua. E uiga ki te tulaga tenā, ne fai atu ne te apositolo ko Paulo te manatu tāua tenei: “Se mea tonu eiloa me i otou fakakinauga ne fakakinauga faka te tulafono, e fakaasi mai ei i a koutou e se ne Kelisiano ko katoatoa. E a, e masei manafai e fakapuapuagatia koutou? E a, e masei foki manafai e kaisoagina otou mea?”—1 Kolinito 6:7.
7 E seki fai mai a Iesu ke olo atu tatou ki ‵tou taina o taku atu i a ia e ‵se kae e tonu tatou. A te pogai tāua ko te faiga ke maua se va filemu. Ke maua se va filemu, e ‵tau eiloa o fakaasi atu a ‵tou lagonaga ‵tonu. E ‵tau o masaua ne tatou me e logo‵mae foki te suā tino. Kae kafai ne fai ne tatou se mea ‵se, e ‵tau eiloa mō tatou o fakatoese atu mo te loto maulalo.
‘Kafai ko Tou Mata Fakaatamai e Fai ne ia ke Agasala Koe’’
8. Ke fakamatala fakatoetoe mai a pati a Iesu i te Mataio 5:29, 30.
8 I tena Lauga i luga i te mauga, ne fai atu ne Iesu a pati polopoloki e uiga ki mea tau amioga. E iloa ne ia me e mafai o fakamataku te ‵tou tulaga se ‵lei katoatoa ki a tatou. Tela la, ne fai mai a Iesu: “Kafai ko tou mata fakaatamai e fai ne ia ke agasala koe, tapale kae ‵pei keatea. Me e sili atu eiloa manafai e galo se vaega o tou foitino i lō te ‵pei o tou foitino katoa ki Kēna. Kafai ko tou lima fakaatamai e fai ne ia koe ke agasala, ‵kati kae ‵pei keatea. Me sili atu eiloa manafai e galo se vaega o tou foitino i lō te ‵pei o tou foitino kātoa ki Kēna.”—Mataio 5:29, 30.
9. E mafai pefea o ‘fakaagasala’ tatou ne ‵tou “mata” io me ko ‵tou “lima”?
9 A te “mata” telā ne faipati ki ei a Iesu e fakatusa ki te malosi o te saga tonu atu ki se mea, kae e fakasino atu a te “lima” ki mea e fai ne tatou ki ‵tou lima. Kafai e se fakaeteete tatou, e mafai ne vaega konei o ‵tou foitino o fai ei ke “agasala” tatou kae ke se ‘sa‵sale fakatasi tatou mo te Atua.’ (Kenese 5:22; 6:9) Kafai e fakaosoosogina tatou ke mo a e faka‵logo ki a Ieova, e manakogina i ei ke taumafai malosi tatou o tapale kae ‵pei keatea ‵tou mata io me ‵kati keatea ‵tou lima i se auala fakatusa.
10, 11. Se a te mea e mafai o fesoasoani mai ke ‵kalo keatea tatou mai faifaiga fakatauavaga matagā?
10 E mafai pefea o faka‵kivi ‵tou mata mai te onoono atu ki faifaiga matagā? “Ko oti ne fai ne au se tautoga ‵malu,” ko pati a Iopu, se tagata telā e mataku ki te Atua, “ke mo a e kilo oku mata ki se fafine mo toku loto lailai.” (Iopu 31:1) A Iopu se tagata avaga telā ne taumafai malosi ke mo a e soli ne ia a tulafono a te Atua e uiga ki mea tau amioga. E ‵tau foki o penā a ‵tou faifaiga faitalia me ko oti ne a‵vaga tatou io me nofo taka. Ke ‵kalo kea‵tea mai faifaiga fakatauavaga sē ‵tau, e ‵tau o takitaki tatou ne te agaga tapu o te Atua, telā e mafai ei o maua ne latou kolā e a‵lofa ki te Atua a te loto pulea.—Kalatia 5:22-25.
11 Ke ‵kalo keatea mai faifaiga fakatauavaga matagā, se mea ‵lei ke fesili ifo tatou penei, ‘E mata, e talia ne au ke kilo atu oku mata ki fakamalosiga fakatauavaga matagā i tusi, televise, io me ko te Itaneti?’ Ke masaua foki ne tatou a pati konei a te soko ko Iakopo: “Ka ko te tino e fakaosoosogina manafai ko to keatea a ia, kae faka‵segina ne ona manakoga ma‵sei. Tela la, kafai ko faitama te manako masei, ko fanau mai ei te agasala; kae kafai ko matua te agasala, ko fanau mai ei te mate.” (Iakopo 1:14, 15) E tonu, kafai e isi se tino tukugina atu ki te Atua “e onoono atu” ki se tagata io me se fafine mo ana manakoga ma‵sei, e ‵tau o taumafai malosi a ia o fai a ‵fuliga e pelā eiloa mo te tino telā e tapale tena mata kae ‵pei keatea.—Faitau te Mataio 5:27, 28.
