Se Olaga Aoga—E Fakaasi Mai ne Iesu a te Auala

E PELĀ mo te mea ne sau‵tala tatou ki ei i te mataupu mai mua atu, ne maua ne Iesu se olaga aoga. Tela la, kafai e ma‵nako tatou ke faka‵fonu ‵tou olaga ki mea aoga, e ‵tau eiloa o tau‵tali tatou i tena fakaakoakoga kae faka‵logo ki ana manatu fakatonutonu.

A te tonuga loa, tenā eiloa te mea e fakamalosi mai a Ieova ke fai ne tatou, e pelā mo te mea e fakaasi mai i te tusi siki mai luga. E aofia i te ola e pelā mo Iesu a te fulifuliga o ‵tou olaga kātoa ke fetaui mo tena fakaakoakoga mo ana akoakoga. Ka fesoasoani mai a te faiga penā ke maua ne tatou a te taliaga a te Atua kae maua se olaga aoga.

Ne aofia i akoakoga a Iesu a fakatakitakiga fakavae kolā e mafai o fesoasoani mai ke ola tatou e pelā mo ia. E maua ne tatou a fakatakitakiga fakavae e uke konei i tena Lāuga takutakua i luga i te Mauga. Ke mafau‵fau tatou ki nāi fakatakitakiga fakavae mo te auala e mafai ei o fakagalue aka ne tatou i ‵tou olaga.

FAKATAKITAKIGA FAKAVAE: “E fia‵fia a latou kolā e iloa ‵lei ne latou olotou manakoga faka-te-agaga.”​—Mataio 5:3.

TE AUALA E ‵LAGO ATU EI TE FAKATAKITAKIGA FAKAVAE KI SE OLAGA AOGA:

Ne fakaasi mai ne Iesu me ne fa‵nau mai a tino mo manakoga faka-te-agaga. Ko leva ne fia iloa ne tatou a tali ki fesili penei: Kaia e ‵nofo ei tatou i konei? Kaia e uke ‵ki ei a logo‵maega i te lalolagi tenei? E mata, e atafai tonu mai te Atua ki a tatou? E mata, e isi se ola mai tua o te mate? E ‵tau o iloa ne tatou a tali ki fesili penei ko te mea ke maua ne tatou se olaga aoga. Ne iloa ne Iesu me e tasi fua te koga e mafai o tali aka ei a fesili konā, ko te Muna a te Atua. I tena ‵talo ki tena Tamana, ne fai atu a Iesu: “A tau muna ko te munatonu.” (Ioane 17:17) E mata, e mafai o fesoasoani tonu mai te Muna a te Atua ke fakama‵lie aka a ‵tou manakoga faka-te-agaga?

SE FAKAAKOAKOGA TONU:

E pelā me se tino usuusu i se potukau ta‵ta, ko pili fua o fai a Esa mo fai se tino takutakua i te usuusu. E ui i ei, ne sē katoatoa te fiafia o Esa. “Faitalia me ne fiafia au o kau ki te potukau ta‵ta, ko leva ne manako au ke aoga malosi atu toku olaga,” ko ana pati. Fakamuli ifo, ne fetaui a Esa mo se tokotasi o Molimau a Ieova. “E malaku eiloa aku fesili ne fai atu ki tou tagata,” ko pati a Esa. “Ne fiafia ‵ki au ki ana tali ‵lei mai i Tusitusiga Tapu, tenā ne lotomalie ei au ke fai ne tou tagata a taku akoga faka-te-Tusi Tapu.” Ne otia te loto o Esa i mea kolā ne tauloto ne ia mai i te Tusi Tapu kae ne fakamalosi atu ki tou tagata ke tuku atu tena ola ki a Ieova. “I taimi ko ‵teka, ne pokotia faeloa au ne fakalavelave e uke,” muna a tou tagata. “Kae nei la, ko maua tonu ne au se olaga aoga.”a

FAKATAKITAKIGA FAKAVAE: “E fia‵fia a latou kolā e loto fakamagalo.”​—Mataio 5:7.

TE AUALA E ‵LAGO ATU EI A TE FAKATAKITAKIGA FAKAVAE KI SE OLAGA AOGA:

E aofia i te alofa fakamagalo a te fakaasiatuga o te loto alofa ki nisi tino, mataalofa kae mafaufau e uiga ki a latou. Ne fakaasi atu ne Iesu a te alofa fakamagalo ki a latou kolā e ma‵nako ki ei. Ona ko te lasi o tena loto alofa, ne fakafeoloolo aka ei ne ia a logo‵maega o nisi tino. (Mataio 14:14; 20:30-34) Kafai e fakaakoako atu tatou ki a Iesu i te fakaasiatuga o te alofa fakamagalo, ko fakaopoopo atu ne tatou a mea aoga ki ‵tou olaga, me e maua ne latou kolā e fakaasi atu a te alofa fakamagalo ki nisi tino a te fiafia. (Galuega 20:35) E mafai ne tatou o fakaasi atu a te alofa fakamagalo ki nisi tino e auala i ‵tou pati mo faifaiga, e maua i ei ne latou kolā e ma‵nako ki ‵tou fesoasoani a te fiafia. E mata, a te fakaasiatuga o te alofa fakamagalo e momea aka i ei a ‵tou fia‵fia?

