E Mata, e Tāua a Tali?
“Ka iloa ne koutou te munatonu, a ko te munatonu ka fakasaoloto ne ia koutou.”—IOANE 8:32.
E MAUA i te Tusi Tapu a te munatonu telā e mafai o fakasaoloto ne ia tatou mai i akoakoga faka‵se tino e uiga ki a Iesu. E mata, e tāua ke iloa aka me ne a mea e tali‵tonu tatou ki ei e uiga ki a Iesu? Ao, e tāua. E tāua ki a Ieova. E tāua ki a Iesu. Kae e ‵tau foki o tāua ki a tatou.
● Kaia e tāua ei ki a Ieova? E faigofie ke fai atu penei, me i te “Atua ko te alofa eiloa a ia.” (1 Ioane 4:8) E manako a Ieova ke ola fia‵fia tatou ke oko eiloa ki te se-gata-mai. Muna a Iesu: “Ona ko te lasi o te alofa o te Atua ki te lalolagi ne tuku mai ei ne ia tena Tama fagasele e tokotasi, ko te mea . . . so se tino e fakatuanaki ki a ia . . ke maua ne ia te ola se-gata-mai.” (Ioane 3:16) Ne uga mai ne te Atua a tena Tama mo fai ‵tou Togiola kae ‵tala mai i ei a te auala ke ola tatou ki te se-gata-mai i te lalolagi Palataiso, e ‵tusa mo Tena fuafuaga muamua. (Kenese 1:28) E loto fiafia eiloa te Atua o tuku atu a te meaalofa ko te ola se-gata-mai ki a latou kolā e tauloto te munatonu e uiga ki tena Tama kae fai a te mea tenā.—Loma 6:23.
● Kaia e tāua ei ki a Iesu? A Iesu foki e alofa ki tino. Ne fakaasi mai eiloa ne ia a tena alofa e auala i tena loto fiafia o mate mō tatou. (Ioane 15:13) Ne malamalama tou tagata me ne tuku atu ne ia a te auala fua e tasi ki te fakaolataga. (Ioane 14:6) E mata, e ‵tau o fakapoi mai ki a tatou me e fia lavea ne Iesu a tino e tokouke e maua a mea aoga mai i tena taulaga togiola? E tenā te pogai ne fakatonu atu ei tou tagata ki ana soko ‵tonu ke akoako atu a tino i te lalolagi kātoa e uiga ki fuafuaga mo te loto o te Atua.—Mataio 24:14; 28:19, 20.
● Kaia e tāua ei ki a tatou? Mafaufau malie aka ki mea kolā e tāua malosi ki a koe—ko tou ola ‵lei mo tou kāiga. E mata, e manako malosi koe ki se foitino malosi mo se olaga ‵lei ke maua ne koe mo ou tino pele? E auala i a Iesu, e ofo mai ne Ieova ki a koe mo ou tino pele a te fakamoemoega ke maua te foitino malosi katoatoa mo te ola se-gata-mai i se lalolagi fou, telā e seai se ‵mae mo logo‵maega i ei. (Salamo 37:11, 29; Fakaasiga 21:3, 4) E gali ki a koe a te fakamoemoega tenā? Kafai e penā loa, e isi aka foki se mea telā e ‵tau o fai ne koe.
Ke toe onoono ki te tusi siki fakavae telā e siki tasi mai mo te ulutala: “Ka iloa ne koutou te munatonu, a ko te munatonu ka fakasaoloto ne ia koutou.” E mafai ne te munatonu e uiga ki a Iesu mo tena tulaga i te fakataunuga o te fuafuaga a te Atua o fakasaoloto tatou mai i te ‵toe tulaga pologa matagā eiloa i mea katoa—ko te nofo pologa ki te agasala mo te mate. Kae ke maua te fakasaolotoga tenā, e ‵tau mo koe o “iloa . . . te munatonu.” Kaia e se tauloto malosi ei koe mo ou tino pele ki te munatonu tenei mo te auala e mafai ei o maua a mea aoga mai i ei? Ka fia‵fia eiloa a Molimau a Ieova o fesoasoani atu ki a koe.