Wie A Miwiee Me Ko No

Ɛtɔ bere bi a nnipa ɔpepem pii hyia nsɛm a emu yɛ den te sɛ nyarewa ahorow a wonni ano aduru a wonni anidaso biara sɛ wobenya ano aduru ntɛm a ɛma ɛho behia sɛ ɛsɛ sɛ wɔko ankasa kodu awiei. Mewɔ anidaso sɛ ebia me osuahu no bɛhyɛ wɔn a wohyia nsɛm a emu yɛ den a ɛte sɛɛ no den na wɔampa abaw na mmom wɔakɔ so ako.​—Sɛnea Monika Siebert ka kyerɛe

WƆTETEE me wɔ Germany kusuu fam sɛ Yehowa Adansefo no mu biako. Wɔ nokwasɛm a ɛyɛ sɛ wɔyɛn me a na minni agya​—owui bere a na meyɛ abofra​—akyi no, na me mmofraase te sɛ afoforo de. Minyin bɛyɛɛ obi a ne ti nhwi yɛ kɔkɔɔ a nneɛma nnodowee nketenkete sisi me ho a hwee mfa me ho a na mewɔ anigye. Ankyɛ biara na mede me ho hyɛɛ bere nyinaa ɔsom adwuma no mu sɛ ɔkwampaefo sɛmpakafo.

Wukuada bi wɔ ɔsram May mu, bɛyɛ mfe 16 a atwam ni no, na me ne Adansefo no mu biako babarima a wadi mfe ason a wɔfrɛ no Walter nam asubɔnten Rhine ho a yɛn ani kyerɛ akuraa ketewaa bi a yɛpɛ sɛ yɛkɔka asɛm wɔ hɔ ase, bere a abofra Walter kae sɛ: “Monika, dɛn nti na wɔrehintihintiw saa? Hwɛ yiye, anyɛ saa a wobɛhwe ase” no, meserewee sɛ: “Mma ɛnhaw wo, ɛnyɛ hwee.” Nanso na biribi atoto, sɛnea ankyɛ biara mihui no.

Adapɛn pii akyi no m’ani fii ase sɛ enhu ade yiye. M’ani so yɛɛ me wusiwusi, na mifii ase huu biribiara sɛ ɛyɛ abien abien. Nanso memaa me koma tɔɔ me yam bere a mekae sɛ: “Mekenkan ade dodo. Mama m’ani no abrɛ. Ebia mihia hwɛe” no.

Enti mekɔɔ aniwa ho ɔbenfo bi nkyɛn na meka kyerɛɛ no sɛ ɔnhwehwɛ hwɛe mma me. Nanso nea ɛyɛɛ me nwonwa no, ɔkae sɛ: “Dabi hwɛe remmoa. Ma memfa wo nkɔ oduruyɛfo a onim ntini ho adwuma nkyɛn na ɔnkɔhwɛ wo.” Eyi yɛɛ me nwonwa yiye nanso misii gyinae sɛ mɛyɛ nea wɔahyɛ ho nyansa no. Nanso esiane sɛ na me ne Hannelore a ɔyɛ me yɔnko no wɔ nnamfo a wɔabɛsra yɛn nti, mitu hyɛɛ da.

Ɔyare Bi Bɔɔ Me

Nna kakraa bi akyi no, bere a yɛne yɛn nnamfo no fi yɛn Kristofo nhyiam horow no mu biako ase resan aba fie no, me ti paee me denneennen. Na ɛte sɛ nea obi retu tokuro wɔ me tirim. Na mintumi nnyina kar a ɛrekɔ nnyigyei ano. Bere a yeduu fie pɛ no, yɛkɔfrɛɛ oduruyɛfo na wɔde me kɔɔ ayaresabea. Ɛbɛkyɛ ansa na me werɛ afi da no: July 5, 1968.