SE FAKAAKOAKOGA TONU:

E fai a Maria mo tena avaga ko Carlos, mo fakaakoakoga o te alofa fakamagalo. A te tamana o Maria e seai sena avaga, kae i tausaga fakamuli nei ko moe fua tou tagata i luga i te moega ona ko te masaki. Ne ave ne Maria mo Carlos a tou tagata ki te lā fale kae ko tausi atu lāua ki ana manakoga katoa. E uke a po ne sē ‵moe ‵lei ei lāua, ke oko foki ki te ave fakavave o tou tagata ki te fa‵kaimasaki māfai ko maluga ‵ki a tena suka. E fai ‵tonu mai lāua me ne fi‵ta ‵ki lāua i nisi taimi. Kae e fia‵fia eiloa lāua, e pelā mo pati a Iesu, me ne tuku atu ne lāua mo te loto malie ki te tamana o Maria a te tausiga telā e manakogina ne tou tagata.

FAKATAKITAKIGA FAKAVAE: “E fia‵fia a latou kolā e uiga filemu.”​—Mataio 5:9.

TE AUALA E ‵LAGO ATU EI A TE FAKATAKITAKIGA FAKAVAE KI SE OLAGA AOGA:

Ke “uiga filemu” e fakauiga tonu loa ki te fai mo tino “fakatupu te filemu.” E aoga malosi atu pefea a te olaga i te fai mo tino e fakatupu te filemu? A te mea e tasi, e maua eiloa ne tatou se fesokotakiga ‵lei mo tino i ‵tou tafa. Se mea ‵lei ke tau‵tali tatou i manatu fakatonutonu mai te Tusi Tapu: “Fai te mea e mafai o fai ne koutou ke tausi te filemu i te va o koutou mo tino katoa.” (Loma 12:18) E aofia i “tino katoa” a kāiga mo nisi tino kolā e se ‵pau ‵tou talitonuga. E mata, e mafai eiloa o fakaopoopo atu a mea aoga ki ‵tou olaga mai te fakaasiatuga o uiga filemu ki “tino katoa”?

SE FAKAAKOAKOGA TONU:

Ke mafaufau ki te tala o se fafine e igoa ki a Nair. I tausaga e uke ko ‵teka, ne fepaki tou fafine mo fakamalosiga e uke kolā ne tofotofo aka i ei a te mafai ne ia o fakatumau a te filemu, maise eiloa i loto i tena kāiga. Talu mai te taimi ne tiakina ei tou fafine ne tena avaga i te 15 tausaga ko ‵teka, ne puti aka ne tou fafine ana tama‵liki i a ia eiloa. E tokotasi tena tamaliki tagata ne umiti ki vailakau tapu kae masani o fakamatakutaku atu ki tou fafine mo tena tamaliki fafine. E talitonu a Nair me ne maua ne ia a te malosi ke tausi te filemu mai i mea kolā ne tauloto ne ia mai i te Tusi Tapu, ke oko ki tulaga fakafanoanoa penā. E taumafai tou fafine ke sē kinau atu io me taua atu. E taumafai malosi eiloa a ia o fakaasi atu te mataalofa, atafai, mo te loto malamalama ki nisi tino. (Efeso 4:31, 32) Ne talitonu tou fafine me i te tauloto ke uiga filemu ne fesoasoani atu ke maua a toe fesokotakiga ‵lei mo ana kāiga pelā foki mo nisi tino.

MAFAUFAU KI ASO MAI MUA

Ka maua eiloa ne tatou a te fiafia mo te loto malie i te olaga māfai e tau‵tali tatou i manatu fakatonutonu o Iesu. Ke maua se olaga aoga tonu, e ‵tau foki o iloa ne tatou a mea kolā e faka‵tali mai i aso mai mua. E se gata i ei, e mafai pefea o maua se olaga aoga māfai e iloa fua ne tatou me i te fakaotiga ka olo aka tatou o ma‵tua, ma‵saki, ko ‵mate ei? Konei loa a mea e fe‵paki mo tatou i te lalolagi tenei.

E ui i ei, e isi se tala ‵lei! E uke a fakamanuiaga a Ieova e faka‵tali mai mō latou kolā e taumafai malosi o “ola e pelā eiloa mo te olaga o Iesu Keliso.” E tauto mai a Ieova me ko pili o aumai ne ia se lalolagi fou kae amiotonu, telā ka ola i ei a tino fakamaoni e pelā eiloa mo te fuafuaga a Ieova mō latou ke ola ki te se-gata-mai i te malosi ‵lei katoatoa. E fai mai a Tena Muna: “Kiloke! Ko ‵nofo nei mo tino te faleie o te Atua, kae ka ‵nofo fakatasi a ia mo latou, kae ka fai latou mo fai ana tino. Ka ‵nofo fakatasi eiloa te Atua mo latou. Kae ka ‵solo keatea ne ia a loimata katoa mai i olotou mata, kae ka se toe ai se mate, kae ka se toe ai foki se fanoanoa, se tagi io me se ‵mae. Ko palele atu a mea mua.”​—Fakaasiga 21:3, 4.

E fiafia eiloa a Maria, te fafine matua ko 84 ana tausaga telā ne taku mai i te mataupu muamua i te fakasologa tenei, o kilo atu ki te fakataunuga o pati konā. Kae e a koe? E fia iloa ne koe a mea e uke atu e uiga ki “te ola tonu” telā ka maua mai lalo i te Malo o te Atua? (1 Timoteo 6:19) Kafai e penā, ke fakamolemole atu koe ki Molimau a Ieova i tou fenua io me tusi atu ki tino kolā e ‵lomi ne latou a te mekesini tenei.b