12. Ne a pati polopoloki a Paulo e mafai o fesoasoani mai ke ‵teke atu tatou ki manakoga ma‵sei?
12 Ona ko te mea e mafai o ofa ne tatou se tulafono a Ieova i mea tau amioga mai te fakaaogaga o ‵tou lima, e ‵tau mo tatou o taumafai malosi ke tumau i te ‵ma i mea tau amioga. Tela la, e ‵tau eiloa o tau‵tali tatou i pati polopoloki a Paulo: “Fakagata a uiga faka te lalolagi i loto i a koutou, e penei mo mea konei: te fina lalolagi, ko te amio se ‵ma, ko manakoga ma‵sei, ko te kaimanako, me i te kaimanako ko te ifo ki tupua tenā.” (Kolose 3:5) A te pati “fakagata” e faka‵mafa mai i ei a taumafaiga e uke kolā e manakogina ke taua atu ki manakoga ma‵sei i te feitu faka-te-foitino.
13, 14. Kaia e tāua ei ke ‵kalo keatea tatou mai mafaufauga mo faifaiga ma‵sei?
13 Ko te mea ke ola se tino, kāti ka talia ne ia ke ‵kati keatea tena lima. A te ‘tapale keatea’ o te mata mo te lima i se auala fakatusa e tāua ‵ki ko te mea ke ‵kalo keatea tatou mai mafaufauga mo faifaiga ma‵sei kolā e fai ei ke sē ‵lei ‵tou tulaga i te feitu faka-te-agaga. A te tausiga o tatou ke mā i te feitu faka-te-mafaufau, i mea ‵tau amioga mo te feitu faka-te-agaga ko te auala e mafai ei o ‵sao atu tatou i te fakaseaiga se-gata-mai telā e fakaata mai ne Kēna.
14 Ona ko te tulaga agasala kae sē ‵lei katoatoa, e manakogina a taumafaiga e uke ke tumau tatou i te ‵ma i mea tau amioga. “Ne fakataputapu fakamaoni toku foitino,” ko pati a Paulo, “ko te mea kafai e folafola atu ne au te tala ‵lei ki tino, e se ‵teke mai te Atua ki a au.” (1 Kolinito 9:27) Tela la, ke na taumafai malosi tatou o fakagalue aka a pati polopoloki a Iesu e uiga ki mea tau amioga, kae ke mo a ma talia ne tatou a faifaiga kolā e fakaasi atu i ei a te se amanaia o tatou ki te taulaga togiola.—Mataio 20:28; Epelu 6:4-6.
‘Tuku Atu Otou Mea’
15, 16. (a) Ne tuku mai pefea ne Iesu se fakaakoakoga e uiga ki te tukuatuga o mea? (e) Se a te uiga o pati a Iesu i te Luka 6:38?
15 E fakamalosi aka ne pati mo te fakaakoakoga sili a Iesu a te uiga ko te fia tuku atu o mea. Ne fakaasi mai ne ia a te lasi o tena kaimalie i tena vauga ki te lalolagi mō te ‵lei o tino agasala. (Faitau te 2 Kolinito 8:9.) Ne lotomalie a Iesu o tiakina tena olaga ‵malu i te lagi kae tuku atu tena ola mō tino agasala, e aofia i ei a nisi tino kolā ka ola i te lagi ke pule fakatasi mo ia i te Malo. (Loma 8:16, 17) Kae ne fakamalosi aka foki ne Iesu a te loto kaimalie i ana muna:
16 “Tuku atu fua otou mea ki nisi tino, kae ka tuku mai ne tino a mea ki a koutou; ka ‵ligi mai ne latou ki otou gatu se fua ‵lei, e ‵lomi ki lalo kae lulugina, kae maligi foki ki tua. Me i te fua e fakaaoga ne koutou ki nisi tino, ko te fua foki eiloa tenā ka fakaaoga ki a koutou.” (Luka 6:38, Tusi Paia, Samoa) E fakasino atu eiloa a te tugapati telā ne ‵fuli ki te ‘‵ligi ki olotou gatu’ ki se faifaiga masani a tino kolā e fakatau atu olotou mea ke faka‵fonu ei a taga o gatu o tino kolā e ‵sai ki olotou foitino kae mafai o tauave i ei a mea. A te kaimalie telā e māfua tonu mai i ‵tou ‵kanoloto e mafai o iku atu ki te mauaga ne tatou o mea ‵lei mai nisi tino, maise eiloa i taimi kolā e ma‵nako ei tatou ki se fesoasoani.—Failauga 11:2.
