Nea Enti a Nkurɔfo Nom Sigaret, Nea Enti a Ɛnsɛ sɛ Wɔnom

Afrika ɔkɔm no bɛyɛɛ nea wɔkaa ho asɛm kɛse wɔ 1985 mu, nanso sigaretnom mmom na ekunkum nnipa bɛboro ɔpepem abien. Wɔkaa, ɔkɔm no ho asɛm kɛse de kanyan wiase no ma wɔpɛɛ ho biribi, nanso ɛkame ayɛ sɛ wɔante sigaretnom ho asɛm biara. Tawanom a wɔbɛma wɔagyae bɛyɛ nnubɔne so nkonim kɛse a wɔadi a ɛsen biara, nanso ntra hɔ ntwɛn sɛ ɛbɛba saa. Tumi ahorow a ano yɛ den ko tia yɛ a eyi bɛyɛ yiye no.

SIGARETNOM abɛyɛ ɔyare kɛse wɔ wiase nyinaa. Nnipa a wɔn dodow boro ɔpepepem biako nom sigaret ɔpepepepem anum afe biara. United States oduruyɛfo panyin, C. Everett Koop bɔɔ sigaretnom ho asiane no ho kɔkɔ wɔ 1964 mu. Efi ɛno akyi no, Amerikafo a wɔnom sigaret no dodow kɔɔ fam, nanso sigaret a wɔnom no dodow kɔɔ soro ɔha biara mu 20. Wɔ wiase nyinaa no, sigaretnom akɔ soro ɔha biara mu 75. Abɛyɛ ɔyare kɛse wɔ aman a wɔanya nkɔso no so na emu reyɛ den wɔ aman a afei na wɔrenya nkɔso no so. Nyarewa ahorow a sigaretnom na ɛde ba kunkum ɔpepem pii afe biara. Nnipa a wowuwu wɔ wiase nyinaa no ɔha biara mu anum fi tawanom. Nnipa a wowuwu wɔ Europa ne United States afe biara no ɔha biara mu 20 fi tawanom. Wɔ Canada no, ɛyɛ mpanyimfo a wowuwu no mu ɔha biara mu 17.

Asɛm a ɛyɛ awerɛhow wɔ eyi nyinaa mu ne nokwasɛm a ɛfa sigaretnom ho a Amanaman Nkabom no fã a ɛhwɛ akwahosan ho nsɛm so no kae no: “Ɛno ne ɔyare kɛse wɔ wiase a wobetumi asiw ano.” Enti dɛn nti na nkurɔfo kɔ so nom na wotwa so aba a ɛyɛ hu no? Enti nea enti a ɛnsɛ sɛ wɔnom no da adi pefee. Nea enti a wɔnom yɛ asɛm a emu dɔ.

Amanneɛbɔ bi a ɛfa sigaretnom ho a Worldwatch Institute a ɛwɔ Washington, D.C., de mae afe yi wɔ January mu no na ɛkaa asɛm a ɛwɔ atifi hɔ no ne pii a ɛka ho. Ɛkae sɛ: “Nnipa dodow a tawa kunkum wɔn no yɛ wɔn a Amerikafo nnuru afoforo kunkum wɔn no mmɔho 13, na ɛyɛ wɔn a wowuwui wɔ lɔre akwanhyia mu no 8.” Amerikafo dodow a ekunkum wɔn afe biara no dɔɔso sen wɔn a wowuwui wɔ Wiase Ko II mu no. Worldwatch amanneɛbɔ no kae nso sɛ: “Aban ko tia marijuana anaasɛ wii a wobedua anaasɛ tɔn a wɔbɛtɔn, nanso ɛnyɛ saa wɔ tawa a edi awu kɛse no ho.”

Dodow a nyansahufo sua ho ade no, dodow no ara na wohu sɛ tawa di awu kɛse. Afe biara komayare, akisikuru ne nyarewa a ɛtete saa kunkum nnipa bɛboro ɔpepem abien a wɔnom sigaret no. Obi a ɔnom sigaret koma yɛ adwumaden sen nea ɔnnom bi. Ne bɔ boro so mpɛn bɛyɛ awotwe kosi du simma biara awia bere ne abiɛsa kosi anum bere a wada. Nhwehwɛmu bi a wɔdaa no adi wɔ Science nsɛmma nhoma mu kae sɛ: “Sigaretnom ne ade titiriw biako a wonim sɛ ɛde akisikuru a ekunkum nnipa wɔ United States no ba, na wobu akontaa sɛ akisikuru a nnipa a tawanom na ɛde ba kunkum wɔn no yɛ ɔha biara mu 30.” Ɔha biara mu 30 no mu pii fi ahrawa mu. Wɔ South Africa no, sigaret 90 a na obi nom da biara no maa n’ani furae.