Mfiase no na ɛte sɛ nea obiara nhu nea atoto no. Nanso anyɛ yiye koraa no aduru a wɔyɛɛ me no tumi maa yaw no gyaee. Wosusuw sɛ ebia na biribi ahon me tirim. Sɛnea ɛbɛyɛ a wobehu sɛ ɛyɛ ampa no, na nhwehwɛmu pii ho hia, enti wɔde me kɔɔ University Clinic a ɛwɔ Bonn a ɛyɛ Germany kuropɔn a ɛwɔ asubɔnten Rhine ho no.

Wɔ bere a emu yɛ den yi mu no, wiase nyinaa onuayɛ, anuanom a manya hokwan ayɛ wɔn mu biako no dɔ a mihui no hyɛɛ me den kɛse. Kurow no mu Adansefo a na minhyiaa wɔn da no bɛsraa me a pii kurakura akyɛde ahorow mpo. Ɔyare biara nni hɔ​—ɛmfa ho sɛnea emu den te​—a ebetumi ama mahwere saa ɔdɔ yi da!

Wɔ nna bi a na minnim nea ɛbɛba akyi no, wɔsan de me baa ayaresabea a ɛwɔ kurow no mu no mu na wɔkaa ɔhaw no ankasa kyerɛɛ me bɔkɔɔ sɛnea wobetumi. Na manya ɔyare bi a mentee ho asɛm mpo da: Multiple sclerosis.

Mfiase no mante nea ebefi mu aba nyinaa no ase. Afei nokwasɛm a ɛyɛ hu: Ɛyɛ ɔyare a ɛma obi bubu a de besi saa bere no na wonyaa ano aduru.

Awerɛhowdi anaa Adeyɛ​—Nea Ɛwɔ He?

Mihui sɛ multiple sclerosis yɛ ɔyare a ɛka adwene, ntini, ne ehon nkwaadɔm no. Biribi a ɛte sɛ srade a wɔfrɛ no myelin a atwa hon ntini nketenkete no ho ahyia no sɛe na esiw nneɛma ahorow a ɛsɛ sɛ efi amemene no mu kɔ ntini no mu ma ɛyɛ adwuma no kwan. Nea efi mu ba ne sɛ oniiko afã afã wu. Ɛyɛ ɔyare a ne sa yɛ den a ɛkã obiara a ɛyɛ no no wɔ ɔkwan soronko so. Ɛyɛ den sɛ wobetumi akyerɛ sɛnea ɛbɛyɛ wo, na mpɛn pii no ɛdaadaa ɔyarefo no ma osusuw sɛ ne ho atɔ no, na ɛsan ba bio bere a ɔnhwɛ kwan. Ɛyɛ kyerɛ a wontumi nkyerɛ nea ebefi mu aba yi na ɛma woyɛ basaa no.

Nokwarem no midii awerɛhow. Ná me nhyehyɛe a mayɛ ama daakye no yɛ nea afei minnim sɛnea ebewie. Egyee bere ansa na mitumi yɛɛ nsakrae. Nanso na masi me bo sɛ merenyɛ me ho sɛ obi a ɔyɛ mmɔbɔ, saa ara na meremma afoforo nni me ho yaw. So ɛsɛ sɛ mema gye a me yare no begye me asabawmu no ma m’aba mu bu anaasɛ ɛsɛ sɛ mebɔ me ho mmɔden? Mepaw sɛ mɛbɔ me ho mmɔden.

Ná mewɔ nneɛma pii a ɛsɛ sɛ meda ho ase. Ná mete nkwa mu. Ná m’adwene yɛ adwuma. Ná metumi akɔ so ara de me nsa ayɛ ade. Dɛn nti na memfa nni dwuma nkyerɛw nkrataa nka Onyankopɔn Ahenni no ho anidaso a ɛyɛ nwonwa no ho asɛm nkyerɛ nkurɔfo? Wɔmaa me kwan sɛ mentoa bere nyinaa ɔsom adwuma no so, ɛwom sɛ na afei ɔkwan a mefa so yɛ no no yɛ soronko koraa de. Nanso ɛma minyaa biribi yɛe, atirimpɔw a ɛbɛma m’akɔ so ako.