17. Ne fakaasi muamua mai pefea ne Ieova te fakaakoakoga ‵lei e uiga ki te tuku atu o mea, kae se a te vaegā tukuatuga o mea e mafai o maua i ei ne tatou te fiafia?
17 E alofa kae taui atu foki ne Ieova a tino kolā e tuku atu olotou mea. Ko ia eiloa te tino muamua ne tuku mai ne ia te ‵toe fakaakoakoga ‵lei i te tukumaiga o tena Tama pele e tokotasi “ko te mea ke se malaia so se tino e fakatuanaki ki a ia, kae ke maua ne ia te ola se gata mai.” (Ioane 3:16) Ne tusi mai a Paulo: “Ka ko te tino telā e uke ana fuaga ne toki, ka uke foki ana fuataga e maua. A tino takitokotasi e ‵tau eiloa o fai a te mea telā ko iku i tena mafaufau ke fai; e se i te loto se malie io me ko te faimalo, me i te Atua e fiafia ki te tino telā e tuku ana mea mo te loto malie.” (2 Kolinito 9:6, 7) A te tukuatuga o ‵tou taimi, malosi, mo ‵tou kope faka-te-foitino ke fakamalosi aka ei te tapuakiga tonu e mautinoa eiloa me ka maua i ei ne tatou te fiafia mo fakamanuiaga e uke.—Faitau te Faataoto 19:17; Luka 16:9.
“Ke se Fakatagi ne Koe ate Pu”
18. Ne a fakanofonofoga ka se maua ne tatou i ei “te taui” mai te ‵tou Tamana faka-te-lagi?
18 “Sa fakamata‵mata koutou o fakaasiasi te otou amiotonu ke matea ne tino, me e se maua i ei ne koutou a te taui mai te otou Tamana i te lagi.” (Mataio 6:1) I ana pati e uiga ki te “amiotonu,” ne fakauiga eiloa a Iesu ki faifaiga kolā e fetaui mo te loto o te Atua. Ne seki fakauiga a ia me e se ‵tau o fakaasi atu a uiga faka-atua i mua o tino, me ne fai atu a ia ki ana soko ke “maina atu te [lotou] mainaga ki mua o tino.” (Mataio 5:14-16) Kafai e fai ne tatou a mea “ke matea ne tino” kae takutakua i ei tatou, e pelā mo tino takutakua i tamunei, ka “se maua i ei ne [tatou] te taui” mai te Tamana i te lagi. Kafai e tenā eiloa te mea e ma‵nako tatou ki ei, ka se mafai eiloa o maua ne tatou se fesokotakiga ‵pili mo te Atua io me ko fakamanuiaga se-gata-mai mai te pulega a te Malo.
19, 20. (a) Se te mea ne fakauiga ki ei a Iesu i ana pati “ke se fakatagi ne koe a te pu” māfai ko tuku atu sau “meaalofa”? (e) E fai pefea ne tatou ke se iloa ne ‵tou lima fakamaui a te mea ko fai ne ‵tou lima fakaatamai?