Ahofadi a Ɛkɔ Nkoayɛ Mu?

Nnɛyi ɔbea a afei de wade ne ho no renom sigaret kɛse na ɔretwa so aba pii nso. Kan no na akisikuru a ɛka nufu na ekum Amerikafommea kɛse​—mprempren de ɛyɛ akisikuru a ɛka ahrawa no. Abu abɔ ho mpɛn 5 fi 1950; ekum mmea bɛboro 38,000 afe a etwaam no. Komayare nso afi ase reka mmea. Sigaretnom pira koma no ne mogya nkwaadɔm no, na afe biara mmea 800,000 nya komayare anaasɛ wɔn fã fã dwudwo. Mmea a wɔnom sigaret a wonya menewamyare no dɔɔso sen mmarima bɛyɛ ɔpepem biako. Nneɛma ahorow a ɛwɔ sigaret wusiw mu no betumi ama mmea a wɔyem anya akisikuru wɔ wɔn awotwaa mu. So nnɛyi ɔbea ade ne ho ampa? Ahofadi a ɛde no akɔ tawa nkoayɛ mu a ebia mmarima nso ka ho?

Te sɛ nea wɔde rebrɛ ho asiane no ase no, ebinom dan fi sigaret so kɔ abua anaasɛ nea wɔfrɛ no cigar no so. Tawa a wɔde hyɛ abua mu no yɛ nea nicotine, a tar a ɛma obi nya akisikuru no pii wom na mframa bɔne a ɛwom no dɔɔso sen nea ɛwɔ sigaret mu no. Nhwehwɛmu a wɔayɛ kyerɛ sɛ mmofra pii gye di sɛ eye sen sigaret. Ɛnte saa. Akisikuru kum aberante bi a wadi mfe 19 wɔ United States afe a etwaam no. Ne maame kae wɔ baguafo bi anim sɛ ofii ase yɛɛ eyi bere a wadi mfe 12 nanso wampɛ sɛ obegyae efisɛ wɔmfaa kɔkɔbɔ biara mmɔɔ tawa a wusiw biara nnim no ho na mmirikatufo na wɔbɔ ho dawuru.

Wɔn a Wohu Afoforo Sigaretnom ho Amane

Ɛnyɛ wɔn a wɔyɛ eyi no ankasa akwahosan nko na wɔde to asiane mu na mmom afoforo nso de. Nhwehwɛmu ahorow bɛboro du a wɔyɛɛ afe a etwaam no daa no adi sɛ wɔn a wɔnnom bi a wɔhome wusiw a efi afoforo mu no betumi anya ahrawa mu akisikuru afi wɔn ahokafo a wɔyɛ saa no hɔ. Nhwehwɛmu a wɔyɛe wɔ Japan, West Germany, Greece, ne United States kyerɛ sɛ “ɛyɛ nea wɔn a wɔnom sigaret no ahokafo betumi anya ahrawa mu akisikuru asen wɔn a wɔnnom bi no.” Nhwehwɛmu bi “bu akontaa sɛ wɔn a wusiw no fa wɔn so ma wɔhome a wowuwu no dɔɔso sen wɔn a mfiridwuma ahorow mu wusiw ma wowuwu no nyinaa.” Aduruyɛ ho nsɛmma nhoma bi kae sɛ: “Dodow a obi ne sigaretnomfo atra no, dodow no ara na obetumi anya akisikuru.”

Na ɛnyɛ nea wusiw a wopuw fi wɔn anom no nko na ɛsɛe mframa a afoforo home no. Bere a etua wɔn nsa ano ne bere a wɔde ato baabi no nso wusiw no ba. Eyi yɛ wusiw a ɛsɛe mframa a ɛwɔ ɔdan a ɛte sɛɛ mu no fã kɛse. Nneɛma ahorow a enye pii wɔ saa wusiw no mu. Eyi pira wɔn a wɔnnom bi a wɔhome mframa no kɛkɛ no kɛse.