Me maame na ɔkyerɛɛ me saa kwan no​—sɛ́ minkura mu denneennen. Ɔbɛyɛɛ Yehowa Adansefo no mu biako bere a misua no, enti na ɔde mmɔdenbɔ atete me wɔ Yehowa akwan so fi me mmofraase. Ansa na meredi mfe ason no, na meka ne ho wɔ bere nyinaa som adwuma no mu bere a ɔkɔ afie ne afie mu no. Na eyi yɛ ntetee pa na ɛma minyaa anigye ankasa. Ne nnamyɛ wɔ Onyankopɔn Ahenni nneɛma ho a ɛfata sɛ wosua mu no ma minyaa ɔpɛ sɛ mede m’ahoɔden nyinaa bɛsom Yehowa wɔ saa bere a na minyinii no mu mpo. Bere a madi mfe 18 na mawiei sukuu na masua nsaanodwuma akyi no, mede me ho hyɛɛ bere nyinaa som adwuma no mu.

Sɛ mehweree saa ɔsom hokwan a ɛyɛ nwonwa yi bere a meyare no a, anka mɛte nka sɛ wɔagye nea ɛbɛboa me no afi me nsam. Ɛwom sɛ m’ahoɔden so kɔɔ so huanee de, nanso na nea meda so ara wɔ no yɛ nea metumi de asom Yehowa, ma enti mede m’ahoɔden nyinaa som no. Na adwene a mikura yi yɛ awerɛkyekye kɛse ma me.

Biribi fii me krataa kyerɛw no mu bae. Sɛ nhwɛso no, na Claudia a wadi mfe 16 a esiane ɔsɔretia a efi awofo hɔ nti, ontumi nsua Bible no wɔ fie no wɔ hɔ. Enti yesuaa ade denam krataa a yɛkyerɛw so. Onyaa nkɔso fɛfɛɛfɛ na ɔbɛyɛɛ Yehowa Adansefo mu biako na mprempren ɔde ne ho ahyɛ bere nyinaa som adwuma no mu nso.

Wɔ saa bere yi mu no, na nnuruyɛfo no reyɛ nea wobetumi nyinaa de aboa me. Woguaree me, wɔtwetwee me, wɔde nnuru ahorow yɛɛ me na wɔsɔɔ aduruyɛ a wɔnam anyinam ahoɔden so de ma hwɛe mpo. Nanso biribiara nni hɔ a ɛmaa ɔyare no ano brɛɛ ase ankasa.

Aduruyɛ Foforo​—Akwan Horow a Wɔnam so Yii Me Hu

Na nnuruyɛfo no asi wɔn bo sɛ wɔbɛma mmerɛw a me yare no ma meyɛ no ano abrɛ ase. Da koro bi bere a nnuruyɛfo pii atwa me mpa ho ahyia no, oduruyɛfo panyin no kae sɛ: “Yɛasi gyinae sɛ yɛbɛma wo mogya pii. Yɛaboa nnipa bi wɔ saa kwan yi so.”

Saa nyansahyɛ yi baa mpofirim ma enti nea mitumi teɛɛm kae ara ne sɛ “DABI!” Afei mekyerɛkyerɛɛ me som mu ntease ahorow nti a ɛma mepow no mu kyerɛe. (Asomafo no Nnwuma 15:28, 29) Oduruyɛfo panyin no gyee me gyinaesi no toom, nanso ayaresabea hɔ panyin abadiakyiri no anyɛ saa. Anyɛ yiye koraa no, ɔbɔɔ mmɔden mprenu da biara da, sɛ ɔbɛma masakra m’adwene na ɔkyerɛe sɛ po a mepow no bɛma me nkwa nna so atew. Nanso mampene so.