19 Kafai e tonu te ‵tou fakamoemoega, ka tau‵tali atu eiloa tatou i te fakatonuga a Iesu: “Tela la, kafai ko avatu au meaalofa, ke se fakatagi ne koe a te pu, e pelā mo te faiga a tino fia amiotonu i fale tapuaki mo auala, ko te mea ke tavaegina latou ne tino. E tonu, au e fai atu ki a koutou, e maua ne latou te lotou taui.” (Mataio 6:2) A “meaalofa” konei ko mea kolā e tuku atu ke fesoasoani atu ki tino fakaa‵lofa. (Faitau te Isaia 58:6, 7.) E isi foki ne meaalofa ne tuku atu ne Iesu mo ana apositolo ki tino fakaa‵lofa. (Ioane 12:5-8; 13:29) Ona ko te mea e se fakatagi tonu atu te pu mai mua o tuku atu a meaalofa ki tino ma‵tiva, e mautinoa eiloa me ne fakaaoga ne Iesu a pati fakatusa i ana pati me e se ‵tau o “fakatagi ne koe a te pu” mai mua o tuku atu a ‵tou “meaalofa.” E se ‵tau o fakailoa atu i mua o tino tokouke a mea e tuku atu ne tatou, e pelā mo te mea ne fai ne Falesaio Iutaia. Ne taku ne Iesu latou e pelā me ne tino fia amio‵tonu me e faka‵pula atu ne latou te faiga o olotou meaalofa i loto i “fale tapuaki mo auala.” Ka maua ne tino fia amiotonu konei “te lotou taui.” A te lotou takutakua e pelā foki mo te mauaga ne latou o nofoga tafa ki mua i te sunako ko te taui tāua e maua ne latou, me ka seai lele eiloa se taui ka tuku atu ne Ieova ki vaegā tino penā. (Mataio 23:6) Ne a faifaiga e ‵tau o fai ne soko o Keliso? Ne fai atu a Iesu ki a latou—kae pelā mo tatou:
20 “Kafai e avatu ne koe ne meaalofa, ke se iloa ne tou lima fakamaui a te mea ko fai ne tou lima fakaatamai; ko te mea ke se matea ne ia au meaalofa; ka ko tou Tamana fua e lavea ne ia koe i te koga se lavea; ka avatu foki ne ia te taui ki a koe.” (Mataio 6:3, 4) E masani sāle o ga‵lue tasi ‵tou lima. Tela la, a te se iloa ne te lima fakamaui a te mea telā e fai ne te lima fakaatamai e fakauiga loa me e se ‵tau o faka‵pula atu ne tatou ki tino a ‵tou meaalofa e fai, ke oko foki eiloa ki tino kolā e pili ‵ki ki a tatou e pelā loa mo te pili o te lima fakamaui ki te lima fakaatamai.
21. Ne a mea e aofia i te taui telā ka tuku mai ne Ia telā e nofo “i te koga se lavea”?
21 Kafai e se faka‵pula atu ne tatou a ‵tou meaalofa ka se iloa foki ne tino ‵tou “meaalofa.” Kae ko ‵tou Tamana telā e “lavea ne ia koe i te koga se lavea,” ka taui mai ne ia ki a tatou. Me nofo atu a ia i te lagi kae se mafai o ‵kilo atu ki ei a tino, tela la, e mafau‵fau latou me e tumau eiloa te ‵tou Tamana “i te koga se lavea.” (Ioane 1:18) A te taui telā ka tuku mai ne te tino telā e nofo “i te koga se lavea” e aofia i ei a te faiga ne Ieova ke maua se fesokotakiga pili mo ia, ke fakamagalogina ‵tou agasala, kae ke maua foki ne tatou a te ola se-gata-mai. (Faataoto 3:32; Ioane 17:3; Efeso 1:7) E sili atu te mea tenā i lō te mauaga o tavaega mai i tino!
Akoakoga Tāua Kolā e ‵Tau o Tausi Faka‵lei
22, 23. Kaia e ‵tau ei o fakatāua ne tatou a pati a Iesu?
22 E uke ‵ki a koloa tāua kese‵kese i te feitu faka-te-agaga e maua ne tatou i te Lauga i luga i te mauga. E mautinoa me e maua i ei a muna ‵gali kae se fuafuagina kolā e mafai o maua i ei ne tatou se olaga fiafia i te lalolagi tenei e ‵fonu i fakalavelave. E tonu, ka fia‵fia eiloa tatou māfai e fakatāua kae talia ne tatou a pati a Iesu ke ‵fuli i ei ‵tou olaga.
23 A tino katoa kolā e “faka‵logo” kae “fai” ne latou a mea kolā e akoako mai ne Iesu ka maua eiloa ne latou a fakamanuiaga. (Faitau te Mataio 7:24, 25.) Tela la, ke na taumafai malosi tatou o fakagalue aka a pati fakatonutonu a Iesu. E fakaasi mai i te suā mataupu ana nisi akoakoga i te Lauga i luga i te mauga.
Ka Tali Pefea ne Koe?
• Kaia e tāua ei ke faka‵lei tou va mo se taina telā e se fiafia ki a koe?
• Ne a mea e mafai o fai ne tatou ke mo a ma fakaagasala tatou ne ‵tou “mata fakaatamai”?
• e a te kilokiloga e ‵tau o maua ne tatou e uiga ki te tukuatuga o mea?
[Ata i te itulau e 11]
Ko tafaga la te gali ke “faka‵lei” koe mo se taina telā e se fiafia ki a koe!
[Ata te itulau e 12, 13]
E fakamanuia ne Ieova a tino kolā e tuku atu olotou mea mo te lotomalie