Nyarewa ahorow te sɛ ɔpakum, inflensa, menewamyare, ne ntehyewa taa ka mmofra a wɔn awofo nom sigaret no kɛse. Mmofra a wɔn nanom nom sigaret no ntaa mmɔ mmɔden wɔ sukuu papa. Nhwehwɛmu ahorow ada no adi sɛ ontumi nkenkan ade ntɛm na wɔtaa ka akyi wɔ sukuu adesua mu asram pii sen mmofra a wɔn awofonom nnom sigaret no. Ɛnanom awɔnom sigaret taa wo mma a wɔnyɛ akɛse sen wɔn a wɔnnom bi no. Wɔ India no, mmea no mu ɔha biara mu 39 di tawa. Nea ɛde ba ne mmofra a wɔwo wɔn a wɔnyɛ akɛse. Afe a etwaam July The Havard Medical School Health Letter no de n’asɛm a ɛfa asiane a ɛwɔ hɔ ma wɔn a wɔhome ne mframa ara kwa no baa awiei wɔ asɛmti yi ase “Ɔhome a Etwa To?,” na ɛkaa eyi: “Ɛsɛ sɛ mpanyimfo a wɔnom sigaret no hu sɛ bere biara a wɔbɛsɔ bi ano wɔ wɔn mma anim no ɛsɛ sɛ wohu sɛ wɔreyɛ wɔn mma no ayayade.” Ne obiara a ɔwɔ hɔ nso!

Dɛn Nti Na Nkurɔfo Fi Ase Nom?

Esiane eyi nyinaa nti, dɛn nti na nkurɔfo fi ase nom? Wɔn a wofi ase yɛ saa mprempren no mu pii yɛ mmofra. Wɔn nti na wɔbɔ ho dawuru no, ɛwom sɛ adwumayɛkuw no ka sɛ ɛnte saa de. Adwumayɛkuw ahorow yi nka mmofra ho asɛm pii, nanso wɔfa anifere kwan so ma ɛyɛ yiye. Sɛnea wɔkae wɔ wɔn dawurubɔ ahorow no ho no: “Yɛn tawa adwumayɛkuw no mpɛ sɛ mo mmofra yi bɛnom sigaret gye sɛ mopɛ sɛ moyɛ sɛ mpanyimfo.” Dawuru ahorow a wɔbɔ no yɛ nea wɔde daadaa mmofra: kar a ɛyɛ fɛ, mmirikatufo, mmarima ne mmea a wɔn ho yɛ fɛ​—a wɔn nyinaa yɛ nnipa a wɔn ani agye. Nea anka ɛfata sɛ wɔde bɔ ho dawuru ne ayaresabea ne amusie​—nanso ɛno remma wɔntɔ sigaret no.

Ɛhaw Mariel Hemingway a ɔyɛ obi a mmofra pii pɛ n’asɛm no bere a ohu mmofra a wɔnom sigaret no. Ɔkae sɛ: “Migye di sɛ ɛyɛ atuatew adeyɛ a nyansa nnim. Bere biara a mehu mmofra a wɔrenom sigaret no, ɛhaw me na meka sɛ, ‘Dɛn nti na monom sigaret? Moanyin wɔ wiase a wɔama moahu sɛ edi awu mu!’” Nanso nom a wobɛnom sigaret no kyerɛ sɛ woka nnipa a wɔaba so no ho. Mmofra nom sigaret a, wɔte nka sɛ wɔade wɔn ho, bere a nokwasɛm no ne sɛ wɔrepene nhyɛso a efi wɔn mfɛfo hɔ no so no. Tawa adwumayɛkuw ahorow no nso redaadaa wɔn. Wonim sɛ wɔn adwuma no daakye gyina mmofra yi so. Sɛ wotumi ma ne nom no ka mmofra a wɔte sɛɛ hɔ a, wɔbɛba abɛyɛ nnipa a wɔbɛnom wɔn nkwa nna nyinaa.

Wɔabara sigaret ho dawuru a wɔbɔ wɔ television ne radio so no dedaw wɔ United States nanso wɔ December a etwaam no mu no, Amerikafo nnuruyɛfo kuw no hyɛɛ mmara no mu den ma “ɛkaa ɛho dawuru a wɔbɔ wɔ nsɛmma nhoma ne nea ɛtete saa mu nso.” Nanso tawa adwumayɛkuw ahorow no ne wɔn a wɔbɔ ho dawuru no fii ase kasa tiaa eyi. Esiane sɛ wɔantumi amfa anoyi bi amma wɔ akwahosan, mmofra, ka a ɛka obi hɔ, no ho nti, afei akuw ahorow no hwehwɛ anoyi foforo: hokwan a wɔne wɔn a wɔnom no wɔ. Sɛ nhwɛso no, PhilipMorris ka sɛ: “Ɛnnɛ, ebia wɔrennya sigaret a menom no ho koma. Ebia ɔkyena nso ɛbɛyɛ hokwan a obi wɔ sɛ ɔbɔ mpae anaasɛ ɔpaw baabi a ɔbɛtra.” Hokwan a ɛho hia wɔn wɔ ha no yɛ “hokwan” a wobenya de apɛ sika.

