Te 2 O Auala
‵Teke Atu ki te Manakoga ke Fakatusatusa ne Koe a Koe Eiloa ki Nisi Tino
SE A TE MEA E AKOAKO MAI I TE TUSI TAPU? “E ‵tau mo te tino o fakamasino ifo eiloa ki ana galuega ne fai. Kafai e ‵lei ko ‵tau mo ia o fakamatamata ki ei, kae sa fakatusatusa fua ki mea a te suā tino ne fai.”—Kalatia 6:4.
SE A TE MEA FAIGATA? E mafai o fakatusatusa ne tatou a tatou eiloa ki nisi tino—i nisi taimi, mo tino kolā e mu‵tana olotou mea i a tatou, mo latou kolā e ‵mafi, maumea, io me e ata‵mai atu i a tatou. Faitalia me se a te auala e fakaaoga ei ne tatou, e se ‵lei faeloa a te ikuga. E mafai o ‵se ‵tou manatu me e fakaiku aka a te tāua o te tino mai i ana mea ko maua io me ko mea e mafai o fai ne ia. E mafai foki o fakamalosi aka ne tatou a lagonaga loto masei mo se uiga fakatau‵fai.—Failauga 4:4.
NE A AU MEA E MAFAI O FAI? Taumafai ke kilo ifo koe ki a koe eiloa e pelā mo te auala e kilo atu ei te Atua ki a koe. Ke talia tena kilokiloga ke fakamalosi aka ei tou fakatāua ne koe a koe eiloa. “A te tagata e kilo ki te gali o te feitu ki tua, ka ko au e kilo ki te loto o te tino.” (1 Samuelu 16:7) E fakaiku aka ne Ieovaa tou tāua, e se mai i te fakatusatusaga o koe ki nisi tino, kae mai i te kilokilo atu ki tou loto, iloilo aka ne ia ou mafaufauga, lagonaga, mo manakoga. (Epelu 4:12, 13) E malamalama a Ieova i mea kolā e mafai o fai ne koe kae e fakamalosi atu ke āva foki koe ki a latou. Kafai e fua aka ne koe a tou tāua mai i te fakatusatusaga o koe ki nisi tino, ka iku atu eiloa koe ki te fakamaualuga io me ko te sē lotomalie faeloa. Tela la, ke na talia mo te agamalu me ka se manumalo faeloa koe i au taumafaiga katoa.—Faataoto 11:2.
Ne a la mea fakapito e ‵tau o fai ne tatou ko te mea ke tāua tatou i te kilokiloga a te Atua? Ne fakaosofia ne ia a te pelofeta ko Mika ke tusi mai: “Ko oti ne taku mai ne te Aliki ki a tatou te mea ‵lei. A te mea e manako a ia ke fai ne tatou tenei: ke fai ne tatou te mea tonu, ke fakaasi atu te alofa tumau, kae ola mo te loto maulalo i mua o te ‵tou Atua.” (Mika 6:8) Kafai e tautali atu koe ki te fakatakitakiga tenā, ka atafai atu eiloa a te Atua ki a koe. (1 Petelu 5:6, 7) Se a foki la te suā pogai sili e mafai ei o maua ne tatou a te lotomalie?
[Fakamatalaga fakaopoopo]
a Ko te igoa o te Atua telā e maua i te Tusi Tapu.
[Ata i te itulau e 5]
E fakaiku aka ne Ieova te ‵tou tāua e auala i mea i ‵tou loto