So Ɛsɛ sɛ Wɔbara Sigaretnom wɔ Wimhyɛn Mu?

Oduruyɛfo ne mmaranimfo Lee S. Glass kaa nea ɛho asɛm ka yɛ den yi ho asɛm nnansa yi wɔ Newsweek mu.

Ɔkae sɛ: “Bere a me ne adwumayɛfo a wosiesie wimhyɛn panyin bi bɔɔ sigaretnom ho nkɔmmɔ no, ɔka kyerɛɛ me sɛ ɛbɔ wimhyɛn adwuma no ka kɛse. Saa tawa pii a ɛdan nsõ no nyinaa mfi wimhyɛn no mu ara kwa. Saa wusiw no sɛe ɛho nneɛma bi te sɛ nea ɛyɛ sigaretnomfo no nipadua afã horow bi no ara pɛ, na ɛsɛ sɛ wɔsɛe sika pii na wɔde asiesie eyi.” Ɛnde dɛn nti na wimhyɛn adwuma no bɔ ka a ɛho nhia yi bere a sigaretnom a wɔbɛbara no bɛma wɔanya bere ne sika pii no? Glass ka sɛ, “Nea enti a wimhyɛn adwuma no pene so sɛ ɛbɛsɛe saa sika no ne sɛ sika a tekit a wɔtɔn ma sigaretnomfo ma wonya no dɔɔso sen sika a wɔde besie bere a wɔabara sigaretnom no.” Glass nnye asɛm yi ntom. Ɔka sɛ awiei koraa no, mmoa a nnipa a wonnom sigaret ne “ahyehyɛde biara a ɛkasa tia sigaretnom a ɛwɔ Savannah kosi San Francisco” de bɛma no bɛma wɔasan anya sika kakraa bi a wɔhwere no. Awiei koraa no, wimhyɛn adwuma no “benya sigaretnomfo a wɔrennom sigaret efisɛ ɛrenyɛ nea nkongua a sigaretnomfo tra so wɔ hɔ. Ɛno bɛma sika a wɔde siesie wimhyɛn no mu nneɛma bi no so atew kɛse efisɛ wusiw renkɔ mu. Ɛno bɛyɛ adepa a wɔayɛ a ɛbɛma ɔmanfo anya akwahosan pa ne ebia ɔkwan a ɛnyɛ tẽẽ a wɔnam so ama nnipa kakraa agyae sigaretnom.”