Dɛn Nti na Ne Gyae Yɛ Den Saa?

Nicotine wɔ tawa mu. Nicotine yɛ aduru. Etumi ma obi bow. Ɛde obi yɛ akoa nso. Sigaret adwumayɛkuw ahorow no ka sɛ eyi nte saa, nanso United States oduruyɛfo panyin, Dr. Koop twe adwene si nea Dr. William Pollin a ɔyɛ asoɛe a ɛhwɛ nnuru a wɔde di dwuma wɔ ɔkwammɔne so ho nsɛm so panyin no kae no so sɛ “nicotine yɛ aduru a ɛde obi yɛ akoa sen biara wɔ yɛn man yi mu.”

Nicotine no de ɔpepem pii ayɛ nkoa. Kakraa bi na wobegye atom. Asɛm a wɔtaa ka de yi wɔn ho ano ne sɛ, ‘Sɛ mepɛ sɛ migyae a, metumi ayɛ saa bere biara a mepɛ.’ Sɛ enya de woyɛ akoa a, ɛyɛ den sɛ wubetumi ade wo ho. Ɔpepem pii bɔ mmɔden sɛ wɔbɛde wɔn ho, pii tumi yɛ saa, nanso wɔn a wontumi na ɛdɔɔso. Wɔ nhwehwɛmu bi a wɔyɛe wɔ tawa ne akwahosan ho December a etwaam no mu no, Amerikafo oduruyɛfo panyin no bɔɔ amanneɛ wɔ 1980 mu nhwehwɛmu bi a ɛdaa adi wom sɛ Amerikafo a wɔnom sigaret no ɔha biara mu 60 bɔ mmɔden sɛ wobegyae nom no ho. Wɔn a wɔyɛɛ saa no ɔha biara mu 80 san tu guu mu wɔ afe biako ntam.

Sɛ́ wubegyae no nyɛ mmerɛw, nanso mmɔden biara a wobɛbɔ wɔ ho no fata. Enti bɔ mmɔden. Gyae, esiane w’ankasa akwahosan, ne wɔ mma de nti. Afei nso esiane wɔn a wɔne wo bɔ no akwahosan nti. Nea etwa to yi yɛ nea ɛho hia, sɛ ɛyɛ nea wugye di sɛ woyɛ Kristoni a. Ɛsɛ sɛ wodɔ wo yɔnko. Ɛrenyɛ nea ɛkyerɛ ɔdɔ sɛ wode wusiw a enye bɛsɛe mframa a ɔhome no. (Mateo 7:12; 22:39) Ɛno nti na wɔn a wɔnom tawa a wɔba bɛyɛ Yehowa Adansefo no gyae no, na Adansefo a na anka bere bi wɔtɔn tawa ho nneɛma no nso nyɛ saa bio.

Ɔkwan a ɛyɛ mmerɛw biara nni hɔ a wɔfa so gyae. Sɛ wonom sigaret a, woyɛ obi a ɔnom nnubɔne a nicotine a ɛwɔ ne nipadua mu no dɔɔso. Wɔn a woatumi agyae no nim sɛ eyi nyɛ mmerɛw. Nanso nyarewa ne owu mpempem pii a ɛka ho a ɛba afe biara no yɛ nea enti a ɛsɛ sɛ ɛma wugyae. Nanso wɔ wɔn mu pii fam no, eyi ano nyɛ den te sɛ tumi a ɛhyɛ wɔn ma wɔnom no. Nhwehwɛmu a nyansahufo ayɛ nnansa yi kyerɛ sɛ nicotine a ɛkɔ nipadua no mu te sɛ nnubɔne afoforo a ano yɛ den no. Nicotine “wɔ nneɛma ahorow a ɛwɔ nnuru a ɛde obi yɛ akoa no bi, na nhwehwɛmu ahorow a woayɛ kyerɛ sɛ etumi ka amemene no dwumadi, etumi ka sɛnea obi yɛ n’ade.”

Bere a womaa sigaretnomfo aduru bi ma wɔnomee no, nicotine a efii asaabo no mu bae no buu bɔɔ ho mpɛn asia. Eyi ma wɔsan nom sigaret no kɛse sɛnea ɛbɛyɛ a wɔbɛsan anya nicotine a wɔn nipadua no pɛ no.