Ayarehwɛfo no mu biako faa anifere kwan bi so. Na meda ɔdan biako mu nanso wopiaa me mpa no kɔɔ mfɛnsere no ano sɛnea ɛbɛyɛ a ɔkwan bɛda hɔ ama onipa foforo. Wɔkae sɛ me dan no mu nkutoo na tokuro a wɔde mframa pa a wɔfrɛ no oxygen fa mu no wɔ. (Akyiri yi metee sɛ eyi nyɛ nokware.) Wɔde ayarefo a wɔrewu bɛtoo dan no mu, na bere a wɔrema wɔn oxygen no wɔhyɛɛ me ma mehwɛɛ pere a wɔperee ansa na wɔrewu no! Bere a wɔn mu baanu wui no, ɔyarehwɛfo no daa no adi pefee sɛ ɛno ne nea ɛbɛto me sɛ mekɔ so pow ɔkwan a wɔfa so yɛ me aduru no a. Eyi kɔɔ so nna pii kosii sɛ awuraa yamyefo bi a ɔyɛ adwuma wɔ ayaresabea hɔ de ne ho gyee mu.

Wɔ saa bere koro no ara mu no, oduruyɛfo bi a wanyin de aduruyɛ ho nsɛmma nhoma ne nhoma bi a ekura nsɛm a ɛfa mogya a wɔde ma nkurɔfo a nnuruyɛfo no rekamfo akyerɛ denneennen no ho brɛɛ me wɔ kokoam. Nanso emu nsɛm no ankyerɛkyerɛ mu sɛ ɛyɛ ano aduru; ɛkyerɛkyerɛɛ mu sɛ ɛyɛ nea wɔde yɛ nhwehwɛmu ara kwa. Eyi a mihui no ma misii me bo sɛ mɛkɔ so akura me mudi mu pintinn.

Awiei koraa no wogyaee asɛm no mu na mpofirim ara mebɛyɛɛ obi a wɔka ne ho asɛm kɛse. Wodii “saa abeawa a ɔwɔ ɔdan 327 mu no gyidi a emu yɛ den” no ho nkɔmmɔ wɔ abrannaa no so. Hwɛ aseda ara a mede mae sɛ mpaebɔ ne me Bible adesua ama abusuabɔ a me ne Yehowa wɔ no mu ayɛ den ma enti mitumi yii ɔdɔ a mewɔ ma no no adi wɔ “nneyɛe mu” a ɛnyɛ “wɔ nsɛm” a mekyerɛw wɔ me nkrataa mu no nkutoo mu.​—1 Yohane 3:18.

Misii Me Bo Sɛ Mɛnantew Bio

Mebɔɔ mmɔden sɛ megyina hɔ​—mpɛn pii nanso mantumi annyina m’anan so. Mede me nsa ne me nkotodwe weaweae wɔ fie, na wɔ nokwarem no, mebɔɔ mmɔden sɛ mɛnantew nanso na bere nyinaa mintumi. Afei da koro mitumi sɔre gyinaa hɔ ankasa! Na ɛyɛ den ma me sɛ mɛtwɛn me oduruyɛfo no nsrahwɛ a edi hɔ no. Bere a ɔbae no, meyɛɛ brɛoo fii me mpa no so sɔre gyinaa m’anan so​—na ntɛm ara mehwee ase. Na ɔpɛ a mewɔ no mu yɛ den, nanso na ɔyare no mu yɛ den sen no. So na mfaso wɔ so sɛ mɛkɔ so abɔ ho mmɔden?

Mekɔɔ ayaresabea foforo a na wosi apɔw mu teɛteɛ so dua. Ná m’abasam da so ara yɛ den, enti misuae sɛnea mede me ho bɛwaw ɔfasu na afei magyina hɔ. Akyiri yi wɔkyerɛkyerɛɛ me sɛnea mɛnantew dua a wɔde asi hɔ na wɔde bi abea mu ho bere a mede me nsa aso mu agyina ho no. Na ɛte sɛ nea ne yɛ yɛ mmerɛw yiye nanso mfiase no na mitumi tu anammɔn abien anaa abiɛsa pɛ, afei anan, anum, brɛoo nanso na mewɔ ahotoso.