Ɔkwan a eye bɛn na wobetumi afa so agyae tawanom? Asɛm a efi February 1986 Health nsɛmma nhoma mu no da nnipa pii adwene adi: “Mmɔden a obi a ɔnom sigaret bɛbɔ nkutoo ne ade ɛ ebetumi agye no.” “Aduru biara nni hɔ a ebetumi ama wɔagyae nom anaasɛ ɛbɛma woatwe wo ho afi ho.” “Nkurɔfo gyae nom da biara​—a wɔn a nicotine dɛ wɔn ayɛ nkoa mpo ka ho.” “Sɛ wugyae prɛko pɛ a, ɛrenkum wo, na ɛno ne ɔkwan pa a wubetumi afa so agyae.” “Afotu a ne gyae ho abenfo de ma ne sɛ wobɛbɔ mmɔden agyae prɛko pɛ: Gyae no prɛko pɛ na tow ɛbo nneɛma nyinaa gu. Sɛ ne nom ho akɔnnɔ no ba a, kotu mpase, kotu mmirika, koguare nsuɔhyew, kodi gua, anaasɛ yɛ biribi foforo biara!”

Sɛ wonom sigaret na wopɛ sɛ wugyae a, tie osuahu ahorow a wɔde ama yi. Sɛ ɛnnɔɔso a, tie Yesu Kristo afotu a ɛho hia kɛse no, sɛ: “Dɔ wo yɔnko sɛ wo ho!” (Mateo 22:39) Esiane ɔdɔ a wowɔ ma wo ho ne dɔ a wodɔ wo yɔnko sɛ wo ho nti, gyae

[Box on page 15]

Journal of the American Medical Association no samufo asɛm bi kaa nea edi so yi faa Tawanom ho:

“Sɛ́ ɔman no, yennya nhuu aniberesɛm a tawa ho asiane no yɛ. Ɛsɛ sɛ yehu sɛ tawa yɛ awuduru a ɛde nnipa ayɛ nkoa wɔ United States nnɛ, ne sɛ nnipa dodow a akunkum wɔn ne sika dodow a wɔsɛe wɔ ho no sen nea wɔsɛe wɔ nnubɔne afoforo, AIDS (ɔyare a nipadua no ntumi nko ntia, lɔre akwanhyia awudi, ne nsɛmmɔnedi afoforo no nyinaa a wɔaka abom ho.”

Bere a atwe adwene asi dɔla ɔpepepem biako a wɔsɛe afe biara wɔ akisikuru bo akodi ho so akyi no, ɛka sɛ: “Nea wobu ani gu so ne nea ɛde akisikuru ba no a wɔbɛko atia. . . . Mprempren wobu akontaa sɛ tawa kum nnipa a wɔwɔ ɔman yi mu no 1,000 da biara.”

Wɔ ɔko a wɔde tia tawanom ne akisikuru a ɛde ba no mu no, Samufo asɛm no kamfo kyerɛ sɛ: “Nea wobetumi de ayɛ wɔn botae ne sɛ wɔbɛma wɔatua tawa biara a wɔtɔn no ho tow a ɛte sɛ ka a ɔman no bɔ wɔ tawanom ho no ara pɛ. Sɛ ka a ɔman no ne yɛn nyinaa bɔ wɔ sigaret adaka biako biara ho no boro $2.60 a, ɛnde na ɛsɛ sɛ wɔn a wɔpɛ sɛ wɔnom no tua ho ka no. . . . Ɛsɛ sɛ wɔhwehwɛ ɔkwan a wobetumi afa so atew tawa a wodua no so. . . . Ɛsɛ sɛ wɔde kɔkɔbɔ tare biribiara a wɔde tawa yɛ no ho. . . . Ɛsɛ sɛ woyi tawa ho dawurubɔ nyinaa fi nsɛm ho amanneɛbɔ mu.”

Samufo asɛm no de ba awiei sɛ: “Migye di sɛ bere adu sɛ yehu no pefee na yenya akokoduru. Yɛahu nsonsonoe a ɛdam. Ɛdɔn no rebɔ.”​—JAMA, April 11, 1986.

[Kratafa 13 mfoni]

WƆN AWOWU WƆ EUROPA/U.S. MU 20% FI SIGARETNOM

WƆN A WOWU WƆ CANADA MU 17% FI SIGARETNOM

WƆN A WOWU WƆ WIASE 5% FI SIGARETNOM

[Kratafa 14 mfoni]

Sigaretnomfo a nicotine de wɔn agu afiase ma afoforo a wɔnnnom bi hu amane