Mikuraa m’anidaso mu, ɛwom sɛ me nnuruyɛfo no kae mpo sɛ meresua nantew bio de, nanso merentumi nkwati me mmubuafo akongua no da. Nea ɛyɛ anigye no na wɔadi mfomso. Mifii ayaresabea hɔ wɔ June 1970 mu na efi saa bere no mentraa me mmubuafo akongua no mu bio ɛ! Wɔ nokwarem no, esiane sɛ obiara yare yɛ soronko nti, ebia ɛnyɛ obiara na obenya no sɛnea minyaa no no.

Daakye Nso Ɛ?

Mfe dunsia atwam fi bere a mifii ase hintiw wɔ Rhine ho no. Mprempren wɔ 1984 mu no, meda so ara nantew a minkura dua. Na ɛwom sɛ me nnamfo ka sɛ makura m’anigye mu na ɛte sɛ nea ɛte mfiase no de, nanso eyi fi bɔ a mabɔ mmɔden sɛ merenni awerɛhow no. Me nnamfo a wɔbɛn me yiye no nim sɛ ɛtɔ bere bi a awerɛhow ka me. Me yare no da so ara yɛ nea wonni ano aduru na ebia wɔrentumi nsa kosi sɛ Onyankopɔn nneɛma nhyehyɛe foforo no bɛyɛ nneɛma nyinaa foforo.

Nanso mewɔ anidaso kakraa. Ampa abasamtu pii wɔ hɔ nanso osuahu ahorow a ɛyɛ anigye pii wɔ hɔ a edi eyinom so. Minim anuanom anokwafo pii a wɔwɔ ɔdɔ a wɔn nkuranhyɛ yɛ nea ɛsom bo kɛse. Masua sɛnea mɛhwɛ m’ahoɔden so na masakra m’asetra kwan ma ɛne tebea foforo no ahyia. Masua sɛnea mɛtɔ me bo ase na madi ahurusi wɔ nkɔso kakraa bi a mehu ho. Abusuabɔ a m’ankasa ne Yehowa wɔ no mu ayɛ den denam hu a mahu sɛnea onipa ntumi nyɛ hwee wɔ ne ko a ɔreko atia ɔyare no mu no so. Yehowa nkutoo na obetumi ama yɛanya ayaresa a edi mu. Wahyɛ bɔ sɛ ɔbɛyɛ saa.​—Hwɛ Yesaia 33:24; Adiyisɛm 21:4.

Bere nyinaa som adwuma no kɔ so hyɛ me den te sɛ nea nsɛm a ɛwɔ Yesaia 41:10, 13 nso yɛ no: “Nsuro, na me ne wo wɔ hɔ, mma wo bo nntu, na mene wo Nyankopɔn. Mehyɛ wo den, nso meboa wo, nso mede me trenee nifa mikura wo mu. Na me, [Yehowa] wo Nyankopɔn, mikura wo nifa mu; me na mise wo sɛ: Nsuro me ara mɛboa wo!”

Ɛsɛ sɛ Kristoni biara “ko gyidi ko pa no” wɔ tebea a ne nkutoo wom mu wɔ asetra mu. (1 Timoteo 6:12) Nanso ɔko no yɛ biako. Na ebia yebewie ɔko no da bi! Mpɛn pii misusuw nea ɛno bɛkyerɛ ama m’ankasa no ho bere a mekenkan Onyankopɔn bɔhyɛ a ɛwɔ Yesaia 35:5, 6 no: “Ɛno na afuraefo aniwa bebue, na asotifo aso atue; ɛno na apakye behuruw sɛ ɔforote, na mum tɛkrɛma ato dwom.”

Nya ade biako yi mu ahotoso. Sɛ Yehowa de daa nkwa hyira me wɔ ne trenee nneɛma nhyehyɛe foforo no mu a, gye ɔforote kɛse a otumi huruhuruw yiye na obetumi ahuruw asen me.